اسقاطات

1

منو صاحب الحق على الآخر ؟
فجأة يطلع ليك واحد من باطن الأرض
وبدون سابق احتكاك مباشر
يتهمك بالتكبر والغرور الخ الخ ... عشان انت
ما بتسلم ولا بتتصل تلفون ولا بتجيهو في البيت..
طيب بنفس المفهوم الساذج دا اتا في ذات نفسك
ما سلمت عليهو عشان يرد ليك و لا اتصلت
عشان يتصل ولا مشيت ليهو في البيت عشان
يجيك.. ببساطة شديدة جدا .
افتكر النوعية دي هي المتكبرة في الأساس
وبتحاول تقنع نفسها انها ما متكبرة
باسقاط سلوكا على الآخرين ..
الزول البنتظر الناس عشان يتصلوا عليهو
ويبادروه بالسلام ولو ما حصل يقوم
يحتج ويشكى ويبكي دا هو المتكبر والعامل
فيها أية حاجة واللا لما وضع في رأسو انو
المفروض الناس تتصل عليهو أولا ..
الحل الوحيد في هذه المعادلة البيزنطية
انك تسكت وما تعاير زول بانو ما اتصل
عليك عشان هو متكبر .. لأنو الكلام دا
بنطبق عليك زيو إذا ما كان قبلو .
فهمتوا يا متكبرين ؟

يتبع

ألاخ الاستاذ طلحة
قبل أن تواصل اهدي اليبك بيت الشعر ابن الفارض
لو تَدْرِ فيمَ عَذَلْتني لَعَذَرْتَني، خفض عليكَ وخلِّني وبلائي

اظنها يا طلحة حاجة في طبيعة البعض ..
يعني في ناس أساسا لازم تلومك ..
ولو ما لومتك مابترتاح ..
مابحب اللوم شخصيا ولا حصل لومت لي زول ..
وكان زول لومني أصلا تاني ما بمش ليهو ..
لامن يخلي لومه لي .. عدا كبارنا في الاسرة ..
فجوه الأسرة بتلقى ناس بتاعين اجتماعيات وتواصل ..
وبتلقى تانين شحيحين اجتماعيا ..
الشغله طباع وخلقة ربنا ..
والله ياطلحة انا عندي خالتي كان بس ما مريت عليها ..
يومين تلاتة لمشغوليات الزمن ده ..
أشيل هم لامن امش ليها رابع يوم ..
فبقوم اتزاوغ منها ومرات بغالطا بقول ليها جيتك ..
بس انتي شكلك كبرتي وبقيتي تنسي .. ههههه ..
المشكلة اني عارف انها مابتنسى خالص ..
زي الماسكة دفتر حضور وانصراف للزيارات ..


الزول البيحس بالضعف والكبر بيلجا للوم اعتقد كده ..
كمان اللوم عادة ستاتية بجدارة ..
والله تشوف الحريم بيتلاومن لامن تمسك راسك ..

طبعا اسقاطاتك ما معانا ....
والعفش داخل البص على مسؤولية السواق .. ههههه ..

سلام يا كنزي
حكاية العتاب عشان اتصال واللا سلام
واللا عدم جية دي سلوك سمج من وجهة نظري
أنا طبعا هنا بتكلم عن البلومك وهو نفسو ما بقوم
بالواجب دا .
طبعا معفيين من الكلام دا الناس الكبار والأهل
المقربين .

فى انتظار جرجير عشان السَّلَطَة تِحْلَوْ
مشتاغوووون ياطلحة.
إنت ما بتداخل فى بوستاتى ليييييه (قول واحد)

حباب جيمي ود القوز
يقيني انو الود والحميمية في القلب وليس اللسان أو التلفون
كتير من أساليب التواصل هي محض نفاق اجتماعي
الواحد يكون ما بدورك وربما حاقد عليك ومع ذلك يتصل
ويلاقيك هاشا باشا وأول ما تدى ظهرك يسبك سرا وجهرا ..
غايتو أنا زيك بالضبط والله يا جيمي عمري ما لمت زول
عشان ما جاني واللا ما اتصل واللا سلم علي .. وما بدور
الزول اللوام في الحاجات دي .. والله العظيم يكون عندي
وفاة عديل كدا وأعرف فلان الفلاني ما عزاني ومع ذلك
ما اعاملوا بالمثل أبدا وأقرب مناسبة زي دي تحصل ليهو
أكون من أوائل المعزيين والمتضامنين وفلسفتي في الحاجة
دي أنو الزول المفروض يعمل بأصلو وما
يكون سلوك الآخرين قدوة بالنسبة ليهو ..

اوووووووو حبيبنا الفاضلابي
والله العظيم كلامك بتاع ما بتدخل في بوستاتي
دا كان الإسقاط رقم 2 ..
المنبر دا أرض خصبة للاسقاطات من الشاكلة دي
فلان ما بدخل بوستاتي أنا ما بدخل ليهو في بوستاتي
وهو تلقاهو عمرو ما دخل بوستاتك .. طيب ياخ بادر أدخل
ليهو بوست مرة واتنين ولو استمر في طناشو يبقي
يكون ليك الحق .. لكن ما تلومو اذا ما شاركت قبل
كدا في بوستاتو خليك شايلة في قلبك على الأقل ما
تجئ تضري بيها عيش على الملأ ..
ياخ حكاية انك تشيل من زول عشان ما دخل بوستيك أو
ما رد ليك على مداخلة ليك دي عملية بتاعت شفع ساي ..
واللا الواحد تلقاهو داقي طبل لي واحد تاني ورافعو
في السماء أول ما يحصل انو ما يرد ليهو لأي سبب
طوالي ينزلو الواطة في المداخلة البعديها مباشرة
واحتمال يفتح ليهو بوست عديل يبشع بيهو عشان بس
ما رد ليهو .
أنا غايتو الحركة دي لاحظت ليها هنا بدل المرة
مرات ... أها دا نفاق رأسو عديل .

Quote: الواحد يكون ما بدورك وربما حاقد عليك ومع ذلك يتصل ويلاقيك هاشا باشا وأول ما تدى ظهرك يسبك سرا وجهرا

الكلام دا ممكن يحصل عكسو تماما
واحد يكون انطباعك عنو انو زول متوحش ومتكبر
واجتماعياتو زيرو لمجرد انو مرة ما سلم عليك
أو ما قاعد تلقاهو قاعد مع الناس مع انو ممكن يكون زول
حبوب وأخو أخوان .. أها دا اسقاط لزج جدا وفيهو بهتان
لأنو ما ممكن تحكم على زول بانو متكبر على الناس وتتعامل
معاهو على الأساس الهش دا لمجرد انو ما سلم عليك ..
انت كدا المتكبر وعامل فيها رئيس جمهورية مع انك
ممكن تكون ولا حاجة لأنك بتقيس طبع الناس بمدى رضاك عنهم .
غايتو من جانبي أي زول يعاملني بالظنون الغبية دي بزيدو
في ظنونو وبقطع ليهو الشك باليقين .. أها خليهو يقطع
مني الهواء أو يجاهد فيني .. خخخخخخ

لا تثريب عليك يا صفوة ,, انا ما عندى بوستات اصلاً
المنبر ده كان بيجذبنا ليه عنوان البوست الان اصبحنا
ندخل عشان الكاتب وليس المكتوب .
على العموم فيما يتعلق بموضوع البوست يحضرنى بيت الشعر:

إذا كنت فى كل الامور معاتباً لن تلق الذى لاتعاتبه.

برضو فى انتظار جرجير

اخي استاذ طلحة
لك ودي
اقول لك:
من انتظر من الناس رد المعروف بمثله فسينتظر طويلاً

استاذنا طلحه . .
ياخي قصة ما اتصلت علي وما جيتني ده كلام عاضي . .
مرات تحس انو الناس بتمارس حكاية اللوم دي مع تقصيرهم من باب الهجوم خير وسيله للدفاع . .
هو اصلاً (ذا لم يكن صفو الوداد طبيعة ً فلا خيرَ في ودٍ يجيءُ تكلُّفا) . .

سلام للحبان
ياخ البوست دا فيهو كلام كتير مخزنو ليوم كريهة وسداد
ثغر لكن يعلم الله زحمة الشغل مودرة اللياقة ومشتتة
الأفكار ومرقدة الزول هردبيس عديل كدا ..
البوست دا ليهو علاقة تناسبية بأحداث عشتها ومستوحى
من أرض الواقع وبدايتو فوق كانت مقدمة أو مدخل
للموضوع اللي أعتقد انو فكرتو واضحة و ساهلة
ممكن كل زول يتكلم على أساسا، ولغاية ما أتفرغ وألبس لبس
خمسة كل الشكر والتقدير للحبان المتداخلين والمراقبين والمنتظرين.
يتبع إن الله هون .