جروا الساعة كتب السر عثمان الطيب

01:03 PM October, 10 2017

سودانيز اون لاين
زهير عثمان حمد-السودان الخرطوم
مكتبتى
رابط مختصر

*جرووها... جراها البلا*
*ارموها... في ابعد خلا*
*قرضتنا بالجوع والغلا*
*جابت لنا الفشل... الجلا*
**
*جروها ... جر..*
*كروها....... كر*
*قولولا : (جر)*
*او قولو : (كر)*
*او حتى : (عر)*
*تقديما كان غاية الضرر*
*ما فيها خير ، قط ، للبشر*
*ما فيها غير فوضى وكدر*
*سواها واحد ، و قام نكر*
*يا ربي ... كم مليون هبر؟؟*
**
*جروووها... جراها الوجع*
*كانت دي بدعة من البدع*
*تقديما ، ما فاد .. ما نفع*
*لا شال تمرنا واتفدع*
*لا بيها قام نجض القرع*
**
*جروها...... بي جرة قلم*
*كان القلم بيزيل بلم*
*جرووها... جراها السجم*
*جابت لنا الهوا.... والوخم*
*خلتنا جهلة... تقول غنم*
*إحساسنا بالزمن اتعدم*
**
*جرووها... جراها المغس*
*الشعب ضاع مخو اتلحس*
*بالساعة صار مهووس هوس*
*لخبط مواعيدو و دقس*
*يتجارى بي اخر نفس*
*فجراوي...في الحافلة اندفس*
**
*جروووها... جراها العمى*
*من غير كلام ومفاهمة*
*فنوها في سابع سما*
*خلوها فيهو معسمة*
*الدنيا لييييل ومضلمة*
*والناس تقوم متخمخمة؟؟*
**
*جرووها....سيبو الجرجرة*
*سيبو العناد والفشخرة*
*ستين دقيقة... ولا ورا*
*كانت بهادل ... ومسخرة*
*كل المواعيد....... دردرة*
*حتى البكور ...... متأخرة*
**
*جروها ... جراها الرماد*
*زنوها في اخر وهاد*
*كانت سبب محن البلاد*
*جات بالتصحر والجراد*
*فد ساعة... عذبت العباد*
*نوم الديوك .. سهر الجداد*
**
*جرووها... ما دايرين لغط*
*كروها........ مردود الغلط*
*بالواطة...مش فوق الزلط*
*أدوها بالجزمة..... وشبط*
*كشوها غادي...سقط لقط*
*غرينتش...تبدا هناك فقط*
*لندن ، عديل ، وبدون شطط*
*تشهد على (قطع الرحط)*
**
*ودوها خط الطول (صفر)*
*ان شاالله تحرد... وتنتحر*
*شان تاني ما تحلف.. تصر*
*تبقالنا خازوقنا (البكر)*
**
*جروها بي اضخم ونش*
*بين الجنازير تنبرش*
*لازم تفتفت وتندرش*
*لازم تدمم وتنكرش*
*بعد العزا ورفع البرش*
*لا فاتحة.. لا بندفع قرش*