بعيد من السياسة --- يا بت يا مطره

07:27 AM October, 16 2017

سودانيز اون لاين
أبوذر بابكر-
مكتبتى
رابط مختصر

اتمنيتك
قلت يوم
القاك معاى
دقيت على باب السما
كتبت عشمى مع دعاى
واستنيتك
جنب الغنيه 
البيك طربانه
فوق المنيه 
البيك نديانه
وكل الدنيا 
البيك مزدانه
جوه الحزن 
الساكن الروح
عمق الوجع 
المابى يروح
وحرقة اساى

اتمنيتك
فكره مغروسه
فى مسام الخاطر
يا زوله مدسوسه
جوه خزاين الحلم العاطر
يا ريده محروسه
بالدعوات
يا محجوبة
بالآيات
يا مكتوبه
فى لوح الأرض تيراب
فى ماضى المنى الباكر
حضور وغياب
حضور معناك
غياب المطره تالانا
وهطولا هناك
واظنك عارفه
انه الدنيا من غيرك يباب
وشذاكى يسافر
دربك وين
يا فرحا ماطر
جيت من وين
يا رمشا قاعد
بين الحاجب السور
وبين الجنة الجوه العين

اتمنيتك
وقلت فى سرى
يا زول اوعاك ما تخاطر
ادفع تمن ايامك حاضر
قول لى البت جاييك بعدين
كان الله كفانا العوارض
ادفع تمن ايامك نقدا
كفى ايدينك رهق الدين
بين الخوف الكاسى الليل
وبين الدغش الشايل النور

اتمنيتك
بلد بطرانه وسعيده
اتلونت واتبهرجت
بى ضى بناتا
تمّرت وجنات بيوتا
راجيه عيدا
وحامده سيدا

اتمنيتك
بلد طيبه وشديده 
ماكله شاربه
وحامده سيدا
عينه كابه
وريحا هابه
منيه ساكنه الروح وحيده
عاشقة عينيك يا حلاتا
وحامده سيدا

اتمنيتك
ويوم ناديتك
معاى الشوق ناداكى
قلت تعالى 
ابقى قريبه
ابقا حداكى
اتذكرتك
والغنيه حداى
مرق منى 
مشى وجاكى
حس الغنا البكاى
رصف دربك ندا
جيهة الفرح 
البيكى يومداك ابتدا
وقعدت براى
طشت دروب الدنيا بى
فترت خطاى

اتمنيتك
ندهت سماكى 
ناديت المطره تعالى
خلى غيابك
وابقى حنينه
يسكت حس الفرقة العالى
نرفع صوت الريد بيناتنا
يا بت يامطره 
عليكى الشوق 
ما تبقى ضنينه
امرقى وهلى
تعالى وطلى
امسكى كتابك
اقرى حكايتك لينا
حكاية الغيم الجابك
ريدة الزول الراسم اسمك 
فى كتاب روحو الحزين
يا مطره حبابك 
ابقى داخله اتوهطى
جوه الروح 
فوق العين
ضمى الجناحين اهبطى
جوه الروح
وفوق العين