Post: #3 Title: Re: الرئيس يعالج الفساد هكذا .... فيديو Author: علي عبدالوهاب عثمان Date: 09-21-2017, 06:35 PM Parent: #2
حبيبنا فرانكلي .. مودتي شكراً على هذا الفيلم .. يا سلام على الرئيس الغاني هو ده الرئيس المثالي وغانا في نمو وتطور .. لأن لهم رئيسي بهذا المستوى النزاهة والوضوح عقبال عندنا يا الله
واخد صاحبي قبل كدا حكي لي انو في مناسبه قريبوم كان فيها حضور البشير وعدد من القيادات .. من ضمن الحضور كانت الاستاذه عائشه الغبشاوي .. اظنها لقتا فرصه وتوصل رسالتا للبشير .. قالت ليهو الشعب مضحون وانتو عايشين في نعيم والفساد ئافح دون رغيب او حسيب .. البشير قال ليها انتي مدعيه وحا اقاضيك امام الله ( وحسابي معاك يوم القيامه) امام الله فالظاهر الفساد في السودان فات مرحله الاجتثاث والمعالجه
في السودان حاليا تلقي شاب عمرو 25 سنه بيمتلك 3 فيلل وراكب اخر موديل .. الناس ما بقولو ليهو من اين لك هذه .لا بشيدو بيهو ويقولو ليك الزول دا (عبر ) و دا (ود شفت) ..حرامي دي بقت وصف للزول المفلس البتلب الحيظه ويسرق الملايات بس
Quote: اقتادوه الي المحكمة بتهمة السرقة ..وبدأ القاضي في طرح الأسئلة : ( اسمك منو؟)، فرد المتهم : ( بسم الله والحمد الله والصلاة والسلام على رسول الله، أخوكم في الله فلان).. استغرب مولانا من المقدمة الرائعة، وواصل أسئلته : (عمرك كم ؟)، فرد المتهم : ( بسم الله والحمد لله والصلاة والسلام على خير خلق الله، والأعمار بيد الله، وبفضل الله بلغت خمسين سنة).. إستاء مولانا من المقدمات وخاطبه غاضباً ( ياخ اختصر، ليه بتبدأ الاجابة بالمقدمة الطويلة دي ؟)، فرد المتهم بمنتهى الجدية : (يعني انت ماعارف حرامية الزمن ديل كلهم بيبدوا كدا؟؟) ..
Post: #17 Title: Re: الرئيس يعالج الفساد هكذا .... فيديو Author: Asim Ali Date: 09-22-2017, 03:03 PM Parent: #16
مايعنينا ليس الانشغال بالاخرين مايعنينا هو اجتثاث الفساد واعادة الحقوق الماديه والمعنويه المسلوبه من اهلها مايعنينا هو محاكمات علنيه لجذور الفساد ومحاسبتهم وتنفيذ الاحكام علنا دون تحايل بفقه ستره او تحلل او ...
مايعنينا ان توكل الامور لاهلها . . مايعنينا هو وطننا وضرب الفساد والمحسوبيه فى مفاصل ادارته وعوده السلام الي ربوعه
الفيديو رقم اتنين بتاع رئيس تنزانيا اهم من بتاع غانا.. لانه سهل ان تتكلم والبشير برضو ممكن يتكلم عن الفساد مثله.. ولكن سوف زول تنزانيا ادى انذار للمسؤولين لتصليح اجهزة المستشفى فى اسبوعين فاصلحوها فى ثلاث ايام.. ونزل يكنس الشوارع ويجلس الى المرضى .. بالمناسبة البنت النيجيرية محترفة فى البرزنتيشن.. راقبت أداءها .. شوف ما نزلت يديها تحت ابدا.. حافظت على ال التسعين درجة.. ومعظم الاوقات تلوح براحة الكفين وليس ظهرهما وهذا يفيد انفتاح المتحدث على المستمع.. عكس اظهار ظهر الكف الذى يفيد الإنغلاق والأنانية وينفر المستمع.. إضافة على التركيز على عين المستمع.. شكرا يا حاج
Post: #23 Title: Re: الرئيس يعالج الفساد هكذا .... فيديو Author: Frankly Date: 09-24-2017, 08:33 AM Parent: #18
فعلاً أخي أبوريش الكلام سهل ولكنه اصبح عملة نادرة في عالمنا اليوم
فلا تكاد تجد مسؤولاً يتحدث في مؤسسة عن الفساد
لأنه يخشى أن يقال له في راسك بطحة
القائد الحقيقي هو من يكون قدوة ويتقدم الناسس بفعل
وقد كان رسول الله صلى الله عليه وسلم خير قائد وخير قدوة وخير مثال للبشرية جمعاء
اليوم االرئيس لا يشارك في تنظيف الشوارع بل تنظف له الشوارع وتطلى له الجدر وتصلح له الطرق لأنه سيمر بها لأحد فعالياته فلا يرى إلا ما يسره
وليته كل يوم يمر بشارع جديد ليجد أهل ذلك الشارع الإهتمام من المسؤوليين وبطانة السوء
قرأت اليوم أن وفد السودان لاجتماعات مجلس حقوق الإنسان كان يتراوح ما بين 100 إلى 120 شخصاً تم تمثيلهم بشخص واحد هذه السنة هو المندوب الدائم للسودان المقر الأوروبي للأمم المتحدة مصطفى عثمان إسماعيل
يا معاوية ما من صورة من صور الفساد إلا ووجدتها في السودان
بداية من الوساطة في التوظيف والعقودات مروراً بشرطي المرور الذي يوقفك في الطريق أولاً ثم يبحث أين يمكنه أن يسجل لك غرامة ويعطلك ويعطل مصالحك ولا ينفع معهم منطق أو قانون ح تدفع يعني ح تدفع
والله كل مرة أقول "تدخل عليهم بالساحق والبلاء المتلاحق" "اللهم أملأ بها أحشائهم بالسطانات والأمراض العضال ويوم القيامة أنت حسيبهم"
المهم الوجع كثير
والفساد للأسف ليس في الخدمة المدنية فقط حتى الكهربجي والمكانيكي لو خليت عربيتك عنده ممكن يشيل من عربيتك قطع غيار أصلية ويخت ليك تقليد
ومن الفساد ضياع الأمانة بين الناس وهذا فساد كبير وصار الناس يضحكون على الضحية ويثنون على المخادع
والله فلان دي زول تفتيحة شديد عمل ليك في علان مقلب خلاه لافي صينية
حسبي الله ونعم الوكيل
Post: #21 Title: Re: الرئيس يعالج الفساد هكذا .... فيديو Author: Deng Date: 09-23-2017, 01:08 PM Parent: #20
بوست في قمة الغباء.
فرانكلي من أكبر المؤيدين لحكومة الإنقاذ الفاشية،المجرمة و الفاسدة.
بعد كل هذه السنين جاي تكلمنا عن فساد الكيزان!!
ماذا عن القتل وحمامات الدم التي سالت وأنت كنت بتهلل وبتكبر؟؟