شن المعني؟ مسدار طارق اللمين

11:45 AM February, 12 2018

سودانيز اون لاين
Yasir Elsharif-Germany
مكتبتى
رابط مختصر

شن المعني؟


02-12-2018 02:34 AM
(طارق اللمين)
وشن المعني شيل علان ورجعة قوش
وتبديل العناقريب جوه بطن الحوش
الوضع الملخبت مابتحلو وشوش
متين بدل الرغيفه نفعنا ماكنتوش
،،،،،،،،،،،،
شن الفرق بين حميده والمتعافي
وبين لعب الكراسي الفي المقابر لافي
العيان وكت كاس العلاج الشافي
شن فايده رجاهو مع الحكيم المافي
،،،،،،،،،،،،
تغيير لاعبين وللكوره باقي دقيقه
وموية المعلقه القايلين بتطفي حريقه
حريقه تخمكم في النار وتبقو سليقه
دمرتو البلد راح في الضلمه طريقا
،،،،،،،،،،،
شن المعني والكيزان جميع همباته
الساقو البلد دربا نهايتو مماتا
الجثمان ممدد وسرقو لي نعلاتا
وراجين كالكلاب ميراثا بعد وفاتا
،،،،،،،،،،،،،
البلد. البقت كيزانا سبب. ٱفاتا
يلهطو دون خجل مال النبي وخيراتا
يتمو كم صبي و سحلوها ذلو بناتا
صبحت زي جهنم ، اخير جهنم زاتا
،،،،،،،،،،،،،
البلد انتهت وصبح اللصوص حكاما
ولسه يجعجعو الجوكيه في إعلاما
شلة مرتشين باعت كمان اقلاما
ياويل اللصوص لمن تتمو كلاما
،،،،،،،،،،
تعين قوش
تجيب زفتون
دا تحصيل حاصل
شن ينفع تلعلع
وبنطلونك ناصل
الثوره ابتدت
فاصل نقيف ونواصل
لا بحلك فريق
لا كتيبه من الحاصل
،،،،،،،،،،
تعيين وزرا
دا ما زاتو الكلام الفاضي
زمنك ولي
والشعب العظيم ماراضي
حيران يارزل
كحيان وكيسك فاضي
تقول لي قوش ؟
دا مش قوش الرماهو القاضي
في سجنك ذليل؟
كيفن ترجعو قاضي؟
افلست وخلاص
داير تعيد الماضي
والله الحنك
يابشه اصبح عاضي

،،،،،،،،،

طارق اللمين
11 فبراير 2018

قوش عندو تار مع كتيرين، أولهم البشير نفسه..