لمن نكتب في sudaneseonline

09:22 PM September, 16 2017

سودانيز اون لاين
عبدالحفيظ ابوسن-no where
مكتبتى
رابط مختصر

لمن نكتب في سودانيز ؟

نخلي معلق كدة
واتمني ان يكتب كل واحد رؤيته
كل واحد لا تعني حرفيا
بل من شاء

لمن صعبة؟كان خليتها لماذا بجاوب

نحن معشر المشردين ...

نكتب لكي نتنفس ...

نكتب لكي ننسى الم الغربة ...

و نكتب للمعذبين في الأرض مثلنا ...

الاخ قبانى كفى ووفى فى التعبير

Quote: نكتب لكي نتنفس ... نكتب لكي ننسى الم الغربة ... و نكتب للمعذبين في الأرض مثلنا ...

الم الغربه الذى نحسه حتى نحن فى الداخل ....
.
واسمحوا لى ان اضيف نكتب شهاده للتاريخ يستفيد منها ابنائنا واحفادنا
.
التحيه للاخ عبدالحفيظ وضيوفه

ودو
انت تقدم الطعام للجائع
ولماذا تقدمه له ؟
لأنه فقير
ستقودك لذات النتيجة
اذا لماذا نكتب ؟

انت تكتب قباني قولا جميلا
ارضيت نفسك
وارضيت من تكتب له
وهو يستحق

نكتب شهادتنا لاولادنا
لاحفادنا
للتاريخ
ونكتب شعورنا حينها
وموقفنا مما يجري

هل الامر يستحق ؟
هل يكفي ذلك ثمنا؟
هل ربح البيع ؟
من تتوقع انه يقرأ لك ؟
لماذا

طيب...
لماذا أكتب في سودانيزاولاين:
أكتب للونسة و المتعة و تنفيس الهنابيك :)

انا اكتب فى المنبر العام لمعرفة الحقيقة الغايبة

كويس يا فرج فودة

انا محمد حسن اكتب لان الكتابة رسالة
اكتب لشعبي
اعبر عن موقفي
واكتب للتاريخ

عدم اتاحه مساحه لتقدم لى وطنك من خلال قنوات تعبير وممارسه سياسيه ولا ان تترك لتبدع فى عملك لاحداث فرق فالكتابه افضل وسيله كبديل.

لماذا اكتب فى منبر سودانيز ؟

اكتب لتبادل الاراء مع الزملاء جميعاً فى المنبر ومن خلال تبادل الاراء والافكار نستفيد جميعاً ويستفيد ايضا اخرون متابعين من خارج المنبر
بمعنى الكتابة للفائدة العامة .

تشكروا
ودو
صديق
منتصر
محمد حسن
عاصم
علاء الدين

من حق أي زول ان يكتب ما يشاء
دة حق اصيل كعضو
ولكنه يتحمل مسؤولية كتابتو في جانبين
جانب الادارة التي سمحت له بالكتابة فهي تقرر فيماذا كتب بالقبول او الرفض ودة حقها لموافقة العضو علي شروطها
والناس البتقرا
الناس البقروا برضو عندهم حق تقييم الكتابة . ياهو اعضاء اظهروا رأيهم ليك كتابة او بتجاهلك
والاغلبية التي تملك حسابا برضو بتقيمك
ف شنو
لامن تكتب هنا أكيد بتكون عملت اسم .
كاتب جاد
كاتب رصين
مهرج
ممل
ممتع
....
.....
أكتبوا ولكن ختو في بالكم ستدفعون ثمن ذلك

الناس البتقرا سودانيز اكتر من عضويتها
وهي بتقيم الموقع من خلال كتابات الاعضاء هنا
وتقيمها بنعكس بعد داك منو البخلي متابعة الموقع
ومنو البواصل
وتقيم الموقع ممكن يكون
موقع يعتد به
منارة للتوعية
موقع يلتزم جانب الشعب
مع الحكومة
موقع هايف
موقع صادق
موقع لا يعتد به
ليس اهلا للثقة
موقع مفيد
موقع لتزجية الفراغ
الواحد يخش يضحك
....
....
من خلال نوعية المتابعين وقلتهم ولا كترتهم بكتسب الموقع اي موقع مكانتو
المهم في الامر
نحن البنقدر نحدد كيف يقيم الناس الموقع بتقيمهم لنا كبورداب

تحياتى يا أبا سن

نكتب لكل من يقرأ

انا شخصيا اكتب سعيا إلى أن يصبح القارئ هو الكاتب

يا اباذر في ظني القارئ الحصيف يخلق نصه الموازي
اذا انت تكتب غير مستهينا بقدرات القارئ وذكاؤه

استاذنا ابوسن
تحياتى

لنحدث التغير الممكن ونقارب وجهات النظر و الافكار لنجعل بكرة افضل
ليستفيد ابناء اليوم رجال الغد من التجارب بكل انوعها حلوها وكذلك العلقم الذى تجرعناه رغم عنا
من ايدى ابناء الوطن الواحد

انا اكتب الهنابيك القاعد ينفسها ود البشرى


ومن ثم اكتب لأتعلم

تعرف عباس اشتهر الموقع قديما كموقع لاسماع صوت المعارضة . ليس سياسيا فقط بل حتي فنيا وادبيا
فالنصوص التي تمنع في الاعلام الرسمي تجد حظها في النشر هنا
والمقالات الممنوعة
فكأن المنبر وطن من لا وطن له بالمعني المجازي
لذا احبه الناس وتابعوه
فهو يتحدث عنهم
ويحكي
هكذا الامر في تقديري

هههه هيثم
وكلنا نتعلم يوماتي من هنا ومن هناك

الزول بونسو غرضو
ونسو الناس بغرضهم
عشان يجوكم الناس البعرفو شايل وشقيق راح
والناس الخابرين دروب اليانكي

أكتب هنا لأعلم أفراد الشعب كيف يصفون الحاجة المناسبة بالشىء المناسب .. خخخ

Quote: الهنابيك القاعد ينفسها ود البشرى

خرطمية مرة قلنا هنا في المكان دا الهنابيك بطرشقوها ما بنفسوها
صوت الطرشقة : طااااخ ترأاااااااخ واحيانا بوووم ..
صوت التنفيس: ششش فسسسس الخ الخ ..
اتا يا هيثموف تابع لي جرجير دا كدا لما تلقي نفسك
مارق بى قد القفة حتة حتة .
ود أب سن ما شاء الله على حيوتك وطولة بالك .. خخخخ

سلام ابوسن
فى 2008 سال دكتور طيبان نفس سؤالك اليوم فى منتدانا البركل
خلينى اوريك بماذا شاركته رغم ان فى سودانيز الكثير يكتب من اجل وطن حدادى مدادى
دكتور طيبان
قليلون بهم ابداع ظل حبيس اروقتهم ودفاترهم الخاصه اتاح لهم المنتدى اخراج ماكان حبيس صدورهم ودفاترهم يرجون التقيم
قليلون متخصصون لهم معرفه مصقوله بالدراسة والبحث يساهمون فى نشر الوعى
البعض له زكريات تطارده رائحتها ويحن اليها يجد فى اخراجها عزاء له
مستفيدون من اوضاع معينه يريدون تمريرها على الجميع ويكتبون لقمع الاخر
جميلون طيبون يكتبوا ليعكسوا صفاء نفوسهم النقيه
والكثيرين تجدهم فى مواقع الدواس لا يحبون غيره

صاحب الموقع يقول ان هذا المنبر صوت من لا صوت له..
وانا اكتب كي اسمع صوتي للآخرين وأن أتعلم من الآخرين شيئا
جديدا كل يوم ...وان اعرف الناس بمدينة عطبرة واهلها الطيبين...
وازيك يا ود ابو سن ...ودمت بالف خير..

طلحتوف الرشاش سلامات وعوافي

ياخي الهنابيك بتطرشق وبتتنفس

يعني تقبل الحالتين

ممكن نطرشقا بي (شكة دبوس) وتقول طراااخ

ؤ ممكن ننفسا بترك منفذ الهواء النفخوها بيهو

حراً طليقاً وتقول فسسس او فررررر .. شفت كيف

ثم خ

التنفيس حالة رحيمة ورقيقة يا هيثموف لا تتسق
أبدا مع المعنى المراد وأصلا ما في هنبوكة بنفخوها
عشان ينفسوها .. يا طرشقت براها يا طرشقوها ..
التنفيس في الحالة دي زي الرش باللبن
والطرشقة زي الرش بالدم .

خخخخخخخخ

هههه يا طلحة اوريك طولت البال جاية من وين مش حميد قال شايله طولت البال من الله
تجي من الشغل قريب المغرب تساسق من فرن لي فرن . لامن تلقا واحد شغال والكبسيبة واقفة . مافي صف مهارات فردية بس . تظل واقف زي الصياد تفتش عن مداخل للتقدم خطوة او تمد راسك للامام . ما بتكون شايف الزول الببيع الرغيف ولا تربيزتو .. وما عندك معلومة أكيدة هل العيش بكون راجيك لامن تصل قدام . اضانك شغالة تلقط كلام ناس قدام عن وضيعة المخزون الرغيفي . وعينك شغالة ويدك شغالة وكرعينك بتحركن للامام بخطوان نملية غير ملاحظة . حتي تجد نفسك قاب قوسين او ابعد . وتمد يدك فوق راس القدام وبالجمبات وتشتغل مع الشغالين انا جيت من قبيل .. واديت دة ووانا قدامو
دي ممكن تاكل معاك مرات ساعتين تلاتة
ساعتين تلاتة في عمل يقتل الابداع ويعطل المخ زاتو
وما عندك سكة الا تصبر
تصبر عشان بطون اولادنا ما تضوق الجوع
تتعلم الصبر وعدم المعقولية غصب

Quote: لا تتسق أبدا مع المعنى المراد

امسك يا ود اب سن دي نوعية تكتب عشان تغالط وبس
اي غلاط و السلام, النوع الفي النكتة دق الباب قال ليه منو قال أنا قال علي الطلاق دا ما انت !!
هسي زي دا عايز يغالطني في رقبتي في المعنى المراد, هو يا العشا بلبن بدرة المعنى رايده انا ولا انت عشان كمان تفتي وتغالطني !
حولا !!!

يعنى هسّة طلحة ده عادّى نفسو كاتب هنا !!!!
غايتو انا ما قريت ليهو غير خخخخخخخخ
انا فى المنبر ده عشان اقرا .. لكن مرّة مرّه بهابش
يعنى هسّى زى طلحة ده .. لو ما هبشتو المغسة بتكتلنى
++
يا طلحة ما براك .. معاك اخرين
+++
المداخلة دى مثال لى بوست حمد الاوتاماتيكى

الصديق ود أبو سن وضيوفه الاجلاء والعابرين بيننا دوما
لكم تحياتي

يقول أستاذي في الجامعة أن الكتابة الرقمية ظاهرة فرضها التطور الهائل الذي شهدته وسائط الاتصال في العصر الحديث بفضل الثورة التكنولوجية التي جعلت من العالم (قرية كوكبية صغيرة).
وقد أسهمت المنابر الإلكترونية عامة ومواقع التواصل الاجتماعي بشكل خاص في خلق حراك اجتماعي شمل مختلف مناحي الحياة. وهو ما نجم عنه تحول عميق في الحياة المعاصرة على جميع الأصعدة والمستويات. لكونها شكلت فضاء حراً لتدفق المعلومات والتعليق على الأحداث.
وقد اتخذ هذا التحول تجليات مختلفة أبرزها الواقع الافتراضي الذي أدى إلى تغيير كبير في أساليب التعبير وأدوات التواصل, كما يكشف عن ذلك فضاء الإنتاج الإلكتروني الذي يتشكل من علامات ضوئية ونصوص أثيرية ورسائل لغوية وغير لغوية سابحة في الفضاء الإلكتروني وجوالة في عوالم افتراضية غير مادية. وهو ما جعل الجميع يوقن بأن هناك عالماً جديداً آخذاً في التشكل أساسه الحاسبات الذكية والبرامج المعلوماتية وشبكات الاتصال الضخمة. إنه عالم يضج بالكائنات الافتراضية التي لا تعترف بالحدود والمسافات، حيث يجري البث في الواقع الافتراضي من مكان إلى آخر بسرعة الضوء وبصورة فورية تجعل حدود المكان بالمفهوم التقليدي تتآكل وتتضاءل.
ولكن لدينا في المنبر عدة نماذج غير الامر العلمي والتظير فيه
ولكن عن ذات نفسي لا أجد فضاء غير هذا الفضاء متاح لي الان وبين بني وطني وأسعي لتوثيق أحداث كثيرة تمر علينا مرور الكرام وذاكرتنا الجماعية ضعيفة
لا نريد نرمي لغير التنوير والمساهمة في خدمة قطاع كبير مضلل وتغيب عنه المعلومة لا شيء غير مناقشة أحوال أهلنا والسيرة العطره والسجال عفيف
متعك ربي بالعافية ةجعلك من الذين يبحثون عن ضالتهم ويسقطون الصغائر
ودمت لي أخا وصديق

تحياتى يا ابو سن ..

نكتب للحق و الحقيقة .. لا للجدل .
نكتب لنقول لا للباطل .. و نعم للحق ..
نكتب لنعلم و نوجه و نربى ..
نكتب لنعمل ليكون لنا وطن ..

أكتب لأتعلم
أتعلم لأعيش.

لمن يأكل وهو ساه،يقف أمام المرآة الزجاجية وهو ساه،يقود سيارته وهو ساه..وعندما يصادف الناس يستنفر من الأصقاع كل خلاياه الحسية..

يا جلال الاخوانيات والمناكفات دي ألذ شئ
لكن المناكفات البتحفظ الود

انا غايتو يا عمر دهب لا أكتب سوي نفسي
ماعندي ازدواجية ماتريكس

بسمات يا اختي دة حنك ساي
الوطن ياهو الوطن لا بديل له
ما يحدث هنا مرات لا يشبه الوطن

يا زهير
المنبر سد خانات كتيرة
خانة ونسة اولاد الحلة في ركن البيت زاتا سداها

اتا يا جلالدونا معذور عشان ما بتعرف صاحبي أسامة اللعاب ..
سامة لعاب بطريقة مبالغة ما في زيو في السودان.. اها دا لما يعدي ليهو 24 ساعة ما يلعب
كورة كان بشوت الدوم والحجارة والأكياس وأية حاجة تصادفو في الطريق
كانت رجلو بتاكلو وتمسكو أم هلا هلا ... لكن عمرو ما قال أنا لعاب ولا
اتصرف مع الحولو على أساس انو ألعب زول في السودان .. بس أي زول
عارفو وبعاملو على الأساس دا ..
عايز أقول ليك طلحة ما عادي نفسو كتاب ولا حتي قراي زي حضرتك
لكن لو ما دخل شلت الدوم والحجارة في المنبر دا يدو بتاكلو خخخخخخخ
يعني زيك اتا لما تدخل في بوست عنوانو ( لمن تكتب ) وتقول أنا بدخل
(عشان أقرأ ) دي قنطرة لا تفوت يا عزيزي .. خخخخخخ
منو السألك قال ليك اتا بتدخل المنبر لشنو ؟؟ واللا بس عايز تشارك بأية
حاجة زيك وزي المستجير واحد ؟؟

غلط يا جرجير
غلط جدا يا حبيب
لازم تستعمل التعبير المناسب لوصف الحاجة المناسبة
لما تقول بدخل انفس الهنابيك غير لما تقول بطرشقا ..
المسألة فيها ثوابت .. ما ممكن تقول أنا بأكل الموية .. وتقول
لي ما تغالطني في المعني القاصدو أنا ..
التنفيس في الحالة دي يعني تخرب البوست .. تحرفو ..
مثلا يكون الموضوع عن علم اللاهوت وتتكلم عن فتة كوارع
تكورك تهرجل لغاية ما سيد البوست يزهج منو يوخلى ليك وبى كدا تكون
نفستو ..
لكن تطرشق تعني انك تفحم .. تنسف الفكرة بفكرة مضادة ..
تطلع سيد البوست كضاب .. منافق .. مدعي.. مطلبلاتي..
الخ الخ الخ .
طبعا عايز ليك تاني خمس ست مداخلات عشان تفهم .. خخخخخخ

سلام عبد الحفيظ
أشارك بنقل مداخلة لى لأستاذنا محمد حرسم ( رحمة الله ) قبل زمن طويل وهى عند دوافع الكتابة فى هذا المنتدى .
----
اكتب يا صديقى فى ( الواقع الافتراض) حيث صورة الحرف تحل مكان ذلك (الصدى) .
ولك ولكل من يكتب فى ( ذاكرة ) تبحث عن الاجابة قبل السؤال .
اكتب ياصديقى ، وضعهاها فى (زجاجة ) ليحملها ذلك المحيط السرمدى المسمى (الاسافير )
وحتما سوف ترسو يوما (فى زمن ماشى وزمن جاى وزمن لسع ).
----
وهى تعبر عن لماذا اكتب هنا وان كنت أصنف نفسى من القُرَّاء ، وأتمنى انت تجد مشاركة من هم امثالى

لكن دى منتهى الانانية

Quote: أكتب لأتعلمأتعلم لأعيش.

يعنى لو كان طلعت طبيب
تفك الريق بى درب و تفطر بى فيتامين

الأخ الحبيب عبد الحفيظ أبو سن!
موضوعك هذا طرق من قبل على مستوى أوسع في هذا المنبر.
كتب الأخ adil amin موضوعا عنوانه: ماذا نكتب؟ بتاريخ:
8/31/2003. و لا أجد فرقا يذكر بين الكتابة في موقع
سودانيزأونلاين الاسفيري، و الكتابة بشكل عام. و قد ساهمت
في ذلك الموضوع. و كانت عمدة مساعدتي مقال بذات الاسم
نشر في جريدة عربية مغمورة تصدر من مدينة ما في جنوب ولاية
كاليفورنيا. و كنت أقيم حينها في تلك المدينة. أعجبني الموضوع
المنشور في تلك الجربدة، فقمت لقصه و الاحتفاظ به. و سنحت
الفرصة في بوست الأخ عادل أمين، فقمت بنشره فيه.
اليك الآن ما كتبته حينها:

أحسب أن الاجابات الواردة أعلاه قد أوفت الموضوع حقه.
لكن اسمح ليان أوسع دائرة السؤال ليشمل آفاقا فلسفية أرحب.
إذ أن دواعي الكتابة قد تتباين حسب موضوعها. إلا أني
سأستفهم إمكانية حدوث الكتابة غياب/ تغييب المتلقي.
و قعت عيناي على نص مكثف و صغير الحجم في جريدة
عربية تصدر من احدى المدن بجنوب ولاية كاليفورنيا
الأمريكية يعالج السيناريو المرسوم إعلاه اعجبتني المعالجة
العميقة فقمت بقص النص الكتابين عن الجريدة، و فاتني
كتابة المصدر على القصاص. تعالوا معي، احبتي، نغوص
في غور النص و نجتني مكنوناته الثمينة.
عنوان النص:
نشوء تيار الابداع يحتاج لقوة القطب الآخر
لنتخيل إنسانا على جزيرة مهجورة. و لنتخيل هذا الإنسان
يمتلك موهبة أدبية، و أنه يعيش الأعوام تلو الأعوام
في بيت مكين بناه بيديه في غابة تتفجر بالينابيع العذبة
و تعج بالحيوات و الطيور، و تنوء اغصان أشجارها بالثمار
البرية، و أنه لا يخاف البرد و لا الجوع و لا العطش. و لكنه
يشعر بعزلة لا حدود لها. أتراه يمسك القلم ليكتب مقالا؟
يعتقد الكاتب الروسي تولستوي اعتقادا جازما أن هذا
الإنسان لن يكتب مقالات و لا روايات، و لا أشعارا،
لأن الكاتب يكتب للناس الآخرين، أي القراء. و صاحبنا
هذا لن يجد قراء على سطح جزيرته.
و يخاطب تولستوي ذلك المبدع المتخيل قائلا: " إن
عواطفك و أحاسيسك و أفكارك ستتحول إلى صمت
متوتر. أنت ستنفجر لو كان لك طاقة يوشكين. إنك
ستشعر بشوق الى من يجالسك، إلى القطب الآخر
الضروري من أجل نشوء تيار ذلك الحقل المغناطيسي
الذي لا تزال تياراته خفية، و لكنها تصل فعلا بين
الكاتب و القارئ ".
إن الكاتب يمتلك قوة إشعاع أحد القطبين، و نشوء
تيار الإبداع يحتاج إلى قوة القطب الآخر المهتم
و المشارك، المسمى جمهور القراء، الى الإنسانية.

انتهى النصنحن نكتب لنكون جزءا فاعلا في صنع
الحياة. نكتب لنكون جزءا من الكون و الحياة.
نكتب لنكون جزءا من الوجود الحي الفاعل. نكتب
لنعبر عن حياتنا، نكتب لنكون، و إن لم نكتب فلن
نكون وفقا لما نتطلع اليه. نكتب لنحقق ذاتنا.

طارق الفزاري
ود زينب

سقطت سهوا بعض عبارات من مساهمتي أعلاه.
و ددت أن أكتب التالي:
.... إلا أني سأستفهم إمكانية حدوث الكتابة
في حالة غياب/ تغييب المتلقي.

طارق الفزاري
ود زينب

اكتب لانتصر على من يخالفنى فى الراى فانتفخ فاصبح مثل
البالونة زهوا وكبرا واعجابا بالنفس وعندها فقط اشعر براحة
تسرى فى كل جسدى اذهب بعدها لانوم قرير العين هانيها.

نعم يا قريمان
حين نكتب نقول الحقيقة كما تتراء لنا
وايضا لنا من سعة العقل ما يجعلنا نفهم كيف يراها الاخرون
ونكتب ايضا للمتعة والتواصل مع الاخرين

نعم حاتم
اكتب لاتعلم
الكتابة تجود مفاهمينا لتثبيتها او تغيرها للافضل
نكتب لنتعلم كيف نعيش

معليش ممكن نستبدل كيف نعيش ب
كيف نحيا
كيف نستمتع بوجودنا

تحياتي عليش
مداخلتك دي مرقت منها كيت والله
شكلي ساهي

رحم الله حرسم يا هاشم
كان نسيجا وحده
يكتب لنفسه اولا

صدقت والله طارق
الكتابة فعل اجتماعي
كما التواصل
تلزم وجود متلقي
والمتلقي الذكي يجعلك تتفوق علي نفسك
وهنا في سودانيز
التداخل مع الاذكياء يطور طريقة كتابتك وادوات حوارك ويفتح مداركك لقراءات جديدة
لذا كنت مندهشا من قصة طفيل
حي بن يقظان

بالجد
لمن نكتب ؟

كما تصعب الكتابة احيانا
تصعب القراءة
بصورة شخصية اعجز احيانا ليس عن تصفح المنبر . بل حتي علي فتح الموقع نفسه
اظننا جميعا نقرأ أكثر مما نكتب
وما نقراءه يؤثر مباشرة في مزاجنا ورغبتنا في الرد موافقة او نقدا .. لكن ان نصل مرحلة الامتعاض وعدم الرغبة فيه فذلك مرده لطبيعة البوستات الموجودة في مقدمة الموقع
ف هل انت معي ؟

أنا معك يا عبد الحفيظ
شخصيا أشعر بالإحباط
وأيضا بالخجل أمام الآلاف من قراء الموقع

التحية للكاتبات من عضوية المنبر اللائي يأخذنه مأخذ جـد
ولـ قِلة من الأعضاء الذكور

اعتقد او من المفترض اننا نكتب لنساهم فى قضية الوعي وتحسين وعينا ما استطعنا (او كما قال الشهيد عبد الخالق محجوب ) فى رده على المحكمه ماذا قدمت للشعب السوداني وبهت الذي سأل حين اجاب الوعي ما استطعت . من يومها اصبحت قناعتي بالقراءه والكتابه لتحقيق هذا المشروع العظيم .

ابسن و الضيوف تحياتي

كلما بحثت عن معلومةفي الإنترنت ، أفاجأ بإجابات تأتيني

من كل فج عميق .. لا أعرف حتى موقعه في الخريطة!

كنا نقول: --- أعمل المعروف و أرميهو البحر .

الآن نقول: -- أكتب ما يفيد و أرميهو قوقل .

نكتب و لن نعلم عدد الذين تسببنا في سعادتهم أو تعاستهم للأسف.

بالتكنولوجيا يا نعمات نقدر نعرف عدد الذين تسبب منبرنا في تعاستهم

تحياتي أستاذنا معاوية الزبير

معاك حق . لكن عدم المعرفة.. هل هو نعمة أم نقمة ؟

شكرا لك . سأعود لاحقاً إن شاء الله .

بالتكنولوجيا يا نعمات نقدر نعرف عدد الذين تسبب منبرنا في تعاستهم
ــــــــــــــــــــــــــــــــ
واحشانا اوي شوتات دحدوح هههه
نحن الأيام دي شغالين ــــ كماعبر تلبو ذات يوم ــــ ببوز الكدارة،ومش كدا وبس،لازم تكون مستخدم السواتر الممكنة كلها،لو دقست بتلقا نخرتك موشحة بالدمي،فارس الحديد الحمي هههه

تحياتي يا عليش
يسعدني أن التقيك في هذه الواحة الدافئة بعيدا عن ساحات الوغى

صلح الوغ(ي)...قبل مايجيك صاحبنا اللذيذ داك هههه

شكرا ياخ

Quote: والوغَى أَصْواتُ النَّحْلِ والبَعُوض ونحو ذلك إذا اجتمعت

القاموس
---------
بالمناسبة، من الشرفة، المنظر يموِّت من التسلية
جعلت أفرك يديّ مرحا

صلّح يديّ دي لو فيها غلط
و.. سعيد بمعرفتك

أنا غايتو النحل،انصح زولك البعوضة دا

في الحقيقة أتساءل: كم من الوقت يحتاج لكي يرمم رميم شهرته؟

في حي مربع 27 في كوستي كان هناك عربية فورد قديمة جدا من زمن ww2
صاحبها كاتب عليها (سبحان الذي يحيي العظام وهي رميم)
الغريبة قعدت (واقفة) جم بيت صاحبها قريب 20 سنة بحالتها تلك
لا حية ترجى لتقاد ولا ميتة يستفاد من إسبيراتها

عربية عمك محمد حامد يا عبد الحفيظ كان ساكن أصلا جم سوق حي أزهري

عجيبة واقفة البين قوسين دي هههه
الأعجب منها ،إنو نحن هنا بنتمنى لو صاحبنا دا يقيف ثانية بس..
تذكر نكتة الكربة؟ الولد سأل أبوهو قاليهو الكربة بتعضي؟ أبوهو قاليهو: ياولدي هي بتقيف عشان تعضي...
يازمن وقف شوية هههه

تشكر معاوية انك معي
فلنتخذ مواقفا لا تشعرنا بالخجل
العربية بتذكرها تماما وحتي الكتابة الفيها
واقفة شمال جامع خوجلي

متابعة ....
يا عليش
شايفة معاوية الزبير سريع مشى صلح (الوغى)...طبعا انا ذاتي قربت اكتبها هنا الوغي..
لكن نفسي اعرف منو ::صاحبنا اللذيذ داك::: واظنه من الناس البيصطادوا الاخطاء الاملائية..

وبعدين ما وريتنا الكربة الما بتعضي دي شنو!!
....ووالله يا ود ابو سن..في اعضاء هنا بيكتبوا لينا كلنا..وبيكتبوا لاهل السودان كلهم..
وبيكتبو من اجل المغلوبين على امرهم ومن اجل الذين لا صوت لهم، ومن اجل احياء الفكر والثقافة
وتحسين لغة الحوار ، ومن اجل حاجات كتيرة..وانت يا ود ابو سن من هؤلاء الذين ذكرتهم هنا..
ودمت بخير وصحة وعافية

تشكر وهبة
المساهمة في نشر الوعي
وكما يقال الفقر لا يصنع ثورة بل وعي الفقير صنع الثورة
يمكن وضع المضطد بدل الفقير

تشكري نعومة
ويذهب الزبد جفاءا
ولكن هذا العصر يحفظ الزبد والنافع
وتبقي كلماتنا لي جني الجنا
فلنتخير تاريخنا لاحفادنا

السلام والرحمة أبوسن و زوار البوست الكرام...

مشكور أبوسن على البوست... تحفيزنا للتفكير و تنبيهنا للمسؤولية .

ثم سلام و ترحيب حار بالأخ العزيز معاوية آمل أنك في تمام الصحة و البهاء.

و بعديها النسمة بسمات ... كيف حالك و كيف الأميرة أميرة؟ بلغيها التحايا و قولي ليها
كفاية حردان.

بتفق مع كلام بسمات الأخير ده ...و ببدا بيه.
كثيرون ينوبون عنّا في التعبير لهم الشكر ...
مرات بدخل و يجيني رد لنقطة معينة و ألقى زول أو زوله كتبه/ته
بقفل البوست و انصرف :) ...
و بالنسبة للسؤال لماذا نكتب... تعتمد على نوع الكتابة.
تحياتي و تقديري لكم جميعاً

..
سلام أخ عبد الحفيظ
لمن أكتب ولماذا وكيف أكتب وفيما أكتب؟
حينما تكتب - يجب أن تراعي وترضي ضميرك وإنسانيتك - تكتب ما تتحمل مسؤليته وتبعاته
ومايجعلك تعتز به وتدافع عنه - وما لايخجلك أو يضعك متواريا أومبررا أمام أسرتك ودوائرك الإجتماعية
- الكتابة بالنت أصبحت سجل موثق يحسب لك أو عليك -وهي سفر سيطلع عليه أحفادك
وأولادهم -!
لماذا تكتب ؟
فهذا يتوقف نمط ونوعية الكتابة ! ونسة !هزار !إجتماعيات كورة ! تقضية وقت !؟
هذه النوع له مكانه وتوقيته - فأنت من يختار دوائر الإجتماعية وشلتك التي يمكن أن تتونس
معها في موضوع وهم بطبيعة معرفتهم بك ممكن يفهمونك بالإشارة والتلميح والتصريح بعكس
الكتابة - في منفذ عام يتطلب محاذير وجدية وصرامة فكل شئ يمكن أن يحسب عليك!
إذا كل كلمة يجب تخرج وتقاس بميزان الذهب وبمعيار صارم !!
** الكتابة السياسية والفكرية والثقافية الجادة
ليست ترفها فالرأي فيما يحدث في وطنك وموارده ولشعبك ( حقوقه وخبزه وحريته وصحته
وتعليمه ) واجب والكتابة فيه يمليها ضميرك وإنسانيتك ووطنيتك - أصدح برأيك - إنحاز لشعبك
وقف في وجه القبح والظلم والفساد والإستبداد - رموزا وممارسة !
أصدح برأيك ورؤيتك في القضايا - الفكرية بلا مهادنة ولا مجاملة - بل بصدق وأتساق ومبدئية !
** في خضم الحوار والطرح قد نخطئ - ونحتد ونتعارك وقد نمارس تخاشن وعنف لفظي ( العنف القانوني ) فهذا من طبائع النفوس البشرية ! لامجال لملائكية وإدعاء كمال إنساني - فقط
علينا البعد الغلو والشطط والفجور في الخصومة ولتكن هناك خطوط حمراء وأحزمة لا يجوز
الضرب تحتها !
** وهم النجومية والتميز والإصطفاء !
هناك من يكتب من أجل ذاته -من التمجيد والنجومية ووهم الصفوية والتميز !
نفسي ! نفسي ! تورم وتضخم ذاتي وسعيا لإنتزاع التصفيق وآهات الإعجاب يمكن أن يتنازل عن الكثير ويسبح مع التيار الطاغي ويتملق خصومه سعيا للثناء ! شكروني ! شكروني ! أنا عبقري وأنا كتاب ! يفعل هذا بصورة سافرة ومفضوحة ومكشوفة تخصم ولاتضيف! لاهم له سوي نفسه ! لا أعني النزعة العادية لشخص يسعي التي يسعي صاحبها لتقديره وتقيمه بحسب إمكاناته وقدراته وإسهاماته بصورة عادلة تناسب ما يقدم - يفعل ذلك إذا سنحت مناسبة ! !!
وإنما أعني الحالات المرضية - التي لاهم لها سوي تسويق الذات لشراء المدح !
هذه العقلية تكتب لذاتها ولمشاهدة صورتها في المراية !
لاقضية ولامبدأ ولاهم عام - وإنما هي الذات المتضخمة خيرا مثال لهذه العقلية هو مبارك الفاضل !

سلام يا حفيظ

بنكتب عشان ما يجي علينا يوم نندم فيه علي عدم الكتابة

ومن المنتصر عليش ؟
أأكثرهم عنفا؟
صاحب اللعب الذي لا يلتزم بضوابطه؟
ثم ماهي جائزته؟

تشكري بسمات
لنكن صادقين اولا واخيرا
صادقين حين نكتب
لا نبذل سوي ذاتنا هنا
وكثيرا ما اقول آخذ هذا المنبر مأخذ جد . فهو بالنسبة لي ليس عالما افتراضيا

الناس مفروض تكتب فيما يفيد البلد
ناس الزراعة وناس البيطرة وغيرهم يكتبوا خبراتهم ويقدموا برامجهم وخططهم
لتنمية الثروات الزراعية والحيوانية وغيرها

قلت الكلام دا زمااان مستبعدا أن تكون هناك فائدة من الكتابة في السياسة
ود البشرى قعد يضحك قال لي: باللهي سيبنا كدا ولّ كدا.. المنبر دا للآكشن بس
وقد صدق

المعرفة والقدرة على الكتابة من نِعم الله على عبده
وسيسأله يوما فيم أنفقها
خذ هذا الكلام بالمعنى الديني أو اللا ديني لا فرق
---------
شكرا لترحيبك يا فردوس، نفعنا الله بعلمك

اكتب لكل امرأة او رجل من امسودان يعمل بجد وجهد لمقاومة النسيان ، ويعرف ان هناك ملامح وطن حقيقي بتتسرق في الثانية مليون مرة..!
اكتب لكل من يضع العشم في شخصي الضعيف ، وهو مقتنع في قرارة نفسه اني كان يمكن ان اكون اجمل واعمق مما عليه الآن..!
اكتب لكل محبي التثاقف الحر الحميم ، الذين يعرفون ويدركون انه في البدء كانت الكلمة وستكون..
وعبرك يا صديقي ، اسمح لي بتحية كل القارئات والقراء الذين لا اراهم ويتكبدون المشاق لإنفاق لحظات من اعمارهم الغالية لمتابعة ما اكتب..سواءا كان مادة اصيلة او مشاركة..ويفتقدون صوتي عند الغياب..ويفتقدون صوت كبر في الرواية السودانية..!
التحية لكل قراء وقارئات مكتبة محمد النور كبر بسودانيز اونلاين..بكم كنت ، وبكم سأكون لو ربنا مد في ايام العمر..!

كبر

تشكري فردوس
المسؤولية
الموضوعية
الانضباط

تشكر كمال عباس
تشكر معاوية الزبير
في الدرك الاسفل من الجحيم اولئك

تشكر عبدالعظيم
نكتب حتي لا نندم او ان نحس بالهوان
وحين نكتب
لا نندم علي ما كتبناه

فعلا كبر
الوطن كل مرة بتسرق وبعضنا شغال بالمثل
دار ابوك كان خربت شيل ليك منها شلية
وبعضنا يكسر في قيم احترام الاخر المختلف وقبوله

التحفيز علي الكتابة والقراءة
في ناس بفتكرو من خلال صراع حتي الموت او خروج المهزوم
انا في ظني بفتكر التحفيز موجود
وطن يتصدع ويتهاوي ونعمل علي جعله واقفا