Post: #1
Title: التقرمط
Author: درديري كباشي
Date: 12-10-2017, 06:27 AM
Parent: #0
05:27 AM December, 09 2017 سودانيز اون لاين
درديري كباشي-
مكتبتى
رابط مختصر التقرمط
بعدما دخلنا جامعة الجزيرة كلية الاقتصاد ولسع ما قلنا يا هادي حصلت إضرابات واحتكاك مع الإدارة وقفلت الجامعة بعد شهرين من دخولنا لها عدنا لمدننا قبل ما نشتاق لها او يشتاقوا لنا . عطلة مبكرة استمرت قرابة الأربعة أشهر.
رجعت للعمل مع الوالد بمكتبة كباشي كسلا. ونحن جالسين في الصالة أمام المكتبة نتناول الفول. أحد أصدقائه، والوالد كان له فئات مختلفة من الاصدقاء بمختلف طبقاتهم ومستوياتهم التعليمية تبدأ من الأميين وتنتهي عند حملة الدكتوراه،
بعد ما جاءت سيرة الجامعة وسبب اغلاقها وجه لي الضيف سؤالا مباشرة ( انت تقرا شنو في جامعة الجزيرة يا درديري؟ .. قلت إقتصاد .. أعاد لي السؤال (أقتصاد دا شنو ؟)
أكيد هو سؤال تهكمي أكثر من كونه استيضاحي كأنه يريد أن يقول بدلا أن تضيع زمنك في شيء غير معروف مهنيا واصل عملك مع أبيك وأكسب زمنك). أنا أحترت كيف أرد حتى لو اعتبرت سؤاله استيضاحي ليس لدي معلومات كافية عن الاقتصاد حتى أرد. نحن بعد شهرين فقط قضيناها في الجامعة حتى لم نتعرف على زملائنا دعك من أن نتعرف على الاقتصاد في شهرين.
بعد أن طال سكاتي وطال انتظار الضيف للرد .. تدخل الوالد كعادته. فهو رحمه الله كانت له دخلات لطيفة ينقذك بها من الورطات حتى لو لم يكن يعرف الرد فهو عنده ما يغني السائل عنه.
قال :
في الخمسينات كنا نجلس في تكية السيد على الميرغني بالخرطوم بحري عدد كبير من المريدين وهم اتباع الطريقة الختمية من مختلف أقاليم السودان. فجأة خرج من أحد الغرف أفندي (الشخص المتعلم الذي يلبس بنطلون وقميص وفي كامل أناقته أعتقد أن المصطلح متوارث من العهد التركي) وكان يقدمه أحد الحيران.
أحد الحضور سأل جاره مع رفع كتفيه ( دا منو كمان ؟)
رد الجار: أستاذ يدرس أولاد السيد علي
- يدرسهم شنو ؟
يدرسهم الاقتصاد
- والاقتصاد هو شنو ؟
- التقرمط ..
فقط كلمة واحدة ما زادها أغنت السائل عن ملاحقته. كما عاد يتابع الأستاذ حتى بلغ باب الشارع وعاد الحوار الذي قدمه حتى الباب. ربما شعر بإحباط فهو جاء يسأل السادة لمساعدته ماديا وها هم عندهم أستاذ يدرسهم التقرمط .
كما أغنى هذا الرد المفحم سائلي أنا عن ملاحقتي.
لكن ظل المصطلح يلاحقني أنا حتى تخرجت من الجامعة وحتى في الدراسة فوق الجامعية.
هل الاقتصاد هو التقرمط فعلا .؟.
إذا كان الاقتصاد في أبسط تعريف له من عندي .. هو الأسلوب والتنكيك الذي يجعلك تستغل الموارد المتاحة الاستغلال الأمثل لتحقق أعلى فائدة مرجوة وبأقل خسائر ممكنة.
يعني بصورة ما نعم هو التقرمط مافي شك .
|
Post: #2
Title: Re: التقرمط
Author: Biraima M Adam
Date: 12-10-2017, 07:58 AM
Parent: #1
درديري
سلام ..
كدي أشرح لينا مفهوم القرمطة في واقع الحياة في الشرق ..؟ يعنى زول متقرمط يعنى مقرضها علي نفسه وأهله؟ .. أم هو شحيح اليد عديل؟
بريمة
|
Post: #3
Title: Re: التقرمط
Author: درديري كباشي
Date: 12-10-2017, 09:23 AM
Parent: #2
مرحبا يا دكتور بريمة
شرفتنا اليوم
بحكم مسقط رأسي شرقا ودراستي وسطا واحتكاكي بالعاصمة كثيرا .. لاحظت أنه مفردة تقرمط منتشرة في هذه المناطق وأعتقد هي مشتقة من المفردة العربية التقريط .. التي تعني الاحكام .
والميكانيكية يستعملوه في حياتهم بفعل قرط وتقريط مثل ما هي .
لكن كذلك توجد مفرات كثيرة تحديدا في منطقة الجزيرة وشمال الخرطوم بين الجيلي وشمبات على وزن (تفعل) بكسر التاء والفاء وتشديد العين .. كسرتو جنس تكسر ودمرته جنس تدمر .
التقرمط معناها البخل والتقريط .
لكن كمان يعني الحرص والدقة في المصاريف . وحك اسبابها ومصادرها .وفكها الا مضطرا للشديد القوي ..
لو جونا ناس البادية يكون عندهم فيها اشعار ومسادير
|
Post: #4
Title: Re: التقرمط
Author: Biraima M Adam
Date: 12-10-2017, 01:51 PM
Parent: #3
شكراً يا درديري،
في غرب السودان، كأن الكلمة تستعمل في للزول الرافع أنفه فوق الجميع .. زول متقرمط شديد .. أو ربما أنا خلطها بكلمة زول متكرضم أو ملكرضم .. زول صاري وشو وشدوقو زي الداقينه .. يعنى الكلمة كرضمة.
وهناك كلمة لدينا، تسمي القرطعة .. وهى شرب الماء أو اللبن بنهم مع إحداث صوت طقطقة في الحلق .. وفي الأقتصاد تعنى البزار لمال الأخر .. ناس الحكومة قرطعوا قروش الشعب السوداني قرطاع .. وخلوا الشعب السوداني يقرمط في كل شيئ.
أها واصل .. متابعين .. إستخراج مفرداتنا السودانية الجملية.
بريمة
|
Post: #5
Title: Re: التقرمط
Author: علي عبدالوهاب عثمان
Date: 12-10-2017, 02:10 PM
Parent: #4
حبيبنا درديري .. عندنا في حفير مشو .. ناس درديري ولدينا نسابة معاهم
ناس علم ومعرفة وأشكالهم حلوة .. عائلا ت مأصلة هناك
حبيبنا درديري .. شخصياً إستفدت كثير جداً من سودانيز فيما يخص العامية السودانية
رغم أنني من ناس ضواحي الدنيا ولكن لفظ ( قرط) كنت بسمع الاسطوات يقولوا ( قرط الصامولة)
الربط بإحكام ..
وحبيبنا بريمة .. مرجعية في تراث أهله .. شخصياً أتابع كل مداخلاته ..
أحياناً بعض الاخوان لا يفهمون طريقته وأقصد لديه ( المزاح التقيل ) وهذا تراث لدى أهلنا
عندما يريدون إفهامك موضوع معين يلجأون إلى الغلظة ( المزح التقيل )
شكراً درديري .. لازم تأخذ جولة على حفير مشو .. وأهلا بيك
شكراً بريمة
سياحة تراثية جميلة ..
|
Post: #6
Title: Re: التقرمط
Author: قسم الفضيل مضوي محمد
Date: 12-10-2017, 02:45 PM
Parent: #5
.
.
تحياتي درديري وضيوفه ...
.
.
لدي طرفة حصلت لواحد بلدياتنا مشابهة لطرفتك ...
وهي ان بلدياتنا مشى مصر قرا كورس "تذاكر" طيران ...
بعد جاء سأله عمه قال انت مشيت قريت شنو ؟
ولدنا ردّ ليه وقال ليه قريت tickets...
عمه قال ليه وتكت دي شنو ؟؟
ولدنا قال ليه تكت يعني تذاكر ...
عمنا قال ليه اسي التذاكر دي دايرا ليها قراية !!!
.
.
هناك طبعا الكثير من المفاهيم المغلوطة لدى بعضنا ولدى بعض أهلنا تجاه التخصصات الاكاديمية وكثيرا ما يفتي الشخص ويمد غيره بمعلومة قد تكون خاطئة فتقوم بتغيير مسار حياته كليا ...
عندك مثلا أنا كان عندي رغبة قويةوأنا في الثانوي في دراسة القانون ولكن كان في كتاب التربية الاسلامية في ذلك الوقت نص صريح يحرم مهنة المحاماة والقضاة !!! فصرفت نظر عن دراسة القانون بسبب تلك الفتوى التي اتضح خطاؤها لاحقا ...
بالنسبة لكلمة قرموط ما اعتقد هي بنفس المعنى الاوردته انت ...
فاغلب سكان النيل الازرق مرتبط هذا الاسم لديهم بنوع من السمك الذي يعيش في النيل الازرق وأنا اول ما قريتها خطر في ذهني انك حا تتكلم عن السمك ... وللتأكد اكثر مشيت قوقل ولقيت انها فعلا نوع من انوع السمك ...
عموما ارجو ان لا حرفت البوست مساره وبجيك صاد مان ربنا هون ...
|
Post: #7
Title: Re: التقرمط
Author: نور الدين عثمان
Date: 12-10-2017, 03:00 PM
Parent: #6
قرمط على كده يا درديرى
|
Post: #13
Title: Re: التقرمط
Author: درديري كباشي
Date: 12-11-2017, 06:05 AM
Parent: #7
قرمط على كده يا درديرى
------------------------
أصلا هو مقرمط من زمان يا زميلنا في القرمطة ههههههههههههههههه
|
Post: #8
Title: Re: التقرمط
Author: Biraima M Adam
Date: 12-10-2017, 03:14 PM
Parent: #6
ول أبا علي
سلام ..
Quote: رغم أنني من ناس ضواحي الدنيا ولكن لفظ ( قرط) كنت بسمع الاسطوات يقولوا ( قرط الصامولة)
الربط بإحكام .. |
قرط الصامولة .. يعنى أديها حبة لفة زيادة ..وما خلي ليها نفس ..
ورد في لسان العرب ..
| Quote: وقَرَّطَ عليه: أَعطاه قليلاً. |
وهذا هو المعنى الذي قصده والد أخونا درديري .. وهو المعنى المقصود أيضاً من قريط الصامولة.
قسم الفضيل، نعم، القرموط سمك معروف في الدمازين يتم صيده في الخزان ..
بريمة
|
Post: #9
Title: Re: التقرمط
Author: محمد نور عودو
Date: 12-10-2017, 10:40 PM
سلامات درديري وضيوفك
( انت تقرا شنو في جامعة الجزيرة يا درديري؟ .. قلت إقتصاد .. أعاد لي السؤال (أقتصاد دا شنو ؟)
عندنا واحد قريبنا لامن كان طالب كلام كثير عندو عمو جا من البلد وجاب ليهو مصاريف كل مرة بسمع الولد بيغالط في الناس عمو قام سالو انت بتقرا شنو يا ولدي؟
رد ليهو قال ليهو بقرا حقوق.عمو ردد ليهو السؤال زي زولك دا وقال ليهو حقوق يعني و تتخرج شنو؟
قريبنا بدل يقول قاضي أو محامي قام طوالي قال ليهو بتخرج محامي يا عمي.
عمو قال ليهو يعني مغلاطي.
يابريمة الزول الشابف نفسه أو رافع انافو زي ما بيقولو السودانيين .
بيقولو عليهو دا زول متقرضم
|
Post: #10
Title: Re: التقرمط
Author: Biraima M Adam
Date: 12-11-2017, 01:39 AM
Parent: #9
الأخ محمد نور
سلام ..
Quote: يابريمة الزول الشابف نفسه أو رافع انافو زي ما بيقولو السودانيين .
بيقولو عليهو دا زول متقرضم |
متقرضم لهجة أم درمانية .. نحن البقارة نقول ملكرضم .. والمتعلم منا يقول متكرضم .. والكردمضة (بفتح الكاف والراء) نفخ الشدقين .. والكُردُمضة (بضم الكاف والميم) هي حال نفخ الكضمين ..
ههاي
بريمة
|
Post: #16
Title: Re: التقرمط
Author: درديري كباشي
Date: 12-12-2017, 09:05 AM
Parent: #9
عندنا واحد قريبنا لامن كان طالب كلام كثير عندو عمو جا من البلد وجاب ليهو مصاريف كل مرة بسمع الولد بيغالط في الناس عمو قام سالو انت بتقرا شنو يا ولدي؟
رد ليهو قال ليهو بقرا حقوق.عمو ردد ليهو السؤال زي زولك دا وقال ليهو حقوق يعني و تتخرج شنو؟
قريبنا بدل يقول قاضي أو محامي قام طوالي قال ليهو بتخرج محامي يا عمي.
عمو قال ليهو يعني مغلاطي
***************
ههههههههههههههههه
منور يا عودو يا رفيق درب الاسافير
|
Post: #12
Title: Re: التقرمط
Author: درديري كباشي
Date: 12-11-2017, 06:04 AM
Parent: #6
لدي طرفة حصلت لواحد بلدياتنا مشابهة لطرفتك ...
وهي ان بلدياتنا مشى مصر قرا كورس "تذاكر" طيران ...
بعد جاء سأله عمه قال انت مشيت قريت شنو ؟
ولدنا ردّ ليه وقال ليه قريت tickets...
عمه قال ليه وتكت دي شنو ؟؟
ولدنا قال ليه تكت يعني تذاكر ...
عمنا قال ليه اسي التذاكر دي دايرا ليها قراية !!!
**************************************
هههههههههههههه
صدقت يا قسم
ناس كثر ظلمنا وظلمنا أنفسنا بسبب جهلنا بتخصصاتهم وأهميتها
أنت من تكون ممتحن الشهادة أهلك ومن حولهم في بالهم تلاتة تخصصات طب وهندسة وقانون
الباقاي ناس جلوجيا وفلسفة ولغات وانثربولوجي وعلم اجتماع واقتصاد والفنون بأنواعها .. هذه يسموها ضياع وقت
بالكثير لو شكروك يقولوا لك أنت أهلك ما محتاجين أقرا أي حاجة تعجبك .ز
أنا اثناء دراستي عندي خالتي سألتني أنت تقرا شنو ؟ قلت اقتصاد .تشتغل شنو بعدين؟ .. لقيت أقرب وظيفة ممكن تعرفها قلت لها ضابط مجلس .
قالت بختنا تشبعنا في الدقيق غايتو هههههههههههههههههههههههه
|
Post: #11
Title: Re: التقرمط
Author: درديري كباشي
Date: 12-11-2017, 05:58 AM
Parent: #5
حبيبنا درديري .. عندنا في حفير مشو .. ناس درديري ولدينا نسابة معاهم
ناس علم ومعرفة وأشكالهم حلوة .. عائلا ت مأصلة هناك
حبيبنا درديري .. شخصياً إستفدت كثير جداً من سودانيز فيما يخص العامية السودانية
رغم أنني من ناس ضواحي الدنيا ولكن لفظ ( قرط) كنت بسمع الاسطوات يقولوا ( قرط الصامولة)
الربط بإحكام ..
وحبيبنا بريمة .. مرجعية في تراث أهله .. شخصياً أتابع كل مداخلاته ..
أحياناً بعض الاخوان لا يفهمون طريقته وأقصد لديه ( المزاح التقيل ) وهذا تراث لدى أهلنا
عندما يريدون إفهامك موضوع معين يلجأون إلى الغلظة ( المزح التقيل )
شكراً درديري .. لازم تأخذ جولة على حفير مشو .. وأهلا بيك
شكراً بريمة
سياحة تراثية جميلة ..
***********************
تشكر يا أستاذ علي
ونثمن طلتك جدا واسهامك جدا
ما هي المعرفة أشياء من هنا وأشياء من هناك .
نتناولها ونتبادلها
فتزيدني وأزيدك
لا يوجد حد عنده الحقيقة المطلقة
وسعيدين مثلك ببريمة
طالما هو من علماءنا الأجلاء لا بنخاف عليه ولا نخاف منه
ونرجو منه أكثر مما يرجو من نفسه
|
Post: #14
Title: Re: التقرمط
Author: جمال ود القوز
Date: 12-11-2017, 09:08 AM
Parent: #11
التقرمط غريبة علي غايتو ..
و ما شايف انها بتعني التقريض التقريط ..
التقرمط دي ان شايف انها جاية من القرمطة ..
ودي حاجة تانية خالص ..
تقدر تقيس عليها لقب قرموط ..
غايتو دي وجهة نظر ممكن الناس يختلفوا معاها ..
لكن ماترموها واطة ..
لانها من زول بنادر وجخانين .. هههههه ..
|
Post: #15
Title: Re: التقرمط
Author: Hani Arabi Mohamed
Date: 12-11-2017, 09:45 AM
Parent: #14
بتقرا شنو ؟
حاسوب
حاسوب دي شنو ؟
كمبيوتر
والكمبيوتر دا داير له جامعة خمسة سنة ؟ ما ياهو معهد ثلاثة شهور وتمشي السعودية ... انا بلاقي ابوك بعدين اقول ليه دا شنو
|
Post: #18
Title: Re: التقرمط
Author: درديري كباشي
Date: 12-12-2017, 09:09 AM
Parent: #15
بتقرا شنو ؟
حاسوب
حاسوب دي شنو ؟
كمبيوتر
والكمبيوتر دا داير له جامعة خمسة سنة ؟ ما ياهو معهد ثلاثة شهور وتمشي السعودية ... انا بلاقي ابوك بعدين اقول ليه دا شنو
****************************
هههههههههههههههه
بيني وبينك يا هاني كلمة حاسوب دي ذاتها شينة واشنة ترجمة لمفردة اجنبية على وزن فاعول ودائما هي الأمراض التسمى كدا زي ناسور
شوفوا ليها بديل احسن وانت ناس الجلد والرأس
وانت وبريمة دا
|
Post: #17
Title: Re: التقرمط
Author: درديري كباشي
Date: 12-12-2017, 09:07 AM
Parent: #14
التقرمط غريبة علي غايتو ..
و ما شايف انها بتعني التقريض التقريط ..
التقرمط دي ان شايف انها جاية من القرمطة ..
ودي حاجة تانية خالص ..
تقدر تقيس عليها لقب قرموط ..
غايتو دي وجهة نظر ممكن الناس يختلفوا معاها ..
لكن ماترموها واطة ..
لانها من زول بنادر وجخانين .. هههههه ..
ههههههههههههههههههههه
جميل يا جمال القوز
طيب القرموط سموه لشنو ؟؟
|
|