سورة الاحقاف والبقرة و قاف فوق جدى رام

07:56 AM October, 10 2017

سودانيز اون لاين
أبوذر بابكر-
مكتبتى
رابط مختصر

من تجليات الحقيبة

اغنية تلفان من الاجفان

نظم شيخنا محمد ود الرضى
وتلحين سرور

والتجلى المقصود تحديدا هو طريقة نظم الكلمات
وحنجى لاحقا للتوضيح

تَلْفَانْ مِنْ الأجْفَانْ

طِيرْ يَامَنَامْ



فَلَقْ الطَّفَلْ مَاحْ فِى الكَفَلْ

بَدراً تَامْ

لَى شِفُوفُه رَفَلْ كَم لَيهُ نَفَلْ

خِلْتُو منَامْ



أدْعَجْ وأكْحَلْ وجَمِيعْ مِنْحَلْ

تَيهاً دَامْ

لَى جِسْمِى نَحَلْ بَعِيدْ يَا زُحَلْ

مَافِى مَرَامْ



وَضِيبُو يَنِزْ فَضَحْ للوِزْ

زُوزَى وعَامْ

يَا عَنْتَر هِزْ أشْجَعْ لا تَفِزْ

غَارَة تَمَامْ



والْعَ الفَصَّادْ والأحْوَرْ صَادْ

جِيدُه الجَامْ

قَبَّلْ صَادْ للبَيهِنْ صَادْ

قَلْباً هَامْ



طَبَقْ الأكْتَافْ على الأرْدَافْ

غَرْيِدْ ونَامْ

سُورْة الأحْقَافْ والبَقَرَة وقَافْ

فُوقْ جَدْى الرَّامْ

قَالُو النُّضَّارْ لَجَلِى النَّضَارْ

غُورْ يَا لِحَامْ

قَالْ للفِيْنَارْ أنَا نُورْ وإتْ نَارْ

مُوتْ يَا ظَلامْ



المَاتْ أحْيَا وفَنَى الأحْيَا

هَيْبَة تَمَامْ

هَادِى المَحْيَا الهَلَكَتْ يَحْيَى

مَافِى كَلاَمْ



إتْنَاعَسْ ونَامْ مِنْ غَيرِ مَنَامْ

عَالْ يا أنَامْ

مِيمَينْ يَا لامْ الخَاتِى مَلاَمْ

للاقْدَامْ

انا حاولت اشكل الكلمات عشان النطق يكون اوضح

بعدين بكتب من الموبايل والله
يا ريت زول ينزل لينا فيديو الاغنية من البوتيوب
متوفرة بصوت المطرب البديع بادى

ومع السمع بظهر التجلى والابداع الحقيقى اكتر من القرايه

الغريب فى طريقة نظم القصيدة
هو انه ود الرضى ما اتبع الطريقة العادية فى نظم الابيات وهى انه كل بيت عادة بكون متكون من كلمات كتيرة اكتر من خمسة او ستة كلمات
والاخيرة بتكون هى القافية فى كل مقطع او فى القصيدة كلها
لكن ود الرضى هنا عمل كل بيت من اربعة كلمات وحتى فى الاربعة كلمات كل كلمتين التانيه فيهم بتكون بنفس القافية
ويقفل المقطع بقافية ثابتة فى كل القصيدة بحرف الميم

اقرب طريقة لطريقة ود الرضى دى يمكن تكون فى قصيدة العبادى

جدى العزاز الجيدو قزاز
يا عزاز انا نومى خزاز

https://youtu.be/6ibFT-5-5ashttps://youtu.be/6ibFT-5-5as

مافى زول يساعدنا ب تلفان من الاجفان

من اليوتيوب ؟

الاديب الجميل ابو ذر سلام ما يغشاك شر


يا قباني الحقنا بي اغنية تلفان من الاجفان

على
الزول العالى

كيفك ياخ واريتك طيب وسعيد و شديد

تغشانا انت ومعاك اكيد بغشانا الفرح

تعرف
انا اتعلمت والله طريقة تنزيل مقاطع الفيديو هنا
بس بعرف الشغلانة دى من اللابتوب
المشكلة الايام دى انا بعيد والله من اللابتوب وشغال مكابسه من الموبايل
وما بعرف انزل الاغنيات من الموبايل

كدى النستنى القبانى وبقية الرهط

تسلم يا على

تحياتي اباذر و علي ...

وَضِيبُو يَنِزْ فَضَحْ للوِزْ

زُوزَى وعَامْ
----
وصف عجيب والموصوف أعجب!
يعني الزولة دي قالت للوِز أنت " Fake news"
بصراحة يا اباذر البوست ده مفروض يكون يوست الربع الجديد والربع الخالي زاتو!
بعدين القصيدة عنوانها مهيب ونظمها غريب ولحنها عجيب وغناها بادي، ما عارف سدرة منتهى الابداع ممكن يكون شنو ابعد من كده؟
والله يا اباذر مرة ضربت لصديق جميل من عشّاق الحقيبة عشان يكلمني عن العنوان بتاع القصيدة دي.
قال: "تلفان من الاجفان"
الله يسامحك ياخ.

محبتي

ازيك يا الفاتح

با البيك نور اقليمك

انا متيم وآلله بالحقيبه

ومفكر اعمل موضوع طويل و عريض عن تجليات الحقيبة وإبداعاتها
نشوف فيهو كل العبقريات العجيبه للطرب المهول ده

رايك يعنى نقول لى حاج بكرى يودى لينا ده للربع الجاى

ممكن طبعا اكيد

شكرا يا فاتح يا سمح

مشكوووووور يا قبانى

شكر كتير والله

الاديب الشفيف ابو ذر بابكر الرجل المبدع الوريف ياخي يوم بتكمل ليك زول من الناس العتيقين الهنا ديل وانا واحد منهم ،،،،
تلفان ... من الاجفان ,,, من اجمل الاغاني نظما وشعرا وقافية ولحنا فابدع فيها عمنا ود الرضي ايما ابداع وعمنا بادي ايضا ابدع في اداءها ولكن ارجو ان يئاينا بها الاستاذ قباني بصوت البلبل الغريد مبارك حسن بركات وبصوته الجميل يضيف اليها القا وجمالا خاصا وهذا ليس تحيز ولكن اعتبره تنوع ليس الا ... فود الرضي بحر ما ليهو ساحل ياخي وانت سيد العارفين ولا شنو ؟ على العموم واصل في هذا الخيط البديع ... متابعين

تحياتي : ياسر العيلفون ....

العزيز ياسر

كيفك يا فنان وان شاء الله طيب ياخى

شيخنا ود الرضى فحل الفحول اب مطرا هطول

شفت طريقة النظم دى كيف بالله
وشفت الصور والمعانى الساكنه فى القصيدة ؟

دى ما بقدر يسويها زول ساى
الا يكون مالى ايدو تب و منجض شيتو

اكيد طبعا مبارك حسن بركات، والزول ده قريبنا بالمناسبة، اكيد هو وبادى
هم الاتنين ياهم الشايلين مفاتيح واختام الحقيبة

وامس كمان بالمناسبة فقدنا وفقد الفن والجمال والحقيبة واحد من كنوز المعرفة والغناء

على مصطفى احمد الدكشنرى

الفقد كبير والله و عظيم
لكين ما كتير على الله

شكرا ليك يا ياسر وتسلم ان شاء الله

"انا متيم وآلله بالحقيبه"
--------------------------------
يا اباذر يا جميل.
مشكور على نقل البوست يا حبيب.
وبعدين الحقيبة دي أنا بتدشدشني عديل ياخ، وخصوصا البروف بادي!
----
يا سر العيلفون الفنان الجميل
ياخ جهجهت باكاتي شديد.لي يومين بفتش في" تلفان من الاجفان" بصوت مبارك حسن بركات.ما لقيتها كلو كلو.!
الصديق دكتور أحمد القرشي سبق وارسل لي كمية من أغاني الحقيبة، ومن بينها تسجيلات لمبارك حسن بركات "أندر من أسنان الديك"، على قولة الراحل على المك.!
غايتو لو ما جابا لينا ود قباني بعد ده إلا نقع مكتبة الكونجرس

محبتي