Post: #1
Title: البشري ونضال ينامون ...والطياره فاتت
Author: علي الكرار هاشم
Date: 11-04-2017, 12:09 PM
12:09 PM November, 04 2017 سودانيز اون لاين
علي الكرار هاشم-الرياض
مكتبتى
رابط مختصر الشعراء ديل ناموا
الطياره فاتت
عملوا الحيله والسبب من التوقيت
وكتبوا مربعات.........
لا بد من الرد عليهم
همتكم
مربعات عاجلة
|
Post: #2
Title: Re: البشري ونضال ينامون ...والطياره فاتت
Author: علي الكرار هاشم
Date: 11-04-2017, 12:10 PM
Parent: #1
لبشري ونضال اول ضحايا تغيير التوقيت
وهم في رحله الي الابيض عبر طيران نوفا
ولكن الطائره فااااااتت لأنهم معتمدين علي الزمن القديم
ونظمو هذه المجادعه
البشري
: الحيكومه ديمه علي الضعاف تتشفت
ناقصين الزمن يعني القبيل ما كفت ؟
راجي الطايره بالزمن القديم ومزفت
فااااتت قالو وانا يا هسي قاعد اتلفت
نضال حسن الحاج:-
نوفا الفينا بالزمن الجديد اتشفت...
حالت دون لقا العين شوقنا ليهم رفت
مدام الصدمة ياستر الكواشف خفت ...
حقو الماضبط ساعاتو هو الاتكفت
بشرى البطانة:
نقصو ساعه شان يرمونا في ها اللوم
عارفين شوقنا لي ناس كردفان بالكوم
لكين انتي اخرك الاكل والنوم
ما قتيلي كان م حشيتا تب ما نقوم
نضال حسن الحاج:
مادام جبت كضبتك آبختوتا" شوم...
انا بوريهن الحاصل وارد اللوم ...
اخير الممن دغش منتظره في الخرطوم؟؟
وللا ال شال ضحوتو يغسلولو هدوم....
بشرى البطانة:
حظك كج واصلك م بتجيبي بشاره
اول مره اظنك تركبي الطياره
بعد م قلنا نضرب شيه في سوق بارا
تاني رجعنا لي ملاح روبنا والكراره
نضال حسن الحاج :
حظا كلما لاويتو ما في بصاره
رماني على هدا ال من لاهو مافي دباره ...
حظك اكان كعب لكن بقتلو جباره
خلتك انت تبقى معاي في طياره
بشرى البطانة:
فالحين في الزمن يا امة الانقاذ
تقرضو في الزمن قايلين عملتو انجاز
اتو اكان حقيقه بتعملو الاعجاز
انقصولنا الرغيف والانسلين والجاز
نضال حسن الحاج:
انا لي ناحيتك بي هينه مابنحاز...
لكن اقتراحك في رقبتو ..مجاز ...
تأخير الزمن لا بشاره لا انجاز
كدي الانكربو في العيش والدقيق والغاز
|
Post: #3
Title: Re: البشري ونضال ينامون ...والطياره فاتت
Author: علي الكرار هاشم
Date: 11-04-2017, 12:11 PM
Parent: #2
المربع الاول
نايمين للضحى لين فاتت الطياره
قايلين السفر باللوري ولا حماره
جيتو تغنو مبسوطين تدقو الطاره
ما تلومو الزمن وتسوو فوقو الغاره
|
Post: #4
Title: Re: البشري ونضال ينامون ...والطياره فاتت
Author: علي الكرار هاشم
Date: 11-04-2017, 12:24 PM
Parent: #3
من الواتس
يكتب صلاح الكباشي
نوفا اسم معروف وطائرة جديدة.
في عالم الطيران الدقة في موعيدة
اتمشدقت يالبشرى وعملت قصيدة
وكايس في المطار شافوك مطارد صيده
|
Post: #5
Title: Re: البشري ونضال ينامون ...والطياره فاتت
Author: فرح الطاهر ابو روضة
Date: 11-04-2017, 12:33 PM
Parent: #4
يعني هسه بشرى ونضال
بس واجعم في الحكومة دي
انها غيرت الزمن
وحق التذكرة
|
Post: #6
Title: Re: البشري ونضال ينامون ...والطياره فاتت
Author: ود الباوقة
Date: 11-04-2017, 11:06 PM
Parent: #5
ابو روضة
ارجو ان تنضبط في مقام الشعر
والشعراء
وشكرا
|
Post: #7
Title: Re: البشري ونضال ينامون ...والطياره فاتت
Author: فرح الطاهر ابو روضة
Date: 11-05-2017, 11:57 PM
Parent: #6
يعني بقيتو
تتذوقوا الشعر
حكمتو بالغة
|
Post: #8
Title: Re: البشري ونضال ينامون ...والطياره فاتت
Author: سيف النصر محي الدين
Date: 11-06-2017, 03:31 AM
Parent: #7
نضال حسن الحاج مربعاتها مكسورة
|
Post: #9
Title: Re: البشري ونضال ينامون ...والطياره فاتت
Author: Haytham Ghaly
Date: 11-06-2017, 04:01 AM
Parent: #8
نضال حسن الحاج مربعاتها مكسورة
__________________
ههههههههه
والله يا دكتور سيف انا زاتي لاحظت نفس الشي
بالذات الاخير صرحت فيهو عدييييل
|
Post: #10
Title: Re: البشري ونضال ينامون ...والطياره فاتت
Author: عزالدين عباس الفحل
Date: 11-06-2017, 02:32 PM
Parent: #9
الانقاذ فتية و كافية جسارة.
الساعة وكت لزوها مو خسارة .
دايرة الناس بنشاط و بجبارة.
عجلة الانقاذ دايرة دبارة
اللوم في البوم الغشيم بينوم.
لي ضل الضحي و ان لكزوهو ما بيقوم.
***
اجتهاد في مجادعة.
ولست بشاعر .
عزالدين عباس الفحل
ابوظبي
|
|