Post: #1
Title: حكايات قديمة مسمكرة
Author: درديري كباشي
Date: 10-23-2017, 05:58 AM
Parent: #0
04:58 AM October, 23 2017 سودانيز اون لاين
درديري كباشي-
مكتبتى
رابط مختصر الحمار شاف الاسد حايم في حلتهم ..
قام نهرو بشدة لمن الاسد خاف والحمارات زغردن ..
اها قام الحمار اتحنفش وسكا الاسد . والأسد جرى وقف بعيد يعاين له باستغراب.. الحمارات زغردن تاني والحمار تاني جرى ورا الاسد ..بعد كم كيلو تاني الاسد وقف والحمار لسع متحنفش راح جاري على الأسد ..
المرة دي الاسد ما جرى وقف والحمار جاري ويتنهر والأسد ما اتحرك من مكانه ..
الحمار يا داب طارت السكرة وظهرت الفكرة ...وقف وحاول يتخارج يرجع لكن أتلفت وراه لقى مجموعة اسود قافلين درب الرجعة وعاد لمين اشكي الوجعة ..
قام قال للأسد الأول انا اصلا قنعت منها ميت ميت وإنشاء الله ما انفعكم. . لكن عندي سؤال واحد انت ليه كنت عامل فيها خايف وخليتني اسكك من الحلة لغاية هنا..
الأسد قال له يا حمار انا كنت متشارط مع الشباب ديل أجيب ليهم عشا ديليفاري
😂😂😂😂😂😂😂
|
Post: #2
Title: Re: حكايات قديمة مسمكرة
Author: درديري كباشي
Date: 10-23-2017, 07:44 AM
حكاية قديمة
2
في حلة من الحلال كان في ولد شقي كدا اسمه محمود ساب القراية وما عندو شغلة بس قاعد من ضل شجرة لضل شجرة يشاغل في البنات ويعمل مقالب في الرجال الكبار والحريم .. ناس الحلة غلبوا فيه حيلة شكوه لأبوه ضربه لمن فتر ما في شئ اتغير .أخيرا شكوه للعمده . العمده راجل طيبان ساق الرجال ومشوا لأبو محمود في بيته . الأب قال والله يا حضرة العمدة الولد دا غلبني تب اسيبه ليك العايز تعمله فيه أعمله وديه الشرطة اسجنوه انفوه أو حرقوه ...
العمدة راجل طيبان شديد قال أنا عندي حل وسط يريح الناس من بلاوي محمود ويبقى له شغل بالنهار يجي بالليل هلكان ويديها نومة من المغرب..
الحقنا به سريع يا عمدة .
الحل نجمع غنم الحلة يمشي يرعاهن في الغابة الجمبنا دي يجي مع المغرب يوزعها على البيوت ويمشي بيته تعبان ينوم .. نكون كدنا ريحنا ناس الحلة واستفدنا منه .
الجميع رحب بالفكرة .وأمه زاتها فرحت الصباح جهزوا له الزوادة ولف على الحلة جمع الغنم واتجه ناحية الغابة .. الغنم ذاتها اتمتعت وهو شاف له ساق شجرة اتكل فيه .. وبعد ساعة شعر بالملل وهو زول متعود على الحركة ..فكر انه يعمل مقلب في كل ناس الحلة ( يعني زي ما تقول كدا مقلب جماعي ) ووقف في طرف الغابة وبأعلى صوته صاح ( الحقوا يا ناس الحلة النمر أكل غنمكم يا ناس الحلة هوي ) كل زول الخطف طورية والعنده حربة والشال مرق عنقريب جو جارين .. لقوه يضحك وقال ليهم ( معاكم الكاميرة الخفية ) .. رجعوا مستائين منه ومن حركاته ( الأرعا ).
تاني يوم قاعد يفكر في مقلب تاني حكاية النمر دي خلاص انكشفت متكئ قريب المغرب سمع خطوات في الأعشاب رفع رأسه شاف نورين يلمعوا في الظلام . واسنان كالبرق .. ياهو ذاتو النمر الجد جد . وبقى يكورك يا ناس الحلة هوي والله المرة دي بالجد .. قالوا سيبكم منه دا محمود الكذاب .. جرى خلى الغنم والنمر كمان خلى الغنم وجرى وراه هو .. قبضو في طرف الحلة واتعشى منه لمن فضل منه الساقين فقط عليهن شدة البلاستيك وباقي السرول الطويل .
ناس الحلة بعد ما اتأخر شالوا الفوانيس والرتاين قصوا دربو لقوه باين .
لم يبقى منه سوى الساقين صفقوا يديهم وتحسروا
والنسوان كمان الكن مكويات من شقاوته تحسرن على فقده .
ستنا عبرت قالت : غايتو محمود دا كان فيه سماحة ساقين دايرات ليهن حنة ودخان .
سعاد قالت لها أها كمان اسحري ود الناس .
اسحر ليه شنو هو فضل فيه حاجة .
|
Post: #3
Title: Re: حكايات قديمة مسمكرة
Author: عمر دهب
Date: 10-23-2017, 07:53 AM
Parent: #2
دائما حكيك طاعم
لكن المره دى عصرت شديد على محمود وكملته من لحم الدنيا
|
Post: #4
Title: Re: حكايات قديمة مسمكرة
Author: درديري كباشي
Date: 10-23-2017, 04:35 PM
Parent: #3
تسلم يا دهب
هههههههههههههه
نركز على الجوانب غير المحكية
|
|