يا وزراء و يا مسئولين: تويتر ده فيه عقرب ؟؟؟؟؟ طمِّنونا!

11:57 AM December, 30 2017

سودانيز اون لاين
محمد عبد الله الحسين-
مكتبتى
رابط مختصر

يا وزراء و يا مسئولين: تويتر ده فيه عقرب ؟؟؟؟؟

الان استمع للاخبار :

رئيس ليبيريا المنتخب الجديد يوجّه تغريدة للشعب…طيب جماعتنا ديل اميين؟؟؟

معقولة و لا تغريدة واحدة من رئيس الجمهورية أو نائبه أو من أي وزير في أي حدث مهم؟؟؟

بنسمع في الدول الخارجية حتى معظم دول الخليج الدول العربية كلما يحدث شيء ينبري الوزير أو الوزارة المسئولة لتنوّر الشعب ‏‏…

إلا نحن يا كافي البلاء…يا ربي نحن مالنا ما بينوّرونا؟؟ ‏

صم؟
‏ و الا ما بنفهم ؟

و الا شنو الراي؟ ‏

ايوااا عرفت السبب…‏سبب الصهينة يعني.

الحكومة في السودان بتشتغل بنظام الصهينة…..خاصة في الموضوعات العاجلة و المهمة..

......رغم إنه احتمال الإشاعات ‏تملأ البلد…و لكن الحكومة بتكون صاااانّة ..هس هس( السكوت من ذهب)…......

إلى أن ينجلي الموقف…و لسان حالهم يقول:

‏الشعب ده اضينة هسه بينسى…:

- تقوم نطلع خبر عن جريمة أو عن عصابة بتسرق و الا بتكتل أو عن واحدة جلدوها ....و الموضوع ينسوه ليك..‏

- أو نعمل حفل فيه انصاف مدني أو احمد الصادق و الا اخوه ....أو نشغّل ليك اغاني في النيل الأزرق و رقيص من الضهر....

الحكومة اللي بتحترم شعبها بتطلعه اول بأول عن كل شيء حتى صباح الخير بتقولا ليهم…‏

لكن الحكومة البتستحقر شعبها حتى الموضوعات المهم تصين منها و بعدين تعمل نفسها ديموقراطية و تكوّن لجنة تحقيق ‏‏…

و الموضوع يدبّروه من جاي لي جاي لما يبرد …و في الآخر يطلعوا ليك تقرير لا يغني و لا يسمن من جوع…زي ‏بيان وزارة الخارجية و بيان (عبدالله بتدّقا)‏

يعني البيان ذاتوا ما مقنع …

تقول لي تويتر؟؟

تويتر ده للناس الراقين…‏قوم لف!