كلمني الساعة كم

08:22 AM October, 30 2017

سودانيز اون لاين
عبدالحفيظ ابوسن-no where
مكتبتى
رابط مختصر

الاربعاء واحد حداشر الساعة اطناشر بالليل بتجيني مرتين
واليوم زاتو بكون خمسة وعشرين ساعة
يكون البلدوهم الساعة اطناشر بالليل التانية ما معروف يحسبوهم شهر عشرة ولا شهر حداشر

دي يا ود اب سن حفلة راس سنة إضافية

الناس يسموها سنة جر الساعة ... ولا سنة البشير أصلا كلها سنين كبيسـة

زي زمان الناس يقولوا ليك .. سنة الهبوب الحمراء وسنة العيش

يعني فيها طفي انوار وموسيقى هادية ولا اصلها الانوار طافية ما لاقية كهرباء

والموسيقى شغالة من القعـو .. الضفادع ... والبعوض الضكر

أحمد الشايقي

يجي يقول ليك بالتوقيت القديم ولا الجديد

زي القروش بالقديم ولا الجديد

جوبكوا البلد في توقيتها وفي تعليمها وفي عملتها وفي اخلاقها وفي اي شئ تبا ليهم
جت

تعرف يا صاحب المنشور،
مسألة جر الساعة هدم حسابات خطوط الطول ، وحسابات التوقيت العالمي فيما يتعلق بخرطومنا.
ففي الواقع - كمايعلم الكثيرين - نحن في خط طول وتوقيت - تقريبا تماما - مع القاهرة.
وبعد العملية الزمنية المشهودة ، بقيتا في خط الطول نفسه ، وتحركنا قليلا لليمين لنعيش مع زمن خط طول آخر ، الرياض السعودية كمثال.
فالأمر هدم حسابات الوقت وعلاقته بخطوط الطول، أو العكس ، ولو جزئيا.

عفوا..

دخلة غلط.

وما ح تتكرر تاني..!!


كبر

Quote: مسألة جر الساعة هدم حسابات خطوط الطول ، وحسابات التوقيت العالمي فيما يتعلق بخرطومنا.

تحياتي حفيظ ...
شيخ قصي بعد التحية ... بكرة الساعة 12 بالليل
ما حا يكون في جر للساعة ... وإنما تعطيل ووقف
الساعة لمدة ساعة كاملة وتشغيلها مرة اخري ...
الجر حصل زمان وبقي توقيتنا زي مكه المكرمه
وكنا بنزيد ساعة واحدة علي توقيت قرينتش
من يوم الأربعاء سوف يكون توقيت الخرطوم
يتخلف عن توقيت مكة المكرمة بي ساعه واحدة
ويزيد عن توقيت قرينتش بي ساعتين. يعني
حا نرجع للنظام القديم ...
تعديل يسبق الي يتخلف عن ... شكرا" قصي.

يعني يا الشايقي ذكرونا قصة بداية القرن 2000 وحكاويهو
حنحتفل براس السنة مرتين

يا اباذر هن ولا اسماء المدارس .. محفوظات من قمنا يقول مدرسة الفجاغ بن ابي لحسة بين قوسين نمرة 3 سابقا
ولا الاحياء

صاحب منشور شنو يا قصي
يعني هسة اقول ليك
ايها الراد علي المنشور
بتبالغ ياخ

مسحت شنو يا كبر
تعال راجع
الحكومة بقت ترجع

مسحت اجمل غنية ،
ما ح يديك ليها زمن..
(يا عبد الله بتتدقا)..!!

القصة يا صلاح مش خطوط طول وعرض
دي عملوها ناس اكثر احترافية من ناس عصام والانقاذ ديل
والاهم هو الناس تواءمت معها نفسيا
يعني تجي 12 يقول ليك ساهرنا
تصحي 6 يقول ليك بدري
شوف لخبتو ساعتنا زاتها
ولم يطرف لهم جفن
قامو رجعونا تاني

قالوا ليهو شداد رجع للاتحاد والمرحلة المتوسطة رجعت والتوقيت رجع للقديم قال ليهم طيب الانجليز جايين متين😂😂😂😂😂
الحقيقة
مرقنا ناس ذوي ارث ثقافي وحضاري واستبدلنا بهم كابوي بنطلونو ناصل من حزام المسدس يبحث عن مناجم الذهب بإبادة اهل البلد

أحلى نكته🤣🤣🤣🤣🤣🤣
الجماعة جروا الزمن ساعة لي وراء طلع لينا شداد اريتو كان جروهو ساعتين اكان طلع لينا اسماعيل الازهري وهو برفع علم السودان عند استقلال السودان عشان نبدأ من جديد 🙊

جيبها يا كبر

Quote: صاحب منشور شنو يا قصي يعني هسة اقول ليك ايها الراد علي المنشور بتبالغ ياخ

المنشور هو المقابل العربي لكلمة post الإنجليزية، وكثير ما تكت بالأربوإنجليش (البوست)
وصاحب المنشور هو الأخ عبدالحفيظ أبوسن.
يعني ممكن تقول :
ايها الراد علي صاحب المنشور،
وكمان لو داير تختصر الزمن على القارئ بحيث لا يذهب ويبحث عن صاحب المنشور ، فيمكنك القول:
أيها الراد علي.
لأن المنشور لم يتداخل بعد، ولو تداخل يختلف الخطاب الموجه
شفت كيف؟

-----

المهم:
كل موضوع إرجاع الساعة يتلخص في أمر عسكري يتكون فقط من لفظين:
كما كُت.

ههههه
عارف يا قصي
فيها جفاء لكن
مخاطبة الناس بأسمائهم تزيد الالفة

ابا ذر عبد العال
تعليقك اوسكار ..اوسكار ...اوسكار...ولا شك...
كل شئ في البلد بقى قديم وجديد،،،
وود ابو سن بقول ليك حتى المدارس قلبوا اساميها لاسماء الصحابة وبقول يقولوا مدرسة عثمان بن عفان ، مدرسة رقم ٣ سابقا
ومدرسة زينب بت جحش ، مدرسة الخرطوم ٣ بنات،،،
وبعد الزمن بقى زمنين ، قديم وجديد، حنقبل على اسماء الشوارع الرئيسية، ونقول شارع خيبر، شارع الجمهورية سابقا،،،
ولك الله يا وطن، والله يستر ما يغيروا اسم السودان كمان الى ساديستان، ونقول جمهورية ساديستان، جمهورية السودان سابقا،،
ودمت بخير وعافية

Quote: يا اباذر هن ولا اسماء المدارس .. محفوظات من قمنا يقول مدرسة الفجاغ بن ابي لحسة بين قوسين نمرة 3 سابقا ولا الاحياء

فعلا غيروا اسامي المدارس

من امس هناك نتجية طالب بمرحلة الاساس متدوالة في مواقع التواصل الاجتماعي
حيث ان الطالب محرز المركز الثاني مشترك في ترتبيه في الفصل الذي به 33 طالب
وساقط في المجموع وعدد من المواد ...حاجه غريبه لدرجة انو البعض شك في انها غير حقيقه
ولكن ظهر احد المعلقين في القروبات واتحدث بمعرفته بهذه المدرسة التي كانت تسمي مدرسة ودرواه الشرقية سابقا
جات الانقاذ وغيرت اسمها القديم الي جديد دار الارقم...وثم غيرته سمتها الشيخ عبد القادر علي..

وكثير من التغيرات في المسميات في المدارس وحتي القري طالها تغيير المسميات

Quote: ابا ذر عبد العال تعليقك اوسكار ..اوسكار ...اوسكار...ولا شك... كل شئ في البلد بقى قديم وجديد،،،

تحياتي يا عطبروايه ...

بالجديد ولا بالقديم جملة ترفع الضغط..

لو تعرفي مدرسة الاهلية المصرية الثانويه في عطبره
انا درسة فيها الثانوي وبقت اسمها مدرسة الانقاذ الثانوية
الان عرفت انها تحت اسم اخر اظن رجعت اهليه ومصرية تاني ههههههه

سلام ابسن و الضيوف

بكرة بالليل في ناس و سفارات محتفلة بالهالووين، يعني الحفلة🎈 ح

تكون ساعة زيادة. الحقيقة الانقاذ قلبت حياتنا لي 364 يوم من الهالووين

نشوف آذان صلاة الصبح يوم الأربعاء ح يكون الساعة كم.

سلام يا أبو سن وضيوفه
كل العالم ماشي قدام إلا نحن
الكنا عاكسين الطريق
وكويس أنهم بدو يرجعوا بنا حيث كنا
لنقطة الصفر حيث بدأوا يعكسوا الطريق
أو عسى ولعل أن يكون الأمر كذلك
وعقبال يرجعوا كل شيء جميل فقد
أو خطف...
الحمد لله على رجعة الساعة لينا
وعقبال الباقي

⏰⏰⏰⏰⏰⏰

- نتلاقى الساعة كم
- نتلاقى ستة كيف معاك؟
- ستة بالجديد و لا القديم؟
- ستة بالجديد ياخي.
- بالجديد الجديد و للا الجديدالقديم
- لا بالقديم الجديد
- لا قصدي بالجديد الكان جديد بقي قديم ؟
- ايوا ياخ بالقديم الجديد الكان قديم
اسمع نتلاقى الساعة كم بتوقيت قرينتش من الآخر كدا.
🤣🤣🤣🤣😜🤡

Quote: يكون البلدوهم الساعة اطناشر بالليل التانية ما معروف يحسبوهم شهر عشرة ولا شهر حداشر

إنت مش اتولدت وخلاس؟ يحسبوهن شهر حداشر ولَّا فى امشير بتفرق معاك شنو؟
ده بوست اخير منه بوست الجدادة الراكضة.

كيف يا حفيظ

والله لو رجّعوا قروش ماليزيا يكونوا أحسن ناس في الدنيا

بس موضوع ساعات العمل (الدوام) لو ياهو نفسو الناس ما اتمقلبت

الناس البعرفو الوقت بالضل
يشيلو من الحيطة مدماك

عبدالحيظ وضيوفه - مساء الخير
غايتو فى قصه جر الساعه مابجرها الا يجروها لى ناس شركه الاتصالات فى تحديث الوقت فى الموبايل
غايتو كان ماجروها ح اكون مدور بالقديم بس
*فارقت ساعه اليد من ماسعيت الموبايل
.
نحنا نضبط شنو ونخلى شنو كلو اتغير كم مره .الجنيه الدينار ثم الجنيه .....السلم التعليمى ....الزمن ..والحسابه بتحسب على راى عادل امام

باقي الحفلة يرجعوها زي اول
للصباح
والوليدات يشربو شايههم باللقيمات في الصيوان
وينتهي التحرش
ويشيلو مشروعهم القالوا نجح دة

هسة ناسنا ديل مربوكين زي ام العروس الابت الكسرة وقبضت الفلوس مالهم
زمان ما كان عندنا توقيت صيفي وشتوي والامور بتمشي زي الترتيب

أبدا ، ما حصل ، لا بالقديم ولا بالجديد السابق ، ولا حتى الجديد الحالي
، مستحيل تنبلع بالصورة دي.

https://www.gulf-up.com/

شيخ قصي ... سنة الإسلام السلام ...
سلام عليك ....
ههههههههه ... فيش وتشبيه عدييييل
شكرا" للفت الإنتباه للخطأ ... قتا لي
مستحيل تنبلع ... طيب ما تورينا الصاح
عشان الناس تبلع معاك ... ولا الهدف
ليس تصحيح الخطأ فقط؟
بسيطه يا شيخ نصحح ... ورانا إيه..

Quote: كنا بنزيد تلاته (3) ساعات عن خط قرينتش

اذا برضك غلطان للمرة التانيه وجب
عليك تورينا الصاح بدون الفيش والتشبيه.
تحياتي ...

باقي من الزمن نصف ساعة، اللهم أجعله خير.

كتر خيركم جميعا
الكهرباء قطعت عندنا قرابة ال6 ساعات . قالوا في برمجة في ام دباكر
قناة النيل الازرق عملت برنامج طويل تتحدث فيهو عن اهمية الزمن والتعديل وضرورته
اهم حاجة فيهو غنت سميرة دنيا
كلمني الساعة كم
الفي العصر مرورو
شركة زين وقفت النت منتصف الليل بالجديد😆😆😆
ما عارف لي كم
نمت
اولادي اصروا يحضروا منتصف الليل بالقديم ويجرو الساعة 😂😉😉
الموبايل لم يقبل +2 بجعل التوقيت تلقائيا برجع طوالي +3
شكلو ناس الاتصالات ما حدثو السيستم مافيهو قلع قروش .. لامن يلقو وقت بعدلو
موبايلي شغال بالزمن القديم

زمنا يمص الضوء من عينيك

وراح زماني
وفي رجاك قاسيت مرارة الانتظار
في ضل شبابيك السفر

يا زمن حظر التجول


لامن يجي الزمن الفلاني