Post: #1
Title: تيه واتاكا يا مشيرنا!!
Author: jini
Date: 01-26-2018, 04:55 PM
03:55 PM January, 26 2018 سودانيز اون لاين
jini-أم طرقا عراض
مكتبتى
رابط مختصر ألو يا أبو حميد كيفك ياخ ومشتاقين والله شنو ياخي من ديك تاني مانلاقيك؟! ياخي والله أمس حصلت لينا قصة إتذكرتك طوالي..😅
تتذكر وكت جيتونا المره الفاتت لم مشينا نتعشى في الكافتيريا الجمب السوق الشعبي موش كان في واحد بيمدح جمبنا؟.. الزول ده إسمو (عبد الله ود أم الحسن ) راجل لذيذ وطاشي شبكة رسمي يعني عادي ممكن يكون بمدح فجأة يقلب غنا بعدين بحب الحقيبة حب ماطبيعي وخاصة أغاني ود الرضي،
أول أمس كنّا بنتعشى صاحبك جا قعد جمبنا شايل طارو ويغني ساااااي غنية ود الرضي " تيه وإتاكا "
بالله تتذكر صوتو جميل كيف ؟! بالله قاعدين كده بعد شويه جابو في التلفزيون إفتتاح الجوهرة الزرقاء صاحبك سألنا منو البرقصوا ديل؟!
عبد الله السمكرجي مامسخوت قال ليهو ده ماعرفتو يا ود أم الحسن ؟ ده ما الزول العمل العيشة بي جنيه😅
زولك خت طارو وقال ليهو: عمل العيشة بي جنيه ويرقص!😡 السمكرجي الفقر قال ليهو تتخيل وبعد تلاتين سنة سواطه!😅
زولك سكت تممممم ونحن نسيناهو، خلصنا العشاء وبنشرب في الشاي ونتونس أكان جانا طاير قال لينا إنتو ياجماعة عارفين ود الرضي ده لو حضر زمنا ده كان " تيه وإتاكا " دي كتبا كيف؟
قلنا ليهو كيف؟!! مسك طارو وقعد يغني قال لينا أسمعوا وأكتبوا:
تيه وإتاكا يالمابتخجل رقيص بي قفاكا وهزْ أجسام
عدمت حياكا رغيف بجنيه جنون يازاكا رُباط ولِجام
معاك شركاكا بشوف في النت جدادك كاكا كذب وأوهام
وطن يتباكى حُكُمْ قرقوش نهكتو إنهاكا مرض وأسقام
منو الأفتاكا تضُرب الناس سلاح فتاكا ده ما الإسلام!
لعلي أراكَ في لاهاي معاك أُمَراكا بلد (أوكامْ)
خريف وشتاكا لغِفْ بالكوم حقوق ضعفاكا ومال أيتام
تفوق نُدداكا من الدولار مليت هاندباكا بنوك وأرقام
خاف من مولاكا يوم ماتقيف قدامو براكا حساب قدام
مابتلقى هناكَ قضاة الزُّور يروموا رضاكا يجيبوا كلام
الشعب أباكا من أقصى الفور لجبال التاكا صلاة وصيام
دعاو يوم داكَ دعا المظلوم تدُكْ أعضاكا صواريخ سام
تراب في فاكا يوم مانقوم منو البلفاكا مصير صدام.
الله يسألك يا أبوحميد الزول ده مابالغ؟!!😂😂😂😂
|
Post: #2
Title: Re: تيه واتاكا يا مشيرنا!!
Author: عبدالعزيز الفاضلابى
Date: 01-26-2018, 05:07 PM
Parent: #1
اوسكار ياحيدر
|
Post: #3
Title: Re: تيه واتاكا يا مشيرنا!!
Author: عبدالعزيز الفاضلابى
Date: 01-26-2018, 05:07 PM
Parent: #1
اوسكار ياحيدر
|
Post: #4
Title: Re: تيه واتاكا يا مشيرنا!!
Author: jini
Date: 01-26-2018, 05:28 PM
Parent: #3
هههه الفيلم
بلاد اوكام
في ٢٠٠٩ عارضت المحكمة الجنائية وقلت ان المحكمة الجنائية كلمة حق اريد بها با طل
وان المستهدف هو السودان وليس البشير وقلت انها لا تعدو كونها ترشيح البشير رئيسا للسودان مدى الحياة.
يومها تم اتهامي بأسوأ التهم أقلها اني مؤتمر موطني مستتر
وللمفارقة كانت الزميلة تراجي من اكثر المهاجمين وهي اليوم تهاجم الانقاذ كلها ماعدا البشير
محاولات البشير المستميتة لتعديل الدستورلتمكينه من الترشيح وهو الذي وعد بان هذه الولاية ستكون اخر ولاية
توكد انه رئيسنا مدى حياته وربما حياتنا.
جني
|
Post: #5
Title: Re: تيه واتاكا يا مشيرنا!!
Author: عبدالعزيز الفاضلابى
Date: 01-26-2018, 06:35 PM
Parent: #4
| Quote: في ٢٠٠٩ عارضت المحكمة الجنائية وقلت ان المحكمة الجنائية كلمة حق اريد بها با طل |
Still
|
Post: #6
Title: Re: تيه واتاكا يا مشيرنا!!
Author: jini
Date: 01-26-2018, 08:13 PM
Parent: #5
ولا زلت علي راي
الجنائية وقعت ليهو في جرح
زي قصة ضب الملوخية
اها الجنائية دي ضب بشة
جني
|
|