داير أدِمس الكِتابة في المحل دا ...

11:50 AM November, 15 2017

سودانيز اون لاين
معاوية المدير-بكندا محافظة البرتا
مكتبتى
رابط مختصر

كنت عيان وغبت عن المنبر ؤ حسيّت بإنو في شي غريب في
حياتي ؤ زي الرايحة لي حاجة كدي، لحدي ما قربّت أعمل سجود
سهو، لكن بالرغم من كِدا الشعور دا كان مصحوب بشي من
الراحة !.


بالمناسبة،
الحمد لله بقيت شديّد ؤ لضيّض ما تجو تشبكوني حِمدِلآلك بالسلآمة،
والدُقشُم، وريتني كان انا، ؤ حيييييي يا يُمّة، ؤ وآ شِريرِي، تحرفو مسار
البوست، شكراً ليكم وِ اتهينا علي كِدا.

ايّ سغيل أها...

أدمِس الكتابة !، الكتابة ياتا كمان !،
والله يا ود المدير بارك الله فيك الفكيّت الحرف ؤ بعد دا أنا عارف ؤ مِتأكِد حا يجوني
يشبكوني ليك، يأخ والله العظيم نحن لآمن نشوف بوستاتك بنجي جاريين جري، ؤ
واحدة خيالية كِدا تقول لي، والله يا ود المدير أنا من أشوفك كتبت مدآخلة بجدع
الفي إيدي وألفح توبي واجي جارية، دا خلآف البيجي يقول لي، يأخ والله انا بجي
داخل المنبر دا عشانك، والبيقول لي إنت كاتبي المفضل، والبتقول لي، غايتو يا
ود المدير إنت كان شتت أنا بنتحر.....إلخ.

بعد دا في سِرهم يقولو، الفارة دا عامل فيها الطيّب صالح ؤ

الف حمد الله علي السلامة
ما تشوف شر

تنبيه،
اي أنا بحب بوستاتي تكون منبسغة لكن البوست دا ما منبزغ فما يجي وآحد
لآيووووق يشبكني بوست منبزغ ؤ يقعُد يتلآيق .


شكراً...

Quote: الف حمد الله علي السلامة ما تشوف شر

أها بدينا !،
يأخي كان دآير تِتحمدلي السلآمة أفتح بوست عشان أنا بحب
الحاجة دي ؤ بتشعرني بأني كاتب مهم .

في اليومين الوقفت فوقن ديل قِدِرت اشطُف هِديماتي وأكل من تبيخ
حلتي ؤ قِدِرت إتشطّف، ؤ بعد زمن قِدِرت البس هدوم مكويات، واسرّح
شعري !، ياتو !، وأعمل حاجات كتيرة حالي دا عيان، وأكبر تغيير حصل في
حياتي إحساسي بأني كاتب كبير ذهب مع الريّح ...

حِمدِلآلك بالسلآمة، والدُقشُم، وريتني كان انا، ؤ حيييييي يا يُمّة، ؤ وآ شِريرِي

على السلامة ياقريبى

القربة قاعدة تزيد المرض نزلة ساكت تخليك تقنت

يا جماعة عليكم الله ركزوا معانا
أنا قلت داير ادِمس الكتابة في الدآهية دا !...

يا مدير ادمسها ساي امبعلها مامرقت منها
خشيت برج نحس كارب دمستو هنا
بكتب ساي ومليتكم فقر
لو فرملت ببنشر عديل كدة
اها بعد حق الله بق الله خش
ما تقولي عندي تسعة

حمدا لله علي السلامة يا عمك
اتعود ما تدمن أي حاجة في الدنيا دي عشان لو فكرت تترك ما تأثر فيك

واسرّح شعري

زرعتا من وراءنا أم بتكتب وفي بالك العام 1940 ؟؟؟

و الله كرهتنا القراية في المنبر دا بي واوك اللابسة همزة دي ....
اوووووووووووف ....

بوست ممعن فى الونسة و فى الونسة الهايفة كمان
و اربأ بنفسى من الدخول فيه
و رغم ذلك اقول
اتّا وكت عندك المصران الاعرج البوديك تاكل الكسرة المرّة شنو
عالم شرفانة

Quote: و تشبكوني حِمدِلآلك بالسلآمة، والدُقشُم،

هههههها
تصدق الناس نايمين وانا اضحك
واتلفت

اه يا مصاريني كما يقول الجيلي احمد

علي بالطلاق المنبر من غيرك ما بتقعد :))

Quote: حِمدِلآلك بالسلآمة، والدُقشُم، وريتني كان انا، ؤ حيييييي يا يُمّة، ؤ وآ شِريرِي

داير تخرب البوست مُش !،
أصبر سااااكت بلِم فيك ماشي السودان السنة الجاية
إن شاء الله .

Quote: على السلامة ياقريبى القربة قاعدة تزيد المرض نزلة ساكت تخليك تقنت

أها وكِت تقنت يا قريبي زول يقولك عينك في راسك
مافي، عشان كِدا بنجي نِندمِس هنا .

ما عندك وجيع ..
ناس جلالدونا ديل صحبتم فو ..
هسه لو كان جاء كتب لينا الوريف ود المدير ملازم السرير الخ ..
كانوا الزملا والزميلات بداقشو بعض ..
بعدين انت الظاهر مصارينك نشفن من البرد ..
كسرة شنو البترقد بيها ؟
كنت عايز اهدي ليك غنية بروى ليك اسبوعين ما جيتنا ..
إلا خفتك تجوعر في أنصاص الليالي دي ؤ تلم الحلة.

نان تغور وين! اوعاك تكون منشّن على فور اول

دمسها ساي امبعلها مامرقت منها
خشيت برج نحس كارب دمستو هنا

==========
حبيبنا ود المدير .. أرجوك يا جميل راعي ظروف غير الناطقين بها
بالله عليك زول مولود ومتربي في ضواحي الدنيا يفهم الكلام الفوق ده كيف
أولاً لازم تشرح لينا معنى كلمة ( أدمس )
يا جماعة رفقاً بالمهمشين .. بوستات الونسة ما قاعد أفهم حاجة منها ..
لابد من عمل حواشي لأي مفردة غريبة .. هههه
يعني نكون محصورين في بوستات زهير وحسين عرفات ... إلخ


جماعتنا ناس .. مولانا الملك وحبيبنا جمال ودالقوز ومجيدو ..ديل إستثناء

يا زول تدمس ندمس كلنا .
انشاءالله لو دمستها يطاك دحش في البنطون وانت تكون لابس شبط .

Quote: يا مدير ادمسها ساي امبعلها مامرقت منها خشيت برج نحس كارب دمستو هنا بكتب ساي ومليتكم فقر لو فرملت ببنشر عديل كدة اها بعد حق الله بق الله خش ما تقولي عندي تسعة

هسّع لو خشيّت برج حمام كان أقلآها طلعت بشوربة، عليك دِيّنك دا
زمن الزول يخش فيهو برج نعس !، بالمناسبة أوّع تكون من مواليد برج
الجوزاء . أوّعك تبنشر الزمن دا في ازمة عفاريت، تسعة في عينك يأخ ...

Quote: حمدا لله علي السلامة يا عمك اتعود ما تدمن أي حاجة في الدنيا دي عشان لو فكرت تترك ما تأثر فيك واسرّح شعري زرعتا من وراءنا أم بتكتب وفي بالك العام 1940 ؟؟؟

السلميّة التوضِبك، غايتو المحل دا ادمناهو وادمنا خلقكم دي، الواحد
بلآكم يقبّل ويّن ؟.
سنة 40 دي أنا حبوبتي بت ميدوب كان عندها جلكسي 13 إنت بتلعب
واللآ شنو ، يا باهي أنا كان فيّ قُدرة زراعة كان زرعت ملوخية، يعني
الواحد ما يأخد لهو دقسة مع الماضي ؟، ليه بتسرقوا اللحظة الحلوة
مِننا !...

Quote: و الله كرهتنا القراية في المنبر دا بي واوك اللابسة همزة دي .... اوووووووووووف ....

كِدي سيّبك من الواو ؤ ركّز معاي في أمر ضروري، ثم بما إنّك خبير في سحب
العِدة، الزول لما يسحبو مِنّو العِدة شعورو بيكون كيف وما هي نسبة التغيير
في حياتو ؟.
تصدق داير أقول لبكري يعمل لي تست، يسحب العدة لمدة إسبوعين ؤ بعد
دآك يرجعا لكن خايف اب صلعة دا يعمل نايم ...

Quote: بوست ممعن فى الونسة و فى الونسة الهايفة كمان و اربأ بنفسى من الدخول فيه و رغم ذلك اقول اتّا وكت عندك المصران الاعرج البوديك تاكل الكسرة المرّة شنو عالم شرفانة

دني، أنا دني أها وكان ماني دني باكل كِسرة بالطماطم والبصل والشمار
الساعة 2 صباحاً، بس هسّع عليك الله في داعي لمداخلتك الهايفة دي ؟،
سكتنا علي هيافة البوستات كمان جاتنا هيافة المداخلات !، إستغفرتك
يا مالك روحي ...

Quote: هههههها تصدق الناس نايمين وانا اضحك واتلفت

أها يا عبد المنعم بعد الجزيّمة دي كولها
ما ريحوني !...

Quote: علي بالطلاق المنبر من غيرك ما بتقعد :))

خلآس جيتوني يا وِلآد اتبرا !،
ياخ نحن كنا لآمن نمرق من السينما الوطنية بنكون شربنا مزيرة السينما
والمزاير الحولها ؤ نمشي نقيف فوق كبري الحرية نرجى القطر يجي ؤ نكُبليك
المزاير دي كولها فوق الناس المسطحين، يعني بنكون عطرناك في لحظة
من لحظات حياتك عشان كِدا بطّل بكش ...

Quote: ما عندك وجيع .. ناس جلالدونا ديل صحبتم فو .. هسه لو كان جاء كتب لينا الوريف ود المدير ملازم السرير الخ .. كانوا الزملا والزميلات بداقشو بعض .. بعدين انت الظاهر مصارينك نشفن من البرد .. كسرة شنو البترقد بيها ؟ كنت عايز اهدي ليك غنية بروى ليك اسبوعين ما جيتنا .. إلا خفتك تجوعر في أنصاص الليالي دي ؤ تلم الحلة.

عاد أنا ألقى لي وجيّع وين ما دآم جلالدونا خُوّتو طلعت خُوّة مرآسة !،
زولك وقعت قدامو في الوآطة رَبّ ما قال لي عينك في رأسك !، لكن
أكان فتح البوست كنت بقعد إتبسّم ساكت نعمني بريد الإهتمامات
شديد خاسةً من جانب الفيونكات .
الكِسرة بريدا عِلآ قرّبت تلحقني أُمات طه، ؤ وكِت الكِسرة ما قِدرت لحقني
أُمات طه إنت جيّب إسبوعين لبروي الله يرحمو ؤ جيّب معاها بِيُوّت الطين
القدِيّمِ خلني اللكنكِش ...

Quote: نان تغور وين! اوعاك تكون منشّن على فور اول

فور اوّل دي وين لمبيريكة ؟...

Quote: حبيبنا ود المدير .. أرجوك يا جميل راعي ظروف غير الناطقين بها بالله عليك زول مولود ومتربي في ضواحي الدنيا يفهم الكلام الفوق ده كيف أولاً لازم تشرح لينا معنى كلمة ( أدمس ) يا جماعة رفقاً بالمهمشين .. بوستات الونسة ما قاعد أفهم حاجة منها .. لابد من عمل حواشي لأي مفردة غريبة .. هههه يعني نكون محصورين في بوستات زهير وحسين عرفات ... إلخ

أُستاذنا علي حبابو .
أدمِس، فِعل أمر من دمس الشئ اي خلآهو والفاعل دآمس علي وزن
فاعل، وإشتق أهل اللغة عندنا منها الدِميّس وهو الكِتيّح ومنه الفول
المدمس أي المررو .

ايّ كلمة صعبة أُخرى نحن جاهزين ...

Quote: يا زول تدمس ندمس كلنا . انشاءالله لو دمستها يطاك دحش في البنطون وانت تكون لابس شبط .

حي، أمانة الوطية علي السقالة ماها حرة،
عموماً كتّر خيّرك علي التضامن والدينمو زاتو كمان ...

فضحتونا يا ناس الضهاري مع الأمير توفيق
حسي اكان جاء داخل قرا كلامكم دا نودي وشنا وين؟؟

يا الله تصرفو