ياسكران يا حيران دي عملية تعملا

07:47 AM January, 23 2018

سودانيز اون لاين
عبد اللطيف السيدح-صرة الدنيا
مكتبتى
رابط مختصر

لم أكن أرغب في الخوض في هذا الموضوع، لولا أن نقل لي بعض الأصدقاء افتراء أحدهم في وسيط عام، أنني قدمت شهادة في أمر يخصه.
ساورد ما حدث دون إضافة أو نقصان والله على ما أقول شهيد.
في ليلة رأس السنة، عقب انتهاء الحفل بقاعة اسبارك سيتي، كنت اقف مع مجموعة من الاصدقاء بينهم مدير قناة النيل الازرق الجنرال حسن فضل المولى ومدير الصالة ، و بينهم اسرة اعلامية معروفة، الزوجة والزوج والبنت، الاخيرة كانت بعيدة نسبيا ،فجاة ارتفع صوتها: (يا سكران يا حيران دي حركة تعملها ووووو).
لم اكن اعرف البنت ولم اشاهد ما حدث، فاذا بالمذيع المعروف يهرب خفيف الخطى وسط الزحام، ويركض من خلفه والد الفتاة، لكن لم يلحق به لتدخل عدد من الحضور، بعد ذلك روت الفتاة تفاصيل ما حدث معها.
انتهت الواقعة وسط عدد من الشهود.
لم اتابع تفاصيل ما حدث بعد ذلك الى ان علمت من الصحف ان ادارة القناة شكلت لجنة تحقيق ،فصل على اثرها المذيع ،قيل ان هنالك وقائع سابقة ولجان تحقيق شكلت للمذيع اضيفت اليها الواقعة الاخيرة، فكان قرار الفصل.
لا علاقة خاصة لي بالأسرة الإعلامية ، ولا عداء لي مع المذيع، اعرفه فقط عبر الشاشة والتقيه أحيانا في بعض المناسبات العامة، ولم يطلب احد شهادتي لاجنائياً ولا إدارياً، هذه شهادة اضطرارية لدفع الافتراء فقط .دمتم بخير

ضياء الدين بلال

جاب الذيب من ضيلو

مقال مبهم... الصمت كان افضل من كتابته

تحياتى اخى عبداللطيف ..

لا أدرى ماذا اراد الصحفى ضياء الدين بلال من مقالته هذه ..

المعروف .. أن تكون كتابة المقال لهدف او عدد من الاهداف .. خاصة أن هذه المقالة نشرت فى الصحف اليومية ..

فى تقديرى مقال ضياء الدين بلال .. خارم بارم ..

دا بوست عملتو في الفيس بوك

Quote: المذيع محمد محمود حسكا (اني وي) .. أتضامن معاك وأية حاجة بعد فصلك من عملك لكن .. بصراحة لم تقنع ولم تفد بما يبعد عنك الشبهات التي تسببت في إبعادك سمعت ليك تسجيل يمكن أكتر من ساعة لم تقل فيه جملة واحدة مفيدة بخصوص دفع الاتهام عنك .. عديتا كلها تكلف وتمظهر وتقعر وتحدب .. وسماعتي كعبة .. ومسافر .. وح أعمل قناة باليوتوب .. وبين كل جملة وتانية تحشر عبارة (انى وي) كدا ساي منجهة منك .. سبق وأن قلت لك ذات مناسبة في بوست أظنه للأخت هنادي الصديق إنك زول كويس لكن بتتكلف زيادة عن اللزوم ودا المصعب عليك الأمور .. لكن كما توقعت زعلت وقعدت تتظارف علي وفي النهاية لقيت نفسي خارج البوست .. خخخخخ طبعا أنا لا أعرفك لأنني لا أشاهد قناة الأزرق إلا نادرا جدا .. لكن لاقيتك ذات مرة مع الأخ أيمن وعدد من العاملين بالبلو نايل في مدينة العين بأبوظبي .. وتعارفنا وتسامرنا وبعدها بشهور قليلة فقط حصل ما حصل في بوست هنادي الصديق حيث تغابيت فيني المعرفة تماما ههههههه .. طبعا ممكن تكون نجم مزحوم بالمعجبين عشان كدا ما اتذكرتني بعد شهرين تلاتة من لقاءنا في العين.. لكن المهم انك رفضت النقد بغرور واضح جدا .. أتمنى والله أن تخرج من الذي وقع عليك كالشعرة من العجين وتعود إلى القناة.. لكن عليك أن تساعد نفسك وتقدم إفادات واضحة وصريحة تبرئ ساحتك .. وحاول بقدر الإمكان تبعد من التكلف لأنو لو ما ضراك ما بفيدك.

لا حول ولا قوة إلا بالله .

وما فائدة القال والقيل ،،، يا ربي الحصل شنو للناس عشان يكتبو الزبد الذي يذهب جفاء .

وطلحة كذلك جاب الذئب من ضيلو

وبعد المقال ربما تنتقل المعركة من الأسافير إلى المحاكم مباشرة

الحكاية بدأت من صالة سبارك سيتي ليلة رأس السنة .

يعنى ايه !
زول اخطأ لو كان سكران او كان مغروم ، إن صحت الرواية
ووقع عليه عقاب في محل بيشتغل والمشكلة اصبحت بينه وبين مُخدمه
بس لكن كان في داعى يقوم ضياء الدين بلال بالتعرض للموضوع تانى ؟
دا مُش ( شهادة اضطرارية لدفع الافتراء) ، دا اسمو تشهير يا سيد بلال .
فأنت يا استاذ بلال زول ما ساهل لانك بتركب الطيارة مع الرئيس زاتو
فمن الطبيعى ان يجد مقالك مساحة مقدّرة من المتابعة
وبموقفك هذا فأنت منحاز ضد الرجل إن كان مذنبا او بريئا
ولو انت يا استاذ بلال قاعد تتحسس من الحاجات الصغيرة دى
وعامل فيها ابو النقاء الاخلاقى فكيف قادر تتحمل مجالسة اللصوص والقتلة
والاكل في موائدهم الزمن دا كلو ؟
ياخى انت مصاحب عتاة القتلة والمجرمين امثال قوش ومحمد عطا
وجاي تستعرض عضلاتك على المسيكين دا ؟
مقال غير موفق يا استناذ ....وكان الله في عون المذيع المرفود ...

الموضوع مؤلم زي مابيقول ..
ربنا يوفقه في مكان آخر ..
لكن عموما كشخصية عامة ..
كان واجب منه الحذر الشديد ..
لكن سبق السيف العزل ..

ضياء ده كان ممكن يكتب كلامه ده في رسالة للشخص المعني فقط بدل شيل الحال ..

في التسجيل المعني محمد محمود ذكر أن رئيس تحرير معروف تسبب في فصله من القناة
وبعد كلام ضياء الفوق دا اتضحت هوية رئيس التحرير المعروف .. وتبقى فقط الصحفية
وزوجها ووالدتها المذكورين في التسجيل ..
من وجهة نظري المذيع هو من شهر بنفسه في الأسافير بالتسجيل الذي رفعه أخيرا
والغريبة ما قال فيهو أية حاجة تؤكد براءته مما نسب إليه .. كل العملو انو لفت الأنظار
ليهو أكتر ..
عموما بالنسبة لي الرجل ما زال بريئا حتى تثبت أدانته وليس من حق القناة فصله بصورة
نهائية قبل حكم المحكمة وكان ينبغي إيقافه فقط إلى أن تنجلي الحقائق كاملة.. وبالنسبة
لضياء فأعتقد أنه حشر نفسه في مكان لا يتناسب وشخصيته الاعتبارية كرئيس تحرير لصحيفة تقود الرأي .

صحيح يا طلحة انا برضو قبيل سمعت الفيديو ..
وما مرقت منه بالتكتح فيما يخص الموضوع .. خخخخ ..
لكن كرأي شخصي اتمنى اعادته للقناة ..
حتى وان صدق الاتهام فالزول شاغل بي خشمو وما مدا يدو ..
بعدين حتى لو هو شاغل واتراشق في الحفلة ..
ممكن عادي البنت توقفه عنده حده بدون جِرس وشوشره ..
لكن ربما كان هناك كمين من الأماية ...
واصلا هو حالفين ليهو فكان يعمل حسابو .. خخخخ

ــــــــــــــــــــــــــــــــــــــــــــــــــ


شالوا حالو وخلاص يا حيدرنا ..
ما عجبتنا ليهو يشهد الله ..
ضياء ده ذاتو مارس دور يناسبه تماما ..
عمل راعي فضيلة ولبس جناح جبريل ..

كامل تضامني مع اسكونس ..

وضيا الدين ده الطلب شهادتو منو ؟
الزول اتفصل من شغلو ، الفتاة لديها حق مقاضاته ام لا ، وبس
شنو يعني عايز يثبت انو بستحق الفصل وانو مافي تامر عليهو ؟ تذكر مجازر التمكين يا ارزقي يا باهت
عمرك ما حتبقى صحفى كبير الا في زمن زي ده

سلام يا جيمي عزيز القوز
غايتو أنا ما شايف أي سبب يدعو لنصب كمين للزول دا
من أجل التشهير به أو اغتيال شخصيته للدرجة التي تجعل بنت تجازف بى
سمعتا بالاشتراك مع والدتا وزوجها من أجل انجاز المهمة .
عبارة يا سكران يا حيران دي لو كانت قاصدا بيها المعنى الحرفي
وانو فعلا كان سكران أو بسكر يبقي موضوعو مستحمى ..
لكن زي ما قلتا يا جيمي اذا كان سكران فكان يجب على البت
أن تعمل بمبدأ السكران في ذمة الواعي خخخخخخخخخ
والله أتمنى أن يقيل الله عثرته ويعود لعمله بعد أن تثبت براءته
لأنه بغض النظر عن أنو كويس واللا كعب كاعلامي فدا في النهاية أكل عيشو ..

Quote: بالاشتراك مع والدتا وزوجها

زوج منو؟
...
صحافة ومذيعين ما عندهم موضوع
و أنا ذاتي ما عندي موضوع