المعطف الأسود

08:28 AM October, 21 2017

سودانيز اون لاين
omer osman-الخرطوم
مكتبتى
رابط مختصر

سلاماً وشوقاً ،،،
بعد غيبة طويلة نعود الي المنبر مهد البدايات الأولي في عالم الأسفير ،،،

هي قصة تدور أحداثها في الحدود الفاصلة بين الواقع والخيال، وأي تشابه بين الشخصيات الواردة في القصة وأي شخصية على أرض الواقع هو محض صدفة !!

(الحلقة الأولي)
في ذلك اليوم خرج الصول ابراهيم من منزله الصغير بالاشلاق بعد أن ادي صلاة الصبح وتناول كوب الشاي علي عجل ! زوجته بت الخير كما كان يناديها سألته الليلة مالك مستعجل كده في شنو ان شاء الله خير ؟
لا لا عادي مافي حاجة بس عندنا بلاغ مهم ومفروض نتحرك فيه بدري !
البلاغات دي ان شاء الله تطير عيشته كانت بقت مقاسمانا جوه بيوتنا يا جاي متأخر يا طالع بدري وكل مرة ياها نفس النغمة بلاغ مهم ! وشن الفايدة من البلاغات المهمة دي مش ياها اخرته وريقة من اللواء نشيد بجهودكم ومش عارف شنو ويختوها في ملفك، لا يوم شفنا لينا حافز ولا شفناك بقيت ضابط زي عبدالقيوم راجل سكينة !!
ههههههههه هي لكن عبدالقيوم راجل سكينة اقدم مني !
يا راجل هووي نحن كمان الاقدمية ما بنعرفه وكت انت صول عبدالقيوم فارش شرايطو في كتفو لسه رقيب أول، بس من يومه القريبو داك بقي لواء أموره استعدلت واها جاء فاتك وانت اقعد باري لي في البلاغات المهمة دي لمن تودرك وتيتم شفعك ديل !
وانتي تبقي ارملة هههههههههه وتتحبسي اربعة شهور الحبسة الما بتدوريها كلو كلو مرة زي عربية النجدة اليوم كله حايمة هههه
بتحبس مالو ده ما شرع الله ما عندي فيهو كلام لكن اعفي لي بعد داك بعرس لي عرس مجيهة كده ههههههههه
هههههههههه وانتي يا غبيانة البعرسك منو بعد ده !!
والله ما بس قسمتي وقسمة الشفع ديل انا العرسان كانو واقفين لي بالصف ود العمدة زاتو نفسو كان دايرني الا بس ابوي الله يرحمه ويسامحه هو الاصر عليك !
ههههههه هوي يا ولية اخرتيني كدي بعدين نجي نتم حديثك الفارغ ده ! ودعناك الله
في وداعة الله والرسول وربنا يغطي عليكم يا ابراهيم يا ود نفيسة.

حضرة الصول مالك اتأخرته قربت ارسل زول يفقدك !
والله يا جنابو عزالدين جاهز ومارق لمت ليك فيني ام الخير شبكتني ليك نقة فارغة ضيعت وكتي كله هههههههه
والله يا ابراهيم الله يعينك بجاي نحن ما مريحنك وبهناك بت الخير ما مريحاك ههههههه
اتعودنا سعادتك ، اها التحرك متين انا غايتو جاهز وتيمي بتاع المباحث جاهز انا كلمتهم من امبارح يجو يبيتو في القسم عشان ما نتأخر !
تمام تمام عارفك شغلك نضيف العربية هي المأخرنا طبعا كالعادة مشكلة الاستارتر والبطارية وطرمبة الجاز ضعيفة اهو غايتو الجاك بعافر فيها بهناك ان شاء الله تتستر معانا.
تمام سيادتك العربية جاهزة !
تمام سيادتك شنو يا الجاك انت مش مفروض تكون جاهز ابدر من كده ؟!
ايوة يا حضرة الصول لكن ..... !
لكن شنو تلقاك امبارح تقلت وغلبك تقوم ! الجاك والله اخير ليك تستعدل وانا كان قبلت عليك بخلي ليك القسم ده خرم ابرة !!
ههههههههه خلاص خلاص يا حضرة الصول كده موضوع الجاك دي خليهو لي بعدين هسي اتحركوا وربنا يوفقكم.

بت الخير سلام !
حبابك علوية ادخلي ادخلي !
هوي يا ولية هي الواطة بتين صبحت لمن قمتي تورقي في خضرتك هههههههه
والله يا علوية يا اختي تصدقي قلق مني ساكت !
ومالك مقلقة ؟ اها والا عشان نتيجة الشهادة ؟ هي لكن محمد ولدك شاطر ماشاء الله عليه وان شاء الله بجيب نتيجة سمحة !
لا والله يا علوية ما عشان نتيجة الشهادة ولاني طارياها هسي !
يبقي يا بت الخير انتي دايرة تبقي عويرة اخر عمرك وشكلك شلتي في خاطرك من كلام النسوان امبارح اجي اجي يا بنات امي ما ياها ونستنا وحجتنا البنسويها كل مرة شن جده عليك يا بت الخير !!
اححح والله يا علوية وما طالباني حليفة ده كل ما طارياهو ولا هو المقلق بي ! المقلق بي ابراهيم !
مالو ابراهيم يا اختي نعلو داير يعرس فوقك كمان ؟
ههههههه الله يجازيك يا علوية ضحكتيني علي الهم الانا فيهو ده ، يعرس شنو ابداً والله لكن الليلة لمن مرق الصباح ما عارفه ليه قلبي انقبض ونعلت الشيطان واستعذت واستغفرت لكن لي كلامي وكلامك ده قلبي مقبوض !!
بسم الله يا بت الخير يا اختي ده كلام شنو ده ؟
والله ماني عارفه يا علوية يا اختي بس قلبي ده قال شح كده وانقبض وكت ابراهيم ده مرق وقفل الباب وراهو !
يازولة ان شاء الله مافي عوجة بتحصل وربنا يغطي عليهم اهو كلهم في جنس الشقاء والتعب البلا فايدة ده هسي الزين ما ياهو داك راقد ممدد مشلول ، وانا واولادي حفينا عشان نكمل اجراءات القمسيون الطبي نسفرو بره وقلنا ليهم الزول ده انضرب في اداء الواجب والطلقة الدخلت ضهرو في العمليات. والله ناسو ناس الاحتياطي المركزي ما مقصرين اهو جارين معانا. كدي قوماكي نمشي علي الجزر نشتري لينا شوية لحمة وخضار ونفرق حبتين مع النسوان هناك خضرتك دي ملحوقة.
سمح سمح يا علوية النلبس توبي دقائق.
يتبع .............

المعطف الأسود (الحلقة الثانية)

يا حضرة الصول ياخ انا متظلم منك !
هههه متظلم مني أنا يا الجاك ليه في شنو ؟ سويت ليك شنو ؟
كل ما اقول خلاص اموري زبطت مع جنابو عزالدين تجيني انت ناطي من وين ما عارف تخرب علي !
ههههه والله يا الجاك ضحكتني انا ما بخرب عليك بالعكس انا داير مصلحتك وانت في مقام اخوي الصغير، والدرب الماشي فيهو ده أسألني منه أنا ما بوصلك لي شيء ويمكن زمان الناس كانت متساهلة شوية في المواضيع دي لكن براك شايف الحكومة الجديدة من ما جات بقوا صعبين في حكاية الشراب والمدير العام مطلع منشور في الحكاية دي عشان كده انا عاوزك تعمل حسابك.
انا فاهم والله يا حضرة الصول لكن زي ما تقول حركات شباب وتعويدة ربنا يفكنا منها.
اسمعني يا الجاك انا اقول ليك كلام ما قلت ليك قبل ده انا والله أنا شايف فيك بوليس مالي قاشو وانت زول ود خرطوم وفي الخرطوم ود الديم يعني زول شفت وممكن يجي من وراك اها توعدني تخلي البتعمل فيهو ده وتنضبط انا بنقلك من السواقة للمباحث !
انت بتتكلم جد يا حضرة الصول ؟
انت عارفني كمان انا بهظر في الحاجات دي ؟
ابداً ابداً ياحضرة الصول وكلنا عارفين انه جنابو عزالدين بقدرك وما برفض ليك طلب.
بس خلاص امسك في كلامي ده قوي وان شاء الله يتم وانا دايرك لشغلانة كبيرة وخطيرة بديت الملم في اطراف خيوطه !
شغلانة شنو يا حضرة الصول ؟
اها يا ودالجاك شوف ده الدرس الأول ما تستعجل وما تسأل من تفاصيل حاجة ضابطك او حكمدارك ما قاله ليك بالتفصيل تسمع وتسكت، شغل المباحث داير البطن الغريقة والخفة واللفة ما بتنفع فيهو وقع ليك كلامي ده ؟
واضح واضح يا حضرة الصول. الحمد لله اهو نحن وصلنا وحسب كلام المصدر قبيل مع الجماعة البيت ياهو القدامو السبيل داك.

مبروك يا حضرة الصول شغلكم نضيف !
انا كلمتك يا جنابو عزالدين قلت ليك مصدري ده معلومته مية المية والجماعة لقيناهم ليك نايمين يشخروا خمشناهم في لمح البصر والدهب كله جبناهو.
تمام تمام يا حضرة الصول بس خلي جنابو انور يعمل تقرير مستعجل بالمجهودات دي عشان نرسله الرئاسة ، ناس الرئاسة كانوا عاملين لينا غاغة بالبلاغ ده !
حاضر سيادتك بس ما يسوا لينا كلام بت الخير ههههههههه
ههههه ماله بت الخير قالت شنو ؟
قالت لي اخرة جريك ده مش ياها الوريقة بتوقيع اللواء وتتخته في ملفك ههههههه
ههههههههههه والله صدقت يا حضرة الصول البوليس براك عارفو ضاربو الفلس غايتو الشاكي في البلاغ كان واعد بحافز كان صدق في وعده بكون الحافز من نصيبكم !
والله يا جنابو عزالدين انت عارف نحن ما قاعدين نشتغل عشان الحافز والشغلانة دي بقت جارية في دمنا ادونا ما ادونا بنشتغل.
عارف عارف والله يا حضرة الصول ربك يهون.

ابراهيم الحمد لله الحمد لله الجيت طيب !
مالك يا ولية مخلوعة كده وكلامك ما ياهو في شنو ؟
لا لا مافي شيء اسوي ليك الغداء ؟
كدي الغداء خليهو انتي الليلة ما براك يا بت الخير في شيء داسهو مني ؟ في واحد من الاولاد سوا ليهو حاجة ولا الحاصل شنو ؟
والله الليلة طبختكم ليكم خضرة تقول انا انا اصبر كدي النقوم نخت ليكم الغداء !
بت الخير انا كان ما زول مباحث ؟! انا معاشرك لي كم سنة ؟ وبعرفك كويس انا ما بخت يدي في الاكل الا توريني في شنو ؟
والله يا ابراهيم انا ذاتي ما عارفك اقول ليك شنو ؟ لكن قبيل الصباح وكتك المرقت داك ما عارفه ليه قلبي وجعني وقال شح كده ويمكن لو ما جات علوية وساقتني الجزر انا كان مت بالقلق !
سبحان الله حاجة غريبة ما ياهو شغلي وياها مرقت بدري والجية مرات انصاص الليالي الجديد شنو ؟
ما عارف والله يا ابراهيم بس الله يهون !
خلاص قومي جيبي الغداء خليني اكل لي لقمة واقوم امرق علي ميدان الرابطة !

سلام عليكم اهل البيت !
اهلاً اهلاً حضرة الصول بشير !
انت يا راجل يا عجوز لسه ما كملت غداك قوم الكورة دي قربت تبدأ
بشير اخوي اتفضل اقعد اقعد اتغدي مع صاحبك ده الليلة سويت ليهم خدرة دخل ايدك ضوقه !
هههههه يابت الخير يا اختي انا خدرتك ماني خابره هههههههه
هههههه ده كلام شنو يا بشير انتو اديتوني مرة ما بتعرف تطبخ والا شنو هههههه
اها كدي كويس يا بشير يا اخوي داير تشمت فيني الراجل ده هههههههههه
والله يا ابراهيم نحن اديناك اجدع واحسن مرة عندنا ومرات كتيرة ابوي الله يرحمه كان بقول لي لو ناس البوليس بياخدوا نسوان اختك دي مفروض تخش البوليس معاك ههههههههه
الله يرحمه ويغفر ليهو كان راجل فارس.
اسمعني يا بشير يا اخوي اها عاصم ما خلاص حدد مواعيد العرس الناس ديل بعد ده بقوموا يقلقوا ودينا قولة خير ودينا سد المال والعقد كل يوم في الليلة وفي بكرة.
والله يا بت الخير عاصم ولدي ده حيرني واليومين دي طوالي مشغول ومهموم وقدر ما قلت ليه يا عاصم يا بني انت في شنو ما عاوز يتكلم !
ما تضغط عليهو يا بشير انت عارف ناس الجيش ديل اليومين دي مسخنين وحرب الجنوب مدورة والبلد فيها حكومة جديدة والانقلاب زاتو لسه جديد والامور ما مستقرة عشان كده الشغل بكون كتير.
والله يا ابراهيم برضو تحليلك ده وارد واذا كان كده ما مشكلة بإذن الله شوية كده والامور بتروق بس انا الخايف منو يكون عاصم ده غير رأيه من شغلة العرس !
قسم بالله كان غير رأيه وانت وامه مافي زول فيكم مسكو دقاهو انا خالتو بت الخير دي بمسكو ادقو هههههه
هووي يابت الخير انتي عارفه بشير اخوك ده ما برضي في عاصم كلو كلو هههههه
كلنا ما بنرضي في عاصم وعاصم ما ولدي رضع من شطري ده امه وكتين ولادتو ما كانت عيانة وما عندها لبن وانا وكتها والدة نوال بتي دي وعاصم يا يمة ولد روضاي يوم واحد ما قال لي ياعمتي بس يمة امي الله يقويه ويسهل امره.
هووي يا ولية الصباح دايرة تضيعي علينا البلاغ هسي كمان دايرة تضيعي علينا الكورة ؟ قوم يا حاج بشير ارحكاكا.
سمح ختركم كنت بدور اونسكم ونسة اخير من كورتكم دي ههههههه
سلام عليكم !!
عليكم السلام ابراهيم عليك الله وانت جاي اغشي التعاون جيب لينا الشاي والسكر باقي عدمانين اسم الحبة !
جداً ان شاء الله.
والصباح الباكر ينشر اطلالته علي بيوت الاشلاق التي بدت تعمر بالحركة انطلق صوت بت الخير بالبكاء والثكلي وووووب ووووووب من الجاتنا ، ووووب من الجاتنا وجاتك يا بشير اخوي
كان أول الواصلين علوية اطلت من فوق الحائط الذي يفصل بيته عن بيت ناس بت الخير
مالكم في شنو يا بت الخير، ابراهيم مالو ؟
الليلة ووووب يا علوية يا اختي الليلة نحن ما اتسودنا واترمدنا يا علوية يا اختي !! عاصم ولدي يا علوية عاصم كبدتي يا علوية
عاصم مالو مالو عاصم يابت الخير
عاصم كتلوهو يا علوية الليلة وووووب علينا واااي يا عاصم وواااي يا العريس ...
يتبع ...............

غداً موعدنا بإذن الله مع الحلقتين الثالثة والرابعة ،،،

هلا وغلا بجنابو عمر
مشتاقين والله,مشيتو كلّكم خليتو لينا البورد خلا
تعال استلم الوردية انا فترت من النفي :)

سلام يا عمر عثمان
عودا حميدا يا رجل

طلحة عبدالله الصفوة الأنيق سلاماً وشوقاً وليتنا عدنا وعادت الأيام برغم الفيس بوك والواتساب .. الخ لكن يظل للمنبر مكانة وحنين

هههههههههه
ودالبشرى يا حبيب عساك طيب والله مشتاقين ولا يفوتنا ان نحييكم علي صمودكم ومثابرتكم طوال هذه المدة ههههههه

يا ريت ما تغيب تاني وجيتك دي تكون مقدمة لعودة باقي العصابة أبو عمير .

جرجير دا عكليتة يا حبيب ما بنقدر .. خخخخخخخخ

نأمل ذلك يا طلحة وان تعود باقي العصابة ههههههه

الحلقة الثالثة

البركة فيكم يا حضرة الصول !البركة في أمة محمد يا جنابو عزالدين. عاصم فقد عظيم لكن نقول شنو لا حول ولاقوة إلا باللهوالله فقد ما ساهل ومأساة كبيرة شايف الحمد لله عم بشير متماسك !!ابداً والله يا جنابو عزالدين بشير ببكي وبنزف من جووه انت عارف عاصم الله يرحمه كان شنو بالنسبة ليهو ! فجأة تقيف عربية وينزل منها ضابط جيش يقول ليهو ياعم بشير الفاتحة ، عمك بشير كان قاعد حيله ما شالو قال ليهو يا ابني الفاتحة في منو ؟ ضابط الجيش قال ليهو يا عم بشير الدوام لله اول امبارح بالليل كان في محاولة إنقلابية وسيادتو عاصم كان واحد من الناس المشتركين فيها وفجر اليوم اتنفذ فيهم حكم الاعدام الصادر من المحكمة العسكرية لاحول ولاقوة إلا بالله. عمك بشير ما قام ولا نطق بغير كلمة الله ووقع بي كومة سكري.لاحول ولا قوة إلا بالله غايتو الله يعينكم ويصبركم وياخد بيدكم، معليش ياعم ابراهيم انا عارف انه الوكت ما مناسب لكن اهو زي ما انت عارف شغلة البوليس دي لا بتعرف فرح ولا كره !!مافي عوجة يا جنابو عزالدين لو في حاجة انا جاهز ، عالم الله يا جنابو الدنيا دي مسخت علي وبجد فكرت اقدم استقالتي وانزل البلد لكن لحدي ده ما يحصل بتلقاني تحت الخدمة 24 ساعة !انا واثق من كده يا عم ابراهيم ووالله العظيم ما براك كلنا الدنيا دي مسخت علينا لكن ياها دي الحياة واقدارنا فيها. علي العموم انا بتوكل علي القسم وانت لو قدرت علي اخر اليوم مريت علينا يكون كويس وكان ما لقيت فرقة فعذرك معلوم ما تعصر علي رقبتك.بإذن الله بحاول امر عليكم انا ذاتي احسن لي اطلع من الجو ده دي حكاية تخلي الزول يجن والله العظيم.والله يا بت الخير الجاتكم ما هينة الله يصبركمهينة بي وين يا علوية يا اختي عاصم كان هين والا لين استغفر الله العظيمبعدين يا بت الخير بشير ده قولوا ليهو يبكي البكاء ما عيب انا والله خايف عليهو الشيء الحاصل عليهو ده اصلاً ما طبيعي !!والله يا علوية انا مسكتو بي يديني ديل وهزيتو هز وبقول ليهو ابكي يابشير اخوي يابشير اخوي ابكي عاصم مات عاصم راح عاصم كتلوهو وكأنه الماسكاهو ده صنم ما بشير اخوي خشمو ده ما فتحو وعيونه دي هناك بعاين لي شنو ما تعرفوا !!حرقة الجنا والحشا ما حارة يا بت الخير يا اختي تصدقي وتامني بالله مش بشير الطويل ده وديما تلقيهو واقف دوغري زي العود من امبارح انه شايفهو زي الضهرو انكسر ورأسه انحني .بشير ما بقعد يا علوية بشير بعد عاصم ولده انا في وانتي في ما بقعد وياربي تلزمنا الصبر.كتر خيرك والله يا عم ابراهيم كونك جيت برغم الظروف الحاصلة دي !علي شنو يا جنابو عزالدين ده ما واجب، اها قلت لي قبيل دايرنك بس ما وريتني الحاصل شنو ؟الحاصل امبارح بالليل حصلت مشكلة كبيرة جداً في منطقة بانتيو (منطقة سكن عشوائي جوار المدبغة) مجموعة من الشباب عملوا مشكلة مع حرس السلطان/مجوك وحصل اشتباك بالاسلحة البيضاء الحمد لله مافي زول مات لكن في اصابات خطيرة وسط الشباب وحرس السلطان.عرفتهم ديل اكيد شلة خميس !بالضبط كده وعشان انا واثق انك بتعرفهم وبتعرف السلطان وحرسه وعلاقتك معاهم كلهم كويسة انا عاوز تمشي تقعد معاهم طبعا في قوات من القسم ومن الاحتياطي المركزي مطوقة المنطقة والاحوال حالياً هادئة لكن نحن عاوزين نسعي في صلح يجنبنا ويجنب المنطقة مشاكل جديدة.جداً يا جنابو عزالدين انا من دربي ده بمشي عليهم وبفيدك بالنتيجة.سوق معاكم فردين تلاتة بسلاح شخصي طبنجات خليهم معاك الظروف ما معروفة !ما بحتاج انا طبنجتي معاي والناس ديل ناسي تب ان شاء الله ما بتحصل عوجة.السلطان مجوك السلام عليكموعليكم السلام يا ابراهيمومالو سلامك جاف كده يا حضرة السلطان انت زعلان مني والا شنو ؟اسمع يا زول هووي ما تسوي كلام كتير سلطان زاتو تعبان وعاوز ينوم قول كلامك بدون غلبة كتير عاوز شنو انت ؟الله الله يا دينق انت كمان بقيت تتكلم معاي باللهجة دي بعدين انا بتكلم مع السلطان انت دخلك شنو ؟يازول انا حرس السلطان وانا مسئول في محل ده ؟يا سلطان مجوك انت عاجبك الكلام ده ؟خلاص يا دينق اسكت خلينا نسمع ابراهيم داير يقول شنو ؟انا يا حضرة السلطان اول شيء داير اسمع منك انت حاصل شنو انا امبارح ما كنت في وما عارف بالضبط الحصل شنو ؟انت بتعرف خميس يا ابراهيم صاح ؟ايوة بعرفو كويس ؟طيب انا كم مرة رسلت دينق ده يفتح بلاغ في خميس وانتو كل مرة ترجعوهو بدون بلاغ ومافي زول جاء قبض خميس ، خميس ده متمرد علي انا السطان وكلم شباب كتار قال نحن في الخرتوم مافي سلطان ولا حاجة.نحن يا حضرة السلطان عارفين الكلام ده كله لكن كمان خليني اقول ليك النصيحة شفت دينق ده هو سبب كله المشاكل دي خميس وباقي الشباب ديل ما عندهم مشكلة شخصية معاك انت السلطان شباب ديل مشكلتهم مع دينق ده وانا قبل كده كلمتك !!ابراهيم انت جاي هنا تحامي لي ناس خميس يعني والا شنو ؟ دينق ده حرس سلطان ولازم خميس والا غيرو يسمع كلامه !يا سلطان انا ما جاي احامي لي خميس انا جاي احل المشكلة واعمل صلح عشان تاني ما تحصل مشاكل وانت اسمع كلامي !كلامك شنو يا ابراهيم انا ذاتي ما داير مشاكل !كلامي انا بضمن ليك خميس وجماعته بس انت عاوز منك حاجة واحدة شيل دينق ده من حرسك وصدقني بعدها ما بتحصل مشكلة. وناس حكومة لو لقوا في مشاكل هنا كتير ممكن يقولوا سلطان ده ضعيف ما قادر يعمل سيطرة .اذا كان كلامك ده بحل مشكلة انا هسا بشيل دينق من حرس !انا مافي زول بشيلني من حرس انا بطلع براي وده شريط بتاعك يا سلطان انا ماشي لكن يا ابراهيم انا حقي ما بخلي !تعال يازول هووي انت بتهددني والا شنو ؟ايوة بهددك وانت براك بتشوف !تدخل السلطان للفصل بين ابراهيم ودينق وانتهز دينق الفرصة وجري خارج القطية يسابق الريح.يا جماعة الليلة دايرين نرحب بالفرد الجديد في تيم المباحث اخوكم الجاك، الجاك زول كويس وان شاء الله بنفعنا كتير في البلاغات الجاية !تتذكر يا الجاك لمن قلت ليك عندي بلاغ كبير وخطير شغال فيهو !ايوة ايوة ونهرتني لمن سألتك من التفاصيل !ههههههه كويس انك برضو متذكر انه أنا نهرتك، طيب اسمعني الموضوع ده مافي زول غيري انا وانت عارفو حتى باقي التيم ما عندهم معلومة عنه وحتي جنابو عزالدين ما عندو التفاصيل انا بس لمحت ليهو اني شغال في معلومات خطيرة وقلت ليهو بفيدك في اللحظة المناسبة.تمام يا حضرة الصول سرك في بير اها بعد كده ممكن أسأل البلاغ شنو او المعلومات شنو وليه اخترتني انا بالذات للبلاغ ده ؟كويس شوف يا الجاك القصة ومافيها انا عندي واحد من مصادري جاب لي معلومة بتاعة شغل تزوير وتزييف كبير جداً حاصل وشبكة فيها سودانيين وأجانب، شغالين تزييف عملة دولار وشغالين تزوير تأشيرات لي اوروبا وانت عارف اليومين دي اغلب الناس عاوزة تتخارج خصوصاً الشباب.طيب وبالنسبة لاختياري انا ما وريتني ليه ؟انا اخترك لانك وجه غير مألوف اغلب ناس المباحث ديل بقينا وجوه مألوفة في وسط المجرمين وساهل جداً ننكشف والشغلانة تبوظ وانا خطتي انك تمثل دور شاب عاوز تأشيرة وكده نحاول نوصل لي اقرب نقطة ممكنة من الشبكة دي. لكن اسمعني اذا عندك اي رجفة او خوفة من القصة دي من هسا كلمني الناس دي خطيرة وما بتلعب في شغله.ياحضرة الصول انا ما بعرف الخوف وزي ما انت براك قلت نحن شفوت والشغلة دي ما بتغلبني.كده تمام انا مفروض الاقي المصدر في اليومين الجايات دي وبعد داك بوريك الخطوة التانية شنو !لا حول ولا قوة الا بالله ياجنابو عزالدين ياجنابو عزالدين في عسكري جاء وقال في ناس بلغوهو انه في جثة جنب سور المقابر ولمن مشي عليها لقاهو حضرة الصول ابراهيم مطعون وميت !!يازول ده كلام شنو ؟ ابراهيم الواحد ده ؟ايوة ياسعادتك حضرة الصول ابراهيم زاتو !لاحول ولا قوة الا بالله لاحول ولاقوة الا بالله ........يتبع ..............

الحلقة الرابعة

وصل جنابو عزالدين وافراد المباحث وتيم المعامل الجنائية الي مسرح الجريمة كما خف الي الموقع عدد من قادة الشرطة في المديرية والرئاسة !! كان هناك الكثير من الدموع والنحيب وكان هولاء الرجال الذين اعتادوا علي التعامل مع مثل هذه الحالات كأنهم في يومهم الشرطي الأول. لكن كان لابد مما ليس منه بد وصدرت الاوامر بأن يتولي الرائد عزالدين التحريات في البلاغ وتشكل اتيام مساندة من مباحث المديرية والمباحث المركزية.بيدي رجفة وغاضبة امسك الرائد عزالدين بالقلم وهو يرسم كروكي مكان الحادث بينما كان فنيي المعامل الجنائية يقومون بالتصوير والاجراءات الازمة. كان الصول ابراهيم كما كان يعرف سابقاً والمجني عليه أو القتيل أو الجثة كما سيعرف اعتباراً من هذه اللحظة ممداً علي ظهره بشكل مائل الرأس في اتجاه الجنوب الشرقي والاقدام تشير الي اتجاه الشمال الشرقي يرتدي زيه المدني مغطي بمعطفه الاسود الطويل وبقع كبيرة من الدماء تغطي المعطف والجزء الظاهر من ملابسه وهناك اثار لعطنة نافذة اخترقت المعطف الاسود وصدر القتيل . لم يكن هناك اثار عراك حول الجثة وكمية الدم هناك تشي بأن القتل ربما تم في مكان أخر ومن ثم نقلت الجثة الي جوار المقابر. وبفحص الجثة تبين بأن هناك طعنة اخري علي اعلي الظهر. المسدس عهدة الصول ابراهيم كان مفقوداً لكن يبقي هناك احتمال بأن يكون بالمنزل او في القسم. جري تمشيط لكل المنطقة المحيطة بالمقابر وعلي بعد مئات الامتار تم العثور علي (كوكاب) وهو (نوع من انواع الحراب المسننة) وبه اثار دماء كما تم العثور علي مسافة قريبة منه علي دفتر البوليس الخاص بالصول ابراهيم وهو دفتر يسجل فيه رجال الشرطة المعلومات والاشياء المهمة وكانت علي الدفتر اثار بصمة مدممة وصفحات كثيرة منزوعة. كانت هناك ايضا اثار لبعض الاقدام لكن اغلبها مطموس او مختلط بأثار الاشخاص الذين اكتشفوا الجثة. لكن كان هناك اثار لعجلات عربية واضحة تم رفعها بالجبص بواسطة فنيي المعامل كما قاموا بأخذ قياسات دقيقة لابعاد العجلات علها تكشف بعد الفحص والبحث عن نوع العربة التي كان تقف بالقرب من الجثة.طلب الرائد عزالدين من مدرب الكلب البوليسي ان يعرض الكوكاب علي الكلب البوليسي عله يشم رائحة يمكن ان تقودهم الي الاتجاه الذي تحرك فيه الجاني ، وبالفعل انطلق الكلب في اتجاه الغرب وظل يواصل المسير لمسافة طويلة ثم توقف فجأة واصبح يلف ويدور في مكانه وفهم مدربه الاشارة وابلغ الرائد عزالدين بأن الجو الأن اصبح اكثر حرارة بالنسبة للكلب وهذا يؤثر علي قدراته في الشم والمتابعة. علي كل تم تحريز الكوكاب والدفتر ليتم فحصهم بواسطة المعامل الجنائية.بعد ذلك تولي الرائد عزالدين بمعاونة افراد المباحث مهمة نقل الجثة الي المشرحة .وعليكم السلام يا جنابو عزالدين الليلة دي شغلة كبيرة الجابتك المشرحة بي نفسك ! ومالكم عيونكم محمرة كده الحاصل شنو يا جماعة ؟والله يادكتور الحاصل مصيبة عظيمة عمك الصول ابراهيم بقي في ذمة الله !لاحول ولا قوة الا بالله حادث حركة مش ؟لا ابداً والله يا دكتور جريمة قتل قالها وهو يسحب الغطاء عن جسد الصول ابراهيم المسجي علي طاولة التشريح !!لم يتملك الدكتور نفسه واجهش بالبكاء فالصول ابراهيم كان صديقاً وأباً له فنوال بت الصول ابراهيم دفعته في طب عين شمس بمصر. ورفض الطبيب اجراء التشريح وطلب من الرائد عزالدين الاتصال بالطبيب الاخر لكن تحت الحاح وضغط من الرائد عزالدين باعتبار ان مسألة الوقت مهمة جداً رضخ الطبيب للمهمة العسيرة.عقد رئيس القسم اجتماع ضم كل الضباط وافراد القسم وبعد ان ترحم علي روح الفقيد طلب من الجميع الاشتراك في اماطة اللثام عن هذه القضية واهمية وضرورة القبض علي الجاني او الجناة لكن في ذلك الوقت طلب منهم ضبط انفعالاتهم والتصرف وفقاً للقانون فقط.كل ذلك وبت الخير واولاد الصول ابراهيم حتي تلك اللحظة لم يجروء احد علي ابلاغهم بل حتى انهم اخفوا الخبر عن الصول بشير وفي نهاية المطاف طلب مدير الكمندانية ان يذهب بنفسه الي منزل الصول ابراهيم لابلاغهم بالخبر.كانت بت الخير غارقة في القلق صحيح ان ابراهيم كثيراً ما بات خارج المنزل اذا تطلبت ظروف بلاغاً ما ذلك، لكن اكثر ما اسار قلقها انه كان مع تباشير الفجر يعود لا محالة والساعة الأن الثامنة صباحاً وابراهيم لم يظهر. قررت ان لا تستسلم لحالة القلق فالقسم ليس بعيد ستذهب وتستطلع الأمر وربما تجد ابراهيم هناك وينهرها مثل ما يفعل في كل مرة تذهب للقسم بحثاً عنه لكنها لا تبالي.قبل ان تمد بت الخير يدها الي وكرة الباب سمعت طرقاً خفيفاً علي الباب طرقاً زاد من ضربات قلبها فلو الكان القادم هو ابراهيم لما طرق الباب ؟! اذن من هو الطارق في هذا الصباح الباكر ؟! وفي تلك الثواني حاولت ان تقنع نفسها بأنها عوضية لكن تراجعت عن ذلك فمنذ متي تقوم عوضية بطرق الباب ؟! عاود الطارق طرقاته التي كانت تطرق في قلب بت الخير قبل ان تطرق خشب الباب. ومدت يدها الراجفة تفتح الباب ببطء من يخشي ان ينفتح الباب علي كارثة وقد كان شاهدت مدير الكمندانية بدبابيره العديدة وحوله مجموعة من الضباط والافراد. بحثت عن وجه ابراهيم في وسط تلك الوجه ولم تجده ولم تسألهم شيء ووقعت مغشياً عليها. ازدحم المنزل الصغير بكل سكان الاشلاق رجالاً ونساءً واطفالاً وكان الجميع يبكون ويتقالدون بحرقة وغضب.التشييع في المقابر كان مهيباً وخاطبه مدير الشرطة واعلن عن ترقية الصول ابراهيم الي رتبة الملازم أول باعتباره شهيداً للواجب وحث كل ادارات الشرطة علي التعاون وبذل اقصي جهد ممكن في سبيل ضبط الجناة ثم تحدث ممثلاً عن اسرة الشهيد ابراهيم وشكر الجميع واعرب عن انهم كأسرة لن يقبلوا بأن يضيع دم ابنهم هدراً وان محمد ابن الشهيد سيواصل المسيرة خلفاً لوالده الشهيد سيفاً مسلطاً علي المجرمين. ورد عليه مدير الشرطة بأن يعتبر محمد هو أول طالب يقبل في كلية الشرطة هذا العام.بت الخير افاقت من اغماتها ووجدت نفسها محاصرة بعدد كبير من النسوة النائحات الباكيات واخذت تسأل في صوت خافت اوهنه الحزن وهده ، ابراهيم مالو الحصل شنو انا قلبي كان حاسس انه ابراهيم ماشي قريب تطوعت علوية بأن تشرح لها ماحدث وحدث عكس ما كان يتوقعه الجميع فقد هبت بت الخير من عنقريبه هووي يا نسوان انا ما عندي بكاء ولا عزاء هنا الا لمن القي الكتل ابراهيم وحرمان علي الدمع والثكلي.ظلت بت الخير في تلك الحال الرافضة للتعامل مع ما حدث حتي شيخ الحلة لم يفلح في تليين موقفها وظلت متدثرة بالصمت والذهول. حاولت علوية وحاولت سكينة واخريات وكن يصطدمن بقوة رأس بت الخير. بت الخير لم تتململ في جلستها ولم تضطرب الا عندما سمعت النسوان يتحدثن عن وصول نوال وزوجها من ابوظبي. نوال بنتها البكر او قلت اختها كان بينهما وشائج صداقة وحب غريبة لاتشبه علاقات الام والبنت وان كان فيها شيء من ذاك ربما لان بت الخير كانت بنت وحيدة بين خمسة اخوان ذكور ولانها تزوجت مبكراً ففارق العمر بينها وبين نوال لم يكن كبيراً ثم ان نوال حققت حلمها في التعليم الذي حرمه منه الزواج المبكر وهاهي الان طبيبة مغتربة.قذفت نوال بحقيبتها علي الارض وشقت صفوف النسوان وصدت كل من حاولت مقالدتها او البكاء معها فقد بلغها وهي الطبيبة ما صرحت به امها وعلمت بأن امها او قل صديقتها تعرضت لهزة وصدمة نفسية قوية . وقفت نوال قبالة امها وبصوت قوي يا بت الخير الحي الله والدايم الله ابراهيم ود نفسية راح في حق الله ودفنت بت الخير رأسها في صدر بنتها نوال واحتضنتها نوال وظلتا علي تلك الحالة لمدة من الوقت يتميلان وهما ينوحان ويعددان مأثر ابراهيم ود نفسية.في اليوم التالي طلب رئيس القسم من الرائد عزالدين الحضور الي مكتبه موافاته بتقرير مختصر عن سير الاجراءاتالسلام عليكم سعادتك ..اهلا اهلا عزالدين انا عارفك انك متأثر جداً ومرهق جداً ووالله يا عزالدين برغم اني ما طولت معاكم في القسم كلها كم شهر لكن ما تتصور ان موت ابراهيم ده حز في نفسي كيف مش عشان شرطي وبس لكن ابراهيم حقيقة من اندر البشر الاتعاملت معاهم زول عفيف وخلوق ربنا يرحمه. اها الامور ماشة كيف والتشريح وناس المعامل جابوا حاجة .ايوة سعادتك ناس المعامل قالوا من ابعاد ومقاسات الاطارات في مكان الحادث العربية بنسبة 99% بوكس تايوتا ومن نقشة الاطارات غالباً موديل 88وبالنسبة للدم والبصمة الفي الكوكاب ؟ايوة البصمة صالحة للمضاهاة وقدروا رفعوها وفي حال قبضنا مشتبه فيه يمكن مقارنتها بسهولة، والدم علي الكوكاب نفس فصيلة دم المرحوم.تقرير التشريح بقول انه المرحوم مطعون طعنتين بألة حادة لكن شكل الجرح ما بتوافق مع شكل الكوكاب وناس التشريح والمعامل الاتنين متفقين انه سلاح الجريمة غالباً سكين بلدية والكواكب ما سلاح الجريمة.اها وبالنسبة لطبنجة المرحوم ؟الطبنجة طبعا من نوع (طارق) عراقية الصنع عيار 9 ملم وحسب كلام محمد ولد المرحوم قال هو شاف ابوهو شال الطبنجة معاهو وهو مارق من البيت.طيب الدفتر بتاع المرحوم عرفت منه حاجة ؟الدفتر طبعا برضو فيهو بصمة مدممة لكن شوية مطموسة ما واضحة والصفحات القديمة كلها موجودة لكن الصفحات الاخيرة منزوعة.طيب يا عزالدين خطتكم شنو والاتجاهات شنو ؟والله يا سعادتك نحن هسي بدينا في اتجاه انه الجريمة دي عندها علاقة بتهديد دينق حرس السلطان مجوك للصول ابراهيم وفي اتيام كتيرة شغالة في مناطق مختلفة بفتشوا في دينق. لكن برضو ما دايرين نحصر نفسنا في موضوع دينق ده وبنحبث في كل البلاغات الاخيرة الاشتغله ابراهيم وتيم المباحث وعندنا ناس موزعين حتى في صيوان العزاء عسي ولعل نلقط لينا طرف خيط تاني.طيب ده كلام جميل بعدين دايرك يا عزالدين تركز في حاجة تانية واضح انه مسرح الجريمة محل لقينا الجثة ده مسرح ثانوي ومسرح الجريمة الاصلي في مكان اخر ونقلت الجثة من هناك الي هنا. لو قدرنا وصلنا لمسرح الجريمة الاصلي افتكر ممكن من خلاله نصل لي معلومات واثار كثيرة.اكيد سعادتك وبتفق معاك انه في مسرح جريمة اساسي وماتنسي سعادتك نحن برضو حنركز علي خيط الطبنجة غالباً الجاني او الجناة حيتخلصوا من الطبنحة يا يرموها في اي حتة يا يبيعوها وعشان كده عملنا نشرة جنائية بمواصفات الطبنجة وزعنها علي كل السودان.ممتاز يا عزالدين ربنا يوفقكم وخليني في الصورة أول بأول ولو محتاجين أي دعم عربات وقود نثريات اي حاجة كلمني طوالي ناس المديرية قالوا هم جاهزين لأي مساعدات.يتبع .................

غداً بإذن الله نلتقي مع الحلقتين الخامسة والسادسة،،،،

(الحلقة الخامسة)


الفاتحة يا حاجة ، وربنا يصبركم الفقد عظيم لكن نسوي شنو ياهو ده حال الدنيا.
ونعم بالله يا عزالدين يا ولدي ونعم بالله ،،،
طبعا انا عرفت انك طلعتي من الحبس اليوم وطوالي قلت لازم اجي اعزيك
كتر خيرك يا جنابو عزالدين يا ولدي ، ابراهيم رحمة الله عليه كان دايما بذكرك بالخير !! اها يا جنابو انا طبعا اصلو قلت ما بسأل واخوان واولاد ابراهيم ما بقصروا وبجيبوا الزول الكتلو لكن وكت جيتنا بالدرب النسألك الحاصل شنو ووصلتوا وين ؟ مسكتوا زول والا لسه ؟
والله يا حاجة شغالين شغالين كويس خالص وعندنا خيوط كتيرة ماشين فيها !
خيوط كتيرة وشغالين كويس انت يا جنابو حاسب الايام دي كم ؟ دي اربعة شهور وعشرة يوم يا عزالدين يا ولدي ولي يوم الليلة ما لقيتو الكتل ابراهيم ؟! حليك يا ود نفسية الليلة كان يوم حوبتك وكتين الخيوط تنشبك والنفوس تحتار كنت سيدا وديمة حاضر وحلك جاهز في ايدك. بلاك خربانة يا ود نفسية اربعة شهور وعشرة ايام ودمك ودمعنا سايل ما لاقي البجففوا !!!
والله يا حاجة انا مقدر ظروفك واحساسك وليك مليون حق نحن كتلنا في ابراهيم لكن والله علي ما اقول شهيد انا معلق المعطف الاسود بتاع عم ابراهيم في الشماعة وراء باب مكتبي عشان دايماً تكون عيني علي بلاغه ده وما برتاح الا يوم اقبض الزول ده او الجماعة ديل.
كتر خيرك يا عزالدين يا ولدي انا عارفك ما بتقصر وامس جاني اللواء هنا وجاب لي خطاب ترقية المرحوم لي ملازم أول ومعاها الازبلايط بي دبورتين كتر خيرو لكن هو وينو سيد الدبابير هو وينو سيد الرجال الفات خلانا واااا حري عليك يا ابراهيم يا ود نفسية نارك ما تبرد وحشاي موقد جمر جيتني فوق كتلة عاصم ولدي وود اخوي وطبقت لي الكي يا الله تاخدني تريحني يا الله تاخدني تريحني !!
استغفر الله العظيم يا حاجة استغفري استغفري ده امر ربنا وقضائه نصبر ونسأل الله ليهم الرحمة والمغفرة والشهداء احياء عندهم ربهم يرزقون.
استغفر الله العظيم استغفر الله العظيم ، اشرب اشرب الموية يا عزالدين يا ولدي وكتر خيرك يوم الخميس محمد جاء من الكلية مرقوهم اجازة الخميس والجمعة وقال لي جنابو عزالدين جاني في الكلية وجاب لي حاجات قلت ليهو جنابو عزالدين من يومو زول واجب. وقال والله يمة ابوي جوه قبروا شايلنا فوق ضهرو الكلية كلها بتعاملني احسن معاملة الضباط علي التعلمجية واي زول يقول ليك ان شاء الله تبقي زي ابوك، ابوك كان زول ما هين.
يا حاجة محمد اخوي الصغير وانا ما مشحود عليهو وعم ابراهيم الله يرحمه هو العلمنا أ ب ت ث شغل البوليس والله يقدرنا نرد ليهو الجميل ده.

****************************

والله يا سعادتك امبارح مشيت عزيت بت الخير زوجة المرحوم ابراهيم قلبت علي المواجع وحسيت بالخجل قدامه !!
والله يا عزالدين كلنا خجلانين لكن اهو الناس شغالة ! الود دينق ده ما قال حاجة !
والله يا سعادتك للأسف بعد التعب التعبناهو في التفتيش علي دينق وماموريات وعذاب وقبضناهو في النهاية لكن لحدي اللحظة رافض يعترف ؟!
لا يا عزالدين هو رافض يعترف والا اساساً هو ما كتل ابراهيم ؟
لحدي الان يا سعادتك هو بالنسبة لينا المشتبه في الاول او علي الاقل عندو الدافع وفي شهود سمعوهو بهدد في المرحوم. علي العموم بكرة نتيجة المضاهاة بتاعة البصمة بتظهر.
وطابور الاستعراف بالكلب البوليسي ما جاب نتيجة ؟
ابداً والله سعادتك.
طيب والخيط التاني بتاعة المعلومة الجابه الجاك الشبكة بتاعة التزوير والتزييف !
طبعا المشكلة الاولي انه الجاك تأخر جداً في ابلاغنا بالمعلومة دي يمكن قريب شهر وهو قال رأسه كان ضارب وما عارف يقول الكلام ده والا يسكت بيهو يعني باختصار ضيع علينا زمن كنا محتاجين ليهو. المهم انا غايتو من معلومات الجاك البسيطة زايد الكلمات المبتورة في دفتر ابراهيم بقت في رأسي فكرة واحدة انه الجماعة ديل في العمارات لكن وين الله اعلم !
لا لكن الخلاك تفكر انهم في العمارات شنو ؟
طبعا يا سعادتك وانت سيد العارفين دايماً انشطة زي دي اصحابه بفتشوا لمقر في حي هاديء ما حي شعبي لانهم في الحي الشعبي سرعان ما بنكشفوا وفي منطقتنا دي ياهو يا العمارات يا نمرة 2 ، الحاجة التانية الزول الشرط دفتر المرحوم شرطو علي عجل يعني في جزء من الصفحات ظل موجود وفيها كلمات مبتورة يعني لمن تلقي كلمة (.....رات) طوالي ذهني بمشي لي انها العمارات او كلمة (....لار) دي اكيد دولار حتى اخر كلمة كاتبه (.....ك) بفكر انها ممكن تكون الجاك. وانا اديت اديت ناس المباحث تعليمات انه يكثفوا مرورهم وتمشيطهم لمنطقة العمارات شارع شارع عسي يلقط ليهم طرف خيط.
والله يا عزالدين ده تحليل وربط منطقي ممتاز ، بس ياريت لو كان المرحوم ادي الجاك اي معلومة عن المصدر المفروض يمشي يقابله ده او علي الاقل كان حيقابلوا وين كان ساعدنا كتير.
بالمناسبة يا عزالدين في معلومة صغيرة جات في تقرير ناس المعامل الجنائية انا افتكر انها مهمة جداً وحقو تختوها في بالكم انا متأكد انها حتنفع لي قدام !
معلومة شنو سعادتك ؟
المعلومة بتاعة انه كان في اثار بارود في يد المرحوم ! وده معناهو انه استعمل طبنجته في وقت قريب جداً جداً قبل وفاته.
صحيح صحيح سعادتك، صراحة انا انتبهت ليها وبناًء علي كده عملنا بحث في كل المستشفيات الفي المنطقة وحتي بعض المستشفيات البعيدة عن زول مصاب بطلقة جاهم للعلاج لكن كل النتائج جات سلبية.
ده شغل ممتاز يا عزالدين لكن ما تنسي انه ممكن يكون فعلاً المرحوم اطلق طلقة من طبنجته لكن ما اصابت زول يبقي برضو نخت الكلام ده في بالنا اذا لقينا مسرح الجريمة الاصلي.
مزبوط سعادتك، تعرف يا سعادتك انا بستمتع جداً بعرض البلاغات عليك صراحة دايماً بتلفت انتباه الزول لحاجات قد تغيب عنه او ما يديها القيمة الحقيقية بتاعته.
ههههههه تعرف يا عزالدين مافي كتاب او كتابين او عشرة ممكن تقراهم وتلقي فيهم شغل البوليس كله لكن اهو خبرات بتتناقل جيل بعد جيل.
****************************

يا جنابو عزالدين مبرووك ناس شرطة الدمازين رسلوا اشارة قالوا ضبطوا طبنجة بنفس مواصفات والرقم المتسلسل بتاع طبنجة المرحوم ابراهيم.
الحمد لله الحمد لله ده خبر سمح شديد ! والتفاصيل شنو ؟
والله قالوا قبضوها مع زول راكب في بص سفري وشايل معاهو شنطة لمن فتشوها لقوا فيها بنقو والطبنجة دي !!
طيب ده كلام ممتاز خليهم يعملوا اشارة لشرطة الدمازين انهم يحولوا لينا الزول ده بي البنقو بتاعو والطبنجة وانا بكلم السيد رئيس القسم ينسق الحكاية دي مع ناس الكمندانية والمديرية والمدعي العام مهم جداً وضروري اجراءات بلاغ البنقو وحيازة السلاح تتحول لينا ونخت الزول ده متهم في بلاغ المرحوم ابراهيم.
وطيب ودينق يا سعادتك لو ختينا الزول ده متهم طوالي وكيل النيابة حيقول لينا ماسكين دينق لشنو ؟
ملاحظتك سليمة يا الجاك لكن بنعرف نتحايل علي النيابة بأنه نحن راجين نتيجة مضاهاة البصمة المهم بنكسب لينا يومين تلاتة لحدي ما نعرف قصة زول الدمازين ده شنو.
ابدي مدير الشرطة في الدمازين تجاوب سريع مع اشارة الخرطوم وفور وصول موافقة النيابة قام بارسال المتهم والمعروضات مع مأمورية مسلحة تحركت علي جناح السرعة.
واخذ الرائد عزالدين وفريقه يحسبون الثواني في انتظار وصول المتهم من الدمازين والذي علي حسب الاشارة يدعي ضوالبيت حامد.
وكانت المفاجأة عندما وصلت العربة البوكس امام القسم وهبط افراد مباحث الدمازين يدفعون المتهم امامهم صاح الجاك و افراد مباحث القسم كلهم وبصوت واحد تقريباً هو ده أنت يا نورين !!
يتبع .....................

الحلقة السادسة

انت يا جنابو عزالدين نورين ده منو ومن وين انت وناس المباحث بتعرفوه ؟!
نورين ده يا سعادتك معتاد اجرائم معروف لدينا في القسم متخصص في تجارة وتوزيع البنقو ! وقبل ما تجي سعادتك تمسك القسم اتقبض عندنا هنا كم مرة واتسجن واغلب الضبطيات بتاعته تمت بواسطة المرحوم ابراهيم.
طيب هل عندو اي مشاكل شخصية مع المرحوم او غبينة لأني زي حسيت بكده ؟
نورين هو في الاساس اشولنجي ولو لاحظت ساعدتك انه يدو الشمال فيها مشكلة حركة وزي بقت شبه مشلولة ! ودي قصة خلفياته انه في واحد من المداهمات علي خانة البنقو بتاعته وكان عندو كمية كبيرة شوية قام اثناء ما هو عاوز يتخارج ويتملص من افراد المباحث طلع سكين وطعن واحد من الافراد وهجم علي المرحوم ابراهيم كان عاوز يطعنه برضو ، والمرحوم طوالي طلع الطبنجة وضربو طلقة في يدو الشمال الشايل بيها السكين وطبعا بعد داك اتقبض ونقلوهو هو وفرد المباحث للمستشفي. الحمد لله بتاع المباحث ما مات وهو زي ما تمت معالجته بشكل كويس وانتهت اليد شبه مشلولة. وبعد طلع من المستشفي اتحاكم في بلاغ البنقو وبلاغ الشروع في القتل. وقاله وسمعوها ناس كتار كم مرة انه ما حيخلي ابراهيم وكان ما كتلو لازم يعطله زي ما ابراهيم عطل ليهو يدو.
طيب زول بالاجرام ده والمحاكمات دي مفروض يكون في السجن مش حايم بره وشغال في المخدرات لسه ؟!
صحيح سعادتك لكن هو زول مجرم مقرم جداً مرة عمل فيها عيان عاوز يموت اها لمن ودوهو المستشفي شرد من هناك وما اتقبض تاني !
اوكي فهمت عشان كده نقل نشاطه بعيد من الخرطوم ! لكن ممكن يكون جاء الخرطوم مخصوص عشان يكتل ابراهيم ؟!
يا سعادتك ده بالضبط السؤال محور التحري معاهو حيكون غالباً هسي بكونوا انتهوا من اجراءات تسجيل القبض والمعروضات .. الخ وبمشي اتحري معاهو وبفيدك بالنتيجة ان شاء الله !
تمام يا عزالدين بعدين عليك الله ما تنسي تراجع الطبنجة وتشوف لو ناقصة ذخيرة وبرضو افتكر لو عرضتها علي ناس المعامل الجنائية يكون احسن !
بالنسبة للذخيرة انا رجعت خزنة الطبنجة وطبعا مفروض يكون فيها تمانية طلقات العبوة الكاملة لكن لقيت فيها اربعة بس ؟! اما بالنسبة لعرضها علي الأدلة الجنائية انا صراحة شايف انه ما مفيد في المرحلة دي والطبنجة قطع شك في الفترة دي تداولت ايدي كتيرة جداً بالتالي ما تنفع لرفع اثار بصمات لمن قطع شك مهم جداً نحاول نعرف من نورين موضوع الاربعة طلقات المفقودة واذا ربنا وفقنا وعرفنا مسرح الجريمة الاصلي اعتقد وكتها بكون مهم نعرضه علي ناس المعامل اذا لقينا ظرف فارغ او مقذوف.
تمام تمام يا عزالدين كلامك مزبوط يا اخوي انت ماشي تبقي الحوار الغلب شيخو ههههههههه
ههههههههه يا سعادتك العين عمرها ما تعلي علي الحاجب.
■■■■■■■■■■■■■■■■■
سلام اهل البيت ...
حباب اتفضلي عوضية ادخلي ..
كيفنك يا بت الخير نعلك طيبة ومحمد ونوال وبقية الاولاد خبرهم شنو ؟
عاد طيبة بي ووين يا عوضية يا اختي ؟! ما بارك شايفه وعارفه !
والله يا بت الخير اصله الدنيا دي كدي وكتين تقبل علي الزول اها تتولاهو بالمصايب دي فوق دي لكن نسوي شنو بس نقول الحمد لله.
والله يا عوضية يا اختي وما طالباني حليفة قسم الزاد ده بقيت ما ضايقة ليهو طعم ولو ما عشان اولادي الصغار القدام عيوني ديل مرة بس اقول امسك سلك الكهرباء القدامي ده وارتاح من الدنيا.
بسم الله يا بت الخير يا اختي ده كلام شنو ده ؟ انتي يا زولة ما مؤمنة والا شنو ؟
مؤمنة وموحدة يعلم الله لكن كتر علي اولن شيء عصام فجأة اتختف مننا تاني ابراهيم يموت مكتول وبشير اخوي اصلن انا كنت عارفهو من يوم كتلة عصام تاني ما بعيش واهو مات ارتاح سألتك بالنبي يا عوضية يا اختي ما كتير علي !
والله كتير وده حزن يهدلو جبل لكن يا اختي الله ده رحمته وسعت كل شيء.
ونعم بالله ونعم بالله
قوم يا مصطفي شوف الفي الباب منو ؟ ياربي ده منو الجايينا زي الساعة دي ان شاء الله خير ؟
ان شاء الله خير يا بت الخير يا اختي ؟
يمة ده واحد من عساكر القسم قال عاوز الباسبورط حقك وكان ما عندك باسبورط هم بطلعوهو ليك واحد بس دايرين منك صور والجنسية ؟
باسبورط الليل شنو ؟ وانا قع امشي وين والا اطير وين ؟!
كدي النمرق عليهو نشوف قصة الباسبورط دي شنو ؟
اتفضل يا يا ولدي ادخل ادخل البيت بيتك !
السلام عليكم يا حاجة كيفك وكيف الاولاد ان شاء الله انتو كلكم بخير ! حقيقة انا مرسلني جنابو عزالدين قال هو مع ناس الخدمات الاجتماعية دخلوك ضمن بعثة الشرطة للحج السنة دي !
كتر خيركم يا ولدي كتر خيركم يا ولدي ......
استغفري يا حاجة استغفري ما تبكي ده حق حضرة الصول ابراهيم علينا !
خير يا ولدي خير بعدين بمشي اتصور وارسل ليكم الصور والجنسية مع مصطفي !
ان شاء الله يا حاجة ربنا يوفق.
ايوووووووي ايوووووووي زغردوة اطلقتها علوية عندما ابلغتها بت الخير بالخبر
ياما انت كريم يا رب شوفي بالله يا بت الخير انا هسي دي كنت بقول ليك في شنو ؟ وانت في حزنك ده وقنعك من الدنيا ده المنادي يناديك اونت في بكانك لا حاريهو لا طاريهو !
صدقتي يا علوية يا اختي واصلن الزول ما يقنع من رحمة ربنا !
اها اها البكاء والنخجي شنو كمان انتي مفروض تكوني فرحانة وتزغردي !
فرحانة والله ياعوضية يا اختي فرحانة والله هو شوفة بيت الله وقبر الرسول دي هينة ! علا بس كنت بدور احج انا وابراهيم سوا و نجي من الحج نلقاكم يا عوضية يا اختي مجهزين لينا الكرامة وكاتبين في خشم الباب يا داخل هذا الدار صل علي النبي المختار.
ياهو حال الدنيا يا عوضية يا اختي وابراهيم رحمة الله عليه اهو بتو نوال حجت ليهو الدور المضي وان شاء الله حجة مقبولة ومبرورة
ان شاء الله ان شاء الله يا عوضية يا اختي.
■■■■■■■■■■■■■■■■■

نورين كلو عرفناهو كمان حكاية ضوالبيت دي شنو ؟ وبدل سكين مشيت كمان سعيت ليك طبنجة عشان ما تجلي مش ؟
ناس الدمازين ما بعرفوني وانا قلت كان وريتهم اسمي الحقيقي اكيد حيعرفوا اني شارد من السجن !
اها والطبنجة دي قصتة شنو ؟
الطبنجة دي يا جنابو اشتريته من امدرمان سوق ليبيا سلاح شخصي داير احمي بيهو نفسي ؟
تحمي بيهو نفسك من منو من البوليس ؟
والله يا جنابو شغلتنا دي فيها خطورة شديدة مرات مش من البوليس لكن من ناس معاك في الشغل ده!
طيب انت عارف انه الطبنجة دي حكومية يعني بتاعة بوليس !
ابداً والله يا جنابو الزول الباعني الطبنجة دي قال لي دي من طبنجات بتجي من الجنوب !
هوووي يا نورين بلاش استهبال معاك انت طبنجات الحكومة ما بتعرفه ؟
والله يا جنابو انا بشوف عندكم كتير طبنجة الامريكي ده وتاني البنجة الصغير داك لكن طارق ده ما شفتو عندكم اصلاً قبل ده.
اها والزول الباع ليك الطبنجة ده بتعرفوا وممكن تودينا ليهو ؟
انا بعرفو وبوريكم محلو بس ما بظهر قدامو وعليك الله يا جنابو ما يعرف انه انا وريتكم محلو !
جداً جداً يا نورين مافي مشكلة لكن نجي لي موضوعنا الاساسي ؟
موضوع البنقو ؟ ده ما شيء عادي يا جنابو ياها شغلتنا نفوته نمشي وين ؟
لا لا انا ما بتكلم عن موضوع البنقو بتكلم عن موضوع تاني انت عارفو كويس ؟
موضوع شنو يا جنابو انا ما عارف اي موضوع تاني ؟
نورين احسن الناي ما تلف وتدور علي بعض وصدقني انا عاوزك تبقي راجل مرة واحدة في حياتك وتحكي لي قبل ما أسألك !
والله ياجنابو عزالدين انا ما فاهم انت بتقصد شنو ! بعدين يا جنابو معليش ممكن شوية موية بس ؟
اها شفت براك كشفت نفسك ومن ما جبنا سيرة الموضوع ريقك نشف !
انا ريقي نشف لاني من قبيل ما شربت موية !
نورين انا داير اقول ليك حاجة انت بتعرفني كويس جداً صاح ؟
صاح يا جنابو صاح !
وانت عارف انا ما عندي بلاغ بروح ساي وكم مرة قبضتك وسجنتك ؟
كذا مرة كذا مرة يا جنابو !
يعني شنو امور اللف والدوران ما بتنفع معاي. وانت عارف انا ماسك منك الجماعة ديل لو لمو فيك بياكلوك حي تطعن زميلهم وتشرد من السجن وتتقبض ببنقو وطبنجة بوليس كمان !!
هاك هاك الكباية اشرب !
نورين انت كتلت ابراهيم لييه ؟؟
تلعثمت الكلمات بجرعات الماء ووقفت كلها في حلق نورين لم يعرف هل يبلع جرعة الماء ام يخرج الكلمات المتعثرة من حلقه ! ااابراااهييم منو ااابراهييم منو يا جنابو انا ما كتلت ابراااهيم انا ما بعرف زول زاتو اسمو ااابراهيم !!
كدي براحة مالك اتخلعت كده وعيونك مرقت لي بره وخشمك تقل وكت ما بتقدر علي الكتل بتسويهو مالك يا جبان !
انا ما كتلت زول يا جنابو !
كتلت كتلت يا نورين كتلت حضرة الصول ابراهيم وهسي ناس المعامل الجنائية جنائية وحنلقي بصماتك في السكين !!
لالا انا ما كتلتو والله العظيم يا جنابو صدقني انا ما كتلت حضرة الصول ابراهيم .....!!
■■■■■■■■■■■■■■■■■
السلام عليكم جنابو عزالدين
عليكم السلام الجاك اتفضل !
لا عاوزك بره دقيقة لو سمحت !
جداً جداً دقيقة بجيك بره !
اها خير مالك مهجوم ونفسك قايم كده ؟
والله يا جنابو الليلة كنت بتونس لي مع واحد سمسار عندو مكتب عقارات في العمارات اها في الونسة كده عرفت منه انه في جماعة سودانيين ومعاهم اجانب فيهم كم واحد صومالي واتنين خواجات لكن ما بتكلموا انجليزي كانوا مؤجرين عن طريقه شقة في العمارات شارع (36) وفجأة كده اختفوا وهو عاوز منهم ايجار شهرين ! اها انا قلت ده طرف خيط كويس ويمكن ديل يكونوا جماعة عمك ابراهيم ؟
ده شغل مممتاز يا الجاك ونظرة عمك ابراهيم فيك اصلها ما وقعت واطة ! بس اوعي تكون وريته او قلت ليهو حاجة ؟
لالا سعادتك بالعكس عملت نفسي ما شغال بالموضوع حتى لمن قال لي ما تساعدني وتفتشهم لي ! قلت ليهو ده ما شغل بوليس ايجارات ومش عارف شنو ده بالنسبة لينا كلام فارغ وضحكنا وانا مرقت طوالي جيتك جاري جري.
مبروك يا الجاك طيب نادي لي حضرة الصول عباس عشان تمشوا تشوف لي معلومات عن الشقة دي والبيت حق منو والشقة هسي فاضية والا فيها زول المهمة معلومات متكاملة عن الموضوع.
■■■■■■■■■■■■■■■■■
حاضر حاضر سعادتك.
ايوة ده نورين المتهم !
تعال هنا يا زول خت يدك هنا عشان نشيل منك البصمات !
يازول اثبت بترجف مالك ! اثبت يا زول !
لا انا ما برجف بس يدي الشمال دي اصلاً كعبة !
يازول يدك الشمال هسا الهبشه منو انا ماسكك من اليمين وبترجف وعرقانة ! هااك كدي قش العرق ده واقعد في الكرسي شوية.
الزول ده يا سعادتك خايف خوف شديد في رأيك بكون هو الكاتل ؟
يتبع ........................................

غداً موعدنا بإذن الله مع الحلقتين السابعة و الثامنة (الأخيرة)

جنابو الراقي حمدلله علي سلامة العودة

عمر ازى الحال
العود احمد

عودا حميدا سعادتو عمر عثمان