مع حق عوض شكسبير في التعبير

07:50 AM December, 17 2017

سودانيز اون لاين
أيمن محمود-etganonline.com
مكتبتى
رابط مختصر

فنانا الكبير ابو عركي ماكنتو محفوظة في القلب وما بتتزحزح

السخف كل السخف هو محاربة حرية التعبير
محاربة عوض شكسبير لانه عبر عن رأيه بطريقتو الخاصة
والعار والشنار للدواعش جميعا بكل الوانهم واطايفهم واديانهم!

طيب وحق التعبير لمن انتقدوا سكتش شكسبير كيف؟ ولاّ ما بجيب دخل زي خالف تذكر

يا أيمن

لم يقل أحد بعدم "قانونية" نقد عركي ...

لينتقد شكسبير من شاء ... كيف شاء ....

وليلعن الآخرون سنسفيله كيف شاؤوا ....

اظنك يامحمد البشرى قادر تفرق بين النقد "كرأي" مخالف او متفق والنقد لتكميم الفم والحجر
الفرق بين نقد استكتش/ات عوض شكسبير كعمل فني ونقده بشكل شخصي فقط لانو تناول شخصية ما

هل موضوع الاسكتش كان بايخ؟
هل السيناريو كان دمو تقيل؟
هل اداء عوض شكسبير كان ما بالمستوى؟
هل التصوير او الصوت كانا رديئين؟

الهوجة القايمة دي كلها بسبب الشخصية التي تناولها!
هل الناس دي هاجت بالشكل لمن تناول بالاسكتشات شخصيات اخرى اقل اهمية؟

-
صدقني انا لو عايز اذكر كان حرست بوستاتي ومليتها بالمطولات واهدرت زمن طويل في الردحي والغلاط .. لكن اخوك بكل صدق ما عندو رغبة ولا قدرة على الردحي الكتير! وما الكتابة هنا الا الكثير من قلة الشغلة

من حق شكسبير التعبير ولكن ليس من حقو اتهام ابوعركي وتصويرو كزول انتهازي يسعى للمال ويبيع المواقف من اجل المادة ..

هذه الصورة غير صحيحة .. وهذا التفكير غير سوي في اعتقادي.

Quote: من حق شكسبير التعبير ولكن ليس من حقو اتهام ابوعركي وتصويرو كزول انتهازي يسعى للمال ويبيع المواقف من اجل المادة

عوض شكسبير يا دكتور رأيه كما اتضح للبعض انو ابو عركي زول انتهازي يسعى للمال ويبيع المواقف من اجل المادة فهل من حقه يعبر عن رأيه ده والا ما من حقو؟!

في رايي من حقه ونص وخمسه - انا كزول مختلف معاه بقول ليه .. لا رايك ما صحيح بدليل كذا وكذا وكذا ... لكن ما بقول ليه يا زول اخرس وابلع لسانك؟!

Quote: لينتقد شكسبير من شاء ... كيف شاء .... وليلعن الآخرون سنسفيله كيف شاؤوا ....

عبد الباقي انت لخصت في السطرين اعلاه سبب اخلافي مع كثير من الناس
ولعلها فرصة مواتية لمزيد من الشرح لمحمد البشرى

انت وافقت (يبدو على مضض) على نقد شكسبير لابوعركي وحرصت على التأكيد على الا يتعدى النقد
اما بالنسبة لعوض شكسبير فاطلقت العنان للعن سلسفيل عوض شكسبير - لاحظ: لعن سلسفيل عوض شكسبير ولعن السلسفيل اظننا بنتفق انو مختلف تماما عن النقد!

رجل هناك وكراع هنا يا عبد الباقي؟!!

-
شفت كيف يا ود البشرى؟

ازيك ياهندسة

البعمل فيهو عوض شكسبير دا ما المفروض يوصف بأنه عمل ابداعي ومامفروض
يجد حظه من الظهور في اي وسائط إعلامية،،

هل يعتبر هذا فن؟
هل امضى شكسبير عمره في دراسة الدراما ليخرج لنا بمثل هذه الضحالة؟
هل تعدي عوض شكسبير على مشاعر محبي ابوعركي يمكن ان تمر مرور الكرام؟

الأمم تكرم مبدعيها ورموزها في كل المجالات ونحن نحط قدرهم يوماً بعد يوم!!

هذا عبث ياحبيب لا فيه فن ولا يحزنون ،


عوض شكسبير يلزمك اعتذار كبير وتوبة على ألا تعود لمثل هذه المهازل

الحمد لله يا عبد اللطيف وسلامات وعساك بخير

Quote: الأمم تكرم مبدعيها ورموزها في كل المجالات ونحن نحط قدرهم يوماً بعد يوم!!

انتقاد الرموز والمبدعين بطرق فكاهية مسألة دارجة في كثير جدا من الامم وما عمري نظرت ليها باعتبار انها بهدف الحط من قدرهم، وانا صراحة مع اشاعة حرية التعبير والنقد لأي كان طالما في حدود القانون وهي مسألة تقبل للرأي الاخر ليس اكثر

ظاهر جدا انو القضية
هي ابو عكركي البخيت
وليست شكسبير

لقد قام بعمل علي المنتجات المصرية ابان هوجة مياه الصرف
وكان عملا ممتازا
مثل عن الرئيس البشير وقبله الكثيرون
مثل شخصية حسين خوجلي فقبله الكثيرون
مثل حتى شخصية تراجي فتقبله الناس ايضا

الجديد ان البعض يعتبر عركي خط احمر وفوق النقد
اعتقد هذا ضيق في الافق ومن حق الفنان ان يعمل وينتقد ويصبر علي الجمهور لان هناك من يصبر علي اغنيات عركي وغيره

يا أيمن لا يوجد تكميم لشكسبير ومنع من ان يعبّر عن رأيه كيفما شاء, اولريدي هو عبّر و انتهى و ذاع الفيديو و انتشر و ملأ الأرجاء
ما تقول عليه تكميم و منع هو ليس كذلك عمليا بل هو رد و تعبير و ابداء رأي في ما صنعه شكسبيروفي اتهامه او وصفه لعركي بما ليس فيه أو ارتكبه و تجيير لنواياه وتفسيرها حسب ما صوّره له هواه أو هداه تفكيره لـ "يخالف" الرأي الغالب و السائد بالتالي ينال الذكر المشتهى و التميّز المتوهم و الذي لا يحتاج لرعاية ومطاولات يكفي نشره للفيديو - تقرا رأيه - مرّة واحدة و الطبيعة البشرية تقوم بالباقي *

*دي فيها تعليق على الجزئية الأخرى من حديثك برضو نظام اتنين ف واحد :)

بالمناسبة يا ودالبشري عوض شكسبير مشهور في السودان
اكثر من ابوعركي ، ابوعركي الجيل الان ما بعرفو
لانو ما موجود في الساحة ، لذلك حكاية خالف تذكر دي
ما راكبة مع شكسبير ، تفتح كل القنوات السودانية بتلقي شكسبير

Quote: عوض شكسبير يا دكتور رأيه كما اتضح للبعض انو ابو عركي زول انتهازي يسعى للمال ويبيع المواقف من اجل المادة فهل من حقه يعبر عن رأيه ده والا ما من حقو؟! في رايي من حقه ونص وخمسه - انا كزول مختلف معاه بقول ليه .. لا رايك ما صحيح بدليل كذا وكذا وكذا ... لكن ما بقول ليه يا زول اخرس وابلع لسانك؟!

كيف الكلام ده يا هندسه ؟!

مفروض نميز بين حاجتين هنا .. حرية التعبير وهي المكفولة تماما مافي ذلك شك .. ومسؤولية المبدع عن منتج حرية تعبيرو !!

حرية التعبير لا تبرر فساد المنتج التعبيري ..
المنتج التعبيري ده كيان قائم بذاتو ويمكن محاكمته ورفضو وبيان فسادو وخبثو ورسالاتو المنحطة .. وبحيب ما قرأت لم تتم هنا دعوة لقطع لسان شكسبير ولا في زول قال انو عركي مقدس لا يجوز نقدو ... كل ما حدث انو الناس قالت انو النقد ده فاسد .. وشخصيا اصفه بالانحطاط

Quote: يا أيمن لا يوجد تكميم لشكسبير ومنع من ان يعبّر عن رأيه كيفما شاء, اولريدي هو عبّر و انتهى و ذاع الفيديو و انتشر و ملأ الأرجاء ما تقول عليه تكميم و منع هو ليس كذلك عمليا بل هو رد و تعبير و ابداء رأي

والله يا محمد البشرى المسألة كانت وما تزال لعن سلسفيل شكسبير وما رأي مخالف!
ممكن نسميها حملة "ابو عركي" الانتقامية من شكسبير
ممكن شكسبير بسبب الهجوم ده يحرم ينتقد تاني وياهو ده محاولة التكميم البقصدها

-
عجبتني طاقية شكسبير اللبستها انا - رب رمية من غير رام

فرق كبير

- ابوعركي فوق النقد (من قال بذلك؟!)

- اقمعو شكسبير (من قال بذلك؟!)

- الكلام القالو شكسبير ده منتج فني مبتذل لا يليق بشكسبير ذاتو وفيهو تجني كبير على مواقف عركي الاخلاقية والمبدئية (من قال بذلك وهل يتعارض ذلك مع حرية التعبير؟!)

عركي يا أيمن أوقفت السلطات أي تصاديق لحفلاته العامة منذ عدة سنوات ....

عركي محارب من كل القنوات التلفزيونية بتوجيهات رسمية ... عامها وخاصها

عركي لم يستجد أحداً ولم يتمسح أحداً ولم يداهن أحداً ....

فهل هذا هو ما يستحقه من نقد؟؟؟

من حق شكسبير أن ينتقد كما شاء ...

ومن حق الناس أن يقولوا له هذا اسفاف وابتذال ...

الفنان حامل رسالة يا أيمن ....

فإن كانت هذه رسالته ...

فعليه "العوض" ... ومنه العوض ...

الفرق كبير بين الانتقاد واغتيال الشخصيات ابوعركي فنان عايز تنتقد اتكلم عن الموسيقي الصوت الكلمات لكن الذي حدث محاولة لمسح تاريخ الرجل

أنا والله متمحن في الحملة على المنتج الدرامي دة !
أصلاً دي طبيعة الفن الساخر كدة
لكن ما نبقى زي الاعلام المصري مع باسم يوسف .. أيام كان بسخر من الاخوان كان حبيبهم ورمز وطني وأول ما هبش السيسي نصبوا ليه المشانق لحدي ما ساب ليهم البلد
شايف واحد قال القنوات مقاطعة ابو عركي .. بحسب ما سمعت زمان إنه ابو عركي هو المقاطع القنوات وأعتقد إنه دي حاجة أضرتو وأضرت جمهوره لأنه المبدع مفروض ما يفوت فرصة للتعبير عن فنه أمام جمهوره في أي وسيط اعلامي طالما موقفه دة لا يعتبر تطبيل وقنا السودان دي ما حقة الحكومة وإنما القناة الرسمية لجمهورية السودان
عوض شكسبير انتقد عركي بطريقته الخاصة في موقف حيثياته واضحة إنه عركي قال ما بغني للجمهور ومشى غنى للأوربيين .. وبس
كونك عندك تبرير لي ابو عركي ما معناها تهاجم الما فهم تبريرك دة

أنا شايف إنه الناس بدل تدين شكسبير حقو تدين الفن الساخر بشكل عام وتقول الشعب السوداني ما شعب بتاع ضحك وسخرية وعندنا الرموز ديل مقدسين وحريقة في الدراما لا عن حدها وخلاص

أنا مع حق أي زول في التعبير عن ما يشاء و نقد ما يشاء.
(طبعاً أتحدث عن التعبير الذي لا يتعدى على حقوق الآخرين، والذي لا يشمل السباب و الشتم و إساءة السمعة بالأحاديث الكاذبة)

مع حق عوض شكسبير في نقد أي زول مهما كانت مكانته.
و مع حقه في نقد أي زول بأي طريقة يختارها.
و مع حقه في النقد بغض النظر عن أثر هذا النقد على الزول المُنتقَد و على الزول المتلقي.
مع حق عوض شكسبير في نقد أي فنان و لو أدى ذلك لأن يترك الفنان الغناء.

و في المقابل
مع حق أي زول في التعبير عن رأيه في أعمال عوض شكسبير من ناحية فنية او موضوعية.
مع حق أي زول في نقد عوض شكسبير بأي طريقة حتى و لو كانت النتيجة أن يتوقف عوض شكسبير عن النقد.

أليس هذا عادلاً يا أيمن؟

أهم فائدة لحرية التعبير و حرية النقد هي أن النتيجة النهائية أن يذهب الزبد و يبقى ما ينفع الناس.

Quote: أليس هذا عادلاً يا أيمن؟

fair enough

دي الروح المطلوبة يا سيف
الناس ترخي جسمها للنقد

Quote: بالمناسبة يا ودالبشري عوض شكسبير مشهور في السودان اكثر من ابوعركي ، ابوعركي الجيل الان ما بعرفو لانو ما موجود في الساحة ، لذلك حكاية خالف تذكر دي ما راكبة مع شكسبير ، تفتح كل القنوات السودانية بتلقي شكسبير

إنتو ود البشرى دا قاعد يكتب لينا مراسلاتو دي من القرن الكم؟
ولَّ هو نحن ذاتو هسه قاعدين في الجيل الكم؟
😂

عليك الله يا ابراهيم عبد الوهاب
أعمامك ناس ود البشرى ديل ثقفهم عن التريندس بتاعة الجيل الحالي.
بس ياريت تدعم الحقائق بتاعتك دي ببعض الأدلة، مثل عدد المشاهدات في اليوتوب الفيس بوك، تويتر، الواتساب.
بالعدم جيب لينا صورتك إنت و الجيل الحالي قاعدين تتعشوا سوا إن شاء الله و لو كوارع عند قفة.

عمنا حافظ بشير
الكوراع دي شنو
وقفه دا منو
نحنا جيل بابا كوستا
واوزون
وبريستا
وتوتي فرتي
والحركات دي
انا من جيلكم عشان كدا ما حرسل ليك صورتي
وماعندي احصائيات
لكن البكون بعيد من الساحة الناس شوية شوية بتنساهو

Quote: انا من جيلكم عشان كدا ما حرسل ليك صورتي

يا عمك صورتك ترسلها لي أعمل بيها شنو؟ أختها في متحف الحضارات المنقرضة؟
أنا داير صورتك مع الجيل الآن و إنتو قاعدين في مكان واحد عشان أعرف مصدر الثقة البتخليك تنثر درة الحقيقة عن الجيل الآن بيعرف منو و ما بيعرف منو.

Quote: دي الروح المطلوبة يا سيف

إنت يا أيمن سيف دا منو؟
عرفنا إنو الجيل الآن ما بيعرف أبو عركي،
أها كمان داير تقول لي إنو الجيل الآن ما بيعرف حافظ بشير؟

أكان كدا نشوف لينا كهف ننحفر منو كإكتشاف لحفريات أثرية.

اتعطلت بينا الحافلة السفرية بين مدني والخرطوم
أنا قاعد في مقعد النص وفي المقعد الدبل شمالي في 2 من طلاب الجامعة
ركبت سماعة الموبايل في اضني وبقيت اسمع في ست الدار بت احمد
الولد البي شمالي قال لي سمعني معاك .. أديتو فردة سماعة .. فاجأني بسؤال دة منو؟
عاينت فيه عشان اعرفو جادي ولا بهزر طلع جادي قلت ليه دة حميد
قال لي حميد منو؟ قلت ليه محمد الحسن سالم حميد
قال لي برضو ما عرفتو .. يعني القصيدة حقتو ولا هو مذيع وبيلقي فيها
شلت منه السماعة براحة وقلت ليه دقايق النشوف لو في غناء لذيذ كدة بسمعك معاي وقبلت منه بالجمبه التانية

أمال انت يا حافظ قايل ناس احمد الجقر وشكر الله ديل جمهورهم منو !

Quote: 2 من طلاب الجامعة

مفهومة جداً دي بالنسبة لي.
ديل بمثلوا كم من الجيل الآن؟
ولَّ هو الجيل دا مقصود بيهو الشباب في عمر 16-21

الحكاية دي حصلت زمن السفر بالحافلات يعني تقريبا 2009 أو قبلها
شوف خلال العشرة سنوات دي اتخرجوا كم جيل ما بعرفو حميد
شوف الفنانين المصنفين واعين وفاهمين زي طه سليمان بكل امكانياته الصوتية يغني ليك عسولي ات هوتميل وكتمتو نفسو وكاتبني وين عند ياتو شيخ
وببساطة كدة يقول ليك الناس عاوزة كدة
نان انت قايل العاوزين ديل منو !

بالتأكيد ما ممكن تلقى إحصائيات دقيقة لمعلومات زي دي لكن دة الحاصل
أي جيل بتعامل مع المعطيات الموجودة قدامه
كدي حاول انت جيب احصائيات بديلة وورينا فنانين شباب جادين مثقفين بقدموا فن راقي حقهم وعندهم جمهور زي جمهور احمد الصادق كدة

تعرف يا احمد
من عام 1989م الي 2017 م كم سنة
28 سنة
يعني الناس الاتولدت من سنة 80م لحد الليلة
دا جيل براهو ، غناهو براو مزاجو براو
فسحتو براو فنانيهم براهم لبسهم براو
مطاعمهم براهم

Quote: شوف خلال العشرة سنوات دي اتخرجوا كم جيل ما بعرفو حميد

يا أبو حميد
شكسبير بمقاطعو الكوميدية البعملها دي بيخاطب بيها منو؟
منو الجمهور المستهدف بيها؟ هل هو جمهور ما بيعرف أبو عركي؟

بمناسبة الجيل بيعرف منو و ما بيعرف منو دي، قبل كم يوم كدا راكبين معاي 3 بنات واحدة مواليد 92 و التانية 95 و التالتة 2000.
كان في العربية شغال عمار السنوسي بيغني غيرة (على الجمال تغار منا).
سألتهم ما إذا كانوا بيعرفوا سيد الأغنية الأصلي و شاعرها.
اصغرهم و اوسطهم ما عرفوا و لكن الكبيرة عرفت و أجابت بأن الغنية لسيد خليفة و شاعرها أدريس جماع.
اوسطهم وجدت الإجابة عندها صدى لأنها تعرف او سمعت بسيد خليفة و سمعت بإدريس جماع.
الصغيرة لم تجد الإجابة عندها أي صدى لأنها لا تعرف من هو سيد خليفة و لا تعرف من هو إدريس جماع و لم تسمع بهم من قبل حسب قولها.

الفرق بينهم ليس فرق أجيال و لكن الفرق بينهم هو فقط في العمر و بالتالي في نوعية المعرفة المكتسبة و كذلك الإهتمام بنوعية المعرفة و ذلك بسبب العمر و ليس بسبب الفوارق بين الأجيال.

أنا أيضاً عندما كنت في مرحلة بدايات الجامعة لم أكن أفرق بين الكاشف و أبو داؤود.
و قطعاً لم تكن تهمني معرفة صلاح أحمد إبراهيم و لا معرفة عمر الطيب الدوش.
و في عمر الطاشرات و بداية العشرينات طبيعي جداً إنو الزول يكون مهتم بالمعطيات الموجودة قدامه فقط.
الإهتمام بالتاريخ و إستيعاب الحاجات القديمة بيجي في عمر متأخر شوية، ربما منتصف العشرينات و إنت طالع.

لذلك لا تقلق يا أبو حميد من حكاية إنو طلاب الجامعة الركبوا جنبك في الحافلة ما بيعرفوا حميد و لا سمعوا بيه، لأن أمامهم متسع من الوقت لكي يسمعوا عنه و يعرفوه.
و لا تبني على عدم معرفتهم لحميد أي حكم عن جيلهم و لكن يمكنك بناء حكم على مرحلتهم العمرية.
أتوقع لو أنك لاقيت نفس الطلاب ديلاك اليوم ستجد دائرة معرفتهم قد إتسعت و تغيرت كثيراً بحيث أنها أصبحت شبيهة بمعرفتك و إهتماماتك المعرفية أنت نفسك.

أنا على فكرة ما بلومهم ولا بستعجلهم المعرفة لكن بعكس واقع متغير عن واقعنا
أنا عرفت حميد في الثانوي لكن ما كان عندي انترنت وتاب وهاتف ذكي عشان اعرف الحاجات اللي هم مهتمين بيها هم الآن
كلام ابراهيم حول إنه شكسبير معروف للجيل الشبابي الحالي أكتر من عركي كلام واقعي والسبب إنه شكسبير متاح في كل مكان بينما عركي بعيد عن الاعلام
لكن دة بالتأكيد لا يعطي افضلية لشكسبير لأنه لوشي اشهر منهم الاتنين

يعرفوا من وين
كدا عاين للصفحة الاولي من البورد دا
بوستات كلها السمح منو والحلو منو

Quote: كلام ابراهيم حول إنه شكسبير معروف للجيل الشبابي الحالي أكتر من عركي كلام واقعي والسبب إنه شكسبير متاح في كل مكان بينما عركي بعيد عن الاعلام

لا لا يا أبو حميد كلام إبراهيم إنو شكسبير معروف في السودان أكتر من أبو عركي و بالتالي لا يمكن لشكسبير أن يسعى للشهرة من خلال فيديو عن أبو عركي.
إبراهيم قال "الجيل الآن" و لم يقل "الشباب الآن" و لم يحدد فئة عمرية محددة.
و بالمناسبة الجيل هو المسافة بين الآباء و الأبناء، يعني حوالي 33 سنة دا من ناحية بيولوجية.
من ناحية إجتماعية الجيل هو كل الناس التي تنشط إجتماعياً و ثقافياً خلال فترة زمنية مشتركة.
إبراهيم في رده على ود البشرى كأنما أراد تعريف ود البشرى بما هو غير متاح من معرفة لود البشرى بإعتبار أن ود البشرى من جيل سابق خارج التأريخ الآن.
لذلك أنا سخرت من لغته الخطابية.

البوست عن فيديو لعوض شكسبير يقلد فيهو أبو عركي. كل السودانيين الممكن يشاهدوا الفيديو هم تابعين لنفس الجيل و هم معنيين في كلام ود البشرى.
تحويل الكلام و تصور إنو المخاطب بالفيديوهات دي هي فئة عمرية معينة لا يتبع لها ود البشرى دي حاجة أقحمها إبراهيم من عندو.
و دي ذاتها الحاجة الأنا سخرت منها.

أما عن الإحصائيات
شوف اليوتوب و شوف الفيديوهات بتاعة أبو عركي و شوف الفيديوهات بتاعة شكسبير و شوف عدد المشاهدات خلال فترة زمنية تختارها.
و ممكن برضو تشوف الفيسبوك و الواتساب و تنجر ليك طريقة تشوف التداول.
و بالمناسبة فيديو عوض شكسبير بتاع تقليد أبوعركي في اليوتوب حقق في يومين مشاهدات أكتر من أربعة أضعاف فيديو عوض شكسبير السابق له بإسبوعين.

اصحاب المبادئ و القضايا لا يبيعوها بابخس الاثمان .

Quote: لا لا يا أبو حميد كلام إبراهيم إنو شكسبير معروف في السودان أكتر من أبو عركي و بالتالي لا يمكن لشكسبير أن يسعى للشهرة من خلال فيديو عن أبو عركي.

طيب خلينا ننط من الوسيلة وطريقة ايصال الفهم إلى الفكرة نفسها
هل انت بتعتقد إنه شكسبير يسعى للشهرة من خلال الفيديو دة ؟

Quote: هل انت بتعتقد إنه شكسبير يسعى للشهرة من خلال الفيديو دة ؟

أنا ما قلت شكسبير بيسعى للشهرة، كلمة الشهرة في مداخلتي السابقة وردت كإستنتاج من ما قاله إبراهيم.
و ود البشرى قال "ينال الذكر المشتهى و التميّز المتوهم"

و طبعاً يا أبوحميد
بدون أدنى شك الفنان بيسعى للإنتشار التميُّز من خلال أي عمل يقدمو.
و بالتأكيد شكسبير بيسعى للإنتشار و التميُّز من خلال تقليد أبو عركي.
و دا هدف مشروع و لا غبار عليه.
و لكن تبقى المشكلة في الوسيلة التي يستخدمها شكسبير في الوصول لهذا الإنتشار و التميُّز، و هل هو تميُّز حقيقي أم متوهم.

أنا فهمت إنه ابراهيم قاصد الجيل الحديث بدليل إنه في أول رد عليك قال ليك انا من جيلكم

لا يوجد ما يميز فيديو شكسبير لعركي عن بقية فيديوهاته
شكسبير ظل يقلد ويسخر من كل شخصياته بنفس طريقته مع عركي ولا أخاله يسعى لغير ما سعى إليه مع البقية

بعد إذن حافظ ارد على التساؤل دا

Quote: بتعتقد إنه شكسبير يسعى للشهرة من خلال الفيديو دة ؟

هي ليست الشهر بالمعنى الحرفي لكن زي ما تقول كدا لحق السوق
قبل الفيديو دا حصلت حملة في الاسافير على قصة احياء ابوعركي لحفل الاتحاد الاوروبي و انقسمت الاسافير بين مؤيد لعركي و مهاجم له فا شكسبير عايز يكون في الجو و مع عدم الموضوع اهتبل الفرصة و الهوت توبيك و كدا
يعني نظام لو عايز تظهر البس اصفر

Quote: بعد إذن حافظ ارد على التساؤل دا

هو بالله إنت لسه قاعد؟
أنا إعتبرتك جيل منقرض و لا يعرف لغة الجيل الآن و أدواته و حواراته لذلك توليت مسؤلية الرد نيابة عنك بصفتي باحث في التاريخ.

أصلاً يا البشرى برنامج شكسبير دة اسبوعي وقائم على الفهم دة
مكانه صفحة شكسبير على فيسبوك ومادته ما يدور على صفحات وسائل التواصل الاجتماعي
كمثال الفيديو الأرفقته فوق السخر فيه من البت بتاعة عادات وتقاليد

Quote: أنا فهمت إنه ابراهيم قاصد الجيل الحديث

يا أبو حميد أنا من الأول فهمت إنو إبراهيم قاصد الشباب في الجامعات و من حولهم في الفئة العمرية.
و يبدو إنك ما متابع لكتابات إبراهيم إذ أنه الناطق الرسمي بإسم هذه الفئة العمرية و لا يري فئات غيرهم و ربما حتى لا يعترف بوجود ناس غير هذه الفئة العمرية.
سبب السخرية أن إبراهيم أتى بفكرته المعهودة.

في دي صدقت
فعلاً ما متابع كتاباته



_____
أنا أصلاً لي زمن ما متابع البورد بالكامل بس بدخل حتت معينة واطلع عشان كدة ما حصل اتلاقينا يا ابراهيم

إنتو موضوع البوست شنو؟
😂
أيمن تعال أحسم الفوضى دي ياخ
وجيب لي لستة المهرجلين في المكتب و معاها بسطونة

حقو في التعبير انو يقول ابوعركي ما بعرف يغني ، دمو تقيل ، مابحبو او بشكل عام اي شيء ليهو علاقة بالميول الذاتية
حقو في نقد عركي كشخص (ليس كفنان) يجب ان يستند على حقائق محددة او تصرفات محددة ثبت ان عركي قام بها
خلاف كده الموضوع بيبقى ما عندو علاقة بي حرية التعبير بيبقى تعدي او اساءة
عموما الفرق بين حرية التعبير والاساءة هو انو حرية التعبير ما بتوديك السجن والعكس
اتهام عركي بأنه شخص يلهث وراء المال غير صحيح وفي الحقيقة هو عكس ذلك تماما بحسب صورته المعروفة له في الثقافة الشعبية فما مكن تكضب فوق زول ساي كده وتقول بمارس حرية التعبير الا تكون عارف ليك حاجة مافي زول عارفا غيرك
الشيء الاهم في نظري "لاني لست عركي ولا من اهل بيته " ، هو ان الفيديو سيء لحد بعيد جدا جدا من الناحية الفنية ويفتقر لأي شيء له علاقة بالفن او الكوميديا ، عوارة مجنون ما يعملا
يعني ممكن الكوميدي يتعدى على نجم او سيااسي من خلال سكيتش او سكيت كوميدي صغير بس يتعب في الmaterial والتمثيل ويطلع حاجة عندها قيمة فنية عالية جدا بغض النظر عن اي اعتبارات تانية وفي ناس كتيرين حيضحكوا ضحك شديد
بالذات الناس البشاركوهو في نظرته السلبية للزول موضوع العمل . لكن هل ممكن اعدى اعداء عركي يضحك من فيديو شكسبير ده ؟
دي عوارة وهبالة ما شفتها في حياتي
اعتقد ان الخط الفاصل بين الكوميدي والعوارة ما هلامي للدرجة دي

عزيزي ايمن
دة تجني وليس تعبير
وارجو ان تقرا الاقتباس ادناه من صفحة الاخ و زميل المنبر المنبر عاطف عبدون

Quote: مابين عركي وشكسبير أسئلة لابد من طرحها س نمره واحد هل تاريخ الاستاذ ابو عركي البخيت وسيرتو بجعلو منو فنان فوق النقد ؟ الاجابه في رأئي ( لا ) س نمره اتنين هل فيديو عوض شكسبير ممكن يتسمي نقد ؟ الاجابه ايضا في رأئي " لا " فلا عركي مقدس وفوق النقد ولا التجريج والاساءة القدمها شكسبير ممكن تتسمي نقد وممكن يسأل سائل ليه ما يتسمي ( نقد ) ؟ حتكون الاجابه ببساطه لانو الفكره البني عليها شكسبير الفيديو بتاعو فكره ما واقعيه بل شئ هو قاطعو من راسو لحاجات شحصيه هو بعرفها براه فــ شكسبير بني فكرتو علي انو عركي وقف الغنا ثم عاد ليهو من جديد في الحفل الاقامو الاتحاد الاوربي قبل ايام والحقيقه الممكن يتاكد منها اي زول بتقول انو دا ما حقيقي ابدا انو عركي ما وقف غناء ابدا عركي ظل علي موقفو في مقاطعة النظام حيث شكل اعلي مستوي اتخذو فنان علي الاطلاق وهي المقاطعة التامه للنظام علي كافة المستويات ودا قرار اتخذو قبل ٢٨ سنه ولسع باقي عليهو وطوال الفتره دي عركي كان مواصل نشاطو الفني لمن قبل سنتين سحبو منو تصديق لاخر حفل ومنذ ذلك الحين لم يُصدق اي حفل ل عركي ظل عركي صامد بعد ما وصل حصار النظام ليهو لي انو يُمنع استخراج تصديق لاي حفل خيري ليهو ووكتها احتفو بيهو سودانيي المهاجر وسافر وقدم عدد من الحفلات برا السودان ورغم انو الصدام بينو وبين النظام وصل مرحلة انو النظام حرم عركي من انو يغني لي جمهورو في حفل خيري لكن عركي ما وقف غناء وطوال الفتره الفاتت كان بكتب وبلحن وقدم عدد من الاعمال ولسع شغال في اعمال جايه حيث اتجه لبث اعمالو عبر السوشال ميديا بعد ما فقل النظام عليهو كل الابواب والنوافذ . اذا الاساس البني عليهو شكسبير الفيديو ما حقيقي وهو عارف تماما انو عركي ما كان مُوقف الغناء ومع ذلك بني فكرة الفيديو بتاعو علي الاساس الما صحيح دا وهنا مربط الفرس والنقطه الفاصله ما بين انك "تنتقد زول" او "تتبلي عليهو" طيب هل شكسبير غلط ويجب ان يعتذر ؟ في رائي انو شكسبير غلط بالتاكيد لانو "إتبلي" علي عركي وبني تجريحو بشي ما حقيقي وما واقعي لكن مافي زول طالبو باعتذار ابدا وبما انو عركي ما هو شيخ الامين الحيهددو بانو يرسل ليهو ناس "يدقوهو" فطبعا هو ما محتاج يعمل فيديو اعتذار بل هو مطالب بانو يكون واقف في مكانو دا من عركي وابدا ما يحاول يمشي (يتدهنس) لعركي او يتوسط للناس عشان عركي يعفو عنو. في رائي انو شكسبير تصرفو كان نتاج لي غباء منو ومافي زول يستعجل لاني حوضح ليه انا بفتكر انو تصرفو كان في غاية الغباء :) الزول دا اولا علي غير العاده "ما نشر الفيديو" في صفحتو وافتكر انو دا ممكن يقلل من فظاعة العملو او يعفيو من مسؤولية الفيديو وابدا ما بكون فكر انو هو شحما ولحما وعبطا وسخفا في الفيديو . الزول دا ما قرا ردة فعل الناس قبل ما ينزل الفيديو بتاعو وابدا ا اجتهد واي زول ذكي كان قرا الواقع بشكل اعمق من كدا وحسب كويس قبل ما يختار مادتو . الزول دا ناسي انو اليوتيوب ملان بي فيديهات هو لاعب فيها دور الارجوز لمحلات تجاريه بعلن ليهم بشكل مخجل عشان يلم منهم شوية قريشات ولو فكر شويه كان اكتشف انو موضوع ( تسول الفنان) ما هو التوبك المناسب ليهو هو بالذات لانو هو اكتر فنان اتسول للمحلات التجاريه لمن بقي الان ما مرغوب فيهو بعد محاولاتو المتكرر بانو يقنع ناس المحلات ديل انو الاعلان في فيديهاتو حيكون ليهو عائد دعائي ليهم اذا لمن الموضوع يكون عن التسول شكسبير هو اخر زول ممكن يفتح خشمو . النقطه الاهم من كل النقاط دي عندي انو الحصل دا رغم سخفو الا انو كان استفتاء حقيقي لي حب الناس لي عركي وتقديرهم لنضالو ومواقفو الصلبه فــ كم الحب الاتدفق في الاسافير اليومين الفاتو حيزيد عركي قوه وصلابه . في ذات السياق الفيديو العملو "تروس" للاسف فيهو مسك للعصايه من النص وكان محبط جدا بل ومشتت للكوره

Quote: إنت يا أيمن سيف دا منو؟

انا اسف يا حافظ - شكلي كنت برد وبالي في سيف بخيت .. ربنا يحسن عزاءه

تحياتي ايمن
وضيوفه
مع حقه في التعبير
ومع حقنا ان نقول ان ذلك اسفاف واسقاط وسعي لتكسير الاصوات المناهضة للسلطة ولا يمثل فنا ولا نقدا

سيبك منهم الاتنين .. والله يا أيمن يا أخوي .. اليورو مغري صراحة ..

تحياتي سامر
الامر يتجاوز الطرافة
بل
يصيب حسنا بشكل مؤلم جدا