Post: #1
Title: أقعوا اللايوق البسند الطايوق
Author: محمد بشير عبادى
Date: 03-01-2018, 05:56 PM
04:56 PM March, 01 2018 سودانيز اون لاين
محمد بشير عبادى-السودان/ولاية الخرطوم/أمبدة
مكتبتى
رابط مختصر
الإعلامي فيصل القاسم دعا في صفحته لتجنب أكل الخبز الأبيض ﻷنه سم يضر بالجسم لخلوه من مواد تتسبب في هشاشة وقصر العظام.. ويعلل القاسم تقزم الشباب وخاصة الفتيات بعد أن كانوا طوالا في الماضي لاتخاذهم الخبز الابيض كغذاء رئيس وفي أوروبا وغيرها من البلدان محرم تناول الخبز الأبيض..نحن في السودان عرفنا الخبز الأبيض مع دخول الإستعمار وانتشرت ثقافة تناول الخبز الأبيض بعد قبول نظام الفريق عبود للمعونة الأمريكية التي كانت طعما لبداية التدخل الأمريكي في الشأن السوداني ..فبعد أن استطعم السودانيين القمح الأمريكي صارت أمريكا تبتز السودان يإيقاف شحنات القمح وذلك لتطويع الدولة ومن ثم قيادها... تطور هذا الامر ليشمل وقف شركة شيفرون الامريكية لعمليات البترول في السودان ثم تطورللمقاطعة المشهورة التي إمتدت لعقدين من الزمان..يجب الرجوع للكسرة وملاح (اللايوق البسند الطايوق).. الذرة غنية بالفيتامينات وتتناسب مع طقس السودان زراعة وأكلا وغذاءا مفيدا للجسم بدلا عن الخبز الأبيض بسمومه والذي منع حتى في بلاده..فلتتوسع الدولة في زراعة الذرة وتطوير صناعة الكسرة وتوفيرها بأرخص ثمن فهي الأشهى والأقيم غذائيا..مادايرين دقيق فينا عيشنا كتير بكفينا.
|
Post: #2
Title: Re: أقعوا اللايوق البسند الطايوق
Author: Mahamed Eltaze
Date: 03-01-2018, 06:46 PM
Parent: #1
هلا محمد
مادايرين دقيق فينا عيشنا كتير بكفينا
بعد الناس اتعلمت اكل الهوت دوج ترجع لي الكسرة ياراجل
قول خليناها اها شغل دول الاستعمار والاستكبار الامريكي دا بينزل وله رجس من عمل الشيطان
قول رجس من عمل الشيطان اها العيش بتاعتنا دقيقه محلي وله مستورد
قول محلي زارعنو برانا التقاوي فاسدة وله كويسة
اها قول كويسه الجبايات في وله مافي
اها اواصل وله كفايه
|
Post: #3
Title: Re: أقعوا اللايوق البسند الطايوق
Author: محمد بشير عبادى
Date: 03-01-2018, 07:32 PM
Parent: #1
يا محمد التازي نحن عايزين كسرتنا بتاعة الفتريتة دي لا سماد ولا مبيدات ده كله شغل خواجات خلوها لينا من المسلمات وبقينا نحن ندافع عن تقليعاتهم من هوت دوق ووو..اسي في احلى من شية الضان الحمري..عندنا ارض بكرة وحيوان معافى ليه الاستيراد..ده ترسيخ لصورة ذهنية لمتتجات الخواجات عبر الدعاية ..جودوا منتجاتكم وروجوا ليها وبلاش كل شي رامنو في الحكومة دي مسؤولية دولة بحكامها ةمحكوميها
|
Post: #4
Title: Re: أقعوا اللايوق البسند الطايوق
Author: Mahamed Eltaze
Date: 03-01-2018, 08:24 PM
Parent: #3
وبلاش كل شي رامنو في الحكومة دي مسؤولية دولة بحكامها ةمحكوميها
للاسف الشديد المحكومين ماعندهم فيها اي شي دي مسولية دولة لمن تقفل
مشروعات منتجة عشان تستورد لمن يكون تكلفة انتاجك اغلي من انك تشتري من السوق وانت صاحب المصنع يبقي سياسة دولة لمن تبور الارض عشان تستورد من بره تبقي سياسة دولة لمن تدخل السلع معفية من الجمارك والضرائب والزكاة بتضرب الانتاج المحلي وبتدمروا لمن تصدر اناث المواشي و البذور و تصدر الهشاب والطلح انت بتدمر مستقبل امة
لمن تغير سياستك الاقتصادية تعال قول محكوم لكن لحد اسي انت شغال بتدمر في البلد بسياستك الخاتيها
ملحوظة الراجحي زارع كم فدان قمح قولته لي
القمح بتاع الراجحي دا مابنفع عيش ابيض
|
Post: #5
Title: Re: أقعوا اللايوق البسند الطايوق
Author: Nasr
Date: 03-01-2018, 09:08 PM
Parent: #4
نصيحتن تخضرك يا محمد التازي
"لمن يكون تكلفة انتاجك اغلي من انك تشتري من السوق وانت صاحب المصنع يبقي سياسة دولة
لمن تبور الارض عشان تستورد من بره تبقي سياسة دولة لمن تدخل السلع معفية من الجمارك والضرائب والزكاة
بتضرب الانتاج المحلي وبتدمروا لمن تصدر اناث المواشي و البذور و تصدر الهشاب والطلح انت بتدمر مستقبل امة "
وطوالي راعي البوست عمل رايح
|
|