كمال شداد... خطوة صحيحة نحو الوراء!!

10:16 PM October, 29 2017

سودانيز اون لاين
محمد حيدر المشرف-دولة قطر
مكتبتى
رابط مختصر

أن يكون د. كمال شداد هو الأنسب والاكثر تأهيلا لرئاسة الاتحاد العام للكرة, وذلك صحيح باعتقادي, ولكن أن يكون ذلك صحيحا, فذلك دليل مرض لا عافية.

بفرنسا اليوم رئيس يبلغ من العمر 39 عاماً!!!

لا نناقش هنا احقية د, كمال شداد بالمنصب وهو حقيق به .. ولا كونه الشخصية الانسب وهو كذلك .. وانما اشياء متعلقة بمناحي الانحطاط الكبير في السودان في كل المجالات ومنها كرة القدم بكل تأكيد... انعدام التواتر في تفريخ قيادات جديدة قادرة ومؤهلة .. يغادر الرجل المؤهل لشغل المنصب منصبه, ليأتي من يخلفه بتواتر يضيف ولا يلغي .. هذه الاضافة بالتحديد, تمثل جوهر التطور.

هناك فرق كبير بين أن نتحرك للامام من واقع معافى ينشد التطوير, وبين الحراك في واقع منحط لا يتطلع الا لمعالجة ازماتو الداخلية .....

لو كنا ننشد التطور والمضي الى الامام, فما الذي سيضيفه د. كمال شداد الآن ولم ينجح فيه خلال ال 40 سنه الفاتت؟.. لا شيء على الاطلاق!!..

ولكنا, كما يبدو, لا ننشد الا معالجة الازمات والعودة للوراء مكان ما كنا قبل الازمة ..

بهذا المفهوم يكون من المنطقي جدا ان يكون كمال شداد هو الانسب.. ولكن مهلا ...
هل لاحظتم اننا نسير للوراء؟!

الوراء الاكثر معافاة من الواقع المأزوم لن يغادر طبيعته الزمانية .. هو وراء, وهو أكثر صحة من الراهن المأزوم..

هي خطوة صحيحة للوراء اذن!!
اهو ده السودان!!!

صحيح يا مشرف
صحيح حد الغصة الحادقة بالحلق

هي العقليات السودانية المعروفة التي لا تعرف
شيء اسمو التقاعد.

كلامك صحيح ود المشرف ، بقدر ما فرحت الاغلبية لازاحة الاتحاد الذي حامت حوله الكثير من الشبهات بالاضافة الى فشله الاداري و لكن شخصيا وقفت في نقطة الرجوع للوراء و لقيادات كبيرة في السن و كأن حواء السودانية قد عقرت ، الدكتور كمال شداد اداري جيد ( رغم ان البعض يحمل عليه بعض السلوك الدكتاتوري احيانا في ادارته) .كمال شداد رجل عرف بالنزاهة و عدم وجود اغراض شخصية في ادارته بالاضافة الى تمتعه بقبول دولي و معرفته بقوانين الفيفا و ادارة الملفات الخارجية، بلا شك هناك من يستطيع القيام بهذا الدور و لكن عادة مثل هؤلاء يبتعدون عن العمل الاداري في ظل بيئة سيئة يكثر فيها أصحاب الأغراض الشخصية.أهم حاجة تم ابعاد الاتحاد السابق الذي تحوم حوله شبهات فساد ، يعني الناس مسرورين لابعاد اتحاد معتصم أكثر من عودة د.شداد.

الحاج حمد ..
تحية طيبة يا عزيزي ..

والأمر كما وصفته بالضبط .. ندور في دائرة معالجة الازمات ولا نمضي قدما في مخططات التطور للامام.

بالفعل عاد وجود زول (غير فاسد) مسالة يتطلع نحوها الناس. عادت هي الاستثناء النادر في هذا الزمن الكعب يا عزيزي

وهو حالة بتاعت عقم اصاب الخدمة المدنية ومؤسسات المجتمع المدني والحياة السودانية عموما

القصة غُصة يا حفيظ ..
نبكي ولا تأتي مواقيت البكاء يا عملات سند

Quote: ي العقليات السودانية المعروفة التي لا تعرف شيء اسمو التقاعد.

بعد اذنك يا دوك
يا ود الشيخ الصياغة دي توحي أن شدّاد سعى للترشح للمنصب وهذا ليس الأمر, الراجل بعد من الوسط الرياضي لكن جوهو ناس الاتحادات المحلية وقبلهم وفود ووفود وكان يرفض مجرد حتى الحديث في الموضوع إلى ان جاءته كتلة الممتاز و شكوا وبكوا حالهم وما آل اليه في ظل قيادة الاتحاد الضعيف فاستجاب لنداءاتهم و قال لهم انتم اصحاب الحق و اسياد الوجعة الحقيقية وليس لي إلّا أن استجيب لكم.
أول خطاب له بعد فوزه امس قال ان المثله يجب ان يكون مستريحا على كرسي القماش لكن المصيبة ان يستعان به وهو على حافة القبر لإصلاح الوضع, الرجل ليس طالب سلطة لكن الحال يتطلب ذلك

يا ود المشرف العمر ليس منقصة في أمر القيادة, على الأقل الخبرة تدعمه, اذا كان رئيس فرنسا عمره 39 سنة فرئيس اقوى دولة في العالم في السبعينات و المرشحة المنافسة له ايضا كانت في نفس الحدود

كتب الأخ الصديق عزام حسن فرح في صفحته في الفيسبوك عن فوز شداد:

Quote: فَوز د. كمال شداد رئيسًا لإتحاد كرة القدم للمره العُشْرُمِية بعد الألف (د. كمال أستاذ فلسفة) . بالله د. كمال شداد ده حيعتق سمانا متين، معقول واحد إتولد سنة 1933م (83 سنة)، وبدأ نشاطو الرياضي سنة 1964م (قبل 53 سنة)، وإختارو سكرتير باتحاد كرة القدم السوداني سنة 1962م وبعدين رئيس لجنة التدريب المركزية باتحاد كرة القدم السوداني سنة 1967م. وكان سكرتير الاتحاد السوداني لكرة القدم، لغاية سنة 1982م. وفااااات وتااااني رجع رئيس للمرة التانية سنة 1992م وللمره التالتة سنة 1995م، وللمره الرابعة سنة 2001م، ياخ معقول بس.. معقول الكنكشة دي، سودان السجم ده متين حيقودوهو شباب.. شباب شنو، بس يقودوهو ناس عصرو.. ناس جيلو (الجيل 33:3 سنة)؟! . العواطِف والعلاقات العامة ما عندها علاقة بكلامي الفوق ده.. طيب.. يعني د. كمال زول مؤهل.. طيب.. ظريف.. عندو علاقات.. ده كلو ما موضوعي، أنا موضوعي الكنكشه دي الطلعت دين البلد!

...

مع تأييدي المطلق لكمال شداد كرجل مؤهل جداً لرئاسة الإتحاد العام لكرة القدم السوداني، إلا أنني أقف تماماً مع وجهة نظرك يا ود المشرف
في أن العقلية السودانية لا تزال تحب الكنكشة... وأن الشباب ذات نفسه لا يرغب في ولوج المجال لأسباب معروفة هي المنافسة غير النزيهة
والكيد والحقد .. والدفن


ما يجعلني مؤيداً لشداد هو أنه الوحيد الذي يقف وسط هلال مريخ دون ضغوطات

من ضمن خطاب فوزه أن قال:
لا مساومات
الصاح صاح والغلط غلط.
لا أتفاقات سرية


تحياتي



الشغيل

شوف لي الليلة نحن في محطة
المحجوب
والازهري
وقاقرين
والدحيش
وعبدالله الطيب
بننتج عينة واحدة بس ثم يصيبنا العقم
عينة للعرض

تحياتي يا دكتور ...

ماهو الصادق المهدي مكنكش لي يوم الليلة و راجي المولد ...

و البشير مكنكش ليو ٢٨ سنة ...

على الأقل د.شداد مؤهل اكتر من البشير ...

و بعرف يتكلم إنجليزي اخير من الدبلوماسي ...

السلام عليكم شباب
شكرا للطرح الجميل للموضوع اخي واخوتي
نحن في سودان عازه نعاني كل الامور السيئة .... ونحسب لدكنور كمال شداد تفهمه وتواضعه الجم للعودة وقد عاد ولكن لابد من العلاج .... فمجرد العودة تعني الكثير وعلي الاقل تغير دولاب العمل الرياضي من نقطة الفساد الي نقطة اللا فساد
عادت الخبرة والفهم وعادت الروح
شداد جدير بقيادة ورئاسة الاحاد الرياضي الدولي وهو جدير بادارة قارة ودنيا ودمتم .... مبروك للسودان والرياضة والرياضيين .

اخ محمد حيدر المشرف
سلام
والله ما قلت إلا صدقا
وقولك هذا يحتاج لمقالات تحليلات
شداد قدم للوطن الكثير في مواقع العلم والرياضة واعطى عطاء لا مطلب من ورائه إلا رفعة الوطن
واعظم منجزاته هي فكرة الدوري الممتاز الذي خلقت حراكاً بين اقاليم السودان وهي خطوة كان يحب ان تلحق بها
مبادارت اخرى
ولكن هناك جيلان اتيا بعد شداد وما زال هو في مركب القيادة
في بلادي لا يدعون الازهار تتفتح لذا يشيخ المنتج ويصبح لا لون ولا طعم له
وها هو المهدي زعيما للانصار ورئيسا لحزب الامة منذ الخليقة الاولى
وهذا المرغني حاله حال المهدي ولا فكاك منه
أما البشير
فاعوذ بالله منه ومما اتي به رئيس لا يفكه عن الرئاسة إلا الموت وكأن حواء السودان عقرت بعد هؤلاء
خارج النص
تعليقى الاخير هذا اهديه لقارئة وربما قراء يتهمونني دائما بأنني مؤتمر وطني ومن جماعة الاخون
ومع هذا نحن حضور ومنا قبول لما يجري امامنا حتى سمعت امس التكبير والتهليل كأنه يوم بدر او فتح مكة

.


أخونا ود المشرف

ياخي تعبنا من الحديث ..

لكن الدكتور شداد رغما عن قدراته ومساهماته في هذا المجال، إلا أنه أصبح جزء من الأزمة الرياضية، والأزمة العامة التي تضرب البلاد لسنوات طوال
ولا ننسى ان الرجل يعتبر عضوا فاخرا في المؤتمر الوطني، وبلا شك اصبحت له مصالح ولسنوات طويلة ترتبط بدائرة من الدوائر الكثيرة المتعددة والمتباينة المنتفعة من الوضع الراهن،
وعندما نقول ان الرياضة في السودان تحتاج الى "إصلاح" فإننا نكون قد خففنا من الوطأة وبالتالي نذهب لقبول أمثال كمال شداد، وشمس الدين الى نهاية القائمة!!
لكن واقع الأمر ان رياضتنا مثلها مثل غيرها فاشلة ومنهارة وفاسدة، وبالتالي لاينفع معها إصلاح ولا ترتيق!
ياخي عندما تستمع لأحاديث الإداريين في البرامج الرياضية، تتكشف امامك الحقيقة المؤسفة، اننا في مصيبة كبيرة، حتى اللغة عندنا أصبحت في إنحدار مخيف
الألقاب العلمية والمناصب الرفيعة أصبحت ملطشة في أيدي العاطلين عن المواهب، يارجل السفهاء وقليلو العلم هم من يديرون أمور الناس عندنا.

شداد لا يستطيع إصلاح ما أفسده دهر الإنقاذ في الرياضة!



.

اقتباس
مداخلات عزيزنا ود المشرف + مداخلة عزيزنا ود البشرى
وبذلك يكون رأيي


لكما تحياتي والشكر الجزيل

يا ابو حتوت المقصود ليس شداد في حد ذاتو
الناس البكو وراهو ديل ذاتهم ماعندهم في بالهم شيء اسمو التقاعد.

وما تقول لي . اي سوداني دخل الاضواء تاني ما يخارجو منها الا القبر او الخرف في افضل الاحوال

السلام عليكم اخى دكتور المشرّف

كلامك سليييييم 100%

شاهد القنوات الفضائية نفس الوجوه تجدها تتردد على جميع القنوات

كانّهم مؤجرين شقق مفروشة بالقرب منها ؟؟!

نفس الوجوه والشخصيات ... و كانّهم فى فلك واحد يسبحون ( استغفر الله العظيم )

بالرغم من ان السودان ملياااااااان عقول وبشر وعلماء وكورنجية .... الى آخره ؟

ولا تستطيع الحصر ...ولكن ماذا نقول ؟؟؟

حاجة تفقع المرارة

لك مودتى الخالصة ولجميع الاخوة هنا

دمتم بخير

............

لو كنا ننشد التطور والمضي الى الامام, فما الذي سيضيفه د. كمال شداد الآن ولم ينجح فيه خلال ال 40 سنه الفاتت؟.. لا شيء على الاطلاق!!..]red]

من النقد اللاذع الذي أورده أستاذنا د.منصور خالد واصفاً حالتنا السودانية

" إن أهل السودان يسيرون للمجد في دائرة "

حيث تقضى ( 360 ) درجة بالتمام والكمال وتجد نفسك في نقطة البداية

كمال شداد ما ممتاز ولا متميز! إذا كان القياس هو الإنجاز - والثمار
ولكنه أفضل من تلاميذه !علي الأقل بفهم في القوانين والنظم الرياضية وكيفية التعامل مع الإتحادات الدولية!
*التسيس - طال تسيس وإحتواء المؤتمر الوطني جميع الأطراف ولكن لايمكن لأي جهة أن تضمن شداد أو تسيطر عليه فالرجل مستقل وذاتي يفعل - مايريد -ومايحلو له!كما أنه يملك القدرة علي مواجهة عبث مليارديرات الأندية الكبيرة
*حتي في أخطائيه ومعاركه وأرتجالاته -يملك القدرة علي حشد رصيد من الحجج وإعطاءمسحة قانونية لما يقوم به ! بعكس التانيين ناس المعتصم وشمس الدين وبقية المنافسيين فإنهم - لايستطيعون الدفاع أو الإقناع الشكلي بقراراتهم !..* خبير في إدارة المعارك والإنتصار للذات فقد أفلح في أخذ ثأره من تلاميذه بعد عدة سنوات وتسديد صفعة قاسية لهم و إخشي أن يكون هذا هو هدفه الأخير من العودة !
* من الناحية النظرية فهو -مؤهل ومثقف وملم بالنواحي الإدارية والقانونية!
* لم يعد في السن والعمر الذي يسمح له بالنشاط والحركة بمثل ماكان عليه سابقا!* ولكن ماهو الإنجاز الرياضي بالسودان- أسمع جعجعة ولا أري طحنا! *علي شداد وهو في هذه السن والمرحلة أن يفعل شئيا واحدا : االعمل علي أهلية وديموقراطية الحركةالرياضية وإعادة هيبة الإتحاد وإبعاده عن سطوة الحكومة !
* أما الإنجازات الرياضية ووضع السودان في المسار الصحيح - والتطوير ونهضة الكرة السودانيةفدا ما أظن يحدث فيه تغيير نوعي !

ود البشرى سلامات وكيف الحال يا صاحب

اتفق معاك جزئيا انو العمر ليس مانعا لتولي المناصب.. شخصيا أعتبر ذلك تمييزا سالبا في حق شريحة من المجتمع.

الجزء الذي لا اتفق معه في تعليقك وساحاول أن أكون دقيقا جدا.

1- العمر يبقى مؤشر مهم Indicator للقدرات الوظيفية فسيولوجيا وسلوكيا وفيزيائيا ومعرفيا ...

2- البقاء في الوظيفة القيادية لفترات طويلة جدا ومتكررة برضو indicator مهم لحالة من (العقم) الاداري وقدرة اي مؤسسة او قطاع او جهة على تأهيل الكوادر القيادية.

أما مسألة الاستشهاد برئيس الولايات المتحدة فهو خارج السياق من باب أن الاشارة نحو رئيس فرنسا جاءت في معرض الاشادة بتجربة حضارية انتجت قيادات شابه.. مثل هذه الاشادة لا يرد عليها بان رئيس الدولة الفلانية كبير في السن لاسيما وان السائد هو أن يكون الرؤساء كبارا في العمر.

او هكذا أظن على اية حال

صحي يا مشرف
تقدم السن بجيب الخرف والنسيان وسؤ تقدير الامور
والاهتمامات
اي زول فينا شاف في اسرتو ممن طعن في السن واختلاف شخصيته وحكمه للامور
واضح شداد رأيو زي رأينا من صيغة خطابه
اظن يا مشرف في حاجة اسمها طب كبار السن زي مافي طب اطفال

العزيز عبدالعزيز الشغيل ..
تحية طيبة يا صديقي وحبابك عشرة.

في هذا المحيط الفاسد وغير المؤهل, يكون شداد الأستثناء الوحيد في تقديري.

مودتي البالغة

حفيظ سلامات
امبارح جاتني نكتة في الواتساب يا حفيظ عن أحدهم (مسطول) وقد قيل له أن السلم التعليمي قد ارجعوه للنظام القديم. وان الساعة رجعت لقديمها, وأن شداد رجع للاتحاد العام. فما كان منه الا ان تسائل: طيب الانجليو يحيجوا متين؟!!!!

ببساطة شديدة يا مشرف

نحن قوم يبحث عن مستقبله في ماضيه
تحياتي

لكن ما احبطتني يا مشرف
معناتو ما بتقرا بوستاتي
نكتة جبتها من امس التقول في بوست كلمني الساعة كم
اها مكاواة وكيتا فيك
نكتتك بايخة

قباني يا حبيب ..

الكنكشه ما كويسه يا صديقي ..
لا اقول بانتهاء الحياة الوظيفية لكبار السن (تحديدا من كان منهم في العقد التاسع) في المجتمعات ولكن .. لهم أدوارهم المختلفة كالعمل الاستشاري والمرجعي والتأليفي الخ.. وقيمة هذا العمل لربما تفوق الاعمال التنفيذية ومباشرتها

الاخ العزيز محمد رحمه النور
حبابك عشرة يا عزيزي

كفاءة د. شداد لا شك فيها, لا طق فيها ولا شق ... وربنا يديهو الصحة والعافية ونتمنى له التوفيق.

ولكن ماذا لو رفض شداد .
ماذا كان ليحدث؟!
هل من شخص آخر يتمتع بما يتمتع به شداد من كفاءة ونزاهة والخ؟!

كان من المنطقي, ويبدو من البديهي كذلك, أن يكون د. شداد الآن, وقد ادار يصورة ناجحة مؤسسة كرة القدم السودانية لفترات طويلة, بمثابة مدرسة ادارية اخرجت للسودان عدد كبير من الكفاءات الرياضية لتولي وتطوير ذات المدرسة الرائدة.. ويبدو ان د. شداد فشل, على الاقل, في ذلك!!

حبيبنا محمد .. مع التحية ..
جميل كلامك وبتجرد ومن غير عواطف .. أحياناً الواحد يتعمد أن يبعد حتى والده عن مواضيع معينة إذا بلغ به العمر .

رغم أن العمر لم يبلغ بنا الكثير ولله الحمد ..ولكن الواحد يشعر بأن هناك إنحسار في مستويات معينة
وخاصة في موقع العمل .. النسيان وعدم التركيز أحياناً حتى بعض المفردات اللغوية وخاصة بالانجليزية
يأخذ المرء بعض الثواني لإستحضارها .. وكذلك الاسماء .. وأماكن المستندات وملفات .. والسمع ..
هكذا سنة الحياة ..
كما ذكرت يمكن الاستشارة وإعطاء الدروس والتجارب .. إلخ
لا أظن أن مسألة تقاعد شيء عبثي ..

الرئاسة بكل مستوياتها ممكنة ولكن في الدول التي بها أنظمة وقوانين ومسارات واضحة للعمل
حيث يتم التجهيز من قبل المستشارين وما على الرئيس إلا إضفاء الهيبة والكاريزما على القرار

ولكن عندنا في السودان .. ما أظن .. لأننا نعمل بدون سيستم ( وفي كل الوطن العربي وكما أفريقيا أو كل دول العالم الثالث )

يا جماعة هذا البوست عميق ومفيد ويحتاج مننا إلى عدم الركون إلى العاطفة .. وأنا وغيري على أعتاب التقاعد ممكن أن نستفيد
من الاراء .. بدون شخصنه ولا هلال ولا مريخ ..

شكراً محمد حيدر .. واصلوا

من بوست الاخ (بلدي يا حبوب) ..
وأعتقد أن د. كمال شداد يقول ذات الذي اقوله هنا بالضبط.

أطلق الدكتور كمال شداد الرئيس المنتخب لاتحاد كرة القدم السوداني تصريحات غير مألوفة في أول حديث له بعد فوزه برئاسة الاتحاد، جاء ذلك في ختام أعمال الجمعية العمومية عندما إعتلى المنصة بعد الساعة العاشرة مساء الأحد. وبحسب تصريحات دكتور شداد المتداولة على عدد من مواقع التواصل الاجتماعي التي خاطب فيها ممثل الفيفا باللغة الانجليزية. فقد تحسر الدكتور في بداية حديثه أن يكون هو البديل لقيادة اتحاد الكرة، معترفاً بأنه بلغ أرزل العمر ومن في عمره الآن يجلسون في (كرسي قماش)، وذهب أبعد من ذلك بقوله ان الجمعية العمومية أتت به وهو قريب من المقابر ليقود الاتحاد، والسبب في ذلك درجة السوء وتدهور الاتحاد والكرة عموماً،

قدر ما قلنا شداد كعب وديكتاتوري ..
لكن ناس معتصم جعفر ومن لف لفهم ..
من الناس الجوا بعده ..
لا يساوا بصلة قدام فكر وفهم شداد ..
كنت اتمنى ما يخش في المعمعة دي ..
لان السن برضو ليهو أحكام ..
لكن صدقني مافي بديل ..
والموجود على الساحة الرياضية ..
جلهم عبارة عن سماسرة كورة ..
وناس عايزة تلهط وتعمل قروش ..
السرقات والنهب هو غاية مايتمنون ..
عشان كده أخير لينا شداد بي كبره ولداحته وعنطجته .. ههه ..
زمان كرهنا طلحة ده في شداد كل مايفتح بوست ننط ليهو ..
هسه والله الحاصل ده ورانا بيان بالعمل ..
انه طلحة كلامه الزمان داك كان صاح ..
يأخ القاعدين هسه ديل عبارة عن مواسير قلفنايز .. هههههه ..
وسماسرة وشلة حرامية ..
عموما مبروك لشداد وتهانينا ..
وفعلا يامشرف هي خطوة صحيحة للوراء ..
من الاول كان يخلوهو قاعد على الاقل ..
كان الحال حيكون احسن من الجبانة الهايصة دي ..
العملتوا الاتحادات الجات بعد شداد شيء يندى له الجبين ..
سيبك من سرقاتهم ولهطهم ..
تحس كانك في ملجة مش في اتحاد كورة ..
من فرط عوارة وشتارة وشكل الناس العورا ديل ..

يا مشرف يا حبيبنا

ممكن اعترض على د. شداد لأي سبب ... ما عدا عمره ...

اذا كان قادر على العطاء مالو ...

و اذا جا بالانتخاب ... حبابو

دي ما اسمها كنكشة ...

طيب تفتكر الناس القاعدة في وظائف في الخليج ليها ٤٠ سنة دي كنكشة في الوظائف
و لا ناس قادرة على العطاء...؟

انا اتفق فى جزئية استاذ / قبانى الاخيرة .
مثلاً , نيلسون مانديلا استلم قيادة بلاده كرئيس وعمره 75 عاماً .
ذلك الاسطورى الذى اعشقه ببعض التحفظات السياسية والدينية , الخمينى , مواليد 1902 , واصبح الرقم الاول فى بلده 1979 بعد الثورة الايرانية الشعبية " واحدة من اهم الثورات الشعبية التى حدثت فى القرن العشرين " , وعمره 77 عاماً .
اعتقد ان الخبرة والكاريزما فى احيان كثيرة تتفوق على العمر .
واعتقد ان واحدة من مبادىء حقوق الانسان , ان العمر يجب ان لا يكون عائق فى الترشح لاى وظيفة , طالما توافرت الشروط المطلوبة , ولا يتحدد الاقصاء فقط لبلوغ سن مُعينة .
وطالما كانت الادارة وفقاً لطرق الادارة الجماعية الصحيحة , فان الراس هنا يكون مُجرد رمز ومُجرد فرد فى مجموعة .

عفواً .. وحتى لا اقوم بالتعديل .
فيما يخص الزعيم " الخمينى " اردت القول اعشقه ببعض التحفظات السياسية وليست الدينية , وسقطت منى سهواً كلمة " وليست " , مع احترامى وتقديرى لكل الشعية فى ارجاء المعمورة .

موضوع السن
شخصيا لا ستطيع أن أقطع برأي في هذا المنحي
* صحيحا أن تقدم العمر والشيخوخة المتقدمة تصحبها عدة" أشياء- " ولكن ليس كل الأشخاص
يتعرضون لنفس الشئ في شيخوختهم ! هناك من يحتفظ بوضع صحي جيد نسبيا وبقدرة
برضو نسبية علي الحركة والنشاط ! ومن يحظي بذاكرة متوقدة وتركيز ذهني عالي
وقدرة علي إعمال العقل ! ومن الناس تأثرمن سلبا بتقدم السن وهكذا !
** القوانيين الإنسانية تمنع التميز السلبي بسبب العمر
Download Discrimination and Anti-Discrimination Board of NSW Factsheet 138KB

Types of discrimination

In NSW there are ten​ main types of discrimination that are against the law (in certain areas of public life). ​
Age discrimination
Breastfeeding and pregnancy discrimination
Carer's responsibilities discrimination
Disability discrimination
Homosexual discrimination
Infectious diseases discrimination
Marital or domestic status discrimination
Race discrimination
Sex discrimination
Transgender discrimination
Direct and indirect discrimination

There are two kinds of discrimination that are against the law, direct and indirect discrimination.

http://www.antidiscrimination.justice.nsw.gov.au/Pages/adb1_antidiscriminationlaw/adb1_types/adb1_types.aspx
))
* بالنسبة لنا الشيوخ وكبار السن - في مضامير السياسة والعمل العام يحتكرون المنصب
والوظيفة ويمنعون عملية تواصل الأجيال وإكتساب الخبرة - مما يحرم الشباب من الفرص ويجعل التميز
السلبي عندنا معكوسا - الضحية هنا الشباب ومتوسطي العمر وأصحاب الحظوة هم بعض الشيوخ !
** في مجتمعات أخري يستفاد من خبرة الشيوخ وعصارة تجاربهم بوضعهم في مواقع
إستشارية - الخ

Quote: انا اتفق فى جزئية استاذ / قبانى الاخيرة . مثلاً , نيلسون مانديلا استلم قيادة بلاده كرئيس وعمره 75 عاماً

تحياتي استاذنا شاهين ...

المشكلة ود المشرف لسة شباب تلاتينات و كده ... ما قادر يحس بينا ... :)

ما قادر يعرف انو الرجل السوداني من يوم يصل الخمسين ... بفتكر انو باقي ليهو في الدنيا حوالي عشرين سنة تاني ...

اها العشرين سنة دي بتمشي معاهو طوااالي ... اصلها ما بتنقص ...

خلو الرجل يشتغل ... :)
________________________________________________
أتذكر صديقي ( زحمة ) العالمي ...

كان وقتها عمره خمسين و انا لسة في الاربعينات ...

مشينا زيارة المستشفى في الرياض نزور زول كاسر كراعو ...

تفاجأنا انو في واحد تاني صاحبو و قدرو جاتو زبحة و راقد في نفس المستشفى ...

صاحبي انهجم ...

لما راجعين قلت ليهو مالك مهجوم انشاء الله بسيطة ...

قال لي تتذكر و احنا سغار ... يموت زول من الاهل عمرو خمسين سنة ... ابهاتنا يجعروا ...
و انحنا نقول ... عمره خمسيييين ... زول كبير يعني شنو لو مات ؟

قلت ليو ... أي و الله ...

قال لي حسي تسمع زول عمره في الخمسينات و الستينات جاتو زبحة ... تترقط كلك ...

فـــ خلو الناس تشتغل ... Age is just a NUMBER

تحياتى الصديق ود المشرف
اتفق معك فيما ذهبت اليه
دكتور شداد احسن السيئين والمأمول فيه في المرحلة القادمة :
ابعاد الحركة الرياضية من سطوة المسخ المسمى " امانة الشباب بالمؤتمر الوطنى "
وتحقيق مبدأ أهلية وديمقراطية الحركة الرياضية وهو من المؤمنين بهذا المبدأ ,

Quote: مثل هذه الاشادة لا يرد عليها بان رئيس الدولة الفلانية كبير في السن

هههه .. سمح بردّوا عليها كيف؟ حسب كتالوج الردود و التعليقات

من جهتي اعتراضي على شداد ما عشان كبير في السن
و ما يتصل من موانع منطقية .. أبدا ...
كنت أتمنى ما يرجع شداد عشان العالم دي تعيش
مخلدة في الخبوب والتخلف العملوا الأرزقية والمستفيدين
من الوضع دا بتشجيع من مشجعي الهلال والمريخ
أصحاب العواطف اللزجة والحلاقيم الكبيرة اللي كل
همهم الهلال يغلب المريخ أو العكس بعيدا عن أية مصلحة تانية
تهم الكورة السودانية .

في ناس هنا على ما أعتقد جابوا سيرة انجازات شداد
ولى ديل بقول تقريبا كل الانجازات اللي حققتها الكورة
السودانية كان لشداد يد فيها بطريقة أو بأخرى ..
بداية من كأس الأمم سنة سبعين ومرورا ببطولتي
سيكافا وبطولة مانديلا ( المريخ) ووصول الناشئين لكأس العالم
ووصول الهلال لنهائي دوري أبطال أفريقيا .. وحتي
حصول المنتخب على كأس سيكافا .. كلها كان لشداد حضور فيها .

يا جيمي .. شعارات شداد المرفوعة واللي خلتنا نقيف معاهو دائما
ونراهن على انو الوحيد القادر على تحقيق الطموحات والتطلعات هي
نكران الذات وتغليب المصلحة العامة على الخاصة والتجرد والاخلاص
والنزاهة والمبادىء والأخلاق وقول كلمة الحق ولو عليهو عشان الضمير يرتاح ..
شداد بالصفات دي المفروض يكون رئيس جمهورية وليس رئيس
اتحاد بتاع كورة منفسة يتجارى خلفها هواة بتاعين روابط ويدير أنديتها الكبيرة
تجار سوق يعشقون الفشخرة والبوبار وأضواء اعلام العلاقات العامة
والدعايات مدفوعة الثمن، ويكتب في صحافتها مشجعين متعصبين جاءوا رأسا من مدرجات
التعصب والكواريك .

تحياتي لراعى البوست محمد المشرف والشباب .

الناس القارنت عمر شداد مع ترامب ونيلسون ما نديلا والخميني وغيرهم ما قارنو المؤسسيه البتدار بيها الانظمه الهم اترأسوها والمؤسسيه الجو والفوضي الحا يعمل فيهم شداد

فرق كبير بين انك تكون علي راس دول تدير شؤنها بي مؤسسيه ونظام واسس ومستشارين وبين انك تدير نشاط مطالب انت تضع ليهو المؤسسيه والنظام وتحد من الفوضي والرشوه والفساد وتكون انت الناهي والامر


شداد ممكن يصارع ويعمل حاجه لو الجو العام كلو ماشي او بادي او فيهو امل لي تخطيط او تنطيم لكن كدا حا يرقد مستشفي بي جلطة في اقرب غلات

د. المشرف وضيوفك ... سلام ..

اها قلنا د. كمال شداد زول مؤهل لقيادة الاتحاد ..وافضل من غيره ..
طيب الناس دي مالاقيه مدرب للمنتخب القومي غير مازدا ؟؟

عااالم بطااالــــــــــــــــــــة ,,,

عفوا محمد البشرى ..
لم يكن المعنى المقصود (ولا المكتوب) هو تحديد كيفية الرد وانما الاختلاف مع قيمة وفحوى الرد.

ما عارف اقولها ليك كيف ولكن التعبير (مثل هذا الكلام لا يُرد عليه بكذا) هو تعبير متداول بكثرة.. ويقوم مقام تعبيرات اخرى ك ( ان الاستشهاد بكذا لا يناقض جوهر الاشارة تلك) ..

شيء من هذا القبيل يا عزيزي ..
والامر يخلو تماما من كتلوج او وصاية او نحو ذلك ..

واصلوا يا اصدقاء..
سأنضم اليكم باكر ان شاء الله ..

عارف يا دوك والله عارف لكن حبكت النكتة وتأثيرات جو بوست اب سن بتاع المساخة وكدا

.


خلافنا حول شداد ليس من باب كبر السن، الخوف من تكريس القيادة الفردية لمجال يعتمد القوانين واللوائح والتنظيم، وقبل ذلك المنهج والرؤية والتخطيط
هذه آفة السودان على كافة الصعد، حال السودان لايحتمل العقلية الواحدة ولا يحتمل الإجتهادات الفردية، فقد تدهورت الأوضاع وبلغت درجة شبه الإنهيار التام
ذلك يستلزم التأسيس من جديد، فبعد هذه السنوات العجاف الكالحة لم يتبقى لنا من جدار نستند عليه.


.

الحبيب المشرف ضيفه الكرام

اتفق تماما مع طلحة
وبعدين كل اقطاعات في السودان دمرت شنو البخلي الرياضة تنهض
لكم التحية

.


خلافنا حول شداد ليس من باب كبر السن، الخوف من تكريس القيادة الفردية لمجال يعتمد القوانين واللوائح والتنظيم، وقبل ذلك المنهج والرؤية والتخطيط
هذه آفة السودان على كافة الصعد، حال السودان لايحتمل العقلية الواحدة ولا يحتمل الإجتهادات الفردية، فقد تدهورت الأوضاع وبلغت درجة شبه الإنهيار التام
ذلك يستلزم التأسيس من جديد، فبعد هذه السنوات العجاف الكالحة لم يتبقى لنا من جدار نستند عليه.


.

يديكم العافية يا زملاء ..
لكم التحية واحد واحد ..
ونتمنى التوفيق لكمال شداد .. وربنا يديهو الصحة والعافية