باستثناء بعض نفر قليل من ناس الخرتوم، باقي بيوت السودانيين في الحلآل والمُدن في الماضي كانت لا تخلو مِن قفص جداد، بُرج حمام، زريبة غنم، والبعض يضيف أرانب، أو بط وهذا قليل .
الجدادة لآمِن تكون دايرة ترمي بتكون مزعجة جداً بالزآت منتصف النهار والحر يفسخ ؤ تلقى زول بيسارق في نسمة كان يلقالو غمدة، ثم فجأة جدادة يجيها المخاض ؤ تقعُد تكاكي، تكاكي، تكاكي، ثم تكاكي، وما أن يجد صاحبنا منها غفلة يروّح لآفِحا بالسفنجة أو المركوب . دي كانت وآحدة من الدرامات البتحصل في البيوت السودانية ولا تنتهي إلا بعد ان تِتحلّ الجدادة بالسلآمة ؤ يرسلونا نحن السغار في مهمة البحث عن جنا الجدادة وأين دستو، ؤ غالباً ما نلقى البيضة جنب الخُمارة أو في ركن المارقون ...
ما اوردناه في صدر البوست بخسوس رمي الجدادة، وفي هذه الفرقة سوف نتطرق إلي مرحلة أُخري من المراحل التي تمر بها الجدادة وهي في مقتبل العمر وعنفوان الشباب وهي مرحلة (الكتكتة)، اي عندما تصبح الجدادة كاتة. والجدادة عندما تكِت تكون في حالة إستعداد لتفقيس البيض حيث تعلو عندها هرمونات الكتكتة فتصير اكثر إزعاجاً من الجدادة الدايرة ترمي بيضة، ولا تسكت من الكتكتة حتي يلمو ليها كمية من البيض في حُفرة جنب الخُمارة برضو، ما عارف السر في حكاية الخُمارة دي شنو !، يمكن عشان التخمير ؤ كدا . أها، بعد يلِمولآ البيض دا ؤ تحضنو بهدي من الكتكتة ؤ بتبقى عشرا في بيضا، ؤ بالمناسبة بتكون شرسة جداً والخوف بيُنزع من قلبها تماماً، يعني بالرآحة ممكن تكاتل الكديس ...
ثم بعد الكتكتة بتجي مرحلة الفِقيّس وليس الفِنقيّس كما أضاف بعض الزملاء هنا حرف النون زوراً وبُهتانا . والفِقيّس هو الكراك الذي يحدث في البيضة وتخرج من خلآلة السوسيوة للحياةوتبدأ مشوار البحث عن مستقبلها . ليس كل البيض الذي تمّ جمعه ينتج سِوِسيو، فالنذر القليل منه يفشل ولا يكون صالح لشئ حيث يُرمى في الزبالة ؤ دا بيسموهو (البيض الخايس). أها، الجدادة في المرحلة دي بتكون مُهتمة بصغارها أكتر من بعض النسوان ؤ بتحميهم حتي من الحِدية يساعدها في ذلك الديك، ؤ بتكون طول اليوم بتبحبِت في الكوش والمزابل كي توفر لهم سبل العيش الكريم، والذي يهمنا في عملها الدءوّب هذا البحبتة المستمرة ومتابعة السواسيو ليها كأنهم ظلها ...
كلم الجماعة ما يجو خامين نونهم ويجوك هههه مرات في جداد غتيت بفقس عند الجيران والجيران يلبدو بالبيض فعلا تلقاها تكاكي ولافه يقول ليك حارقها البيض تعب الولادة كعب !!
كلام كبير .. اتا يا جلالدونا متواضع وقاعد معانا هنا مالك لازم تروح للناس التانين ديلك وتتفاهم معاهم محل الجداد دا لا يتناسب مع فخامة كلامك الكبار دا .. خخخخخخخخخخخ
يا ود المدير جدادك دا تبيع ؟ ..
Post: #13 Title: Re: الجدآدة المفقِسة ... Author: حيدر حسن ميرغني Date: 10-22-2017, 10:15 AM Parent: #10
الظاهر زمان كنت بتجازف بيضة بيضتين عشان تدخل السينما :)) نحن كان عندنا بط .. عشان كده كنت بدخل بلكونة
Post: #16 Title: Re: الجدآدة المفقِسة ... Author: عبدالمنعم الطيب حسن Date: 10-22-2017, 10:19 AM Parent: #10
السواسيو صغيرة وحركتا بطيئة مرات كتيرة بتنوطي تلقي السوسيو مات تحت كراعك كم حزنت على سواسية اندعست وفِي القراءة التحت السطور لفها الصمت واحتواها الخجل وسوء التقدير والمصير وسلام يا صديقي...
Quote: كلم الجماعة ما يجو خامين نونهم ويجوك هههه مرات في جداد غتيت بفقس عند الجيران والجيران يلبدو بالبيض فعلا تلقاها تكاكي ولافه يقول ليك حارقها البيض تعب الولادة كعب !!
نعم يا ود اب سِن، الغتاتة عند الجدادة تحدث احياناً، وهي اساسيّة جداً في موضوع البوست الأساسي ...
Quote: السواسيو صغيرة وحركتا بطيئة مرات كتيرة بتنوطي تلقي السوسيو مات تحت كراعك كم حزنت على سواسية اندعست وفِي القراءة التحت السطور لفها الصمت واحتواها الخجل وسوء التقدير والمصير وسلام يا صديقي...
منعم يا صديق، عجبتني القرأة التحت يأخ فيها حصافة شديدة . بس دعس مافي سوف يكون الجو فرايحي ...
تعاميك عن الرد على مداخلاتى لن يغير واقع الحاضر وماضى التاريخ من وين جبت معلومة انو الجدادة بتكتكت قبل ما تركض الما معقول اى زول شاف ليهو جدادة يجى يعمل فيها ابو الفهم فى امور الجداد و متناسيا دور الديك فى هذا الملف ___ مافى داعى اخت ليك وش ضاحك
سلام ودالمدير وجميع المتداخلين عندي سؤال محيرني ليه زمن هل كل بيضه تحت ظروف معينه بتطلع منها سوسيوه وللا لازم تكون البيضه مخصبه لانه مره شفت لي في فيديو الصينين ديل بدخلو البيض في حضانت صناعيه وبعد اسبوع بتطلع منو سواسيو
Quote: تعاميك عن الرد على مداخلاتى لن يغير واقع الحاضر وماضى التاريخ من وين جبت معلومة انو الجدادة بتكتكت قبل ما تركض الما معقول اى زول شاف ليهو جدادة يجى يعمل فيها ابو الفهم فى امور الجداد و متناسيا دور الديك فى هذا الملف ___ مافى داعى اخت ليك وش ضاحك
يا خبير أنا أعتقد الديك في الحتة دي دورو ينحصر في نفش ريشو لتمكين الناحية الفيسلوجية واشاعة جو من الرومانسية بما يحفز الهرمونات الأنثوية لدي الجدادة ويثير شبقها قبل أن يقفز قفزته المهولة على ضهرها ليقيم علاقته المشبوهة في الهواء الطلق معلنا تأسيس حياة عامرة بالمح والجنا جداد .. الديك المتسلبط الزير أبو عين طايرة لا يتورع في تطبيق نظرياته الفاحشة هذى على أية جدادة لافة في أي جخنون وملف على الأرصفة والأزقة .. غير مبالي باخلاقيات ولا مبادىء ولا وفاء وقد قيل في المقام : من آمن العقوبة أساء الأدب . خخخخخخخخخخ
ياطلحه اجابتك بليغه جدا الديك المتبختر ده بعد ان يفعل فعلته الشنيعه دي التي لاتستمر سوى ثانيتين يمشي مفرود الجناحين كانو عمل حاجه ياخالد انا برضو في انتظار الاجابه يمكن الجداد الصيني دي فهمو براهو
كان في واحد في حلتنا عينو حاره خلاص عندنا جارتنا عندها جداد بطري الابيض داك جا داخل عليهم لقى الجداد يتجارا بي جا وبي هناك قال ليهم الشي شنو ممرضات بعد ساعتين الجداد كلو وقع واطه وللا وحده سلمت من عينو معليش يامعاويه استلمنا بوستيك
Quote: سلام ودالمدير وجميع المتداخلين عندي سؤال محيرني ليه زمن هل كل بيضه تحت ظروف معينه بتطلع منها سوسيوه وللا لازم تكون البيضه مخصبه لانه مره شفت لي في فيديو الصينين ديل بدخلو البيض في حضانت صناعيه وبعد اسبوع بتطلع منو سواسيو
كويس يا ود المدير .. عرفنا معلومات كتيرة عن الجدادة.... وبالمناسبة ما بس زمان الناس كانوا بيربوا الجداد....ايه رايك لهسع عندنا قفص جداد في حوش البيت وفيه اكتر من ٥٠ جدادة.... والان عندي سؤالين: ١~ هل الكلمة الصحيحة جداد ولا دجاج ٢~ ليه لمن عاوزين تعرفوا البيضة السليمة من البيضة الفاسدة بتختوا البيض في صحن مويه إوتقولوا البيضة البتغطس في المويه سليمة والبتطفح فاسدة،،،،ليه،،،السر في كده شنوا؟؟ ودمت بالف خير وصحة وعافية
الجميل في البوست دا إنّو أصبح ذو شقين، الشِق الأوّل مرتبط بالتشبيه والمُشبه بِهِ هو الجدادة المفقسة وسواسيوها وسوف نطلعكم علي المُشبه، أما الشِق الثاني فمرتبط إرتباط مباشر بالجداد وأحواله ...
Quote: ههههههههههههههههههههههههههههههههههههههههههه مرورو على سبيل التحية ،
حياك الغمام يا إبنها البار وحياها، والتحية والإحترام لك ولها ...
Post: #46 Title: Re: الجدآدة المفقِسة ... Author: عبدالمنعم الطيب حسن Date: 10-23-2017, 09:21 AM Parent: #45
ما عارف ليه حاسي البوست دا مشى في اتجاه جداد غير ما يود صاحب البوست الشفيف؛ اللهم هذا حدسي في ما املك.... حيث ان ود المدير عميق؛ وهو يملك من النباهة والحصافة ليرجع البوست لمساره القويم!!
عبد المنعم الطيّب يتجلّى و يفهما طايرة ايوه خليك كده فى لحظة تجلّى تقع عماقة ود المدير و عماكتو حدّها البيضة تفقس اها بعد داك فى شنو فى تكتيك جدادة الخلا انت قايل التكاتيك دى مكتوب فوقا حصرى ____ و طلحة كعادته لا ببيّض لا بركض و المصيبة بكتكت جدادة كرتونية بس
طيّب، نرجع للشِق الأوّل من البوست . عملية الأرشفة الآخيرة التي حدثت تُعد أضخم عملية أرشفة منذ تأسيس سودانيز اونلآين وإشتملت علي كم كبير جداً من البوستات المتنوعة الأغراض، وكانت ساحتها أكبر مُعترك (أكشن) يشهده المنبر منذ تأسيسه، لذلك كان لا بُدّ من التطرُق لأكثر ظاهرة لفتت إنتباه أعضاء المنبر والقراء معاً الآ وهي ظاهرة الجدادة المفقسة، مع الإحتفاظ للذين يودون التبحر في علم أحوال الجداد بحقهم كامل غير منقوص ...
لا شكّ إنو حاتم ابراهيم كان هو الشخصية المثيرة للجدل في الربع الشحمان الفات وما زال علآمة إستفهام كبيرة للبعض حتي هذه اللحظة، وظلّ ينتهج أُسلوب جديد علي أساليب الطرح السائدة في المنبر إتفق معه البعض وإختلف معه البعض الآخر، وظلّ هو يمثل دور الجدادة المفقسة والمختلفون معه والمتفقين معه علي الحد السواء يمثلون دور السواسيو، خاصةً وهو يجيّد البحبتة في مزبلة قوقل ...
Post: #55 Title: Re: الجدآدة المفقِسة ... Author: عباس محمود Date: 10-23-2017, 10:22 AM Parent: #50
سلام ود المير
فترة الفقس هي ثلاثة أسابيع والجدادة بتركض عشان توفر للأجنة ظروف تساعد علي نموه دخل البيضة درجة حرارة ....رطوبة...... تهوية ... تقليب... وده اللي بيحصل في المفاقس الآلية. حتي لو كل البيض مخصب في الغالب لا ينتج كله كتاكتبت لأنه ممكن يحصل موت لأجنة خلال اال 21 يوم ما قبل الفقس وده لأسباب كتيرة . طبعا يا ود المدير أخدت جانب واحد من البوست قدر فهمي لك التحية والتقدير.
ظاهرة حاتم إبراهيم دي بالضبط زي ظاهرتي مكواة الفحم القدييييمة دِييييك وظاهرة ابو القُنفُد . في فترة من الفترات ناس السودان تركوا الوراهُم والقِدآمُن وأصبح شغلهم الشاغل مكواة الفحم، ثم بعد فترة تكرر نفس الشي ليتركوا كل مشاغلهم ويصبح همهم ابو القُنفُد والحصول علي ابو القُنفُد، علماً بأنّ المكواة وابو القُنفُد كليهما لا يفيد في شئ، وهذا بالضبط حال ناس المنبر مع حاتم إبراهيم ...
Quote: يا خبير أنا أعتقد الديك في الحتة دي دورو ينحصر في نفش ريشو لتمكين الناحية الفيسلوجية واشاعة جو من الرومانسية بما يحفز الهرمونات الأنثوية لدي الجدادة ويثير شبقها قبل أن يقفز قفزته المهولة على ضهرها ليقيم علاقته المشبوهة في الهواء الطلق معلنا تأسيس حياة عامرة بالمح والجنا جداد ..
ههههههههههههههههههههه، يا عمّك الديك المكار دا عامل فيها مؤذن ؤ مشبع الناس فسو . وراء كلو بيضة ياكُلآ زول فسية ...
بوست جلالدونا ذو الطاشر صفحة والإمتداد للبوست الذي قام بتحريره أبو حسين في هذا الربع، وكمية البراميل من الحبر التي إندلقت والخصومات التي قامت ومبادرات الصلح التي عُقدت والإتهامات المابتديك الدَرِب كل هذا حال حاتم منه كحال المتنبئ في قوله، أَنا الَّذي نَظَرَ الأَعمى إِلى أَدَبي ******وَأَسمَعَت كَلِماتي مَن بِهِ صَمَمُ أَنامُ مِلءَ جُفوني عَن شَوارِدِها ******وَيَسهَرُ الخَلقُ جَرّاها وَيَختَصِمُ
أما فيكم رجل رشيّد !!!. كان المتنبئ مُصيباً في قوله حيث أنتج ما يدعو الناس للإلتفاف حوله وأخذه مأخذ الجد محاولين سبر أغواره، فحاتم لم ينتج شئ ولم ينطق في الأمر بشئ !!!...
Quote: أيوة .... الحضانة الصناعية ممكن تعملها إنت في البيت ... ما لازم صينيين. في الحالة دي الحضانة (بتركض) بس ما (بتكاكي) بس لو الصينيين قدروا يلغوا دور الديك ... يبقوا عملوا حاجة جديدة. _____ * متأكد أسبوع واللا تلاتة أسابيع؟
Post: #64 Title: Re: الجدآدة المفقِسة ... Author: كمال عباس Date: 10-23-2017, 02:17 PM Parent: #63
الجدادة تكضكت أيضا في حال حصولها علي فتات أكل أو حبات عيش حينها تبدأ في تكسيره وتفتيته ثم الشروع في الكتكتة لدعوة وجمع صغارها لمائدة الطعام ! تقول حبوبتي عن إهتمام وحنية الجدادة " حن الكت" تقرأ الكض بضم الكا " حن الكت بلا لبن ! وتضربه مثلا لكل من يدعي الحنية والإهتمام باللسان والكلام فقط من دون فعل ودفع قروش ! ** وتكتكت الجدادة لتنبيه صغار عن إقتراب الخطر " حدية، كديسة" الخ ولحظة الدفاع عنهم تنفش ريشها - ووتسن منقارها وتشرع في الكتكتة والصوات لإثارة الخوف في نفس المهاجم ! * - المشاركة دي بعيدة عن إي تشبيهات أو مقارنات منبرية !
Post: #65 Title: Re: الجدآدة المفقِسة ... Author: عبداللطيف حسن علي Date: 10-23-2017, 05:57 PM Parent: #64
بعد ساعتين الجداد كلو وقع واطه وللا وحده سلمت من عينو ـــــــــــــــــــــــــــ ساعتين كتيرة ، ليه ماوقع طوالي !
Quote: كويس يا ود المدير . عرفنا معلومات كتيرة عن الجدادة.... وبالمناسبة ما بس زمان الناس كانوا بيربوا الجداد....ايه رايك لهسع عندنا قفص جداد في حوش البيت وفيه اكتر من ٥٠ جدادة.... والان عندي سؤالين: ١~ هل الكلمة الصحيحة جداد ولا دجاج ٢~ ليه لمن عاوزين تعرفوا البيضة السليمة من البيضة الفاسدة بتختوا البيض في صحن مويه إوتقولوا البيضة البتغطس في المويه سليمة والبتطفح فاسدة،،،،ليه،،،السر في كده شنوا؟؟ ودمت بالف خير وصحة وعافية
بسمات يا بنتنا، والله مشتاقين . بس خلآس عِرِفنا، أنا اليوم اللنزل اتبرا حا إتقلب صبرة وامشي ادوّر في القفص دا شوي إن شاء الله . من ناحية اللغة العربية طبعاً الكلمة الصحيحية دجاج، وجداد عامية جرت علي لِساننا . راجعي مداخلة الأخ عاصم والفيديو المُرفق .
ود المدير ود حلتنا وبدون ما تفتش، يومك التنزل فيه لعطبرة ادينا خبر ووصفنا لينا البيت في السيالة وحنجيب ليك خمسة جدادات هدية،، ،بس الحاجة المستغربة ليها الكتاكيت دي ما بتموت في الحضانة الصناعية دي وانا شايفة في الفيديو كيف الالات دي بترمي الكتاكيت بالقسوة دي.. .يا ربي هل في مصانع حديثة زي دي في السودان في مزارع الجداد ولا هم بيفقسوا البيض زي ما نحن بنعمل في البيوت!؟ بوست فيه فلسفة رائعة وهو ربطك لموضوع البوست الرئيسي بالجدادة المفقسة،،، ودمت بخير وصحة وعافية
Post: #70 Title: Re: الجدآدة المفقِسة ... Author: حمد عبد الغفار عمر Date: 10-24-2017, 06:38 PM Parent: #69
مديرنا
زمان عندنا واحد لما يكون في زول بيطلع ويدخل كتير من الغرفة بيقول ليهو
مالك غالباك القعدة زي الجدادة الحارقاها البيضة
لكن من وجهة نظر (علمية أ) عتقد إنو دي حالة فطرية في الدجاجة عشان تسهل نزول البيضة بالحركة الكتيرة والدخول والمروق الكتير دا لدواعي أمنية عشان تتأكد إنو مافي بني آدم جيعان حيشوفها لما ترمي البيضة في الغرفة
Post: #71 Title: Re: الجدآدة المفقِسة ... Author: حمد عبد الغفار عمر Date: 10-24-2017, 06:38 PM Parent: #69
Quote: يا سلاااااام يا ود المدير ياخي في حضرة جدادك يطيب الجلوس ومكتكت امامك يكون الكلام منو العاش في بوادي السودان ولم تتعفر يداه بمخلفات الجداد وليس الدجاج ومنو الما كان بفرز البلدي من البطري من الرومي اييييييه زمن كنا نرتبط بجدادنا ارتباطاً وثيقاً لدرجة اننا لا نرضى مجرد الاهانة لجدادنا وكم طربنا وحدانا الشجن لمن تغنى بـ: يا جدادتي كاك كاك واللكلك يصيبو الهلاك دم بخير يا صديقي في القفص وكاكي كاكي كاكي في بوستك حتى تفقس الجديد المفيد تحياتي
حباب الغالي ود الغالي . بمنسبة الإرتباط الشديد بالجداد دي، عندي بِت عمتي زمان عندها ديك مسمياهو كحوش، هجمت عليهو الصبرة في ذات ليلة من الليالي وذات غفلة منه وقامت بإختطافه، فرسته بِت عمي بمرسية يدمي لها الفؤاد لم أذكر منها غير مطلعها والذي تقول فيه، جروح قلبي اللبت تبرا ؤ كحوش ختفتو الصبرة .
دا بالنسبة للجزء الخاس بالجداد، أما بالنسبة للجزء الخاس بموضوع البوست بجي امُوصلك الفِطيريّة ...
ماعاوز اطرق لقصتى مع جدادتى حاليا بعد ماتكتمل المداخلات فى بوست الجدادة المفقسة ويتحدر مع العرق ونعيد انعاشة مرة اخرى
Post: #74 Title: Re: الجدآدة المفقِسة ... Author: adil amin Date: 10-25-2017, 08:52 AM Parent: #73
الجدآدة المفقِسة ...
************************* البط ....كيف يا معاوية المدير الفي الجداد اتعرفت !!!! اوعى النسر ام البطة ؟
Post: #75 Title: Re: الجدآدة المفقِسة ... Author: حيدر حسن ميرغني Date: 10-25-2017, 09:06 AM Parent: #74
الصبرة والصقُر كنا بنشرَك ليهو بمصران الدجاج والحمام لما يضبحوهن في البيت كنا نملا المصارين بالصاعوت ونكشحن تحت العمود بتاع الكهرباء قدام البيت عليك أمان الله اول ما يجغمن بقعد يطوطح وبرررردلب يجينا واقع .. وهاك ياعذاب كمَل لينا جنيات البط والجداد
Quote: ما عارف ليه حاسي البوست دا مشى في اتجاه جداد غير ما يود صاحب البوست الشفيف؛ اللهم هذا حدسي في ما املك.... حيث ان ود المدير عميق؛ وهو يملك من النباهة والحصافة ليرجع البوست لمساره القويم!!
منعم يا صديق، البوست سوف يكون له ملحق إن شاء الله ...
فترة الفقس هي ثلاثة أسابيع والجدادة بتركض عشان توفر للأجنة ظروف تساعد علي نموه دخل البيضة درجة حرارة ....رطوبة...... تهوية ... تقليب... وده اللي بيحصل في المفاقس الآلية. حتي لو كل البيض مخصب في الغالب لا ينتج كله كتاكتبت لأنه ممكن يحصل موت لأجنة خلال اال 21 يوم ما قبل الفقس وده لأسباب كتيرة . طبعا يا ود المدير أخدت جانب واحد من البوست قدر فهمي لك التحية والتقدير.
عباس محمود، لك مني السلآم وحياك الغمام . ألف شكر علي المعلومة القيّمة .
Quote: الجدادة تكضكت أيضا في حال حصولها علي فتات أكل أو حبات عيش حينها تبدأ في تكسيره وتفتيته ثم الشروع في الكتكتة لدعوة وجمع صغارها لمائدة الطعام ! تقول حبوبتي عن إهتمام وحنية الجدادة " حن الكت" تقرأ الكض بضم الكا " حن الكت بلا لبن ! وتضربه مثلا لكل من يدعي الحنية والإهتمام باللسان والكلام فقط من دون فعل ودفع قروش ! ** وتكتكت الجدادة لتنبيه صغار عن إقتراب الخطر " حدية، كديسة" الخ ولحظة الدفاع عنهم تنفش ريشها - ووتسن منقارها وتشرع في الكتكتة والصوات لإثارة الخوف في نفس المهاجم ! * - المشاركة دي بعيدة عن إي تشبيهات أو مقارنات منبرية !
ألف شكر يا كمال علي المداخلة الجميلة الشحمانة، نأخذها في صياغها ولا مانع أن نقتبس منها إذا دعت الحاجة أو نتمثل ببعض ما ورد فيها ...
Quote: مديرنا زمان عندنا واحد لما يكون في زول بيطلع ويدخل كتير من الغرفة بيقول ليهو مالك غالباك القعدة زي الجدادة الحارقاها البيضة لكن من وجهة نظر (علمية أ) عتقد إنو دي حالة فطرية في الدجاجة عشان تسهل نزول البيضة بالحركة الكتيرة والدخول والمروق الكتير دا لدواعي أمنية عشان تتأكد إنو مافي بني آدم جيعان حيشوفها لما ترمي البيضة في الغرفة
حمدنا،
الحالة الفطرية دي في البشر في برضو لذلك المرا لآمِن تكون علي وشك وضوّع بيخلوها تتمشى في انحاء البيت عشان الجنين ينزل، ؤ برضو قد لا تكون دي حالة فطرية عند البشر باعتبار إنهم ماخدنها من الجدادة ...
Quote: البط ....كيف يا معاوية المدير الفي الجداد اتعرفت !!!! اوعى النسر ام البطة ؟
النسر واللآ الأمل !، يا عادل حيدر حسن ميرغني طلع تفتيحة ؤ عرف من اين تطلّع القروش في اتبرا عشان كدا كان بيبيع البط للأقباط، بينما نحن طلعنا فارات بارينا الجداد ...
