Post: #1
Title: يا عهد الشوم أجلك محتوم
Author: Dr. Moiz Bakhiet
Date: 02-02-2018, 02:19 PM
01:19 PM February, 02 2018 سودانيز اون لاين
Dr. Moiz Bakhiet-المنامة - البحرين
مكتبتى
رابط مختصر
يا عهد الشوم أجلك محتوم
شعر: معز عمر بخيت
______________________
يا وطن انهار
بعمايل الناس السوء الشوم..
السرقوا الدار
المصو الدم
والنفس الحاير والمكتوم
لا عارف يطلع يلاقي الغم
لا عارف يدخل ولا يحوم
ما بين النبض الرئة والعين
ما بين أوجاع أمراض وهموم
لو يرجع تاني الزمن الزين
والجيل التايه وعاش محروم
يطلع زي برْق يجيب الحق
الكان متغرب وكان مهضوم
أرواحنا فداك يا وطن استدرك
انو الخوف ما بزيل الجوع
ما بستر عورة هم مقسوم
والصمت الطال على ظلم الحاكم
قط ما بدوم
وشريعة الغاب
وذبيحة الباطل برة الباب
ما بتنجح يوم..
ح يطل النور
والقُمري يغرد فوق السور
والذئب الخاين يموت مسموم
بالغضب الحايم في الأعماق
بهدير الشعب على الآفاق
ودعا المظلوم
يا شارع ثور يا باطل غور
يا ليل انزاح يا حادب قوم
العيش مافيش حاكمنا الطيش
والدوا معدوم
حارمين البيت من كسره وزيت
وكروشم ديك متروسة شحوم
منفوخة حمل كذاب ودموم
يا أمن وشرطة مطافي وجيش
ليش انتو بعاد من ناسكم ليش
الشعب الانتو حماتو وزاتو
على كل بقاع في كل تخوم
اختار الله الوطن العدل
ما بين الحاكم والمحكوم
يبقي السودان أروع ما كان
إبداع وعلوم
الناس الشر بي اسم الدين
في ليل مشؤوم
حرومونا يقين وصفاء وحنين
والضو اللاح أصبح مهزوم
وجنيهنا انهار والزمن احتار
غُبن المشوار
ح يفجر فيك أمطار وغيوم
شعب الإخلاص موعود بخلاص
في كل عموم
سودان الحب وأصالة الناس
خيرك معلوم
يا وطن اتحكر في الوجدان
بكرة الكيزان ما بلقوا هدوم
يرجعوا حافين في بيوت الطين
بين سجن الخوف ونعيق البوم
والأمل يملاك يا وطن يفداك
قلباً مكلوم
بهواك وحماك عاشق دنياك
في أرضك يحج
ويصلي ويصوم
الثورة بدت والنصر شعار
خط الإصرار يتحدى النار
يا عهد الشوم أجلك محتوم.
_________________
معز عمر بخيت
|
Post: #2
Title: Re: يا عهد الشوم أجلك محتوم
Author: احمد حمودى
Date: 02-02-2018, 05:54 PM
Parent: #1
لك التحية بروووف ارمى قدام ما يغشاك شر
|
Post: #4
Title: Re: يا عهد الشوم أجلك محتوم
Author: Dr. Moiz Bakhiet
Date: 02-03-2018, 03:52 PM
Parent: #2
ولك كل الحب والتقدير الغالي أحمد حمودي
|
Post: #3
Title: Re: يا عهد الشوم أجلك محتوم
Author: Hani Arabi Mohamed
Date: 02-02-2018, 10:31 PM
Parent: #1
مساء الخير يا بروف
شكراً جزيلاً لهذا الجمال
وربنا يرفع البلاء عن شعبنا
|
Post: #5
Title: Re: يا عهد الشوم أجلك محتوم
Author: Dr. Moiz Bakhiet
Date: 02-06-2018, 06:10 PM
Parent: #3
شكراً نبيلا لك الغالي هاني
ونسأل الله أن يلطف بعباده من هذا الكابوس الرهيب
|
Post: #6
Title: Re: يا عهد الشوم أجلك محتوم
Author: الفاتح شلبي
Date: 02-07-2018, 10:47 AM
Parent: #5
Quote: يا شارع ثور يا باطل غور
يا ليل انزاح يا حادب قوم
العيش مافيش حاكمنا الطيش
والدوا معدوم
حارمين البيت من كسره وزيت
وكروشم ديك متروسة شحوم
منفوخة حمل كذاب ودموم
يا أمن وشرطة مطافي وجيش
ليش انتو بعاد من ناسكم ليش
الشعب الانتو حماتو وزاتو |
تحياتي يا بروف
|
|