Post: #2
Title: Re: الدولار 29.20 جنيه
Author: امتثال عبدالله
Date: 01-03-2018, 04:11 PM
Parent: #1
لا ومش كده وبس
انا بعت صباح اليوم دولارات..والدولار الواحد ب ٢٩.٢٥ جنيه..
ويبدو ان الدولار ما حيتوقف من الصعود الى الاعلى الا بتغيير سياسات
الحكومة الخرقاء وزيادة الصادرات النقدية وتخفيض الواردات الكمالية..
مع وافر التقدير
|
Post: #3
Title: Re: الدولار 29.20 جنيه
Author: Nasr
Date: 01-03-2018, 05:51 PM
Parent: #2
وزيادات بهذه المعدل في سعر صرف الدولار
تعني أنه سيكون هناك تضخما منفلتا في السودان
أخشي أن يتجاوز معدلات التضخم في زيمبابوي والصومال
قالت إمتثال
"ا...... وتخفيض الواردات الكمالية.."
طالبتي القطط السمان بما لا يقدرون عليه
أن يتخلوا ولو بمقدار سنت عن مستوي حياتهم
وسيكون رد أبناءهم وبناتهم الحناكيش :
مش كفاية رضينا نقعد ونقرا ليكم في السودان دا!!!!!
وسيكون رد المترفين:
آي يا أولادي كلامكم صاح
نحن ذاتو مضحين بشوية عشان نحكم السودان دا!!!!!!
وحيجي تفاح من فرنسا
ومنتجات ألبان من هولندا
وبرتقال من اليونان
وأثاث من إيطاليا
ودهب مشغول من دبي
ولا يدرون أن المنسأة قد أكلت عرش سليمان
|
Post: #4
Title: Re: الدولار 29.20 جنيه
Author: امتثال عبدالله
Date: 01-03-2018, 07:34 PM
Parent: #3
والله يا نصر القطط السمان ديل هم سبب البلوى في السودان، والمصيبة القطط السمان ديل هم
اصحاب القرار ومنفذي التشريعات والقوانين ويشرعون فقط ما يتماشى مع مصالحهم الشخصية
وليس مصلحة البلد ومصلحة الشعب المغلوب على امره،،ولمن شفنا بوست منى عمسيب وقصور
النافذين عرفنا ان البلد دي ما ممكن تمشي لقدام الا يحكمنا رئيس مثل قاهر الفساد الرئيس التنزاني
الذي شن هجوما على الفاسدين في حكومته،،،لكن مين يقول البغلة في الابريق،
والله يا نصر انا بستعمل المثل ده ولا عارفة مناسبة البغلة في الابريق ،لكن عارفة انه مثل بيضرب للحاجة
المستحيلة تحدث،،وطبعا مستحيلة حرامية الحكومة يتوقفوا عن نهب المال العام.
ومع وافر التقدير
|
Post: #5
Title: Re: الدولار 29.20 جنيه
Author: Khalid Elsayed
Date: 01-04-2018, 07:33 AM
Parent: #4
الاخت امتثال والاخ نصر
منقول
استيضاح !!!
معليش يا شباب طولو بالكم معاي شوية وخلوني استعرض معاكم بعض بنود ميزانية 2018 عشان تعرفوا انو الكيزان قاعدين يعملو في شنو ( الارقام بالمليار وبالجنيه الجديد ) :-
حجم الموازنة = 173.143
الايرادات المتوقعة لتمويل الموازنة :-
الايردات الضريبية = 75.100
المنح = 8.100
الايرادات الاخرى = 33.700
الاستدانة = 00 55.3
مبيعات اصول مالية = 0.343
مبيعات اصول غير مالية= 0.600
لحدي هنا الارقام منطقية لكن الخوازيق جاية تحت :-
زيادة جمارك الدقيق بنسبة 10%
زيادة جمارك مكونات صناعة الاغذية الى 40%
زيادة جمارك سلع اخرى ( لم يتم تسميتها ) بنسبة 40%
تخفييييييض
تخفيض التبغ الخام بنسبة 10%
تخفيض المونيوم الاواني بنسبة 20%
تخفيض مصنوعات الاحذية 10%
تخفيض جمارك اللساتك والمطاط ب 10%
تخفيض جمارك البكاسي ب 30%
( تاكلو نعلات ولساتك بس تاني يا شباب ، وناس البوكسي اب زيق حظكم )
* نجي للخازوق الاكبر والطاعون المستمر في الدولة :-
- الوزير اعلن الى خروج ايردات البترول من الموازنة تماما ؟؟؟؟؟؟؟؟
نوريكم الوضع :-
انتاج السودان اليومي من البترول = 110000 برميل
سعر البترول = 60 دولار ( خام خفيف )
عدد ايام السنة = 365 يوم
السعر الرسمي للدولار الحالي = 15.8 ( حسب سياسة الحافز )
ايرادات البترول المتوقعة :-
110000×60×365×15.8 = 38.06 مليار جنيه سوداني !!!!!!!!
- لم تأتي الاشارة لسلعة الذهب في الموازنة لا من قريب ولا من بعيد مع العلم ان نصيب حكومة السوداني من الذهب هو 25% اي 33.5 طن ( والباقي قادي السلك ) وسعر لطن عالميا 40 مليون دولار فايرادات الذهب =
33.5 × 40000000×15.8 = 21.172 مليار
- دا غير ايرادات كتيرة تم جملها في بند الايرادات الاخرى وهي ( المعادن غير الذهب والبترول وايرادات الكهرباء والغابات والكثير جدا من الايرادات )
* بند المنح الذي يساوي 8.1 مليار جنيه غير حقيقي البتة لان المنح وحسب وزارة التعاون الدولي تساوي اكثر من مليار ونصف دولار وسعر دولار الدولة الرسمي للواردات هو 15.8 والدولة تحسب لنا هذا البند بسعر 6.7 اي ان هنالك اكثر من 19 مليار جنيه سوداني فرق ، اين يذهب هذا الفرق ؟؟؟؟؟؟؟؟؟
باختصار الذهب والبترول وفرق سعر المنح = 78 مليار دولار وما داخلة في الميزانية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يا وزير المالية اذا كان نوام البرلمان غافلين وناس الصحف غافلين نحن ما غافلين
نقول شنو غير حسبنا الله ونعم الوكيل .
منقول
|
Post: #6
Title: Re: الدولار 29.20 جنيه
Author: علي دفع الله
Date: 01-04-2018, 07:51 AM
Parent: #5
انشاء يوصل 100 ج
|
Post: #7
Title: Re: الدولار 29.20 جنيه
Author: Khalid Elsayed
Date: 01-04-2018, 07:56 AM
Parent: #6
لو وصل 200 ج ماحتصل حاجة
شعب لمن يعلنو عن زيادة وقود تجده صفوف في الطرمبات
|
Post: #8
Title: Re: الدولار 29.20 جنيه
Author: ابو عثمان
Date: 01-04-2018, 08:39 AM
Parent: #1
أين الصحاف ود الباوقة ؟
|
|