أقترح إلغاء الجنية السوداني

12:47 PM September, 14 2017

سودانيز اون لاين
عبدالحفيظ ابوسن-no where
مكتبتى
رابط مختصر

نلغي العملة الوطنية
ونعتمد أي عملة أخري
دولار
يورو
ريال سعودي
اي عملة أخري
ونقفل باب زاد ونقص
نقصناهو تلاتة اصفار وما نجح
نلغي بس

من قصد البحر أستقل السواقيا
المتنبئ
وقت كل شئ مرده للدولار وانخفاض جنيهنا قصادو
خلونا من الدولار
نشوف ريال سعودي ولا درهم اماراتي ولا ين صيني
ونمرق من حجوة ام ضبيبينة دي

عندي قصة حكيتها هنا قبل كدة
احكيها تاني
اشتريت كرت ذاكرة ب 60 والدولار وقتها كان ب 20 ج
شاءت الاقدار الدولار يرتفع صح كضب ما عارف وقالوا عمل 22 ج
مشيت اشتري كرت الذاكرة قال لي ب 120 ليه
ليه الدولار ارتفع
طيب 60 ج ب 3 دولار

مع السعر الجديد 3 دولار ب 66 ج
امر يمكن تقبله
لكن عشان ارتفاع دولار تقفز الاسعار دون رقيب ولا حسيب
خلونا طوالي نخش فيهو

.


اول مرة أنا قريت العنوان: أفصلوا الجنيه السوداني!

.

الفكرة دي معمول بها في زمبابوي الأن

الدولار الأمريكي بجانب عملات أخرى هو العملة الرسمية في المكاتب الحكومية.

لكن عايزين تقييم نجاحها من فشلها عشان ما نجرب المجرب فتحيق بنا الندامة

ممكن يتم إعلان السودان مقاطعة أمريكية لو الأمريكان رضوا بينا أو ما رضوا بينا ويعتمد الدولار أب صلعة عملة (أمريكوطنية) للسودان.
ونبلع كل الشعارات بتاعت يا الأمريكان ليكم تسلحنا (الله يطراك بالخير يا ود أبو) وأمريكا دنا عذبها والحاجات دى.
ونستورد الهوت دوق مباشرة من أمريكا وبالدولار.

اهلنا الصوماليين إختاروا العملة الأمريكية من قبل عشرة سنوات وريحوا بالهم.

عندى مليون جنيه جيبتهم معاى من السودان ٢٠١٢ كان بيعادلوا حاولي ٢٥٠ دولار.
هديلك قاعدات فى الدرج ماعندهم قيمة اليوم. ياريتنى لوكان حولتهن لدولار.

خلي يفصلو يا سيف اليزل الماحي
افصلو
اصلا قاعد ساي
عبء علينا

ندرس شنو با فرانكلي يا اخوي
كان نحن بندرس ونخطط كان دة بقا حالنا
نحن بنعوس عواستنا ساي
نعدم زول عن عندو كم دولار لأنو تجارة الدولار جريمة
ثم يدور الزمن واكبر تجار الدولار يصير نجما في التلفزيون والريس يزورو في بيتو ويضحك معاهو
نأخر الساعة
ونرجعها زي اول
نلغي سنة من السلم التعليمي ونجوطو
ونرجع السنة تاني ونجوطو
و
و
ف شنو ما فرقت
لو ما نجحت نرجع الجنية تاني
مش جربنا الدينار !؟

ههه يا سيف اليزل عمر انت احسن
في ناس ورثوا بيوت لا تساوي شيئا وعجزوا عن تسجيلها بعد حساب الدولار

انا اقترح التجارة البكماء

انا اقترح التجارة البكماء

Quote: ندرس شنو با فرانكلي يا اخوي كان نحن بندرس ونخطط كان دة بقا حالنا نحن بنعوس عواستنا ساي نعدم زول عن عندو كم دولار لأنو تجارة الدولار جريمة ثم يدور الزمن واكبر تجار الدولار يصير نجما في التلفزيون والريس يزورو في بيتو ويضحك معاهو نأخر الساعة ونرجعها زي اول نلغي سنة من السلم التعليمي ونجوطو ونرجع السنة تاني ونجوطو و و ف شنو ما فرقت لو ما نجحت نرجع الجنية تاني مش جربنا الدينار !؟

يا زول بوستينك ده أقفلو واعرش على كده.

حرّم ما خليت حاجة

غايتو فكرة فرانكي مافي (أفلح) منها إلا أرجوزة جلال
القال فيها (انا اقترح التجارة البكماء)

ذكرتني نكتة سيد المصنع مع ولدو التخة.

اول شى الورم فرانك ما قدّم اى فكرة هنا
الفكرة جابا ود اب سن و زولك ده بس علّق عليها
تانى شى .. ارجع اقرا كوبس بعدين نشوف بتاع المصنع و صاحبك الفعج
سمح
____
شكلك اليومين ديل بقيت خبير مالى

بس ود ابسن ما اقترح (تجارة بكماء) لحل مشكلة تدهور (العملة)!
ما تشيل هم النكتة والفعج وتعقد الأمور، بشرح ليك لاحقا
كدي ورينا العلاقة شنو بين مقترحك وسعر العملة؟
لأنو فكرتك دي تناسب الضمنة والبلي
باعتبارها عروض تجارة.

أها المايك معاك.

كدى امشى افتح بى كلامك ده بوست و بجيك فيهو
ما تخرب للزول ده بوستيهو
سمح
___
الا بالمناسبة وين بوست الفلجة

مالو يا جلال
نجرب ورانا شنو
مش صدرنا النبق والدكاترة

تشكر ابوالريش
كتر خيرك

لعله لا تغيب عنك سخرية الاقتراح نفسه
اقلاها نوفر حبر وورق

صباح الخير -
وما رأيك بإلغاء جمهورية السودان مؤقتاً لمدة 300 عام وضمّها للتاج البريطاني من جديد في فترة انتداب انتقالية تمتد لـ 300 سنة ، ولا تنتهي إلا بعد اجتياز ثلثي المواطنين بنجاح لامتحان خاص تحت اشراف القصر الملكي في لندن

Quote: بى اخلاق و تربية القرية و اخو البنات الكعب لازم تقيفلو الف احمر و قس على ذلك انتا وانا عايمين فى بحر واحد كايسين الفضيلة التاهت بين صعلقة الزمن الكعب و الافترا بى اسم العلم ما داير اقول ليك .. انتا فاهمنى .. +++ كدى امشى افتح بى كلامك ده بوست و بجيك فيهو ما تخرب للزول ده بوستيهو

ههههههه
البوست مفتوح يا (جلال الفهم) و(جمال الرأي)، لكن م بتفهم منو شيء، نظراً لمحدودية أفقك البانت بينونة كبرى دي

ولسه ما قلت لينا شيء مفيد بخصوص اقتراحك الأبكم! ما عارف؟
يعني جيت داخل هنا عشان تتونس وتنكت؟

تعرف يا (جلال) مافي شيء خرب البلد وضيع عملتها غير رهان الناس على التجريب بأسلوبك دا
أنا (تربية القرية) وأنا (أخو البنات) وأنا شايف وأنا برى وحقو ديك وحقو داك
وهيع وهاع والمخ في التفكير أخير منو بطن الكراع

بعدين جنس كلامك الفوق دا حالياً بيسموهو (الصعلقة في الزمن الكعب)
دا منبر عام يا جلال الدين ما بيت صبحية ولا جلسة ظار، عشان الواحد يقرأ الإسفاف دا
انت ما بتستحق بوست، لأنو الرد على (مقترحك) دا لا يكلف غير تلاتة سطور!
نكتبهن ليك ومعاهن نكتة سيد المصنع مع ولده (التخه) الما أخو بنات وما تربية قرى

أهو افترينا عليك بالعلم وغلبك تلقى في رويصك سطرين تشرح بيهن كلامك انت دا ذاتك!
وواضح إنو (مآثرك) الذكرتها غير ذات فائدة في تزويدك بأي سلاح تذود به علمياً أو حتى عنها ذاتها
وكلمة فارغة واحدة ما قلناها ليك لأنو دا أسلوب العاجز والجاهل.

See! so easy.

نبقا زي دكتورة احلام يا هاني
لا ما اظن
كفاية العملة
مش العملة تعني سيادة البلد
وتتعامل معها الدولة بأحترام شديد وتمنعك تسئ ليها وتكتب فيها عشان تتذكر خضار البيت

في انتظار نكتتك حاتم
شوف حاتم البلد دي تدار كما يدار كنتين في قرية نائية
تخضع لمزاج وعقلية المسؤول ومصلحتو الذاتية بل الموغلة في الذاتية في اتخاذ قرارات تمس اناس كثر
قريت قبل ايام مسؤولة عاملة مجري للصرف الصحي من بيتها للمصرف الرئيسي وازكمت رائحته الانوف غير المرض وتوالد الحشرات
ولا قرارات بترحيل احياء كاملة لمصلحة شخص او بضعة اشخاص
ولا العطاءات الخارجية الما بترسي علي الافضل
ولا ولا
استلفو كل سوءات تاريخ القدماء وابدعوا فيها مما يفوق عقل شيلوك
لذا
كل الاحتمالات مفتوحة ان ننكص لعهود
نشتغل بي بطنا
ودي زاتا بقت حلم بعيد المنال

Quote: شوف حاتم البلد دي تدار كما يدار كنتين في قرية نائية تخضع لمزاج وعقلية المسؤول ومصلحتو الذاتية بل الموغلة في الذاتية في اتخاذ قرارات تمس اناس كثر

الإشكالية في صغارة النفس وقلة العقل يا أبوسن
شارع زي الأربعين مثلاً طوله كيلومترين فيهو دستة صيدليات!
دا مؤشر على شنو غير رداءة العلاج والصحة العامة وسوء البيئة؟
من زمان البيروقراطية والطفيلية الاستغلالية هي البتدير البلد وبعقلية متخلفة جداً
أمسكها من داك المنع التعليم على أولاد الناس وقال ليهم متر خشب هنا يساوي متر في الجنة
لحد ما تصل للبيروقراطية البتخلي النقالات والشاش وأجهزة قياس الضغط تتركن في الإمدادات والمستشفيات تبقى مراكز أوبئة بدل علاج
لأنو في تجار مستفيدين عايزين يهدروا العملة في استيراد المزيد مع توفر البدائل ومع وجودها بالفعل، لحد ما تتلف
نفس الشيء يحدث في الصناعات التحويلية والغذائية، البلد متروسة منتجات ونستورد الصلصة والزيوت والأثاث؟

أسلوب سياسة الناس بالتجهيل والإغراق في المشاكل والحاجات المتدنية يدل على وضاعة.

========

النكتة بتحكي عن واحد من التماسيح عندو ولد تخه والباقين بنات
أها، قام دلعو وبقى يأهل فيهو، وفات استورد مصنع بتاع تعليب لحوم عشانو
مصنع حديث وأوتوماتيك
يلا يوم الافتتاح جاب شوية مسؤولين ومعاهم (التخة) وعملوا جولة في المصنع وهو شغال
العجل يدخل المصنع بكرعينو وفي مرحلة ينضبح وبعدها ينسلخ وهكذا
المهم لحد في نهاية الخط يطلع شيء معلب وشي مفروم وشي سجوك
والتخة بعاااااااين!
أها، بعد الجولة انتهت وبقوا على الغدا قام الأبو نادى ولدو عشان يربطو مع المسؤولين لتأمين مستقبله
أها قعد يعدد في ميزات الولد وجاب كم في المدرسة وأدوهوا جائزة شنو وإنو شبه أبوهو في الذكاء الفطري
قام بعد داك الأبو قال للولد عندك شيء داير تقولو للضيوف، قال آآآآيا
الأبو: شنو؟
التخة: يا أبوي هسع مش في المصنع بندخل عجل بيجاي ويطلع سجوك بهناك؟
الأبو: يصفق، ياسلام على الفهم، أيوة يا أبني وإن شاء الله انت حتدير المصنع دا كله
التخة: أنا جاتني فكرة كويسة يا أبوي!
الأبو: شفتو! مش قلت ليكم شعلة من الذكاء زي أبوهو تمام! يلا فكرتك شنو؟
التخة: نقوم ندخل السجوك في نهاية الخط يقوم يطلع لينا عجل في بداية المصنع
ههههههه

فعلا حاتم .. ادارة وطن كامل بعقلية صاحب كنتين . يستغل الناس ويحارب اي كنتين جديد
ههه قلت لي داير يعكسها .. مع انو العجل الهدف منو لحمتو

الحمد لله انك ما قلت تغيره بالدينار او الدراهم
...لكن الافضل إلغاء الجنيه واستبداله بالدولار...
يعني يسموه الدولار عديل كده ..بدل كل مرة نسمع
الدولار طلع الدولار نزل..
ودمت بخير