ههه قبض تجار العملة

06:26 AM October, 25 2017

سودانيز اون لاين
عبدالحفيظ ابوسن-no where
مكتبتى
رابط مختصر

نفذت أدارة العمليات بدائرة المباحث بشرطة ولاية الخرطوم أمس* حملة واسعة استهدفت تجار العملة بوسط الخرطوم،وبحسب تصريح صحفي للشرطة فإن «إدارة العمليات بدائرة المباحث بشرطة ولاية الخرطوم نفذت حملة كبرى استهدفت تجار العملة بوسط الخرطوم»،وأكد مدير دائرة المباحث بشرطة الولاية اللواء عبد العزيز حسين عوض* طبقاً لـ(سودان تربيون ) «استمرار العمل الكشفي لمختلف الجرائم وعدم تقييد أي بلاغ ضد مجهول»، لافتاً الى أن الحملة على تجار العملة «هدفت لإزالة الظواهر السالبة وسط الخرطوم والمجمعات التجارية»،وتابع «ظاهرة وجود سماسرة العملة وسط الخرطوم من الظواهر السالبة التي تعمل على تهديد الاقتصاد الوطني».
آخر لخظة.

اجي يا كدة
هسة ديل تجار عملة !؟
ولا تجار زاتو 😂😉😂

إن كانت ثمة سيادة لحكم القانون لذهبت كل الطقمة الحاكمة للسجون يا ود اب السن جميع الصرافات التي يحول عبرها المغتربون تتبع لشركات حكومية .

سلامات يا عبد الحفيظ أبو سن

ديل فعلا لاتجار ولا حاجة ... المعنيين بالتجار في الخبر لا يختلفون كثيرا عن باعة مناديل الورق وأكياس البلاستيك في التقاطعات والطرق.
هؤلاء لا حول لهم ولا قوة ... ِرأيتهم وانا أخرج من صالة الوصول في مطار الخرطوم .... ديل زيهم وزي اي بايع بسرح بي بضاعته.
الذين يتاجرون في العملة حقيقة لا يصل اليهم أحد.
بالله يا حفيظ أقتصاد شنو ده اللي بتتحول فيهو العملة لي سلعة

دم بخير

صدقت شيقوق
الفساد الاقتصادي بحتاج لسلطة تحميه
كلهم عندهم ضهر
بل
صاروا ضهر هم زاتم

صحبي يا عباس
ديل صبيان للتجار
ولا يملكون مالا
التاجر هو البمولهم بالقروش من الصباح ويفرو
العملة الصعبة عندو ..
والبيع عندو
هم بشترو بس
بلقطو

ود ابوسن وضيوفه سلام

تجار العملة الذين يسيطرون علي السوق لايتعدي عددهم ال50 تاجر معروفين لدي الدولة
واجهزتهاالامنية وهم من يحددون سعر السوق كل يوم .. مالم توفر الدولة العملة لشركات
مثل زين سيواصل الدولار ارتفاعه حتي يصل الي 100 جنيه


---------
الشركات الكبري والحرامية امثال البقي مستشار خارج السودان كيف اخرجوا اموالهم من السودان

ديل نجوم يا مسلمي
نجوم تفتح لهم الابواب ويفرش لهم السجاد ويطلب ودهم
ولو
مرضو بزوروهم

قبل سنة غيّرت عملة من نص الخرطوم رجعت البيت بوّزع القروش حسبتها لقيت فيها زيادة كم مليون رجعت ليهو اول ما شافني من بعيد جاني براهو جاري يضحك ومعاهو اتنين من زملانو بهاظروهو ويدافروهو حامنو يمد يده عشان اسلمو قروشو وانا بناولو القروش اصرّ الا يحضني فرحا قال لي عارفك بتجيني راجع قلت ليهو شن عرّفك طيب عد قروشك يازول رفض يعدها قال لي كان بتنقصها ما كان رجعتها تاني قلت ليهو هل ختيت احتمال ما اجيك ؟ قال لي بثقة والله ولا واحد في المية واردف كان ما جيت كان الرماد كالني دي ما قروش ما عندي فيها الا حق يوميتي وبس وكان صرّجت معاي الشهر كلو الشاهد انه الناس ديل ما عندهم علاقة بي انه تجارة العملة تشتغل او تقيف في البلد النظام هو تاجر العملة وما العملات الصعبة اللقوها في بيوت متنفذي النظام ببعيد قال شنو صاحبنا داك أولاد اهلي المغتربين بيختوا قروشهم عندي المها ليهم بالعملة الصعبة .. ههههه اللذيذة ما خلى عملة صعبة الا لقوها عندو .. ياربي اولاد اهلو ديل مغتربين وين ؟ .. ههه ..

تسلم ود القوز