ولدي مابشرب مريسة !!

11:11 AM December, 23 2017

سودانيز اون لاين
عبداللطيف حسن علي-
مكتبتى
رابط مختصر

بوست ترفيهي ....(اصلا منبر رجرجة ودهماء)

بوستاتي الجادة قاعدة بهناك

الفكرة منبثقة من بوست الباسطة بتاع قباني(بوست الدهشة المستمرة)

ولو شاركت بمداخلتي العايز اكتبها هنا في بوست الباسطة اكون طيبان اكتر

من اللازم ،،،،،

زوجتي مجرد صورة كعكة بتاعة واتس ابت ترسلها في راس السنة ورسلتها

تاني يوم بعد فقدت طعمها ، اقوم اجي انا اكتب مداخلة زي دي مجاااني كدا ....!

لو تتذكروا كتاب العرقي الكيميائي والموت الفجائي لواحد ضابط شرطة

لو تتذكروه احتفظو بيه في سركم

جايز تكون في علاقة

عبداللطيف حسن سلامات

البقنية أم رغوة مع المطرة الصابة تحت راكوبة تعبانة خطرة شديد

Quote: عبداللطيف حسن سلامات البقنية أم رغوة مع المطرة الصابة تحت راكوبة تعبانة خطرة شديد

سلامات ياعظمة ، الراكوبة ياها جنس المنبر دا

نشرب مريستنا وخليه يملانا طين لامن بهناك

هههههههه
لطيف يا بهجة ولدك ما بشرب المريسة وانت خبرك شنو😂😂

واصل البوست سيجد حظه من الانتشار لانو البوستات الجادة بقت مملة 😃

علي يا اسمح زول 😁
عشانك بس ح اقول
ياحليل المريسة وحليل زمنها😜

يا علي دفع الله شنبك دا فيه حلاة شفشفة مريسه
تشرب وتقش باقي الرغوة الفي الشنب باللسان وتهز رأسك
وتقوم تدقش عود الراكوبة

والله ايامكم ، عبابيركم تتطاقش !

سلام سيد البوست و الجالسين علي البنابر !

....

علي دفع الله الزنديق ، طبعاً كلام المرايس دا بعجبك !ش
زي ما قال ليك عبد العظيم ، شنبك دا زاتو النوع البصفٓو بيه المريسة !
شايفك قبل فترة قلت للمستنير إنّو بشبهني .... دمٓرتني يا وغد .... و جاييكم بالمهلة 😜

...
تحياتي للجميع

مجرد ثقافة عامة : البقنية درجة الكحول 3- 6 % وهي درجة لا تؤهلها لمسمى الخمورالبيرة درجة الكحول 7-12 % الخمور بنوعيها الحمراء والبيضاء 13 -20%20% فاعلى دراي جن للراغبين في مغادرة عالم الوعي، لعلم الجميع العرقي خارج التصنيف وقد يفوق النسبة المسموح بها عالميا وليس في العلم حرج ... هذه نتائج تحليلات مختبرية راكوبية

استاذ لقي تلميذو في الانداية
خاتي جردل مريسة قدامو زعل مشي لابو
الولد.
الاب قال متاكد ولدو مابشرب مريسة
الا يكون ما لقي عرقي

جارنا بقبضوهو كل اسبوع سكران
ويدخل السجن بسبب الغرامة الكبيرة
اخر مرة وهو طالع واحد محكوم سنتين اداهو جنيهين
قال جيب معاك صعوط

غايتو يا عبد اللطيف رغم احتمال اتهامي بمرض البرجوازية الصغيرة الا اني فعلا لا اعرف
كيف يستسيغ بعض الناس شراب عجين خمران.
زمان كنا بنمشي نصطاد سمك في حلة كوكو ومرات في سوبا، المهم في الطريق كنا بنعدي على
بري ابو حشيش بنجيب حاجة اسمها "مشك" وهو ناتج تصفية المريسة لأنو عندنا عمنا كان
مقتنع بنظرية مفادها انو المشك بيلم السمك لما ترميهو في الموية حوالين السنارة. هناك كنا بنشوف
الجماعة خاتين جرادل المريسة قدامهم من دغش الرحمن ومتكلين بمزاج. منظر المريسة الشفتو
داك لا يغري اطلاقا بشرابها. عندنا اصحابنا برجوازيين صغار ههههه بجيبوا المريسة دي ويخلطوا
معاها بيبيسي وما متأكد بالضبط لكن يتخيل انهم برضو كانوا بزيدوها طحنية وحسب كلامهم
انها بعد التعديلات دي بتبقى حاجة تصلح للاستهلاك الآدمي.

Quote: الجماعة خاتين جرادل المريسة قدامهم من دغش الرحمن ومتكلين بمزاج. منظر المريسة الشفتو داك لا يغري اطلاقا بشرابها

سلامات يا أبو السيوف
تعرف دي برجزة منك ساي ..ومن صفات البرجوازية الصغيرة
التردد " إنت قدامك الجردل ما تجرب "بقة بقتين" وبعدين أحكم

اها يا عبد العظيم ما قلت ليكم بطلعوني برجوزي هههههه
انا والله ما برجوازي لكن ود افندية و ووالدي رحمه الله ما كان يحب البلدي.

مع جقلبة نتائج إمتحانات السيمستر في جامعة الجزيرة
إثنين من أولاد المنشيىة لقوا النتيجة فيها F
وضلمت الدنيا قداهم وقالوا الزهجة دي تتفكا بي سكرة
وهم ما بعرفوا زقاقات القصة دي
لم فيهم زول صاحبنا شفت شال منهم القروش
وغتس جاب ليهم "الشربة" في كيس ساطقة وفيها ثلج كثير
الجماعة يشيلو ويشربوا سكروا وشغالين نبز وسب دين تقيل
بعد 15 سنة إكتشفوا إنهم شربوا شفن آب مخلوط بإسبرين

حكاوي المريسة من اجمل الحكاوي

قريبنا محمد الشهير بالكعوك كان بحب المريسة جداااا وبسميها الونيسة وعندو قصص وحكاوي لا تمل بركب كاروه من الصباح اول شيء بصطبح بي عبار دقة وبعلق لي حمارو بي مشك ببقى هو حمارو آخر نعنشة في بداية ايام هذا النظام عانى معاناة ما عادية لكن دي ما المشكلة .قلب عرقي لانو ساهل وبتشيل وبتتخارج لكن حمارو اضرب عن العلوق وبقى ضعيف وشكلو اكتأب الكعوك حزن على حال حمارو في النهاية الحمار مات .

عند يا شباب هنا في نواحي سنار المريسة وجبة ومعظم الاهالي بعتبروها ما حرام بتلقى الشيخ بدرس في الخلوة والعبار جمبو يا اخي ديل في نفاير حش العيش عندهم مقولة محفوظة (تحشو عيش تشربو عافية)

الى الملتقى في خاطرة قادمة
دمتم

رائع عبد العظيم شكلك ديالكتيكي متمرس ، طبعا اهم صفات البرجوازي الصغير ما يلي:
التعالي على الطبقة
التردد
ضيق الافق ... حتى قيل ان خصرها اضيق من افق برجوازي صغير
حب العلوم النظرية وعدم القدرة على التطبيق
احتقار الفقراء وتزلف الاثرياء
القناعة بان المال ياتي على قدر الفهم
من كن فيه فهو برجوازي

عن عبد اللطيف عن عبد العظيم ان دكتور عبد المطلب قال :
ست من كن فيه كان برجوازيا معلوم البرجزة، قلنا ما هُن يا دكتور عبد المطلب؟
اصلح رباط عنقه ثم قال ( التردد وضيق الأفق والتعالي على الطبقة وحب العلوم النظرية
مع العجز عن التطبيق واحتقار الفقراء وتزلف الاغنياء.) قلنا ثم ماذا يا دكتور؟
قال ( القناعة بأن المال يأتي على قدر الفهم.).

شكلك يا سيف النصر ، لقيت ناس قصي مافشين واتفسحت ... هسة كان الزموك بالاستتابة .. شكله تهديدات ترامب اثرت على المنبر.

اُسلوب الاقتباس مافوقو حاجة يا دكتور 😊

شكرا للجميع.اتداخل من تلفون وعزائي
ان البوست يحكي تجارب وخواطر
المريسة مهما نكتب عن عالمها لن نوفيها حقها
مرحلة تاريخية واقتصادية وثقافية ساهمت في كافة نواحي الحياة

كان مات فكي كانو ماحصل شئ
كان مات مداح'بلا وانزاح
لكن كان مات مراسي فراقو علي قاسي
احد مقولات الزمن الجميل
مجتمع بكل اطيافه.الحداد السواق الخدرجي الطبيب المهندس المعلم الفنان المثقف الخ
حركة كاملة للاقتصاد في البيع والشراء.من الطاحونة للسوق الي ترابط مع اناس جدد لمجرد ان جمعهم جردل مريسة وتبادل ثقافات واسع لكل جغرافيا وارث البلد ياتيك في مكانك.المهم تتفرغ بس

العالم دا كلو اختفي لانو الحتات كلها اتباعت كما قال عبدالرحيم حسين والمريسة تحتاج اطراف البلد
اليوم لوعايز عبار تدفع قصادو مايوازيه مائةمرة ودا ترف وجنون

العالم دا كلو اختفي لانو الحتات كلها اتباعت كما قال عبدالرحيم حسين والمريسة تحتاج اطراف البلد
اليوم لوعايز عبار تدفع قصادو مايوازيه مائةمرة ودا ترف وجنون

يروى والعهدة على الراوي ( ما أنا ) أن السيد عبد الرحمن المهدي زار إحدى القرى الأنصارية، ممن يصطبحون بالمريسة ويفطرون، فدخل منهم وفد بمناسبة زيارته لحسم موضوع المريسة، فهم لا يطيقون فراقها، وحكاية التحريم دي ما خاشة ليهم في راسهم، السيد عبد الرحمن فكر في الموضوع مليا وقال ليهم: المريسة دي ما حلال، لكن " أشربوها وقلبكم كاره " ... يا زوووول جماعتك شالو الفتوى .. واحتفالات شديدة عرضة ونطيط قالو : والله سيندنا قال لينا في المريسة كلام .... قررررب يحللا لينا.

في تمانينات القرن الذي انصرم وفي ميز الكهرباء بالدمازين الجماعة بيتحلقوا حول اخونا الباشمهندس (س) الذي اتي من الرباطاب
وكان يحمل كمية من البلح قام بتوزيعو على الأسر حول المنطقة السكنية.
ناس الميز قالوا ليهو ونحن حقنا وينو؟؟
قال ليهم: انتو التمر بتاكلوه كمان؟ انتو بتشربوه بس.

كيف يستسيغ بعض الناس شراب عجين خمران.
ــــــــــــــــــــــــ
عظمة ليهو حق يقول عليك برجوازي صغير

ياسيف !

انت ضوقا بعدين احكم ، متاكد ح تندم علي حكمك المتسرع دا

المريسة بتخلق في الزول قدرة عجيبة علي الحكي الممتع المترابط

مازي العرقي البخليك تنسي انك كنت واقف وين قبل مايقاطعوك

وانت دكتور حقو تدعو لمؤتمر مريسة للحد من انتشار مرض الكلي

مقلبت المتداخلين ديل كلهم يا عبد اللطيف
قانون النظام العام ووكلاء نيابته في انتظارهم بمطار الخرطوم والتهم :
1- الترويج للمسكرات
2- الدعوة لشرب المسكر
3 - التشجيع على العصيان وازدراء الخلق القويم
4-
5-

إثنين من أولاد المنشيىة لقوا النتيجة فيها F
وضلمت الدنيا قداهم وقالوا الزهجة دي تتفكا بي سكرة
ـــــــــــــــــ

انت ياعظمة قاصد النشيشيبة ؟!

قصتك بتاعة ال F دي ذكرتني واحد صاحبنا قالوا ليه لو ضربت ليك كباية

عرقي ودخلت امتحان الرياضيات بتقفلوا لان الذكاء بزيد

ولانو طماع وعايز يبقي خارق الذكاء قام ضرب كبايتين ,,ووقع في الورقة رص شديد

فإذا به يحرز F حتي بانت نواجزه من المغسة

ضيق الافق ... حتى قيل ان خصرها اضيق من افق برجوازي صغير
ـــــــــــــــــــــ

يادكتور عبدالمطلب ، الزهايمر بدا ول ايه ، ياخي دا اجمل بيت شعر

واظنو لكمال الجزولي

عينا حبيبتي نقابتا عمال +++++ وخصر حبيبتي اضيق من افق برجوازي

شدة ماكان عاجبني كنت كاتبو قدامي في دولاب غرفة الداخلية


زمن غريب ، انتقلنا من ثقافة اليسار لثقافة الله اكبر والعوارات الكيزانية

وحكاية التحريم دي ما خاشة ليهم في راسهم، السيد عبد الرحمن فكر في الموضوع مليا وقال ليهم: المريسة دي ما حلال، لكن " أشربوها وقلبكم كاره "

ــــــــــــــ
برضو تطور في فكر الانصارية !

مرة كنت في الجزيرة ابا ، دخلوا انصار عجايز من زمن المهدية ووجدوا عقب سيجارة

واقع في الارض ، تخيل يافرحات مسكوه بقنايتين عشان يكون بعيد منهم ورموه في الشارع

حاليا الجزيرة تحولت لمدينة مفتوحة عادي لاي شئ ، الزمن وحده يتكفل بالافكار المتحجرة

مقلبت المتداخلين ديل كلهم يا عبد اللطيف
قانون النظام العام ووكلاء نيابته في انتظارهم بمطار الخرطوم والتهم :
1- الترويج للمسكرات
2- الدعوة لشرب المسكر
3 - التشجيع على العصيان وازدراء الخلق القويم
4-
5-
ــــــــــــــ

هو وينو المسكر يادكتور

بالعكس البوست دا بيخدم الفساد في البلد لما الناس تغمر بريحة الذكريات الجميلة

وكان يحمل كمية من البلح قام بتوزيعو على الأسر حول المنطقة السكنية.
ناس الميز قالوا ليهو ونحن حقنا وينو؟؟
قال ليهم: انتو التمر بتاكلوه كمان؟ انتو بتشربوه بس.

ـــــــــــــــــ
مرحب ود الشيخ

اذا جاء الشتاء فعليكم بالبلح
قال : اناكله ناشفا ام سائلا ؟!
قال : سائلا ؛ ثم ضحك حتي راينا نواجزيه
(عثمان البشري)

بقت عندى عادة متحكمة فينى اليومين ديل
البوست حتى و لو عاجبنى ما بخش فيهو طال ما فيهو محظورات حددتها برااااى
المهم عشان اتجاوز الحتة دى شربت لى حاجة بتشبه البقنية بت عم المريسة
عشان اكرمك بالمداخلة دى و انت تتلمس خطاك فى دخول دنيا الونسة المؤنسنة
قال ليك يا عبد اللطيف
حبوبتى من هولا و جولا حتى الملوك جلسولا
للاسف ولدك طلع ما من طائفة الملوك و لا مجالسيهم

صراحة يا عبد اللطيف .. نسيان بيت في قامة :
عينا حبيبتي نقابتا عمال +++++ وخصر حبيبتي اضيق من افق برجوازي صغير
دة ما زهايمر دة اسمه تغبيش الوعي
وهذا ما حدث ... الزهايمر بداوى وتغبيش الوعي لا دواء له
من حالات غبش الوعي احتفل القصر الجمهوري امس بتسجيل شرائح الهاتف باسماء المشتركين
واحتفل مجلس امناء مستشفى شهير اول امس بتركيب 10 مكيفات
واحتفل معتمد بتركيب اشارة مرور
بيت شعر اخر كان خالدا في دولاب احد الطلاب بداخلية بحر الغزال لطلاب الاقتصاد يقول :
وفوضنا امرنا للشارع المدود نحو القصر

يا عبداللطيف انت في المريسة والا السوكوسوكو
يمين بالله يوم ضربت لي كباية سوكوسوكو ما عرفت
بيتنا بي وين مع انو بيتنا ما كان بعيد من بيت ست العرقي.تباَ له

يا سلام على الشفافية يا فيصل ...
بس السوكوسوكو دي تدليع للعرقي وليس اسم او نوع اخر له ..
وربما المقصود به بداية التقطير ... البكاري ...
زرت مصنعا في المانيا متخصص في الاواني الراقية للفنادق الخمس نجم وشركات الطيران ومن شدة تكريمهم لنا منحونا كرتونة خمر المانية معتقة ... ومن باب الشفافية اعتذرنا جميعا عن حملها ...

. الزهايمر بداوى وتغبيش الوعي لا دواء له
من حالات غبش الوعي احتفل القصر الجمهوري امس بتسجيل شرائح الهاتف باسماء المشتركين
واحتفل مجلس امناء مستشفى شهير اول امس بتركيب 10 مكيفات
واحتفل معتمد بتركيب اشارة مرور
بيت شعر اخر كان خالدا في دولاب احد الطلاب بداخلية بحر الغزال لطلاب الاقتصاد يقول :
وفوضنا امرنا للشارع المدود نحو القصر
ــــــــــــــــــــــــــــــــــــــــ
رايح ليهم احتفال يا دكتور ، فعلا امورهم هايفة جد ، دي عقدة اللا انجاز ومضايرة

للفساد بتغبيش وعي الناس انهم اصحاب انجازات ، اكبر من سرقة شجرة صندل وتهريب

ذهب بالمليارات، الي افتتاح اشارة مرور ههههه

المهم عشان اتجاوز الحتة دى شربت لى حاجة بتشبه البقنية بت عم المريسة
عشان اكرمك بالمداخلة دى و انت تتلمس خطاك فى دخول دنيا الونسة المؤنسنة
قال ليك يا عبد اللطيف
حبوبتى من هولا و جولا حتى الملوك جلسولا
للاسف ولدك طلع ما من طائفة الملوك و لا مجالسيهم
ــــــــــــــــــ
زي السوري الساق السوداني للطابق الارضي
وقفل الباب وشرب قزازتين عرقي عشان يقول
بشار دكتاتور!

بقنيتك الافتراضية تعمل شنو ياجله وهي في ارض الواقع ليست سوي عجين طاعم

كلمتك قلت ليك رايحة لي ونسة وشايف نفسي ماشي كويس ماتحبطني ساي ....وتخليني ارجع

للبوست الدمو تقيل داك ....

الولد الذكور في عنوان البوست مجرد ذريعة اختيار لعنوان ضمن مفارقات عالم الدهشة

بتاع اليومين ديل ، حقيقة عشنا اكتر من حقنا ودخلنا عالم الغرائب والباسطة

صديقي د.عبد المطلب صديق
السوكوسوكو اظنو بيعملوهو من السمسم
لكن حاجة خطيرة خلاص . دمار. بقيت اسال
ياخونا ما بتعرفوا انا ساكن وين ؟ هههههه.
تاني بقيت اعمل منه لفة كبيرة

صديقي د.عبد المطلب صديق
السوكوسوكو اظنو بيعملوهو من السمسم
لكن حاجة خطيرة خلاص . دمار. بقيت اسال
ياخونا ما بتعرفوا انا ساكن وين ؟ هههههه.
تاني بقيت اعمل منه لفة كبيرة
ــــــــــــــــــــ

فيصل يارائع تعودنا علي بوستاتك المتميزة ، انا مهتم بها جدا

وكل مرة اجد فيها عن شئ غامض كنت ابحث عنه ....

السوكو سوكو في الجنوب هو العرقي الواحد دا زي ماقال د.عبدالمطلب

السمسم يسمي كاجي مورو وبشبه شراب خفيف بعملوه ناس الشمالية حاليا ناسي اسمه

الصديق الرائع فيصل
في المانيا وبالتحديد في مدينة هايدلبيرج وعلى ضفاف نهر الماين يوجد قصر اثري قديم به نصب تذكاري لاحد الاباطرة تم تخليد ذكراه لانه كان يحطم الرقم القياسي في احتساء الخمور وبلغ به الامر احتساء 35 زجاجة في اليوم... علما بان النصب التذكاري لرجل يحمل زجاجة بيد وجردل بيد أخرى .
والله يا عبد اللطيف مداخلاتك ممتعة ..

يا عبداللطيف انت في المريسة والا السوكوسوكو
يمين بالله يوم ضربت لي كباية سوكوسوكو ما عرفت
بيتنا بي وين مع انو بيتنا ما كان بعيد من بيت ست العرقي.تباَ له
ــــــــــــــــــ
في بداية البوست يافيصل ، د. عبدالمطلب قال كلام خطير

انو العرقي خارج النسب المعروفة عالميا للخمور ، ياخي

السودانيين ديل بالجد اصل الانسان ، شئ خمر ماطبيعي وشئ

شربوت وشئ حلومر وشئ بقنية وكاجي مورو الخ ....

مرحلة ماتعرف البيت دي ، قبلها مرحلة الزول المعاك ممكن تنسي هو منو ذاتو

مرحلة فانتازيا محتاجة مجتمع ديمقراطي - علماني يقطعك الزلط ويوصلك السرير في امان هههههه

Quote: ست المريسة وتوبة وكيل العريف م.ع وكيل عريف في الجيش اولاده في المدرسه , بيصرف المرتب مرتين في الشهر علاقاته ممتازة مع الضباط لانه شفت ومقرم وفقري بيعرف أسرار ميز الضباط بالليل وبيعرف المدينة زقاق زقاق , بيسوق الجيب وهو مغوض , و كيس التمباك ما بفارق جيبه , بيلقط الأخبار وبيعرف أي زوول جديد في الحلة وبيعرف الطلقوها منه وأي ضابط جديد في المدينة ما بقدر يزبط أموره الا عن طريق وكيل العريف ... في نص الشهر يوم صرف مرتب نص الشهر , النقيب أتلحه وكل شوي يرسله السوق ومره يرسله الميز , المهم كل شوي بيطلع ليه مشوار , وصاحبنا عاوز يودي خضار البيت ويدقش الحلة , والنقيب كل شوي مرسال المهم أخر شيء في حطب جاي من الجنوب النقيب عاوز وكيل العريف يجازف الموضوع برا برا عشان ما مجروس الجيش يصل الحامية صاحبنا إضايق شديد "وجلا موضوع النقيب" وجري علي سوق الخضار لفح أي شيء وغشا البيت يسابق الزمن عاوز يصل الحلة سريع , المهم وصل الحلة ولقي العميان شايل المكسر في أزمة شديدة وزحمة شديدة , الناس جيوبا ملانة قروش , والعرقي قطع من بدري صاحبنا رأسه ضرب , وهو طالع نادته ك.خ قاتليه تعال أتسمم "ساعدته قال ما بقدر يجي الليله" دخل بيت ست المريسة (طبعا البيت لا فيه باب ولا فيه شباك) رفع الشوال ودخل جوة بطن الحوش وقد في أقرب بنبر ( ختت ليه النص) وقبل ما تمشي الباب دق شديد ودقة مزعجة ست المريسة مشت علي الباب وجاته راجعة ( جيب القروش يقرش حلقومك) صاحبنا دخل يده في جيبه وطلع القروش , وقامت المرا شالتها ومشت علي الباب وسيد اللبن مستعجل كب ليه خمس أرطال لبــن ورجعت قفلت الباب .. ووكيل العريف يعايـن ويتمتم بالله الواحد يشتري السم الهاري دا وبي قروشه ست المريسه تشتري اللبن قام علي حيله وطلق الحلة وتاب توبة تاني ما رجع الحلة ..

Quote: صاحبنا بكور عنده مزرعه جداد ويوم الضبح الضباحيـن إتأخروا وكل شوي يضرب تلفون ويكورك في التلفون , التلج حيسيح ومابقدر أجيب تلج بالليل دا ولازم أخلص الليله , والجماعه كل شوي ( نحا في الطريق مسافة السكة بس) بكور علي الحالة دي لغاية الساعه 4 صباحا ما قادر يتعشي وما قادر ينوم ويزوزي كل شوي يصل طرف الشارع ويرجع تاني ( بالله دي حالة دي) طبعا لا في مسلخ ولا شيء يعني لازم ينتظر الضباحين الشفوت ديل رجله في رقبته , المهم علي الساعه 5 ص قرر يمشي يشوف الضباحين ديل هو بيعرف بيت الزعيم (طبعا الضباحين ديل ناس منظمين وعندهم زعيم وكلهم بيسمعوا كلامه كأنه منزل) المه وصل البيت ويدق في الباب نص ساعه لغاية ما فتحوا ليهوا ( السلام عليكم , (م.) ويـن ؟ رد عليه عمك كبير كدا الزول من أمبارح ما جا لكن أمشي بعد السوق بي مسافة بتلقي الحلة أسأل من بيت (فلانة) إحتمال كبير تلقاه هنالك ... المهم بكور دخل الحلة وبيفتش في بيت (فلانة) لغاية ما وصل ... في الطريق لقي ليه ناس متلمين حول زول بيكورك (توفيا ... توفيا .... توفيا ) قدر ما حاول يمشي ما قدر الشمار حارقه عاوز يعرف قصة ( توفيا دي شنو) وقف عربيته ومشي علي الزول البكورك ( توفيا .... توفيا .... توفيا ) .. سأله يا حاج إنت من قبيل بتكورك توفيا دي شنو ؟ قاليه إنتو وقت الزول بموت مش بتقولوا ليه (توفي الي رحمة مولاه) نحنا هنا بجيب الجداد الميت وبنقوليه توفيا وبنبيع مشوي لكن عشان بنخاف الله بنكلم الناس بنقول ليهم الجداد دا ( توفيا) ... المهم بكور وصل بين ست المريسة , ودخل لقي جماعته واقفين لمبة ونايمين , وست المريسة سادة الدرب ( الناس ديل كلموا المريسة كلها وما دفعوا القروش اذا ما دفعوا القروش شبر من هنا ما حيمشوا !! صاحبنا رأسه ضرب وفي النهاية دفع لي ست المريسة حقها وساق الضباحين المزرعه ...

عزيزي عبد اللطيف قال :
ي بداية البوست يافيصل ، د. عبدالمطلب قال كلام خطير

انو العرقي خارج النسب المعروفة عالميا للخمور ، ياخي

السودانيين ديل بالجد اصل الانسان ، شئ خمر ماطبيعي وشئ

شربوت وشئ حلومر وشئ بقنية وكاجي مورو الخ ..
المعلومة دي والله قالها لي صديق فرنسي اسمه تشاري دي جاردن وانا في المرحلة الثانوية ... قال لي النسب اعلاه واكد لي ان العرقي خطير على الصحة ولو انه مشروب اوروبي لتم تصنيف كاحد اسباب الوفاة... بالحرف قال انه ست العرقي لا تستطيع السيطرة على نسبة الكحول كما تفعل المصانع وقد تفلح في صناعة عرقي اعلى بكثير من المعايير التي يحتملها البشر ... وقال ان المصانع تكتشف تحول الكحول الى ميثانول قاتل لكن ست العرقي لا تستطيع وتحول الكحول الى ميثانول هو اسرع طريق الى الموت.