"الشيخ" عثمان عووضة و"الشاب" محمد المسلّمي الكباشي: السودان غير!!

07:01 AM January, 22 2018

سودانيز اون لاين
عبدالله عثمان-
مكتبتى
رابط مختصر

"الشاب"* عند المغاربة هو الغناي عندنا وكلم غنايين ياخ!!
والله صحي!! (حقتنا ما حقت الوهابية"

وكذلك غناي عبدالحفيظ أبوسن
ومعاوية الزبير
والشاب مرتضى باسبار


السودان غير

زرت السودان زيارة سريعة جدا
مثل جغيمات الوضوء
توزعت سريعا ما بين عمل في أحفاد قاسم بدري (وجه ما فيهو أي تعبير)
وكم دافنة كدة

يقول لي اصحابي ألقابك كثيرة!!
قلت لهم: في أيامي التسعة دي كلما يتصل علي صديقي الأستاذ عادل بابكر يجدني في دافنة*
سماني "أبو الدفان"
قال لي بس أدفن لينا "كبيرهم" وأتخارج سننصبك ملكا على النوبة السفلى والنوبة العليا

مضت سراعا ولكنها تؤكد ما قاله الأستاذ محمود محمد طه وهو لا يحتاج لتأكيد:
بما حفظ الله عليهم من أصايل الطبايع*

في سوبا أنكسر بنا البص
نزل بعضنا عند ست شاي
طلبوا قهوة
البص دوّر
ختوا كبابيهم ليهرلو نحو البص
حلفت عليهم متيمنة ومتنضرة تشيلوا الكبابي معاكم
أصلو الدنيا طارت!! شيلوهن!!
جبروا بخاطرها وشالوهن
الكبابي بتكون واحدة نزلت مدني والتانية قرية مية على أربعة

لينا حالهم

تسلم يابا

حمدلا بالسلامة
اجتهدت شديد في ملاقاتك . ولامن قنعت من جيتك قلت عسي تلاقي عثمان و معاوية
حسبت ان تأتي لعزاء محاسن
سعدت بمحادثتك
الطريف في الامر انو عرمان بجي يسألني عنك وعن تلفونك
عرمان شقيق عبدالله

نحن نعيش في بيئة روحية ذات مظهر مادي
من أقوال الأستاذ محمود

صورة اغتيال طفل، وتشييع شهيد غض الإهاب.. بقلم عبد الغني كرم اللهصورة اغتيال طفل، وتشييع شهيد غض الإهاب.. بقلم عبد الغني كرم الله

قلت ليهو
ما بعرفك؟!
ضحك
د. قصي همرور قال لي وصلني لتيسيير عووضة
قال ليها جيت مع عبدالله عثمان
عبدالله عثمان دة بتاع عُرج ومكاسير؟؟!! ياهو ذاتو!!
شفت كيف أنا مشهور أكتر منك!!
ضحك عثمان عووضة
رغم أني ألتقيته لدقائق ولكن كأنما أعرفه منذ ألست
الحقيقة كل المجموعة التي كانت معي، الأستاذ أنور همد، د. عاصم حامد عبدون، الباشمهندس الطيب بابكر خلف الله
د. مصطفى الجيلي عمر وزوجي نزيهة محمد الحسن أحبوه وأحبوا الكباشي وعزمناهم لحضور زيجة وجلسة الخ
وشرّفنا المسلمي وزوجه آمنة بلال بحضور الجلسة وبحضور الزيجة المباركة
دة السودان!!
بلد حلو

عصاتنا البشربو الدكاي.. مع الصديق سديد الراي
ود حاج الماحي
شوف ياخوي!! والله أنا حركة إسلامية ومؤتمر وطني... لكن أحمد الله أرثي صوفي ... أنا من أهلك ناس طابت الشيخ السماني
حركة اسلامية ومؤتمر وطني علا البعملو فوقو دة والله ما عاجبني ... عشان كدة مرقت خليت ليهم البلد..
أنا إن قعدت في المسيد كتابة بخرات ومحاية بعيش علا الحاصل مع بعجب زول مرقتها في أم طرقا عُراض...
---
بتصرّف مما حكى لي أحدهم ألتقيته في الخرطوم
---
من زمان نحنا رأينا حتى الأخ المسلم السوداني (الذي يفوق سوء الظن العريض) عندنا أحسن وأبرك من الأخ المسلم غير السودلني

عصاتنا البشربو الدكاي

البلد دي محروسة بالأولياء والقباب قال دالي
قال البلد المافيها ولي يعيّروه بذلك ويقولو ليك "ود شمعون الما فيها فقير مدفون)
قال له أحدهم: نحنا بلدنا ما فيها اي ولي!!
من وين أنت ياخوي؟!
(بفم مليان): من جبل أولياء
ضج الركن بالضحك


عصاتنا البشربو الدكاي

قرآنك دة بنقراهو ليك

خرجنا من منزل أمي آمنة بالحارة الرابعة ... قلنا ناخد أمجاد من الشارع ... خرج الناس لتوهم من الجمعة
لقينا أمجاد في الشارع وبعض شباب حولها ... ياخوانا وين سيد الأمجاد دي عندنا مشوار
قالو لينا سيدها جوة ... خالد سيداحمد ... نادينا خالد سيداحمد ... ما أجاب... قالوا لينا قولو جداد!!
قلنا جداد!! قرررر ضحكوا ... ضحكنا معهم وقلنا لهم مقلبتونا ولا شنو؟!
جانا مارق بمصحفو في ايدو
قلنا ليهو يا أخو عندنا مشوار... قال لكن أنا بقرأ في قرآن ... قلنا له: قرآنك دة بنقراهو ليك!!
والله واضح أنكم شيوخ كبار ومنورين ... خلاص بوصلك ولا باخد منكم قروش
قلنا ليهو لا!! توصلنا وتاخد قروش
طق!! ضرب بيده على المصحف: والله أوصلكم محل ما ماشين وما آخد قروش
طوالي عيون د. مصطفى الجيلي جرت دموع....
ركبنا!!
أها انتو ناس محجوب شريف؟
نحنا أولاد أمنا آمنة جارتكم دي...
يا الله!! يا الله!! أمنا ىمنة دي والله شلناها في أكتافنا للمقابر
45 سنة جاورناها ما شفنا منها غير الطيب
أنتو أحسن ناس
أنتو
أنتو

تاني كررررررررر الدموع تسيل

أنا خالد سيداحمد ودة تلفوني أي مشوار ماشنو ولا ماشيهو واحد من أخوانكم أضربو لي لله والرسول

قلنا ليهو نحن برة قريب ربع قرن لكن متل عمل دة هو البشدنا للسودان دايما

قال "الأخ المسلم اليمني" عبدالمجيد الزنداني:
قال النبي الكريم عليكم بالحبة السوداء ففيه شفاء من كل داء
قال الحبة السوداء هي الشعب السوداني

ياخ والله يا عبد الله انا خجلان منكم
قانل الله. الغضروف،،غلبني قدر ما حاولت
أجيكم ما قدرت
اعفي لي و امسحها في وش تيسير عووضة

Quote: اعفي لي و امسحها في وش تيسير عووضة

يا دفعة بولا .. أنا كنت قايلك شاب خاتي لينا صورتك أيام ثورة أكتوبر (:)
أنت وشك ممسح بي مرقة لكن تيسيير تبرا من دة
والله كنا دايرين نلاقيك لكن النور حمد منتظرك
في كلام كتييييييييير كنا منتظرين نفتو من حنتوب الجميلة لغاية وين كدا ما عارف
الجايات أكتر من الرايحات بس أنت شد حيلك وابقى مارق
سلامتك من الغضاريف

مكتو!! مدينتو!! آمنتو
خرتوم خورشيد أكتظت بالناس والعمران
قال العارف بالله
تعمّر لييييي سوبا
وتخرب طوبة طوبة!!
تجاوزت سوبا الآن ورأيت بأم عيني عمارة من عدة طوابق جنوب سوبا
الكسمبر بها العمير ومسيد ود عيسى وألتي ... نحن المغتربون حقت علينا النذارة
تبنون ما لا تسكنون!!
---
عندي أنا هجرة الناس للخرتوم من الأقاليم ومن تمانية بلدان مجاورة والتُرك والشام
عندي هذه هجرة لأمر روحي علم من علم وجهل من جهل
قلت للصادق الطيب علي طه - من أعيان كوستي وقد ألتقيته في منزل عزاء بالخرطوم
أها ياخوي كوستي محرسنها منو كلكم جيتو هنا؟
قال لي آخرهم بابكر وحاجة آمنة باعو بيتهم ورحلوا سكنو المغتربين

الأعمى شايل المكسر

البيوت مليانة بالطلبة والمرضى وطلاب الحاجات والناس ياها الناس
في كل بيت آمنة
آمنة هذه حكى عنها الشاعر عمر الحسين الذي حقق ديوان حاج الماحي
قال أنها أمراة ذات صلاح باين في منحنى النيل
يأتيها التكارين من كانو وتمبكتو وما دونهما قاصدين "نور البقع" فيستريحون عندها من وعثاء السفر
جيئة وذهابا ... يعودون للتكرون ويحكون عنها كما يحكون عن "القبة التلوح أنوارها"
يوصون بعضهم بعضا
مكتو، مدينتو، آمنتو ...
تشد الرحال الى ثلاث مساجد ... صارت آمنة لهم مسجدا
يكاد يكون دة حال كل بيت سوداني دخلته في المامتي هذه وسمعت عن كثير أيضا

Quote: سعدت بمحادثتك

في ذهني تلاتة أبوسن
العوض مصطفى العوض ابوسن (سنابي ترخيص رباطاب)
عبدالمنعم ابوسن (ما عندو علاقة بسنّاب رفاعة ابسن وهو أستاذ في جامعة البحرين حاليا)
اباشمهنس أحمد محمد علي أبوسن (جمهوري وشقيق عبدالحفيظ ابوسن الواااااحد دة)
تلفوني رنّ
معاك اب سن
طوالي دخلت فيهو شمال أهليييين!! عبدالمنعم ابوسن (زول البحرين)
قال لي ياخ د. عبدالمنعم في السعودية؟! بالله؟! لاقيتو قبل فترة قليلة في البحرين وما عندي فكرة مشى السعودية
المهم طلع دة سناً تاني
يا مرحبا يا مرحبا
سعدنا والله بالمحادثة
وشفناك في أخوك الكبير أحمد محمد علي ابوسن الذي قضينا معه ليلة من ذات الليالي

مما أخرني عن المجي لكوستي يا اب سن - بجانب العمل - مجيء دكتور الخواض عمر أحمد زوج الراحلة محاسن للخرطوم
ممتنون يا صديقي وكثيرا على تفقد حالنا ورعاياكم من عووضة القارح الى الكباشي البدي الجنا
====
قال الحاردلو ينعي ود ابسن
سيد جبارة جبره الجبار ود بت ابشرا
ود اب علي الخبار ول الشرك البقجوه الرجال هبار
وتنيرا مخادة تغرق العبار ابكنك بنات ابسن بقولن كر
وانقد الكان بقود الصافنات الغر
عن شنق الحديث ادي الحديث المر
من جيهة النسل ود الطريفي الحر

حباب أستاذنا عبد الله عثمان

في رثاء الحاردلو لود اب سن قال (ود بت أبشرا)
وتحت قال (ود نسل ود الطريفي)

والكلام ده جاب (السناب) لعندنا هناك
وسط (أهلي العركيين) في أبوحراز

وال ابوسن حبوبتهم (التاية بت الشيخ يوسف أبشرا و ود الشيخ محمد ود الطريفي)

عشان الزول يقعد ليكم الكلام ههههه

مع تحياتي

عبد الرحمن حمد النيل قوي

ياخ ما تشيل حسي،،بولا درسني
في حنتوب والور حمد الدفعة القدامنا
خليك منصف ياخ 😈 😈

اهلا بعودتك يا غوث.العوض ود مصطفى ود العوض الرجل الشاعر الفنان المرهف باقي لي ماهو اب (سن)لكنو ( اب (حجل).

العوض لمان فقد خالتنا (آمنة) بت عطا الفضيل قال فيها مالم تقله الخنساء في صخر
فكيف به اليومين ديل وهو يفقد ابنتها الرضية!
رحمك الله رحمة واسعة يالرضية بت العمدة سلمان ابوحجل.

Quote: خليك منصف يا ....

ﺧﻠﻴﻚ ﻣﻨﺼﻒ ﻳﺎ ﻣﻨﺎﻳﺎ
ﻳﻤﻜﻦ ﺗﻜﻮﻥ ﺍﻭﻫﺎﻡ ﻇﻨﻮﻧ
ﻳﻤﻜﻦ ﺗﻜﻮﻥ ﺳﺎﻛﺖ وشاية

دة عوض أحمد خليفة مش كدة؟!
بكون برضو دفعتك ولا شنو؟!

---
ملاحظتي انو الناس في السودام بعجزوا
بيكون دة الرزق الحلال
حكى لي أخي الباشمهندس الهادي آدم (كنانة) عن نشأتهم وهم عيلة ونجحوا جميعهم
هو يعزو ذلك لتحرّي والدهم الرزق الحلال
حكى لي قصةة لطيفة ومؤثرة ... قال أنه كان يرعى الغنم ... قلت له الحديث "ما من نبي الا ورعى الغنم"
يبدو أن غنماية مات سخلها فعزاها الهادي وهو بعد طفل... يقول لها أنا ولدك وأنت أمي
يرقد لها على الأرض ويرضعها كما يرضع السخل أمه .. تحن عليه وتحاول تضمه اليها بجسدها كله
كان لها في ذلك بعض تعزٍ

لعل ذلك، روحيا، ما ساق الهادي وأسرته كله الآباء والأحفاد الى سوح الأستاذ محمود محمد طه
مندري؟!

Quote: اب (سن)لكنو ( اب (حجل).

أووووه باشمهندس محمد الشيخ
هو أبو سن وهو أبو حجل كلاهما ولكنه يحب ابوسن أكثر ويزيّل بها لوحاته
ذكرناك عند الفكي عابدين موسى وقد ألتقيته قادما من بورتسودان معزيا في أختنا الجمهورية بلالة الأمين ابوالقاسم
زوج الأخ يوسف عبدالحفيظ
جبنا سيرتك وسرة أبوك وأبوهو وسؤال الأستاذ محمود محمد طه لهم
زرتو السيد علي؟
تقصد السيد محمد عثمان؟
السيد محمد عثمان في مصر
بقصد السيد علي...
السيد علي مات
كمان الخلفاء شبر تراب بحجبهم من السيد علي؟!

هلا!! هلا!!
---
نعم فقد آل ابوحجل اليوم أبنتهم أم العز سليمان في حادث حركة بالقرب من مطار الخرطوم لها الرحمة الواسعة
التعازي لكم ولآل ابو حجل وآل الصوفي

سلام الاخ عبدالله عثمان وضويفه

لي علاقة خاصة مع الاخ عثمان عووضة فهو صاحب مشاغب .. اتصل علي قال معاوية الزبير وصل
السودان وفي كوستي بكرة جايي الخرطوم لكن هاك تلفون عبدالله عثمان الجمهوري قلت ليه يازول متاكد
رسل التلفون واتصلت عليه للمطايبة والمقابلة غدا وعدني انه سوف يتصل علي .. تاني يوم الصباح اتصل
انه موجود في الخرطوم ويريد السلام علي وبسرعة اتصلت علي عثمان عووضة وتقابلنا معه في نفس مكان
حدد وبسرعة .. كان اللقاء غريب وعحيب كاننا نتعارف منذ سنين وسنين ووجدت معاه كوكبة من العلماء
منهم زميل المنبر دكتور مصطفي الجيلي وتم التعارف بيننا وتطايبت النفوس بدون اي حواجز وجلسنا
في أنس عام وذكريات جميلة كانت من العم عثمان عوووضة وتفرقنا علي ام نلتقي مرة اخري
وكان الاتصال الاخر مني بعد يومين فقام الاخ عبدالله عثمان بفتح التلفون دون الرد وبعد مسافة رد علي
مع الدعوة بالحضور اليهم في منزل اخيهم في الخرطوم وذهبت اليهم مع زوجتي وكانت جلسة كبري حضرها
لفيف من الناس الطيبين والرجال الذين تسعد برويتهم كنت جلوس مع الاستاذ طلب فهو رجل موسوعة من العلم
والاخلاق وكان بجواري الاخ الطيب محمد الحسن نسيب عبدالله عثمان وهو يقرب لنا من ناحية حبوبتنا جميلة
وكانت زوجتي تجلس مع ماما نوال والاخوات شويدن والدكتورة نزيهة وأخوات أخريات جلسنا معهم حتي اخر الليل
وتناولنا معهم وجبة العشاء وحضرت مجلسهم وتم اهداء منهم الي قصيدة كاربة .. وقدم لي الدكتور مصطفي الجيلي
كتاب رسالته في الدكتوراة هدية منه قيمة وودعناهم علي امل الحضور الجمعة الي عقد قران ابنهم يوم الجمعة في
جبرة الساعة الرابعة عصراً وكنت حضور مع آلاف السودانين وشهدت العقد وكان بسيط في كل شي وتمت خطبة
العقد وكانت تتحدث عن تبسيط الزواج والإصلاح بين الازواج واستدل بقصة مع سيدنا عمر بن الخطاب رضي الله
عنه واشترطت الزوجة والزوج ان تكون العصمة بينهم بالتراضي وان لايعدد عليها الا وفق الضرورة القصوي

-----
كانوا اخوة متحابين بينهم يقبلون الجميع بصدر رحب

ولد ناس شيخنا الكباشي
يميين يزورو فوقك عدييييييل كدى

الكباشي!! خصيم السم الماشي
بصدللكم
علا باكر
يا دووووبك رجعت ووراي قفايا أعوج بالحيل
باكر نلتقي
والكباشي قيدو فوق شبلو

طولنا من الحكاوي الطاعمة زي دي وذكرتنا عبيد الطيب واسحق ود بلة وو
د البوش وود شيقوق . .والردود اوسكار ...وياريت تواصل.
مع وافر التقدير والاحترام

سلام سعادة الدكتور الدرويش عبد الله بن عثمان

لو انت و مصطفى الجيلي رجعتوا السودان الحال بنصلح

السلام عليكم شيخ عبد الله.
والله هنيالك. إنت في أرض الكرام و سنة سعيدة و إن شاء الله موعودون فيها بنفحات بعد زيارتك المباركة هذه

شنو يا عبدالله ياخ فاكينا بي نبلة كدة
تخيل بعرفك قبل ان تعرف احمد اب سن .
كنت دفعة ناس منعم وعادل اخوي في سنوات الدراسة الابتدائية اظنها الاهلية ولا نمرة
ثم صرت معلما للثانوي
مع اني متأكد من معرفتك لي الشخصية لكن اظنك كنت غرقان
معاوية و عووضة لامن اديتهم الرقم راجعوني كم مرة كأنه خطأ واظنني لحقتك برسالة

ساووا السودانيين في الفقر الى أن يتساووا في الغنى
الأستاذ محمود محمد طه

في البص من ود مدني للخرطوم لاحظت كثرة طلاب الحاجات ....
تذكرت "ولو جآءكم على ظهر فرس"
في تقاطعات اشارات المرور كذلك رأيتهم بكثرة
مما يطمئن أن الناس لا تزال تعطي ومثلهم "الجود قطع من الجلود"
مع الأوضاع الإقتصادية المتردية والناس تدي دة بيؤكد عندي إنو الدين متجذّر عند هذا الشعب الطيب
لاحظت كذلك لافتة ضخمة في مطعم سوري يشكر فيها صاحبها الشعب السوداني
---
حكيت أطرافا من هذا لصديق سوداني يعمل في الأمارات ... قال لي ما معناهو أصلو السودان دة فيهو سر
حكى لي عن مبتعث أماراتي للسودان لما أنتهت فترة بعثته زوجته قالت ليهو دايرني أرجع تاني عشان أسوق أولادي للمول
الجمعة والسبت ... انا ما راجعة أرجع براك ... قال أنو السيدة دي أتلببوها ليك جارتها من بيت سماية لي شوبش لي ظار (:)
دخلها الا اليمرقو ود الكباشي .... قال زولها طلب تمديد وقعد .... يحلو الحلّ بلة الغايب والحاضر
----
في قديم الزمان قال ود حاج الماحي
قلوب الأمة حراقو
جاب تكرور مدرمس يمشي ساساقو
حازمين البطون ولباسو دلاقو
كل زولا قريعة وفي ايدو مزراقو

---
ديل كانو عانين "نور البّقع" ولكن Mr. J. A. Bright
كتب في الـ Junior
الذي درسناه زمان
في درس الـ Past tense
Nigerians came from Nigeria to go to Mecca, but they found Sudan best

سودانا فوق
سودانا فوووووووووووووووق

Quote: سلام سعادة الدكتور الدرويش عبد الله بن عثمان لو انت و مصطفى الجيلي رجعتوا السودان الحال بنصلح

أوووه الزعيم مسعود محمد علي
السودان اليومين دي حالة عليهو بركات اخوكم د. آدم محمد علي فيا بخته
قابلت د. النور حمد وقلت ليه عن حال السودان - رغم حلاوتو - لكن يبدو الحضرة قررت معاقبتو

وارد عندنا انو الحضرة النبوية كانت قررت في زمان سابق معاقبة السودان ولكن الشيخ الطيب أعترض بشدة
وكان يردد عبارة "الله لطيف بعباده!!! الله لطيف بعباده"
يقال أنو سيدنا النبي أتدخل وقال "أنا مع أبني الطيب الله لطيف بعباده" ورفع البلاء
نرجو ان يكون قد رفع بلا عودة
السودان فيهو عارفين كتاااار ومنهم شقيقكم د. آدم ووراد عندنا مجرّد وجود العارف يخضّر الحياة من حولو

قوزاً أخدر على السودان وأهل السودان
في البص لي مدني جابو لينا وهابي في الفيديو كلّم الناس عن النار والعذاب فلاحظت وجوما في الناس
ثم جابو وهابي تاني اسمو مين كدة حاج سيد ولا حاجة كدة ونفس الوجوم
أعقبتهم فنانة شابة ممتلئة حياة اسمها حنان لندن ولا ايمان لندن ما عارف البص دة كلو زي البقت فيهو قمرة اربعطاشر

بشرّوا ولا تنفروا

هم ناس حلوين ويستاهلو كل الخير ياخ

العزيزة إمتثال عبدالله
سلام مربع
في السودان
كل كلام تقولو حلو

انا ظليت ليومين أو ثلاثة بعد عودتي من الأجازة أصحو وأتخيل نفسي في السودان
ياخ قصب السكر دة غير (:) .....

لاحظت وبخاصة في الجامعات زي في هجمة مرتدة على ما يسمى زورا وبهتان بـ "الزي الإسلامي"
بعدما اتضح للناس أنو الموضوع كان مجرّد "عدة شغل" زيو وزي الدقن وثفنة الصلاة
في الأحفاد بخاصة وقريبا من "داعش" مامون حميدة شفت البنوت لابسات لبس السرور
لابسات زي ما لابسة البت القيافة الغنت في ختام الدورة المدرسية وقام البشير وعصابتو
بعدما "دسوا الدقن تحت الكاب" وعرضوا فيها صقرية وغيرو بلا نظام عام بلا مطاوعية

"غريب" يعود السودان السودان وقد تمّ تصدير الهوس لبلد المنشأ (البنا والبناول الطوب)

هيلاااااااا هوب

الله في

يا قاصد الخير تنيل .. زور الشيخ حمد النيل

العزيز عبدالرحمن حمد النيل قوي .... أعراك!!! ملوك!!! سلاطين!!! أككك!!
جامعين التلاتة صلاح وسر ورجالة
عبدالرحمن يغلب اسمه عند الأنصار
وحمد النيل* ماركة مسجلة عند العركيين حتى لقد حسبت يومد دفننا د. عفاف الصادق حمد النيل أنها منهم
قويّ أسم فرع كبير عند الجمهوريين (الصادقاب منهم بخاص)
جامعين التلاتة صلاح وسر ورجالة
---
في زيارتي الإلمامة هذه زرت حمد النيل عدة مرات ..
أردد دائما ما حكى الفنان ابراهيم الصلحي (له فضل لفت نظر كثير من تلاميذه للأستاذ محمود محمد طه)
أردد ما حكى عن أنه رأى مناما - هو في لندن - الشيخ حمد النيل يقول له ما معناه انه ضمين أم درمان
ومن يدفن حداهو الحبة ما بتجيهو ... قال جا سوّر له بكان ... ويا بختو بعد طول عمر في الصالحات
---
يقول الأستاذ محمود محمد طه من حسنات الخليفة عبدالله جاب الشيخ حمد النيل لأم درمان

عرفت مؤخرا ان الشيخ حمد النيل كان مدفنه عند كبري أم درمان قبالة المقرن وتم تحويله لمرقده الراهن

مدد ... مدد... مدد...

أستاذ عبد الله تحياتيعلى ذكر الراحلة د. عفاف الصادق لها الرحمة وعلى حد علمي أنها من أهلنا العركيين في (المسلمية)لكنها (المعايش) التي قادت أهلها الى نيالا ... شايف كيف؟

نعم ... انا أعلم أن مدفن الشيخ حمد النيل في أبوسعد على ضفة النيل ونقل لاحقا" الى موقعه الحالي
وكان ثالاث ثلاثة جدنا الشيخ أحمد الناجي مات ودفن في مقابر الصبابي والشيخ محد يونس أدرك نهاية المهدية وعاد ودفن في ابي حراز
وضريحه هناك من المزارات

يا عبد الله عثمان انت مالك حقار
كدا ياخ
وينها سيرة شيخ عووضة القارح؟؟
زعلان منك ياخ

تحياتى الدكتور شيخ عبد الله مشتاقين للمطايبة والتبرك من حمد النيل

Quote: لكن اظنك كنت غرقان

هلا هلا الملك ود أب سن
كيفن تغباني؟؟!! لي هسة طعم الشاي الشربتو معاك في مطالع نوفمبر 2015 في خشمي (في الخليج الخشم الأنف)
أني ولا بنغرقو
من يعلّق بنا يغرق
بمناسبة الغرق، يقال والعهدة على الرواة ان السيد الحسن (يلحقنا ويفزعنا) كان زوّرا للأولياء وذلك مما حقق به ولاياته الكبرى
يقال أنه لما نزل سوح الشيخ يوسف اب شرا أهاب الشيخ ببناته أن يذهبن للسلام على السيد الحسن
حسب الميثولوجي السنابية فإنهم يقولون أن الفقيرات لفحن تيابهن فسراع فسراع فسراع وخترن له دغشا بدري
يقال أنهن وجدنه في حضرة ملكوت فنفح ذرياتهن من تلك الحضرة فصاروا أهل السجادة وشيوخا للمسيد
وبحسب الرواية، والعهدة على الرواة، أن التاية أم السنّاب، تحفّلت وذهبت عصرا فوجدته في حضرة ملك
فنفح ذريتها من تلك الحضرة فصاروا ملوكا
يقال أن ود أب سن، وهو في رياشه وبحبوحة عيشه، داعب بعض أبناء خالاته من الفقراء مادحا صنيع جدته قائلا له:
إن كان حبوبتنا تبعت حبوباتكم، كان دي الساعة أباريقنا وسباحنا يطاقشن

---
مرحب بيك يا ملك

سلام الاخ الدكتور عبدالله عثمان وضيوفه
الشخصية الانسانية البسيطة التي يتمتع بها الاخ الدكتور عبدالله عثمان تجعلك تعيد حساباتك في الدنيا البسيطة اكثر من مرة
شخص بلغ درجة علمية ووظيفية في المجتمع المادي الان يجعله يعيش في عالم الجري وراء هذه الاشياء ولكن اخونا عبدالله عثمان شخص
غير ملكته الطيبة الفطرية الحقيقية التي تجبر كائن من كان التقي به ان يحترمه ويسعي ان يكون مستمع له في تاني حقيقي لنيل المعرفة
البسيطة من السلوك الإنساني العجيب الخاص الذي جبل عليه وارتاحت نفسه لمواصلة العمل والسير فيه بأريحية لاتوصف اكتب لكم عن
شخص تقابلنا في ظرف سريع قدر لنا ان يكون زمنه محسوب لارتباطاته مع أناس لاتجمعه معهم الا المحبة والمواصلة في الاجتماعيات
الخاصة .. قدر الزمن الحسابي بضيق الوقت ولكنه أخذ سعة روحانية حقيقية جعلت المعرفة كأنها سنين طوال او ابناء منطقة او عمومة او
بينهم من التواصل الحقيقي القديم بينهم ..

-----
المهم لي عودة في هذا الموضوع عن صاحب البوست والدكتور مصطفي الجيلي والوالد الاستاذ طلب زهران وماما نوال