الواحد من هسة يمشي يشوف ليهو دبدوب احمر بكون رخيس والناس لسة ما كابستو وكرت معايدة فيهو زهور بنفسجية بنفسجة للقلب ويدقش موقع ادب يفتش فاروق جويدة يلقط ليهو كم بيت كدة حارات وملهلبات واشتري قلم احمر وما تقول كمان انا خطاط خط . كنت بكتب جريدة حائطية براي ارش ليك الابيات بخط محبين آي الخط زاتو انواع في خط رسمي كدة بتاع نبلغكم بوفاة فلان ما دة ياخ خط زاتو يرقص طربا
مافي زول يجي يقول لي الحب في زمن العيشة ام جنية ولا الحب في زمن الايدز دايرين نعيش يوم انصرافي جدا انصرافي تعود للواقع والله احب جنس حب اسكتو ساي كل مرة ناسيهو
لكن خاشي في جدلية فنية جدا هل افلتن مع ام العيال واجيب ليهم كيلو سيقا وازيد اللبن ؟ نعمل لقيمات وشاي بي لبن ولا ابحت الحنان الكان زمان ونقنب نفلتن وهل الفلتنة مع ام العيال تعتبر عيد ولا توسعة معيشة ساي ممكن اشتري ليها شبشب اهو اصلا قالت دايرة شبشب يبقا الغرض في الغرض
زمنا ما كان اخترعوهو لسة بي الله تسلم علي ميتين نفر قاعدين في الشارع ما يسمعوك ولا يشوفوك تجي ماشي مع بت تاني يوم البلاقيك كلو يقول ليك شايفك امبارح ومعاها غمزة عين
تعرفي يا معاوية عندنا واحد كان بسكر زمان .. يسكر سكر شديد لامن ينقلب قرد مرتو بتجي تشتكي لي اخوانو بقومو يعملو ليهو مجلس سري ! غدا يوم الجمعة في بيت واحد منهم كلهم بجو بعد الغدا بخشو الصالون وبنادوهو بجي خاشي وبقعد في السرير بتكون في صنة صغيرة حقت من يبتدر النقاش بقوم هو بنضم اول زول والله يا جماعة السكر دة حرام وعيب .. وبنقص الراجل .. وبخليهم يقصر في واجب بيتو .. وانا زاتي بقيت لو شميت الفلة ساي اسكر وقررت اخليهو من اليوم . وتاني ان شاء الله لو زول سكران ما اقعد معاهو ثم يصمت ويصمتون يقوم يقول ليهم اها ان شاء الله خير لميتونا كدة .. لو مافي موضوع لاحق اجيب الغنم من السرحة ويمرق يحصل مغرب الجمعة مع الجماعة
مرحب حفيظ وبقية الإنصرافيين. أول شي .... حيعلنوا عليكم الجهاد .... لأنو عيد الحب ده ما داخل في أعياد الله. بعدين هو ذاتو ما (عيد الحب) .... حسب الترجمة من كلام الخواجات مفروض يكون (يوم الحب).
قبل كم سنة، وكعادة أئمة المساجد، قبل يوم 14 فبراير، بيمارسوا هوايتهم في تذكير الناس بيوم الحب. الإمام بتاعنا في خطبة الجمعة جاب ليهو كلام لحدي هسي محيرني ..... قال ودون أن يرمش له جفن: إن مبتدعي هذا العيد يمارسوا التفسّخ لدرجة أن يقوموا بتبادل الزوجات، فيعاشر كل واحد زوجة الآخر. ........ الناس ديل بيجيبوا الثقة دي كلها من وين؟
ليس هناك حكاية حقيقية ثابتة عن هذا القديس حتى الآن، فحكايته تختلف من منطقة إلى أُخرى، لكن الحكاية الأقرب بأن فالنتين كان كاهن مسيحي وكان يزوج العشاق المسيحيين فيما بينهم حيث كان سر الزواج في المسيحية موجود في ذلك الوقت، وبسبب أن المسيحية كانت ممنوعة في الإمبراطورية الرومانية فقد كان يعاقب على كُل من يمارس أحد أسرار الكنيسة، وبسبب ذلك إعتقلته السلطات الرومانية وحكمت عليه بالإعدام، فاشتهر منذ ذلك الوقت بأنه شهيد الحب والعشاق لأنه ضحى بحياته لأجل سر الزواج، تحتفل الكنيسة الكاثوليكية مع بعض الكنائس البروتستانتية بذكراه في يوم 14 فبراير بينما تحتفل الكنائس الآرذثوكسية بذكراه في يوم 30 يوليو.[1] منقول
سلام ود أبوسن لكن خاشي في جدلية فنية جدا هل افلتن مع ام العيال واجيب ليهم كيلو سيقا وازيد اللبن ؟ نعمل لقيمات وشاي بي لبن ولا ابحت الحنان الكان زمان ونقنب نفلتن وهل الفلتنة مع ام العيال تعتبر عيد ولا توسعة معيشة ساي ممكن اشتري ليها شبشب اهو اصلا قالت دايرة شبشب يبقا الغرض في الغرض عليك الله كدي وريني ليه الفلتنا مع أم عيل تكون دقيق سيقا ولبن بدرة والفلتنا مع الحنان الكان تكون دبدوب أحمر وقلوب بنفسجية وغرويد عيون؟
اتا محبط يا ابو الريش ومصيت طاقة الحب الجواي ياخ جيت اغني قبليني مرة في كل عام مبسوط اربعة وعشرين قيراط ادوبي واطنبر نحنو نتحين الفرص للفرح حتي لو بيت بكا
عيد الحب هو اليوم الاربعاء الموافق ١٤ فبراير... واحسن شئ تعمله يا ود ابو سن للاحتفال بعيد الحب مع العيال وام العيال انكم تتلموا في الحوش الكبير في بيتكم وتجيب ليك جردل لقيمات وترامس شاي باللبن ، وكمان اشتري ٤٠ رغيفة ، وهو كله بدولار واحد بس، وتختهم في صينية قدام الباب للفقراء والمساكين، بس كمان ما تنسى تكلمنا ليه بالذات اختاروا اليوم ده لعيد الحب... مع وافر التقدير والاحترام وهابي فلانتين day...
Post: #31 Title: Re: هابي فلنتاين داي Author: علي عبدالوهاب عثمان Date: 02-14-2018, 04:57 PM Parent: #30
حبيبنا أبوسن .. مع التحية دار الافتاء في مصر أصدر إفتاء بجواز الاحتفال بعيد الحب ولا يوجد اي مانع شرعي في ذلك
اذا كان كلامك صحيح وناس الأمر بالمعروف بيوزعوا في الزهور فمعنى كده محمد بن سلمان انتصر ....وهو الذي سينقل السعودية إلى عهد جديد... مع وافر التقدير
Post: #38 Title: Re: هابي فلنتاين داي Author: محمد البشرى الخضر Date: 02-15-2018, 05:25 AM Parent: #35
ماسورة يا ابو الريش, الصور قديمة وفي عيد الفطر و ليست ورود فقط معاها هدايا وكدا لكن اولاد الحلال جابوها مع فتوى الشيخ الأخيرة عن عدم حرمة عيد الحب نظام حركات مناضلين وكدا
Post: #37 Title: Re: هابي فلنتاين داي Author: الطيب عباس Date: 02-15-2018, 05:18 AM Parent: #1
ياعمك
Quote:
آخر تحديث: الأربعاء 29 جمادي الأول 1439هـ - 14 فبراير 2018م KSA 20:05 - GMT 17:05
الغامدي: عيد الحب مناسبة اجتماعية.. ولا حرج شرعاً
الأربعاء 29 جمادي الأول 1439هـ - 14 فبراير 2018م
الشيخ أحمد قاسم الغامدي رابط مختصر
العربية.نت - نادية الفواز
اعتبر الباحث الشرعي أحمد قاسم الغامدي، مدير عام هيئة الأمر بالمعروف والنهي عن المنكر بمنطقة مكة المكرمة "سابقا"، أن الاحتفال بيوم الحب مناسبة اجتماعية إيجابية لا ترتبط بالدين.
وأكد لـ"العربية.نت" أن الاحتفال بيوم الأم أو يوم المعلم أو اليوم الوطني أو يوم ميلاد المرء أو زواجه يعزز تلك الرابطة الإنسانية، وهو أمر إنساني اجتماعي، والتهنئة به لا حرج فيها شرعا. وقال إن الكلام الحسن مطلوب بين الناس، سواءً كانوا مسلمين أو غيرهم من اليهود والنصارى غير المحاربين، فيعاملون معاملة البر المشروع، وزيارتهم وتهنئتهم وتبادل الهدايا معهم مشروعة، وتحفز السلوك الإيجابي في التواصل بين الناس، كما تحفز عاطفة خلقها الله تعالى في الناس، حيث زار الرسول صلى الله عليه وسلم جاره اليهودي، وقبل صلى الله عليه وسلم هدايا الكفار، وعملا بقوله تعالى: "وقولوا للناس حسناً".
وأوضح أن معارضي الاحتفال بيوم الحب لربطهم له بالدين، فالإسلام جاء وأبطل أعياد الجاهلية، وشرع عيدين هما عيد الفطر والأضحى فيهما صلاة وذكر وعبادة، وليس الأمر كذلك في الاحتفال والفرح بالأمور الإنسانية الاجتماعية، مستبعدا أنها أعياد دينية حتى يقال إنها تتعارض مع الإسلام، ويشرع فيها الاحتفال والفرح بمثل ما يكون فرحا بيوم زواج أو تخرج، فهي ليست محظورة، لكونها تدخل السرور إلى قلب المسلم، وهي أمور مشروعة ومستحبة حتى وإن كان منشأها من غير المسلمين، ما دامت بعيدة عن التعبدية، مبينا أن المعارضين يستدلون بحديث "من عمل عملا ليس عليه أمرنا"، وهذا الاستدلال غير صحيح، لأن المقصود في الحديث هي الأمور الدينية وليست الاجتماعية أو الوطنية، بل هي مناسبات تحفز العاطفة في سلوك الناس وقلوبهم، فإنه ينمي الإيجابية والتواصل وأواصر المحبة بين الأقارب والأزواج والأبناء والآباء والأمهات، وهي قضية نافعة للإنسان وليست مخالفة للدين، مشيراً إلى أن الاحتفال بعيد الحب يحفز الروابط وينميها ويقويها في سلوك الناس، ويدفع ما كان عكسها من القطيعة والبعد والكراهية والجفاء والجفاف.
وقال الغامدي "يجوز تهنئة اليهود والنصارى بأعيادهم الوطنية والاجتماعية بما فيها عيد الحب، وردّ السلام عليهم والتحية وتبادل الورود الحمراء وغيرها، طالما أنه ليس فيها دلالات تخالف الإسلام أو أحكامه من باب الإقساط والبر المأذون فيه شرعاً الذي أقره الله عز وجل، موضحاً أن ذلك ليست له علاقة بالموالاة وموافقتهم في عقائدهم، بل يندرج تحت مظلة المعاملة الحسنة مع الكافر المسالم وليس العدو المحارب، فالكافر المسالم لا يَمنع كفره من البر به، فهو لم يؤذِنا ولم يحاربنا، وليس من الحق محاربته، وهذه من المعاملات في السلم لا علاقة لها بالموالاة لهم
Post: #39 Title: Re: هابي فلنتاين داي Author: MOHAMMED ELSHEIKH Date: 02-15-2018, 06:07 AM Parent: #37
يوه كده قلوب تنبض💕 ياخ كل سنة انت والمدام طيبين *********************
اهو الفوق دا توجيه واضح بالفلتة مع ام العيال.
لكن قصة زولكم البيسكر دا والمجلس العملوه ليهو زكرني حكاية مجلس أيضا تم في القرية.
مجموعة من الشباب في الحلة اليوم داك سكروا وفي خفلة العرس حتوه قرض وسارت الركبان تاني يوم بالحكاية. اباءنا الكبار سمعو بالخكاية وقرروا عمل مجلس للجماعة ديل وفعلا تم الأستدعاء بعد صلاة المغرب في حوش عمنا ابراهيم ود ابراهيم. من المغرب الجماعة يشكوا في الرتاين ويجهزوا في السراير والمراتب والكراسي داخل الحوش. والبنوت من العصر رشن الحوش وكنسنو. والحاجات جوة يظبطن في شاي المغرب والجبنات. والعوين(عندنا تعني الشفع" بي برة يتحاومو حول المنطقة والحمير مربوطة في الزريبة بي برة والحالة حال.
اها تم ادخال المتهمين الرئيسيين (عدده 3) حيث تمت اسرع محاكمة في التاريخ. بعد وصول الجماعة قام عمك ابراهيم وبدون اي مقدمات او افتتاحية دخل مخزنو وجاء مارق شايل البندقية ابو عشرة معلقها في كتفوا وخاطل الحضور قائلا: " شوفوا . علي الطلاق بالتلاتة تاني البنسمع بو سوا جنس العمل دا فيكم , طلاق التلاتة غير اب عشرة دا ماعندنا ليكم شيء" وانتهى الاجتماع والجلسة على كدى وكل زول فرتك على جيهة
Post: #40 Title: Re: هابي فلنتاين داي Author: أحمد محمد عمر Date: 02-15-2018, 06:13 AM Parent: #37
Quote: #كشك_الوقفة دبدوب العيد يجب علي. العاشق الجدجد و عندو شريحتين.وكريم شعر وبنطلونو كباية وفنيلتو برتقالية كما يجب على الراسطات ايضا. ويجب أن يكون الدبدوب احمر واضنينو كبار وما بتشال في شنطة اليد. وما مقطوع من حتة. وجلدو ناعم. ومشتريهو . من حر مالك وما دون ذلك بيعتبر .كرامة ساااااكت. وفرحة عيد. يجوز دبدوب العيد بالاقساط للموظفين. بالنسبة لمحدودي الدخل في دباديب بالكيلو في شارع الهوا. جبرة. للمقتدرين في دباديب تني وجضع في العمارات والرياض. ووحدات جامبو في مول الواحة. والمابقدر اشتري أحب أقول ليهو عمك فلنتاين قام بالواجب عنكم زماااااانك. واشتري واحد بالنيابة عنكم . البسو. احمر بس. أما موضوع شربوت الفلنتاين.صراحة ما بقدر أفتى فيهو.
عمر الحاج فني فلنتاين سوداني
Quote: #كشك_زماااااانك #مقارنات# زماااااااااااااااانك قبل (القفص) الذهبي .. يوم 13 فبراير اللي هو يوم التيسوعة بتاعت الفلنتاين.. بكون في زي حلاقة ومراجعة هندام (قميص جديد تي شيرت ) واضعف الايمان ريحة تركيب. بالاضافة الي قيام الليل (بالتلفون مع الجكس). والكلام ده كلو دبدوبك جمبك . و (دبدوبي لاقيتو بي بسمة حييتو). بعدين لازم يكون في لون احمر في القشرة إنشاء الله المنديل . و بكون في زي سهر كده ومرات تقرب تفكر انك تخبز للعيد او تشتري ملاية جديدة. اما يوم العيد فبكون في نوع قشرة كده (فلنتاين زاتوو ما قشره) وفي ناس مفتحين ما بشترو الدبدوب يوم الوقفة بشتروهو يوم العيد الصباح كتكتيك بتاع مفتحين. والاسعار بتكون متهاودة وممكن عادي تلقي دبدوب جضع ولا تني بي رماد وشو. ولو عندك بتاع مكتبة صاحبك ممكن تشتري دبدوب بالاقساط . وبعد كمين تلفون كده بتاخد حبيبيتك وتشيل دبدوبك ووردتك وتبقي زول حدايق وسندوتشات من الصباح بتجي مترواح المغارب (زي راعي الحلة). #عيد الحب الان# يوم 13 فبراير بعد دخولنا (القفص) بكون مطلوب منك قروش تسجيل البت في الروضة . القصد بتاع (فرن الكهرباء) باقي قروش الصندوق وأشياء اخري مفيدة ويوم عيد الحب المساء بتكون مشحوط في جاكسون وبعد ده بتجيك رسائل قصيرة ممتعة زي (انت وين ومالك اتاخرت جيب معاك عيش) وبعداك بترجع البيت بتكون شايل بامبرس وفول بجنهين.ومستغرب في الناس اللابسين هدوم حمراء ديل مالم ولا الحاصل شنو. عمر الحاج باحث ومقارن سوداني.
المنشور الأخير دة مرفقه معاهو صورته بورّق في خدرة ما داير اجيبها هنا أمشوا شوفوها براكم facebook.com/omar.ahmed.7315720
كلكم سلام جاكم بي ربطة المعلم وسلام مخسوس وخاسي جدا مليان ود ومحبة لي التلاتة حبات زي حبات العقد الكلو فالصو الا فيهو تلاتة ماسات .. هسة ابو حسين يقراها الماظة قال ليك ما بعرف يومو يومو داير بيهو شنو انا بحب بس بعرف الحب وقردنة القلب لامن يفر كعصفور بلله نقيط المطر وبعد داك يا ودو والطيب هو قال ليك راجين فتوى عشان نحب يمين الله نحب حب لامن نبقا بروة ساعة تسمع اسمو قلبك يسوي الرب الرب الرب وااااا كتلتني وقعدت ام عيون كحيلة يا احمد انا اتأبط قلم رصاص واستيكة للوليد وعشرة عيشات وسلطة وخدرا . اخش البيت واحرد الغدا افتح الواتس وحبيبتي الزمان قاعدة اقعد احب فيها وتحب فيني ارسل ليها قلب احمر شاقيهو سهم ترسل لي خشم فيهو بوسة نقعد نحب كدة ولامن ام العيال تجي مارة افتح موقع كلو رطانة خواجات .. تعاين لي بالدس وتقول بس واقول ليها محمد معانا ما تغشانا ونقنب نحب انا اقنت وحبيبتي تقنت وناس الواتس ما قصر معانا باقي ليهم يجيبو لينا رسمة كية كية مغرزة الحب حلو ياخ والحب انا ما بديتو
Post: #42 Title: Re: هابي فلنتاين داي Author: أحمد محمد عمر Date: 02-15-2018, 07:36 AM Parent: #41
صحبي قال لي يا احمد خير المتع ما كانت من ورا حجاب 😤😤😤😤 تقول لي ام عيالك بحبك تقول ليك لو بتحبني صاح جيب لي توب وكارينا وشبشب لي عرس جيرانا تمرقك من فضاء الحب البنفسجي لواقع الحياة الصحراوي اصفاااااار دي تقول ليها بحبك تقول ليك وانا بموت فيك تديها حب ترجعو ليك اكولة في القلب زي ما قال صحبي في سلامو خلا سؤال كيف الحال ؟ شغال مطايبة اسلامية بس!! قال لي تقول ليهو كيف الحال يقول ليك مفلسين جيب مية يطلعك من دفء العلاقة الانسانية لي فضاء التكافل الاجتماعي واتا ذاتك دايرلك كافل
هسة معقول اسمع خبيئني بين جدران المسام قبليني مرة في كل عام تقوم تتذكر ام عيالك ؟ اجي يا كدة 😀😀 ولا جاي منك وماشي ليك ولا ولا يا ناس هوي مرات في نطيط برة الحوش قلبك دة بدور يبحث عن لذة الخفقة الاولي ما تجيني واحدة من الالماظات التلاتة ولا واحد شليق يقول ليك اترضاه لزوجتك بكون انصرافي ساي زي معاوية الزبير يمرقنا من فضاء النقاش علي اطر عامة لضيق الخاص الاخص كما قال بكري عباس تحتاج مساحة واسعة للاستعراض ياخ
Post: #45 Title: Re: هابي فلنتاين داي Author: أحمد محمد عمر Date: 02-15-2018, 08:43 AM Parent: #44
المشكلة تكون معرس ليك واحدة عندها أنف كلب بوليسي زي حلاتنا وحاتك الفكرة ساي في راسك تشمها وتزرزرك بيها قبل تفكر فيها
من أول أيام العرس أدركت القاعدة الذهبية تقول فلانة حلوة تاني خلاص تحرم عليك شوفتها لو جابوها في التلفزيون المرة تخلي التلفزيون وتتحول كلها برج مراقبة لتقاطيع وجهك مع صرة جااااامدة كدة منتظرة منك أي تعبير حركي عشان يبقى يومك كحلي زمان كنت بحضر التلفزيون كتير تلقاني راقد على بطني وساند حنكي بي يدي زي الممحن ولدي الوقت داك لسة ما اتعلم الكلام كويس عاجباهو الحركة بقوم يجي يرقد جمبي على بطنه ونفس الحركة الزمن داك بدايات ظهور نانسي عجرم وانا بحضر كليباتها والولد أتاريهو بحب الجمال زي ابوهو قال لي دي اسمها منو؟ بعد ما داير اقول ليه اسمها خفت من بوليس الحركة قلت ليه اسمها سلافة ومشينا الموضوع على كدة تمر فترة كدة والجنا الغتيت دافنها لي .. ويوووم نحن في نص الغداء تجي نانسي عجرم في التلفزيون والجنا الشليق يلفت فيني وشغال لي سلافة سلافة وانا عامل فيها ولا شايف طبعاً المدام بقت متحيرة قالت لي سلافة دي شنو كمان؟ قلت ليها أنا عارف! تكون واحدة معاهو في الروضة بتشبه الفنانة دي
قالوا في المثل radius الوايف محدود لكن radius المدام لا حدود له لها قدرة عجيبة علي التذكر تغالطك في مصاريف اليوم الاديتهم ليها الصباح وماتنسي اسم عابر قبل عشرين سنة . اسم نسائي عندي معاها نوادر بقت لو سألتني بتعرف مريم بنكرها طوالي ابداننن ما بعرف اسم زي دة اجي يا بنات امي !! مريم اختك شردتني من اسمها منو ديك العندها وش كبير ديك 😢😢😢 الممثلة الامريكية ديك آي هسة دة فلم ليك قول عاجباك ساي ولا العازفة القلت سمحة مرة قالت لي رايك شنو في العازفة دي ؟ ردي جاهز دة سؤال استهلالي شكلي شينة هي !! ما قلت عاجباك زمان ! اول مرة اعرف ان سمحة من مترادفاتها عاجباني اتذكرت الممثلة جنيفر لوبيز الشينة 😆😆 اها تكون بتتفرج وهي بتتفرج فيك يا احمد وتتابع خلجاتك وتعابيرك وخمة نفسك تكرهك الممثلة زاتا
هو عمي نصاح يا عمر اخوي عمونا تب وحياتك مرتك جايب منها ستة يقبضوك يقول ليك وين القسيمة . حرم محلها ما عارفو وين وتشوفهم نايرين ولابسين احدث خطوط الموضة في التلفزيون عمينا تب شغالين يغيرو في مفاهمينا زاتا الواحد براهو تلقاهو بقا نظام عام عاين البت دي التقول ما عندها اهل لابسة كيف 😈😈😈😈 وسبحان الله الا تكون مؤهلة حتي نلاحظ ليها 😆😆 ف شنو غيرونا لكن نحن معاكسين بنمشي في الاتجاه العكس كيتا فيهم كدة
Post: #50 Title: Re: هابي فلنتاين داي Author: أحمد محمد عمر Date: 02-15-2018, 10:19 AM Parent: #48
حنك الممثلة شينة دة كان بمشي فيها زمان لكن هسة نقشتو وحاة الله قبل كم اسبوع كدة أيام فيديو لوشي بتاع المظاهرات لقيت روحي تحت برج المراقبة وانا متابع الموضوع في الفيسبوك طوالي طلعت ورقة البراءة قبل يسألوني (وحاة الله لوشي دي لا سمحة ولا حاجة الناس دي متسببة ساي) الإجابة جات بإدعاء براءة مع ابتسامة صفراوية اصلو ما بتغباني (هي لوشي دي شنو انا دايرة اشوفها عشان صاحباتي في الشغل قاعد يقولوا لي بتشبهي لوشي .. عليك الله هي شينة؟) طبعا بقيت اتمتم لا تقدر تقول شينة لا سمحة غايتو ربك فراج الكرب رسل لي واحد من العيال ما صدقت جاء حايم جمب باب الأوضة ناديتو برمجت بيه عشان اغير الموضوع :)
Post: #51 Title: Re: هابي فلنتاين داي Author: عمر التاج Date: 02-15-2018, 10:52 AM Parent: #50
تحية الحب والمودة لكل حبيب وعيدك كل حب يا حفيظ ويتعاد عليك بالحب والحنان ندهتني بي هناك أنداح مع الحبيب فقلت أحسن أبدأ هنا وأواصل بي هناك .. عيد الحب يبدأ عندي بنظرة الصباح ، سهم يمر بقلب الحبيبة فيملأه أمنا وإيمانا .. بعد النظرة همسة من شجن، ثم لمسة دافئة ندلف بها لضمة وقبلة الاستيقاظ ثم يمر بأعلى الجنان حيث شجرة الحب وشوق لا يبلى . هذا البوح بين الأرواح فقط لا تشغله الماديات ولا تلمسه الأجساد
أما موضوع الهدايا فسنكمله هناك .. وقبل ذلك نهديك طرفة عيد الحب: . . قالت لي وانا مفلس ماذا تهديني في يوم 14/2😻 قلت لها بكل خشوع✋..... آنا لا آهدي من آحببت ولكن الله يهدي من يشاء .... حظرتني البايرة الكافرة 🙀... المابتعرف الله
Post: #53 Title: Re: هابي فلنتاين داي Author: عمر دفع الله Date: 02-15-2018, 11:53 AM Parent: #52
خلاس يا ود ابوسن بي كدا احتفالك بعيد الحب بقا شرعى ... فحب بكل جوانحك واجنحتك حتى لو تطير في الحلة والاحياء القريبة والبعيدة .
Post: #54 Title: Re: هابي فلنتاين داي Author: محمد أبوالعزائم أبوالريش Date: 02-15-2018, 11:54 AM Parent: #52
Quote: ماسورة يا ابو الريش, الصور قديمة وفي عيد الفطر و ليست ورود فقط معاها هدايا وكدا لكن اولاد الحلال جابوها مع فتوى الشيخ الأخيرة عن عدم حرمة عيد الحب نظام حركات مناضلين وكدا
أي والله طلعت ماسورة يا ود البشرى، لكن الشيوخ ديل السحسحة العليهم شنو؟ عيد الضحية ما يمشوا يوزعوا لحمة على الفقراء.
احمد محمد عمر ههههههههههههه.. سلافة دي قريبة اميرة بت السيد وهي من بنات كوستي،،، واجمل من نانسي عجرم،،، وقول لود ابو سن ..خلي بالك ...وهابي فلانتاين day...
ضربة ركنية النت كان معصلج وحمدت الله بعد حين !! الحب كأي عاطفة انسانية لا يملكها ويحس بها إلا من تعلمها صغيرا من عرف الحب وهو صغير سيكون قادرا علي معرفته وبذله وهو ناضج اما أولئك الذين تربوا علي الكراهية .. او البغضاء .. او لم يحبهم أهلهم لخطأ في تركيبتهم او مشاعرهم سيكبرون وسيعجزون عن فهم مشاعر لا مستقبلات لديهم عليها يكبرون وتصغر انسانيتهم ويبتعدون كل عام عن ان يكون اسوياء ويؤذيهم ان يرو الحب عند غيرهم
Post: #57 Title: Re: هابي فلنتاين داي Author: أحمد محمد عمر Date: 02-17-2018, 02:05 PM Parent: #56
Quote: سلافة دي قريبة اميرة بت السيد وهي من بنات كوستي،،، واجمل من نانسي عجرم
سجمنا بركة الما بنعرفها .. كان اتقبضنا بالثابتة :)
غايتو يا بتي بعد تعرسوا اوعى تغفلوا من الرجال الواحدة فيكم ما تعمل فيها سمحة وواثقة من روحها وبتاع علي الحلال تنزلوا كشافات المراقبة دي ساعة واحدة تلقوا الراجل اتشلب