حى الزمالك

09:23 AM October, 29 2017

سودانيز اون لاين
أبوذر بابكر-
مكتبتى
رابط مختصر

ما بتاع القاهرة داك

ده فى ود مدنى

اى والله ود مدنى عديل كده

يعنى مع و زى بانت والعشير و ود ازرق و المدنيين والدباغة وشندى فوق والمزاد الخ

حى الزمالك

اسمه الرسمى كده

يا اخوانا الحصل شنو فى البلد

الناس دى جاده ؟

مش كفايه الشارقة و القدس و يثرب والرياض و القادسية

بعد شويه ممكن نلقى المعادى و بولاق و الدقى

الله يستر بس الواحد ما تجيهو جلطة

انا ذاتى الرجعنى السودان شنو ؟

المحزن فى الأمر هو مستوى الاستلاب والاحساس بالدونية الوصلنا ليه بوعى او بدون وعى

يعنى خلاص عقرت فينا روح الابتكار و ابداع الجديد عشان نصل مرحلة نمسى فيها حى من أحياء مدينة فى السودان، نسميه الزمالك ؟

شنو المعنى و شنو القصد ؟

ياخى لو خلاص بقينا ما بنعرف ولا بنقدر نعمل اسماء جديدة، ممكن بكل سهولة نسمى الجديد على الشى الموجود عندنا

شنو الكان بمنع نسمى الحى ده البان جديد او الدندر او النيل او الكرمك او توتيل او البجراوية ؟

او نبتكر ونبدع اسم جديد بالمره

حى الشروق
حى الامل
حى النخيل

مثلا يعنى

و لى هسه الله يستر

حاجه تمرض والله بالجد

حبيبنا أبوذر .. تحياتي ..
هذه المسميات تأتي حسب تقديري من تجار العقارات ..
وذلك لرفع قيمة الارض .. فهم أذكياء عرفوا تماماً نفسيات المشترين
هل تصدق من الاجيال الحالية واحد يكتب عنوانه : بانت والعشير و ود ازرق و المدنيين والدباغ
هم يفتكروا أن انطباع الأول للاخرين عن الشخص يأتي من مكان السكن ..
الفرق كبير بين واحد يقول ساكن الدروشاب .. والثاني ساكن الرياض ..

هذه نظرتي رغم أنني من سكان ضواحي الدنيا في اقصى الشمال ..
ولا افقه شيئاً في العاصمة وعندما آتي من الغربة إلى الخرطوم أكون تحت قيادة أبناء أختي

تخيل عنوان مكان في الخرطوم يكون : شارع الستين - الرياض _ صيدلية مكة ..

حتى ( يثرب ) كانت من الاسماء التي كانت غير مستحبة في الاسلام ..

موضوعك دسم .. حبيبنا أبا ذر

تحياتي أخي أبوذر بابكر
وعساك طيب ،، أثرت فعلا موضوع مؤلم ..... هذا المسخ والتقليد الذي لون حاياتنا في نواحي كثيرة وتفاصيل يومية وليس مسميات الاحياء فحسب ..
وإذا كان كلام الأخ علي عبدالوهاب صحيحا إن المسميات تأتي من تجار العقارات .. أين المسؤلين عند اعتماد الاسم في الجهات الرسمية ؟
نملك آلاف الخيارات لتسمية شوارعنا وأحياءنا ، أكيد لنا في الماضي بطولات وتاريخنا مليء بالإنجازات .. وحاضرنا يزخر بالإشراقات .... ولكن ؟

العزيز مصدق
كيف الحال
ده الحاصل والله و يا للبشاعة

خلل مريع فى طريقة التفكير
والاخطر انه الخلل ده يكون استفحل فى العقلية
والاخطر من ده كله اننا نكون نسينا نحن منو مهما كان حالنا الان

و فقدنا احساس الانتماء للبلد والفخر والتباهى باننا سودانيين

العزيز على

تحية و سلام

زى ما تساءل اخونا مصدق فى مداخلته
اذا فعلا السماسرة والوسطاء هم البعملو الاسماء البلهاء دى
يبقى وين دور الجهات الرسمية المسئولة اصلا عن الاشياء دى ؟

ما اعتقد انه الأسماء دى جايه من طرف سماسرة الاراضى
الموضوع يبدو اكبر واخطر من كده

ظهرت عندنا فى السنين الاخيرة يا على مفاهيم كان السبب فيها مجموعة عوامل

منها احساسنا بالتبعية والدونية نسبة لتاخرنا فى كل مجال واى مجال
ومنها برضو الانبهار بالغير مهما كانت قبمته

الخلل فى العقليات يا على

وربك يستر من الجاى

ليس هنالك استلاب في رائ

هنالك مدن امريكيه هي اسماء مدن اخري او حتي دول
علي سبيل المثال

لبنان
دمشق
القاهره
ومدينه السودان في تكساس
مدينه دنقلا
مانشتر
لندن
الاسكندريه

كل هذه مدن امريكيه وهي اسماء مدن ودول اخري
ولا اري استلاب في الامر

الاخ ابو ذر سلام . .

كتب مصدق :
(وإذا كان كلام الأخ علي عبدالوهاب صحيحا إن المسميات تأتي من تجار العقارات .. أين المسؤلين عند اعتماد الاسم في الجهات الرسمية ؟ )

ماهو تجار العقارات يا هم المسئولين ذااااتم . .

تحياتى يا عمر سعيد

ده هو السبب ربما

على الاقل بكون فى مبرر وجيه وان كان سيئ

لكن الاشد مرارة انه السبب يكون غير كده

مثلا يكون لا وعى او عدم اهتمام المسئولين بالتسمية وكيفما كانت

ما اعتقد انه ده مجرد رأى

والمقارنة معدومة او شبه غائبه بين تشابه اسماء بعينها فى العالم
زى اسكندرية و طرابلس و جورجيا رغم البعد الجغرافى والاختلاف فى الثقافة

وببن تقليد الأسماء مثل تسمية الزمالك او القدس او الدوحة

التشابه فى الأسماء الاولى المذكورة اعلاه كان مبرر وبسبب وجيه
مثلا طرابلس فى شمال لبنان وطرابلس فى ليبيا، المدينتين قامت على يد نفس المجموعة البشرية الثقافية
اى الفينيقيين على الرغم من بعد المسافة جغرافيا بين الاتنين
وربما ينطبق نفس الشى ولو باختلاف او تفاوت بسيط بين الباقيات
وفى الحاله دى فعلا مافى استلاب

لكن
فى حالة يسمى حى فى قلب مدينة سودانية باسم الزمالك او الدوحة او المعمورة، فدا هو الاستلاب المبين