Post: #2
Title: Re: توجد صورة بدون سخرية
Author: Nasser Amin
Date: 02-02-2018, 11:24 AM
Parent: #1
هههههههههه
هسي في داعي للهرجلة دي
سلامات اب سن
|
Post: #3
Title: Re: توجد صورة بدون سخرية
Author: عبدالحفيظ ابوسن
Date: 02-02-2018, 03:37 PM
Parent: #2
يا ناصر البليلة ماعندنا فيها راي تب .. اياها آخر قوت الكرم وجهد المقل
بليلة مباشر ولا ضبيحة مكاشر
لكن الخبر الزي دة بشوفو بي زوايا اصلا ما بريئة
اشتروها بي كم البليلة
كلف نجيضها كم
فحمها وملحها وتومها
وبعد داك نثريات ومصاريف لجنة البليلة
ثم الاهم عندنا كشعب سوداني شد البليلة يتم بفهم ديني تسليمي . الطلب من الله لافعال لا يملكها الاهو سبحانه وتعالى
يعني المطر شح
لكن لو زول ظلمك ما بتشد ليهو بليلية .. بتجيب حقك
|
Post: #4
Title: Re: توجد صورة بدون سخرية
Author: عبدالحفيظ ابوسن
Date: 02-02-2018, 03:45 PM
Parent: #3
كنا في السوق اطفال
الوالد عليه الرحمه من يخش شهر ستة ويقدل لي سبعة . هو وكثيرون غيره من التجار
كل زول عندو كانون في دكانو وحلة قوز كبيرة . يجيبو الفحم ويولعو النار
ويشدو البليلة
بليلة ابوي بالذات بتذكرها بوجد غريب . فيها كم مكون . عدسية ولوبا عفن وعيش وحنيطير وشمار وملح وبعمل فيها لحمة
تجقجق لامن تنجض واي زول بي صحنو
لا يمنع منها احد
كل الناس بتاكل
وما بشدوها يوم واحد كل كم يوم بشدو دون اتفاق
كرامة وسلامة
تزيل البلا
وتشيل الغلا
هذه كلمات محفوظات تقال حين وضع الحلة في التار
وما بغطو الحلة بقول ليك خلي بخورها يطلع
كأنها رسائل الهنود الحمر
|
Post: #5
Title: Re: توجد صورة بدون سخرية
Author: Ali Alkanzi
Date: 02-02-2018, 04:48 PM
Parent: #4
يا زول ديل اصحاب الايادي المتوضئة
والجباه التي تعلوها علامة السجود
والذقون المعطرة بعطر العود
لا تتأخر عن قيام ليلهم
فالسماء ستلتصق بالارض تلكم الساعة
|
Post: #6
Title: Re: توجد صورة بدون سخرية
Author: قسم الفضيل مضوي محمد
Date: 02-02-2018, 05:01 PM
Parent: #5
.
.
يا حفيظ ... سلامات ...
(أعتقد) المقصود هو :
المشاركة ب(ليلة) التضرع والدعاء ...
.
.
|
Post: #7
Title: Re: توجد صورة بدون سخرية
Author: معاوية الزبير
Date: 02-02-2018, 05:10 PM
Parent: #6
ههه الجوع كافر يا عبد الحفيظ
لكن دي يا قسم، أخير منها البليلة الواااحدة دي
قال تضرع قال
تضرعوا ويدلّكوا فيكم
|
Post: #11
Title: Re: توجد صورة بدون سخرية
Author: Nasser Amin
Date: 02-02-2018, 06:40 PM
Parent: #7
سلامات الاخ معاوية الزبير
ان شاء الله بلغت الصحة و الشفاء التام
نفتقد طلتك و قلمك ..
تحياتي
|
Post: #8
Title: Re: توجد صورة بدون سخرية
Author: Yasser Ali
Date: 02-02-2018, 05:13 PM
Parent: #6
سلام الرجل المحترم ود ابسن غايتو مسجد الجامعة زمان بدسو فيه السيخ عشان يدقونا بيه
|
Post: #9
Title: Re: توجد صورة بدون سخرية
Author: أحمد الشايقي
Date: 02-02-2018, 05:23 PM
Parent: #8
الناس ديل تحـــفـــة يا ود ابسـن
ناجحين في المسميات البراقــة المزخــرفــة
..... وبكلفوا شغلاتهم ... شفت كيف اليافطات مطبوعة بقروش كتيرة
المتظاهرين شايلين ورق مشخبـت بي فحــم ولا بي زفــت وجربان ومكرمش
عشان يقولوا لا للغـلاء
ميزانية ليلة التضرع دي تعرف خلي بالك
بكون في جماعة كدا عملوا منها ثـروة
|
Post: #10
Title: Re: توجد صورة بدون سخرية
Author: nour tawir
Date: 02-02-2018, 06:12 PM
Parent: #9
تضرع عشان شنو ؟
الناس دى ما بتخجل كلو كلو...
|
Post: #12
Title: Re: توجد صورة بدون سخرية
Author: عبدالحفيظ ابوسن
Date: 02-02-2018, 07:04 PM
Parent: #10
تشكروا
لو لاحظتو لفظ بدون سخرية في العنوان الحاولت اوصل بيه المعني .. رغم انو حلم الجيعان عيش
|
Post: #13
Title: Re: توجد صورة بدون سخرية
Author: محمد على طه الملك
Date: 02-02-2018, 11:03 PM
Parent: #12
سلامات يا أبا سن وزواره الكرام ..
على الرغم من أني ما شايف الصورة ..
لكن زيما قلتو البليلة عندها رمزية معلومة بين السودانيين ..
بس لو صدق حدسي وطلعت البليلة دي في مسجد الجامعة حسب التعليقات ..
يبقى دا موضوع يستحق السخرية بصراحة يا شيخ العرب ..
معقول بليلة وفي مسجد الجامعة في قلب العاصمة وعلى بعد فركة كراع من القصر الرئاسي !!
بعين البلية في الحتة دي البياكلها أو حتى المحتاج ليها منو؟
حتى الطلاب حول المسجد ما بيعتروا من الفئات المعوزة..
لو كانت في أطراف العاصمة وبيوت الكرتون كنا صمينا خشمنا ..
لكن في الحالة دي أكيد السخرية والاستهجان واجب ديني..
الناس ديل قبلنا كذبهم وخداعهم لينا كمان عايزين يخدعوا ربهم !!! تعالى الله عن ذلك.
هههههه ـ حالتي لسه ما شفت الصورة .
|
Post: #14
Title: Re: توجد صورة بدون سخرية
Author: منتصر عبد الباسط
Date: 02-02-2018, 11:28 PM
Parent: #13
الصحيح المشاركة (في ليلة التضرع)
وليس بـ ليلة ...
ومعاهو حق الأخ عبد الحفيظ أنا تبادر لي في الأول إنو المقصود (البليلة)
بعد برهة من الزمن والتدبر حتى عرفت قصدهم.
|
Post: #15
Title: Re: توجد صورة بدون سخرية
Author: منتصر عبد الباسط
Date: 02-02-2018, 11:39 PM
Parent: #14
لكن طريقة تصميم اللوحة جعلت كأن المقصود البليلة العديل دي
|
Post: #16
Title: Re: توجد صورة بدون سخرية
Author: محمد على طه الملك
Date: 02-03-2018, 00:14 AM
Parent: #15
السؤال يا منتصر أخوي من هم هؤلاء المتضرعين ؟
وما هوالبلاء الذي يسألون الله ليرفعه عنهم ولم يكونوا متسببين فيه؟؟؟؟
|
Post: #17
Title: Re: توجد صورة بدون سخرية
Author: منتصر عبد الباسط
Date: 02-03-2018, 00:34 AM
Parent: #16
Quote: السؤال يا منتصر أخوي من هم هؤلاء المتضرعين ؟
وما هوالبلاء الذي يسألون الله ليرفعه عنهم ولم يكونوا متسببين فيه؟؟؟؟ |
سبحان الله
البلاء بذات نفسه يسأل الله أن يرفعه عن الناس ؟!
معناها البلاء نفسه ضاق ذرعا بنفسه!
|
Post: #18
Title: Re: توجد صورة بدون سخرية
Author: سيف النصر محي الدين
Date: 02-03-2018, 01:27 AM
Parent: #17
والله لو غيروها "لفتة" بنشارك.
|
Post: #19
Title: Re: توجد صورة بدون سخرية
Author: Biraima M Adam
Date: 02-03-2018, 03:21 AM
Parent: #18
| Quote: والله لو غيروها "لفتة" بنشارك. |
يا سيف، الفتة ذاتها فيها رمزية ..
قول لو عملوها "حولية" .. ممكن تكون رمزيتها أفضل ..
بريمة
|
Post: #20
Title: Re: توجد صورة بدون سخرية
Author: Hani Arabi Mohamed
Date: 02-03-2018, 03:38 AM
Parent: #1
هم بيعرفوا ربنا أساساً ؟
|
Post: #21
Title: Re: توجد صورة بدون سخرية
Author: عبدالحفيظ ابوسن
Date: 02-03-2018, 05:41 AM
Parent: #20
تشكروا جدا والله
لا انكر خطئي في استيعاب لفظة بليلة لعدة اسباب
رغم عدم معقولية أن يأتي الامر بهذا الشكل من غيرهم . او من أي تنظيم منضبط وجاد . لكنني لم استبعده منهم ابدا
بل هو اول معني قفز ذهني حين قرأته . فهم يفقون سؤ تبسيطي وابتذالي للمعني .
فقد رأينا منهم الهجرة إلي الله .. ورأينا منهم انهم يساوون انفسهم بالصحابة . وبل يتخيرون من حظي منهم بالاشارة المحددة في القرآن . اولئك الذين بايعوا الرسول عليه افضل السلام تحت الشجرة
ثم يشبهون أولياؤهم بالخلفاء ويتخيرون من اشتهر منهم بالعدل والزهد
فرأيت يقصدون البليلة الواحدة دي .. معقولة منهم وبتشبههم . وتشبه ديماجوجيتهم في استجداء عطف المواطن واستدرار تآزره بإستلافهم لمورثه بعد تشويهه وافراغه من مضامينه
لا يعملون عملا مجانيا ابدا !! بل وان عجز ذهنك عن ادراك مصلحتهم رغم نبل السلوك فتأكد ان وراءه مصلحة تقعد به عن النبل وتذهب به إلي الحطة والاستغلال
نعم
اخطأت تماما عطفا علي خطأ كتابتهم وظننتهم يعرفون اللغة العربية
هدف اللغة الابانة
والابانة تستلزم المعرفة بالكتابة فلا اظنهم يقرؤون ليستطيعوا ان يكتبوا لافتة لا تحتاج إلي تراكيب معقدة
ف شنو
معليش ياخ
وياريت لو كانت فتة سيف النصر
الفتة ام توم حمتنا النوم
الفتة ام شطة حمتنا النطة
|
Post: #22
Title: Re: توجد صورة بدون سخرية
Author: مهيرة
Date: 02-03-2018, 09:21 PM
Parent: #21
سلام ودابو سن اخوى وضيوفه الكرامورد فى حديث ( ان الله طيب لا يقبل الا طيبا)( ثم ذكر الرجل يطيل السفر أشعث أغبر ، يمد يديه الى السماء ،يارب،يارب،ومطعمه حرام ومشربه حرام وملبسه حرام وغذى بالحرام ،فأنى يستجاب له )
قلت لى شباب المؤتمر الوطنى!!!!!
كمان أمانة الطلاب!!
تحياتى
|
Post: #23
Title: Re: توجد صورة بدون سخرية
Author: محمد على طه الملك
Date: 02-04-2018, 02:04 AM
Parent: #22
والأغرب يا دكتوره مهيرة شايلين عكاكيزم وسواطيرهم يفلقو في عيال الناس داخل الجامعات والمظاهرات ويجو يتضرعو !!!!!
|
Post: #24
Title: Re: توجد صورة بدون سخرية
Author: عبدالحفيظ ابوسن
Date: 02-04-2018, 05:37 AM
حباب مهيرة والملك
ولو تدرون ماهي وكالة النشاط الطلابي لجاكم طمام واستفراغ
واحدة من المؤسسات التي افسدت التعليم
|
Post: #25
Title: Re: توجد صورة بدون سخرية
Author: ولياب
Date: 02-04-2018, 08:53 AM
Parent: #24
هم لمن يتضرعوا ويدعون الله وهم في نعيمهم
أمال البروليتاريا حيقولوا أيه !!!
|
|
