من عجايب الاسافير دعوة مميزة للتظاهر

07:13 AM January, 31 2018 سودانيز اون لاين
زهير عثمان حمد-السودان الخرطوم
مكتبتى
رابط مختصر
الشفيفين الوريفين المتماسكين البت النصف نبية والبت الحديقة المستنيرين ناس الكنقولي الملتحين شوفوا الوطن ده على مقاس أوهام منو و وين الغموض والعصلجة .؟
المثقفين الملحدين المعارضين العميقين و السطحيين ، أفراد القطيع النبلاء النرجسيين الكادحين البرجوازيين الجلابة والفقراء البائسين العمال والموظفين سكاتنا شين .
الناس الفرحة أسياد الرصة والمنصة اسياد الريد الواقفين قنا الاخوان شديد وناس هناي وأنتو منو والناس الما حيعرسوا سودانيات الساندين بعض عشان الوطن الحووب ،وعشان نبقى بخير أبقوا كتار ونرمي قدام ونمشي بحري .
الزملاء في الحزب الشيوعي والرفاق البعثيين والحبايب في الأمة والأشقاء الرفيعين في الأتحادي وأصدقاء التراب والموسيقى في المؤتمر السوداني تعالوا حدثوهن عن الخبز والأرض والسلام وعن جمال عيون الحبيبات تحت البمبان و وسط القنابل المسيلة للدموع ، وملامح وجوههن أثناء هتافهن سلمية سلمية تعالوا أعملوا سيلفي للوطن .
الزولة البتفتح الروح ضلفتين الموجودة في الصف الأمامي في المسيرة السلمية أرتبط بيها طوالي.
زولي ورقة وقلم عاداتنا وتقاليدنا والتاريخ محتفظ لينا بأجمل المواقف الثورية وحب الأوطان فاااشنو ، عن الثورة نتحدث ،أكتب تم وبحري ياخ .
الفاسخات الجالخات الشرقيين المتخلفين أسياد البرادو والتوسان وأصحاب الجلحات ،
أهتفي معه أربعيني ربما يتزوجكي .
الأرهابيين المنبطحين المتطرفيين اللصوص الفاسدين الكيزان وناس قريعتي راحت الثورة يصنعها الشرفاء .
العقادة الحواتة ناس أبو اللمين وأبو عركي وأبو السيد ، وأصبح الصبح وغناوي الخليل أرحكم .
الجميلات الهبهانات ستات الريد الطويلات الفيمنست القصيرات والحقوقيات الثورة أنثى والنصر ذكر .
سلمية سلمية ..
مشجعي أرسنال المخذولين دوما، الدلاقين ورابطة مشجعي اليوفي بالسودان ، محبي الريال والبرسا ناس البريمرليغ الشفاتة المقطعين حنان الكفر الماتش ثورة .
بعض هذا الهتاف أحببتك اكثر مما ينبغي قواعد المسيرة المعروفة موسم الهجرة إلى بحري وعرس السودان الجنقو مسامير الأرض وفي قلبي أنثى بحرية ، كونديرا رواد دوستويفسكي الكافكاويين رفاق جيفارا ودرويش الحالمين المدخنيين أصدقاء الكتب وطاولات المقاهي أعملوا ريفيو للوطن .
الماركسية المتصوفة السلفية القرانيين النصارى البوذيين وناس النزعة الايمانية في الشعر السوداني الرومانسيين والما عندهم شيء لأي شيء والدراويش الندوة وطن.
الأهل الأحباب الأصحاب المعارف والفرد صيوان عرسنا مدقوق على بحري .
جنيهين حديد أو تلاتة ونص يوم ، صورتك الخايف عليها وصوتك وقدااام.
الأطباء الأخصائيين السسترات الهاوس أوفسر طبيبات الأسنان وناس المختبر والصيادلة وطني يؤلمني.
الأساتذة البروفات الطلاب وكتب المطالعة الحصة وطن .
ناس ملاح الخدرة ومغتربين السعودية ناس الأيمو ههه والكبسة ، رفاق المنافي البعيدين خلف المحيطات في بلاد الصقيع والجليد ، ناس اللوتري المنتشرين في بلاد العم سام وعواصم العالم الكتاب ، العلماء ، الباحثين ،و الشعراء والتشكيليين أكتبوا شعارات المرحلة .
- قميص سادة جزمة سوداء أو سبورت ، بنطلون جنز قاش جلد وأقطع نص ، جيب سجاير ولاعة كيس صعود أشحن تلفونك وفعل نت ، طرق صوتك أطلع الشارع أرفع أصبعين أهتف أهتف ، سلمية سلمية ضد الحرامية . متر قماش أبيض ولون مداد أحمر أكتب.. أكتب ، سقطت سقطت يا كيزان ،
الشعب يريد إسقاط النظام ، ويوم الأربعاء 31 يناير ده نتلاقى في ميدان الشعبية بحري.
منقول