Post: #2 Title: Re: الزول دا معقّد! Author: محمد البشرى الخضر Date: 09-02-2017, 02:56 AM Parent: #1
يقول المثل يمكنك نزع الرجل من تكساس لكن لا يمكنك نزع تكساس منه! اها اللخو دا في أوروبا - إن كان بالفعل هناك - شايل معاه "الرتينة بقّـت" أو أيّا كان المكان الجا منو زي ما هو لم يضف له العيش في أوروبا شيئ و لم يغيّر في مفاهيمه الحبّة خلّيك من اي شي, انت يا اللخو بتعميمك المخل و السخيف دا وقعت في ذنب القذف و خضت في الاعراض خوض من لا يخشى على عرضه! حالة او اتنين او جتى مائة لا يعني أخذ البريئ بجريرة غيره, و الطلاق حلال وحق للمراة و للرجل وأحيانا يكون في الصالح ويقي من وقوع جرائم أوكوارث أشد وقولك عن انحراف النساء وممارستهن لبيع الجسد في الغربة طيب ما في السودان توجد هذا الأمر ووسط ابائهن و ربما ازواجهن! المربّى من بيته لن تفسده الغربة مهما قست ظروفها
Post: #3 Title: Re: الزول دا معقّد! Author: معاوية الزبير Date: 09-02-2017, 03:56 AM Parent: #2
كل سنة انت وأهلك طيبين يا ود البشرى
قال السودانيين هنا تلاته أنفار (يقصد فئات): نعامة و جحا و قمرية لكن ما ورّانا هو من ياتو فئة
قال "الرسول قال لو علمتم ما أعلم لما استمتعتم على النساء في الفرشات.." دا كلام دا ؟!
Post: #4 Title: Re: الزول دا معقّد! Author: يحي قباني Date: 09-02-2017, 04:19 AM Parent: #3
60% من الاسر السودانية ؟
ياخي ده زول تافه بس ...
و في نظري ماسورة كيزانية حقيرة ...
و الله يا محمد ما يستحق تجيبو هنا و الناس تسمع الكلام التافه ده ....
يمين بالله ده يكون قدامي الا يمرقنوا كرعينو ....
الله يخيبو و يخيب زاتو ....
عليك الله كان ما شلت الباطل ده من قدامنا يا محمد ...
Post: #5 Title: Re: الزول دا معقّد! Author: عادل الباهي عبدالرازق Date: 09-02-2017, 04:39 AM Parent: #3
سلام يا ود البشرى عليك وعلي ضيوفك وكل عام وأنتم بالف خير وربنا يحقق أمانيكم
بالجد الزول دا حيرني عن اي دولة في اوربا بيتكلم ؟؟ مش في عينة كدة لازم يتكلم في الحاجة البيفهما والماعندو خلفية عنها بس ياهو الزول دا كتب ليهو كم آية من القراءن قدامو عشان يقولو الزول دا واعظ وقعد يهرف بما لا يعرف ، لقط ليهو كم معلومة وعمل فيها اسامة انور عكاشة ونجر الباقي نجر . طيب يا فريد عصرك أوربا دي لو ماعاجباك المقعدك فيها شنو دا لو إفترضنا أنك موجود فيها ما تلم بقجتك وترجع بلدك ,
غايتو عكلتة مني ساي لو في زول عارف الزول دا موجود في أي دولة أوربية يورينا والله بالفيديو دا لو ما رجعتو السودان أخليهو ماشي ويتلفت
سبحان الله أي إنسان خائن بيشوف الناس كلها خائنين زيو وسيئين وتلقاهو معقد ماعارف السبب شنو .
البوست دا برجع ليهو برواقة حتي نعرف اي دولة اوربية البتسلمك كتاب أسود دي .
Post: #6 Title: Re: الزول دا معقّد! Author: جمال ود القوز Date: 09-02-2017, 07:39 AM Parent: #5
مازاد على ان حكى مشكلته الشخصية .. فأسقط كل ما حدث له هو على الكل .. كرد فعل لحنقه وغضبه .. أي زول بيعمم تأكد عنده نفس مشكلة البيعممها .. ده رد فعل نفسي قل أن يخيب ..
Post: #7 Title: Re: الزول دا معقّد! Author: محمد البشرى الخضر Date: 09-02-2017, 12:01 PM Parent: #6
ألسلام عليكم شباب وكل سنة طيبين وعافية يعود عليكم كما تحبون إن شاء اللهانا اشك انه اللخو دا يكون في اوروبا اساسا,كلامه كله يقول تحويل ميتين تلتمية دولار, مش الاجد كان يقول يورو! عموما حتى لو كان في اوروبا فواضح انه هناك جسدا فقط فتفكيره و روحه لا زالت في نواحي (.....) * وما جاورها
____________________________
*جاني اتصال من احد الأحباب من اهل العوض زعلان كييف استهتر باللعوتة و ما جاورها,و أنا هنا اعتذر للخو و لجميع اهل اللعوتة واعمالها و ما ورودها كمضرب للمثل إلّا باعتبارها احد مناطق السودان الكبير لا اكثر, ولكم العتبى احبابنا اهل العوض في كل مكان :)
يا ود البشرى الزول دا مابيعرف اوربا كويس ومابيعرف السودانيين والسودانيات فى اوربا كويس .. حتى لو فرضنا مثلا انه شاهدا مثالا واحدا هذا لايعطيه الحق فى التعميم حق المرأة مكفول بالقانون فى اوربا .
سلام وكل عام والجميع بخير اعاده الله بالخير والبركة
ياساتر دا كلام شنو دا
الزول دا شكلو ضل الطريق اكيد كان قاصد الاغتراب ولا هو الهجرة الي السعودية ولا افغانستان المهم الخلفية علم الصومال علي ما اعتقد فممكن يكون عادي جدا من الشباب المجاهدين
دا لو صحيح خارج السودان لمن يرجع بختها لابوبكر اداب وصحبو مزمل المكفراتية في خطراتم لمن يعرفو حاجة ودوورد
السلام عليكم جاءني اتصال من اللخو اللى رسل لجرجير زعلان لاقحام اللعوتة وما جاورها في الموضوع استهتارا واستحقارا وسخرية من صاحب البوست وقال لي ما معناه أنو لما اتصل على سيد البوست ما عشان اللعوتة بالمعني الحرفي الواضح لكن بس عشان الزول دا خرب موضوع البوست بالإشارة إلى اللعوتة وما جاورها وهو ما يتناقض تماما مع فكرة البوست التي تدعو لعدم التقليل من شأن الآخر ورميه بالإفك . ........... المهم العملية نجحت خخخخخخخخخ
Post: #13 Title: Re: الزول دا معقّد! Author: محمد على طه الملك Date: 09-02-2017, 03:21 PM Parent: #12
كل سنة وانت طيب ود البشرى وزواره .. مش دا الزول زاتو في الفيديو دا ؟
الزول دا عايش في أوربا وعارف قوانين الأسرة والعمل .. فقط بفسرها من خلال مفاهيمو وثقافتو وتجربته الخاصة .. يعني زي البنتقد المجتمعات الاوربية ويعيب عليها عدم أخذها بتعاليمو وثقافتو .. وبما إنو عندو أكثر من فيديو فيما يشبة الحملة المنظمة .. ولما كان وراء كل فعل دافع .. في رأيي حملات الزول دا دافعها أحد ثلاث حالات .. 1/ ديني بحت ما عايز أقول منطلقاته داعشية .. 2 / هاجر لأوربا وفشل في تحقيق أي نجاح ويعيش حالة صدمة نفسية .. 3/ اوربا بعد اكتظت بالمهاجرين خاصة المسلمين .. ظهرت فيه مجموعات تعمل على تنفير الناس من الهجرة لأوربا . الزول دا إذا بقرا سودانيز بوصيهو يمسح الفيديوهات دي أو يرجع السودان إذا لسه قاعد في أوربا .. لإنو لو تمت ترجمتها ووقعت في يد أي منظمة سوف تقاضيه وربما سحبت جنسيته ورحل قسرا .. دا إذا ما وجهت له تهم .
الزول دا بيتكلم ويحرف بما لا يعلم .. انا عايش لى سنين وسنين فى اوربا بالنسبة للسودانيين والسودانيات مثلهم ومثل غيرهم من الشعوب الاخرى لهم مالهم وعليهم ما عليهم من الحقوق والواجبات تجاه اسرهم ومجتمعاتهم فى اوربا .
وبالنسبة للكتاب الاسود والله العظيم اول مرة اسمع عن شئ اسمه الكتاب الاسود فى اوربا !!! واصلا حرية الديانة مكفولة للجميع بالدساتير والقوانين .
وبالنسبة للعصمة : هذا الشخص يتحدث عن الاسر السودانية التى هاجرت الى اوربا لذلك ردى سيكون كالتالى : نحن فى السودان على مذهب امامنا مالك بن انس وفى صيغة وثيقة الزواج لا يشار الى من بيده العصمة وذلك لانه من المعلوم بالضرورة فى مثل هكذا امور .وفى الفترة الاخيرة بدا ان بعض الزوجات يطالبن بأن تكون العصمة فى ايديهن خوفاً من تقلبات الزمن .. والذى اريد ان اصل اليه هو : انّ العصمة اصلاً فى يد الرجل حين وصولهم الى اوربا وفى بعض الحالات النادرة فى يد المرأة .. وانا اعجب كثيرا ان يقول هذا الرجل بان المرأة تطالب بالعصمة فى اوربا الكلام دا كلام فارغ فارغ جدا ولا اساس له لان الانظمة الغربية ليست كالانظمة العربية يتعاملون بردود الفعل ابدا هنا قوانين لها مئات السنين هذه القوانين ملزمة للجميع من الحاكم وحتى الطفل الرضيع . لذلك المراة لا تستطيع ان تطالب بالعصمة لان اى دولة اوربية لا تستطيع ان تعطيها العصمة انما يمكنها ان تطلب الطلاق مثل ما تفعل فى السودان او اى بلد اخر اذا وصلت الامور والمشاكل الى طريق مسدود . وحكاية الكلاب والاطفال ..... الخ دا كلام زول سطحى لان الحقوق مبذولة للجميع بحــد القانون وليس لاحد حق اكثر من غيره والجميع سواسية امامه .. دا اى كلام وغير مؤسس .
الزول دا بيتكلم لصالح جهة ما : ربما دينية او حكومية
الزول ده ما نصيح .... ده تعميم مخل...وما فيه اي منطق وفعلا زي ما قلت ده زول معقد...
Post: #16 Title: Re: الزول دا معقّد! Author: Osman Musa Date: 09-02-2017, 05:32 PM Parent: #15
الود ده ما شاف في الدنيا شي . و تجاربو علي قلتها . تجارب منفسة . ولو قعد في أي مكان ح يكون ده حالو . دحين يا ود البشرة يا اخوي ما تحرق دمك ساكت .
Post: #17 Title: Re: الزول دا معقّد! Author: Fatima Alhaj Date: 09-03-2017, 00:37 AM Parent: #1
سلام ود البشرى والمتداخلين وعيدكم مبارك أن شاء الله أغرب جملة قالا " ضربني قال ما يُضربك ما راجلك " الجملة دي تختصر لنا التركيبة النفسية لهذا المخلوق, فاشنو.. ليس على المريض حرج..
Post: #18 Title: Re: الزول دا معقّد! Author: HAYDER GASIM Date: 09-03-2017, 03:50 AM Parent: #17
تجدوني أنيخ بعيري في صحبة الأخ محمد على طه الملك, فقد أضفى من موقع الإيجاز وحكى كل القصة. وخض ذلكم العقل الوصائي الراتب. يبقى بيت القصيد, أين من يتحدث عن الهجرة بشكل موضوعي؟ فهذا الرجل برغم كل تحاملاته المستغرقة في غيبوبته, لكنه إختار أن يبين وجهة نظره ومن أي زاوية أو منطلق يرى ... فأين الرأي الآخر؟ والقادر على التواصل في شكل (حلقات) متلفزة كما يفعل هذا الرجل؟
لاحظوا تتابعه في تحميل المسئولية للعلمانية, فالرجل ذو غرض بائن بينونة كبرى, كما لاحظوا أيضا إنعدام أي نفحة (شكر) لمن يستضيف موجوعا هاربا من وطنه ... فهذا جحود يعكس صدى نفس أمارة بالسوء
للمهاجرين ولا شك مشاكل في مجتمعاتهم الجديدة, لكن الواضح أن كرامتهم حفيظة في كل مسار ومراحل التأقلم هذه, وأن دول العبور أو الإقامة توفر الحقوق الإنسانية الضرورية, من مأوى ومأكل وملبس وصحة وتعليم ... فيما الدول والمجتمعات ذات الطابع الإسلامي (الطارد) كانت هي الأقرن بوصاياه وما إختار من آيات وأحاديث لإحقاق الحق ... حاجة غريبة
Post: #19 Title: Re: الزول دا معقّد! Author: HAYDER GASIM Date: 09-03-2017, 03:59 AM Parent: #18
ود البشرى ... تسلم يابا, وكل سنة وإنت طيب
معليش ياخ, فهذا التهجم أصابني بالتجهم, فغفلت غير عمد تحيتك
بالله اوروبا كعبة كده؟ انتو يا ناس بت عمسيب عايشات في اوروبا كيفن!! غايتو امريكا ما كده....
الزول ده قطع شك حصلت ليه نفس المشكلة البيحكي عنها وعاوز يعممها على جميع السودانيات... وده كلام عيب ..وكل مجتمع في الدنيا فيه الصالح والطالح... وقولوا ليه تعال شوف مساجد امريكا في شهر رمضان وغير شهر رمضان تجد النساء السودانيات وغير السودانيات يملان ساحات المساجد للتعبد وذكر الله ....يا معقد..فليس كل النساء فاسدات وليس كل الرجال فاسدين،، واذا اوروبا بهذا السوء من الفساد وان النساء السودانيات يتغيرن ويتنمرن على ازواجهن لان القانون بحميهن ،الوداك تعيش في اوروبا شنو يا متخلف... انت عاوز تشوه سمعة النساء السودانيات العايشات في اوروبا لغرض دنئ في نفسك،،، وفرقك شنو من ذلك المنافق الذي اتهم ام المؤمنين السيدة عائشة ،،وجاءت الحقيقة من السماء ...وانت ايضا منافق مثله.... ودمتم في اتم صحة وعافية
Post: #21 Title: Re: الزول دا معقّد! Author: علي دفع الله Date: 09-03-2017, 04:51 PM Parent: #20
المايك معاك يا ود البشرى اخخخخخخ او كما قال الجميل طلحة
انا كلامي ما موجه البشرى كلامي موجه للزول البتكلم في الفيديو وقول ليه المايك معاك وتعال رد لينا... والتحية لود البشرى الورانا بانه في ناس بتفكر بهذا التفكير الدنئ... وكل سنة وانتو طيبين،،
Quote: انا كلامي ما موجه البشرى كلامي موجه للزول البتكلم في الفيديو وقول ليه المايك معاك وتعال رد لينا... والتحية لود البشرى الورانا بانه في ناس بتفكر بهذا التفكير الدنئ... وكل سنة وانتو طيبين،،
بسمات الشيخ كل سنة وانتى ومن معك بألف صحة وعافيه على دفع الله ماقاصدك انتى ..
Post: #27 Title: Re: الزول دا معقّد! Author: محمد على طه الملك Date: 09-04-2017, 00:28 AM Parent: #26
يا سلام يا حيدر قاسم .. شدتني مداخلتك الموضوعية المضيئة .. وفتحت شهيتي لالقاء المزيد من الضوء على بعض النقاط التي تحدث عنها صاحب الفيديو .. لقد عملت مستشارا بمؤسسة الـ (COA ) .. وهي منظمة مركزية مسؤولة عن تنظيم ورعاية شؤون الهجرة واللجوء والدمج الاجتماعي بالتعاون مع وزارة العدل .. المشكلات الأسرية التي حكى عنها صاحب الفيديو وفسرها وفق مفاهيمه وحالته النفسية .. ليست قاصرة على الأسر المهاجرة السودانية كما يوحي المتحدث .. بل هي مشكلات موجوده حتى في الأسر الأوربية .. صحيح قانون الأسرة الأوربية يمنح المرأة حقوقها .. ويفرض لها الحماية القانونية حال تعرضها لاعتداء من زوجها .. وصحيح قد تصل اجراءات الحماية إلى حد أبعاد الزوج عن بيت الزوجية وابقاء الزوجة في بيتها .. غير أن هذا الإجراء يتم في إطار الحماية الاحترازية للزوجة .. حتى لا يتم الاعتداء عليها مرة أخرى .. ولا شأن لتلك الحماية فيما يتعلق برباط الزوجية .. إذ يمكن للزوج الاتصال بزوجته بوسائل التواصل المعلومة أسرية كانت أم غيرها .. ومن ثم يمكن للزوجة حال تصالحها مع زوجها إلغاء إجراءات الحماية المتخذه ضد زوجها .. فتعود مياه العلاقة إلي طبيعتها .. اما إذا استحال عودة العلاقة لطبيعتها فقد اعتادت التجمعات السودانية بوجه أخص .. لعب دور الوساطة والسعي لحل الإشكال فتنجح أحيانا مساعي الوساطة .. وأحيانا تفشل فتتم إجراءات الطلاق بالطرق الشرعية المعتادة .. وتحضرنا هنا طرفة .. صاحبتها سيدة سودانية اجتماعية وظريفة .. كلفت لتطيب خاطر زوجة مغاضبة لزوجها .. فقالت لها : يا بتي الرجال ديل جزم بس كمان ما بنقدر نمشي حفايا .. واستطاعت بحكمتها وطرافتها حل المشكلة .. أما قوله بأن المطلقة يتم الضغط عليها لإنشاء علاقة جديدة .. فهو حديث ظني فضلا عن أن المعنين بشؤون العلاقات الاجتماعية .. يتمتعون بطبع أوربي حساس وحذر ليس فيه مثل هذا الفضول السبهللي .. القوانين الأوربية لا تحكم العلاقة الزوجية ما لم تكن موثقة لدى السلطات البلدية .. والنفقة المقررة على الزوج لطليقته وأطفالها عالية جدا وفق قانون الأسرة الأوربية .. المشكلات الأسرية تكون أكثر تعقيدا إن كانت الزوحة أوربية والزوج سوداني على سبيل المثال .. ففي حال الانفصال إن لم يكن هنالك تفاهم بين الزوجين .. فالأبناء يصبحون أوربيون ولن يسمح للزوج بأخذهم إلى وطنه مالم توافق الزوجة .. وهنالك مشكلة ناقشناها هنا في سودانيز فبل سنوات .. كانت عن حالة زوج سوداني قام باختطاف إبنته وعاد بها إلى السودان .. ونجحت الأم في اقامة دعوى أمام المحاكم السودانية وتحصلت على حكم بعودة إبنتها .. غير أن الحكم لم ينفذ ولم تعود الطفلة لأمها إزاء تعنت والدها .. ولعله نجح في إقناع السلطات التنفيذية في السودان بأنه يريد تنشئة إبنته تنشئة إسلامية .. غير أن الزوج وقع في غفلة مريرة بعد ذلك عندما عاد بمفرده لأوربا .. فتم القبض عليه وحوكم بخمس سنوات سجن.. تتجدد تلقائيا لمدد أخرى ما لم يعيد الطفلة أو تبلغ سن 18.. إجراءات الحماية القانونية في أوربا ليست قاصرة على المرأة بل تشمل الأطفال أيضا .. فالتحرش بالقصر والقاصرات محمي بقانون عقابي قاسي .. كما أن التحرش بالمراة بصفة عامة يعاقب عليه بعقوبة رادعة وتكفي افادة المرأة لإثبات الجريمة .. هذه الأفعال كثيرا ما يقع في حبائلها القادمون الجدد دون دراية . فيما يتعلق فرص التعليم والعمل .. فهنالك مؤسسات وموظفون مهمتهم تقديم العون .. وتتولى كافة البلديات مصروفات تأهيل القادم ودمجه عن طريف توفير فرض دراسة اللغة .. وإن كان القادم يحمل مؤهل أكاديمي من أي درجة فإنهم يقومون بمعادلة شهادته .. ولكن في العادة يطلب من القادم بعد مضاهات شهادته العودة مرة أحرة لفصول الدراسة .. ربما لعام أو عامين يصبح بعدها مؤهل حسب المقاييس الأوربية للعمل .. أما الذين يأتون بلا مؤهلات فأنهم يخضعون لكورسات في المجال الذي يختاره أو لديه فيه سابق معرفة .. يمنح بعدها دبلوم يؤهله لسوق العمل .. على سبيل المثال لدينا هنا في هولندا .. لن يسمح لك بممارسة أي مهنة حتى لو كانت مهنة حلاقة أو نظافة ما لم تكن قد تحصلت على دبلوم .. يعني مهنة النظافة ذاتا البتكلم عليها باستخفاف .. ما بلم فيها بطريقة تعاقدية رسمية ما لم يملك دبلوم تأهيلي .. فرض العمل تتحاح حسب المؤهل والخبرات وهنالك قانون يمنع ممارسة أي نوع من العنصرية في التوظيف . فهل فعلا ناقش المتحدث هذه المشكلات دون تحامل مغرض او دافع دعوي؟
Post: #28 Title: Re: الزول دا معقّد! Author: محمد البشرى الخضر Date: 09-04-2017, 07:33 AM
تحياتي للجميع و التهاني بالعيد السعيد اعاده الله علينا بالخير و ليمن و البركات الشكر اجزله لمولانا الملك لتسليطه الضوء على فيديوهات اللخو دا الأخرى, قضيت جزء من اجازة العيد في مشاهدتها, وضح لي جليا انه احد عاهات السايبر السوداني لقاله وقت و موبايل بكاميرا و شبكة نت كويسة ونزل في الناس هري و تهريف بما لا يفهم او يعرف تخيّل في احد فيديوهاته يقول ان الاوروبيين العلمانيين يعلمون الفتاة في المدرسة من سنة رابعة كيف تمارس الجنس!! و يقول الاوربيين العلمانيين الحاقدين يعلموا الطفل كيف يتصل بالشرطة عشان يشيلوه منك يودوه المايقوما !! أي والله قال المايقوما عديل كدا حقيقة بعد تابعت فيديوهاته الخرى اتضح لي انه مش معقد فقط لكن كمان جنريتر إلى حد ما ولا يستحق الاهتمام او الرد عليه و البوست دا زاتو ما كان في داعي ليه
Post: #29 Title: Re: الزول دا معقّد! Author: عمر نملة Date: 09-05-2017, 06:45 PM Parent: #28
سلام لبوست دا زاتو ما كان في داعي ليه بالعكس..بوست مهم جدا...وانت ماممكن تضيف ليه شي لعدة اسباب اولها انت بعيد عن ارض واقع كلام الراجل دا وماممكن تحكم على اي كلمة فيه...ثانيا عنونت وختمت البوست باستخراج شهادات تعقيد وتخريف وكان الاحر بك ان تناقش او تتدرك الفوله لكيالها... استغربت لمداخلة قباني وهو الاقرب لارض الواقع ويمتلك خبرة طويله بحكم استقراره بالغرب...اما الراجح محمد طة المك فقد اوجز ولم يدخل ويوضح تفاصيل ما اسماه الراجل الكتاب الاسود..وكان من الاجمل ان يقارن بين قوانين الاحوال الشخصية في السودان وهولندا كنموذج... اما صاحب الفيديو فليس معقد ولا مخرف ولكن دي سعة ماعونة وما قادر يشوف اكتر من كدا..كل ما يملك ان واحد حفا وباع كل ما يملك واستقر في الغرب وتم اختيار شريكة حياة..ولكن تمردت عليه واستقوت بالقانون الاوربي المفرق ما بين المرء وزوجه كما يزعم.. برجع للبوست ومعاي ما اسماه الكتاب الاسود لتوضيح الصورة مع بعض الادلة من ارض الواقع
Post: #30 Title: Re: الزول دا معقّد! Author: محمد البشرى الخضر Date: 09-05-2017, 08:57 PM Parent: #29
اضيف شنو وبتاع شنو؟ يعني لازم اكون عايش في اوروبا عشان افرز الكلام الخارم بارم و انهم بعلمّوا البت تمارس الجنس من سنة رابعة وانو بعلموا الاطفال يتصلوا بالشرطةعشان ياخدوهم منك و يودّوهم "المايقوما" وأنّو غالبية النساء السودانيات الافصلهن عن ازواجهن شغالات دعارة للبنقال و الصوماليين!!! ويعني لازم تضوق - الله يكرم السامعين - الزبالة عشان تعرفها زبالة! اخشى ان يكون هناك من يشارك هذا العاهة افكاره من السودانيين الفي اوروبا! تبقى مصيبة جد
Post: #31 Title: Re: الزول دا معقّد! Author: عمر نملة Date: 09-05-2017, 09:46 PM Parent: #30
سلام اسلوبك دا ما ينفع لإعطاء كل صاحب حق حقة..وكون بداية بوستك باحكام مسبقة وعايز توجه البوست في اتجاة ادانة الراجل والبعد عن موضوع البوست.....ما تفهم كلامي انو استصغار ليك..وما تنفخ وتقوي موقفك بمسك بما قال من بنغال وصومال و...اذا عايز تستملك بوستك ويمشي على هواك بكل بساطة بنسحب ما ينفغ السب والتقيم السالب...وما فرقك منو كتير شايلاك الهاشمية.. ايوه لازم تكون في الغرب وتجيد لغة البلد العايش فيها وعارف قوانيها..وتجيد لغة قانونها..وعايشت مشاكلها..غير كدا ما ينفع..ويكون كلامك زي كلامة تلقيط واستناج وتوهم...الغريبة في بعض أجزاء كلامة صحيحة وان عابها الاسلوب رجاء خليني اساهم في البوست دا بادلة وبراهين ..مع جلب الكتاب الاسود كما ذكر اما ذكر بعضهم والتهديد بارجاعه السودان..كما لو كانوا يملكون ذمام الامور...كفاية اسلوب الحجر والوصايا من يريد مقارعة الحجة بالحجة فليفعل ومن تضرر فالقانون هو الفاصل
Post: #32 Title: Re: الزول دا معقّد! Author: محمد البشرى الخضر Date: 09-05-2017, 10:08 PM Parent: #31
البوست من أوله بل من عنوانه وضّحت رأيي في العاهة دا, وما وجّهت ليك دعوة عشان احنّسك تقعد, عايز تكتب رأي مخالف مرحب بيك ما عايز على كيفك, البوستات ليست مملوكة للكاتب كل صاحب رأي يتفضل يقوله أو يتفضل يتيّسر ومرّة تانية لا اعتقد اني محتاج ان اعيش في أوروبا او ادرس قوانينها لكي المس خطل الآراء و الأفكار المطروحة في فيدوهات الزول المعقّد دا
Post: #33 Title: Re: الزول دا معقّد! Author: عمر نملة Date: 09-05-2017, 10:29 PM Parent: #32
سلام تمام بتيسر
Post: #34 Title: Re: الزول دا معقّد! Author: عادل الباهي عبدالرازق Date: 09-05-2017, 11:04 PM Parent: #33
Quote: اما ذكر بعضهم والتهديد بارجاعه السودان..كما لو كانوا يملكون ذمام الامور
شوف يازول هووي أنا أسلوب المطاعنات دا ما بعرف ليهو عندك اي كلام تعال لي عديل أحترمك جدا ، أنا القلتا الكلام دا وعارف بفديوهاتو دي وبأي طريقة اخليهو يمشي ويتلفت ، الغرب دا لو ماعاجبو مايرجع في زول رسل ليهو كرت دعوة ؟؟ بعدين الكتاب الاسود البتتكلمو عنو دا عمري ما سمعت بيهو الا من زولك دا . لو بتعرفو او قريبك وجاي تدافع عن هطلو القالو قول ما تختشي ما تجيء بالواضح بدل الاسلوب الدخلت بيهو دا .
Post: #35 Title: Re: الزول دا معقّد! Author: محمد على طه الملك Date: 09-05-2017, 11:50 PM Parent: #34
سلامات يا عمر وكل سنة وأنت طيب .. يا جماعة روقو الحرورية ما لازمة .. بعدين يا عمر أخونا ود البشرى كتر خيرو نبهنا للفيديوهات دي .. ما في سبب لتقريع رأيه أو رأي ود الباهي أو أي رأي آخر .. الموضوع أصلا مطروح عشان الناس تدلو دلوها بالطريقة البتشوفها .. ياريت نتجاوز النفس الحار دا ليستمر نقاش ما ورد في الفيديو .. في الحقيقة الزول دا عندو فيديوهات كتيرة الرد عليها بالتفصيل داير وقت.. وإذا لاحظت أنا قلت في مقدمة المداخلة السابقة بأنو عارف قانون الأسرة والعمل.. بس مشكلتو التعمييم والتفسير الخاطئ استنادا على ثقافته وحالته .. طبعا المقارنة بين قانون الأحوال الشخصية في السودان .. أو أي دولة اسلامية مع قانون الأسرة الهولندي معدوم .. لإن المرجعيات التشريعية مغايرة تماما .. القانون في الدول الاسلامية مستمد من الشريعة الاسلامية .. بينما القوانيين الأوربية قوانيين مدنية .. مع ذلك القوانيين المدنية الأوربية لا تحكم علاقات الزوجية المؤسسة بين المسلمين .. فهذه الدول رغم إنها علمانية غير أنها تحترم عقائد الناس وما ترتبها من علاقات أسرية .. والحالة التي يتدخلون فيها هي حالة طلب الزوجة للحماية .. والتدخل لا يتجاوز تلك الحماية كما بينتها في المداخلة السابقة.. كذلك يتدخلون إذا اشتكى اطفالك بمعاملتهم معاملة سيئة أو ضربهم أو أهمل العناية بهم .. وهم في الغالب الأعم لا يتخذون قرار الابعاد النهائي للأطفال إلا إذا تكررت الشكاوى .. عندها يوكلون الأطفال لأسرة تتبناهم وتكون مسؤولة عن تربيتهم .. وبالمناسبة قانون الأسرة الهولندي في بعض الحالات .. يعطي الرجل حقوق تحرمه الشريعة منها .. مثال / إذا كانت طليقتك لديها أملاك ( عقار مثلا ) ولديك منها أطفال .. فإنك تمتلك النصف في عقار طليقتك .. عكس الشريعة التي تجعل من الطلاق منهي لاي حقوق لك في أملاك طليقتك .. ولا يحق لك وراثتها حتى لو بينكم أطفال.. ولكن يشترط لذلك أن تكون علاقتكم الزوجية مسجلة في السجل المدني ليسري عليها قانون البلد.. عارف الأسرة الأوربية إذا عندها بنت متزوجة من أجنبي بتلتف على القانون دا كيف؟ بتقوم الاسرة ببيع العقار وتوزع قيمته على ابنائها في شكل مبالغ نقدية توضع في حساباتهم كودائع .. الخدمات الايجابية التي تقدمها القوانين للأسرة كثيرة .. وعلى سبيل المثال لو وضعت زوجتك وأنت شغال .. يمكن للأسرة طلب مربية تتولى كل الخدمة حتى تتمكن زوجتك من القيام بواجباتها المنزلية .. تغسل وتكوي لك ولزوجتك وللطفل وتراقب رضعاته ونظافنه وتنظف البيت وتطبخ وتتسوق.. الطفل هنا ملك متوج عناية الدولة به وبحقوقه كاملة من يوم مولده حتى يبلع سن 18.. المشكلات الأسرية خاصة بين القادمين أحيانا ياعمر بتكون متعمدة وبالاتفاق بين الزوجين .. لشيء في نفس يعقوب ما في داعي للكشف عنها .. تصدق في تصرفات واشياء كثيرة كانت قد تجاوزتها سلطات الرقابة الرسمية .في الدول دي. المهاجرين اضطروهم للعودة إليها .. لما جينا البصات والترامات ما فيها كماسرة المحلات مافيها كمرات مراقبة.. بسبب تصرافتنا الغير مسؤولة اضطروا يعيدو الكماسرة لوسائل المواصلات .. سوداني جابو ليهو غرامة عالية بسبب مخالفة مرورية .. مع إنهم بينوا في ورقة المخالفة التاريخ والساعة والشارع نكر ومشى استانف القرار.. جابو ليهو صورة عربيتو والشارع وصورتو هو ماسك الدركسون .. ولدو الصغيرشاف الصورة قال ليهو بابا دا أنت هههه.. : ياريت أنت كمان تساهم في تفنيد معلومات الفيديو بدون نفس حار لتعم الفائدة .. انا شخصيا وصيت الزول دا يسحب الفيديوهات دي لإنو إذا ترجمت يتخلق ليهو مشكلة كبيرة.. لإنو تراتيبيتها وتعميمها دا ما شغل زول عايز يفرغ زعلو من حدث .
Post: #36 Title: Re: الزول دا معقّد! Author: جلالدونا Date: 09-06-2017, 00:06 AM Parent: #35
قصة حقيقية حول قانون حماية الطفل طفلة سودانية حديثة الولادة تبكى بألم شديد طوال الوقت اخر اليوم والدا ودها الحوادث بعدى الكشف عليها وجدوا ان هناك عدد من الكسور بيديها و ارجلها و اضلعها طوالى ناس المستشفى ضربوا لى ناس الحكومة و استلموها و باشروا و اتهموا اسرتها بضربها و تعذيبها المهم ربك رب الخير الدطاترة اكتشفوا سبب الكسور الطفلة عندها هشاشة فى العظام ___ امريكية زهجت من اولادا و راكبين معاها فى العربية وقفت العربية و نزلتم فى مظلة مواصلات و فرتقت ____ اخرى فى موقف الاستور قفلت العربية بالتأمين و اولادا جوه جات راجعة بعد نص ساعة لقت التلاتة فى خبر كان و الامثلة كتيرة يا ود البشرى فى مسألة الاعتداء على الطفل القانون مهم لسلوك هؤلاء الناس و ما خاص بالاجانب زى ما داير يصوّر الزول ده و سمّاهو كتاب اسود الاسر السودانية هنا من اكثر الاسر انضباطا و سلوكا و عرف السودانى عند سيد البلد برضو بى اخلاقو الحميدة
Post: #37 Title: Re: الزول دا معقّد! Author: عمر نملة Date: 09-06-2017, 08:14 AM Parent: #36
سلام يا مك وكل سنة وانت طيب
Post: #38 Title: Re: الزول دا معقّد! Author: عمر نملة Date: 09-08-2017, 03:35 PM Parent: #37
سلام ياملك بعدين يا عمر أخونا ود البشرى كتر خيرو نبهنا للفيديوهات دي .. ما في سبب لتقريع رأيه أو رأي ود الباهي وين الراي واحد بيسب وواحد بيهدد.. ود البشرى معزور لانه بعيد من موقع الحدث..اما الباهي في الموقع ويا خسارة بعد التعب عليه واقف في محطة ( هوي)
الزول ده يا محمد علي ويا عمر مشكلته الاساسية بيتهم النساء السودان بتهم فظيعة وبتعميم مخل وغير منطقي واظن بسبب مشكلة حصلت ليه مع زوجته يمكن... وبيدي المشاهد صورة قاتمة وسودة عن الحياة في اوروبا ..وانا ما عارفة اذا طريقة الحياة في اوروبا مختلفة عن امريكا...وانا ما عشت في اوروبا لكن اظن طريقة العيشة والاقامة واحدة....والاسر السودانية من اكثر الاسر الاجنبية تهذيبا واخلاقا والقصص الخيالية البيحكيها دي ما سمعنا بيها في امريكا... الله لا ودانا اوروبا دي(وجه ضاحك) ....ويتهمونا اتهامات باطلة ... ودمتم بالف خير وصحة وعافية
Post: #40 Title: Re: الزول دا معقّد! Author: محمد البشرى الخضر Date: 09-08-2017, 03:58 PM Parent: #39
ممل ملل شديد يا نملة
Post: #44 Title: Re: الزول دا معقّد! Author: عادل الباهي عبدالرازق Date: 09-08-2017, 05:01 PM Parent: #39
Quote: اما الباهي في الموقع ويا خسارة بعد التعب عليه واقف في محطة ( هوي)
يا نملة ايوة خطابتك بالعبارة دي لاني اكره ما أكره المطاعنة والناس البتطاعن كنت مفترض تقتبس كلامي وتجيبو وانا أناقشك فيهو. هسع مافات شيء الزول دا تطرق للنقاط دي * الزول دا قال اول ما زوجتك تجيء هنا بيعطوك كتاب أسود تعال أتحفنا بأي دولة أوربية بتوزع كتاب زي دا وماتجيء تقول لي الزول دا بيقارن بين قانون الاحوال في السودان وفي اوربا لانو الزول بيخاطب في ناس مستوي تعليمهم ما واحد وفي ناس وفهمهم ما واحد وبعيدين عن ارض الحدث . * وين العصمة في يد المراءة ووين زوجتك بقت زوجة الجميع ؟ * في اي دولة أوربية زوجتك ترفع سماعة التلفون للشرطة وتقول ليهم الرجل دا ماعاوزاها بيخلعوك؟ * زكر قال الرجل ممكن يضرب زوجتو ، هن النسوان ديل هاملات للدرجة دي ؟ اي أرعن يتزوج ليهو بت ناس كانت في بيت أهلها معززة مكرمة أي خلاف يمد يدو عليها هو مفتكرا جارية اشترها ليهو ابوهو ؟؟ * لو في مشاكل بين الزوجين في دولة البوليس يشيل الاطفال دي ماسمعت بيها . * في كلامو قال ياحاج بنتك دي لو مشت الخرطوم بالليل ما بتنوم مابلك قاعدة في اوربا وما ادراك ما اوربا . أقسم بالله اوربا آمن الخرطوم علي الاقل مافي صيع بيقعدو تحت العمود او في ضل عشان يتحرشو باي امراءة ماره . * وين السودانيات القال قالبات بأربعين وبخمسين للبنغالة والصوماليين ؟ انا قاعد 22 سنة في أوربا دي لفيتا بكراع كلاب ما حصل سمعت بيهن مجرد سمع .
زي ماقال مولانا محمد علي طه الملك الزول دا ملم ببعض القوانين وبيفسرها علي حسب مزاجو او بيحكي في قصة حصلت ليهو هو شخصيا فما يعمم علي كل الناس . والزول دا شكلو دخل اوربا جديد وغلبتو الغربة او ماقدر يندمج عشان يفهم المجتمع الجديد ففضل يقعد يورجغ العلمانية العلمانية ، لمن فكر يجيء اوربا دي في حد قال ليهو في نبي مدفون هنا ؟؟؟ أي مجتمع فيهو وفيهو مايقعد يعمم ويقول ليك ستين في المائة واربعين في المائة .
Post: #41 Title: Re: الزول دا معقّد! Author: أبوبكر عباس Date: 09-08-2017, 04:11 PM Parent: #38
Post: #42 Title: Re: الزول دا معقّد! Author: أبوبكر عباس Date: 09-08-2017, 04:23 PM Parent: #41
موضوع البوست بالنسبة لي هو سقوط قوامة الرجال المسلمين على زوجاتهم بالقانون في الغرب. صعب على الرجال المسلمين استيعاب هذه الفكرة والتعايش معها، القصة دي بتكون كبيرة في اوربا وكندا لانو الدولة ممكن تقدم دعم سخي، بخلي النسوان يدّن الرجال وش كرتون لو قعدوا يسووا حركات السودان. الاخ دا ما قادر يستوعب ما يمكن ان تصل اليه الامور لو جانا هنا بنوقع ليهو القصة
Post: #43 Title: Re: الزول دا معقّد! Author: احمد التجانى احمد Date: 09-08-2017, 04:38 PM Parent: #41
سلام الاحباب ابكر و عمر النملة وكل عام وانتم بخير , غبت فترة عن المنبر او عن السايبر عموما و منذ يومين عدت للمنبر ووجدت اقتباس لمداخلة تنسب لابكر , حقيقة قدر ما اعدتها ما قدرت انسبها لبابكر لعدم توافقها مع خطه فى الكتابه اذ جاءت هذه المداخلة مملؤة بالاسى و السخط من قلم اعتاد الكتابه باسلوب الفكاهة و المتعة للقارى وشى من الكوميديا الساخرة , حقيقة احزننى ذلك اشد الحزن وعكفت ابحث عن جزور الموضوع و ما زلت ووجدت انه الموضوع يتعلق باتهامات قذف بها معاوية عبيد كالعادة دون ادلة و دون ادنى منطق , التقى بمعاوية احيانا وكانت اخر مرة منذ شهر تقريبا ولم اعرف وقتها انه اطلق تلك الاتهامات ولكن كما جرت العادة كلما التقيت به ان اطلب منه عدم الفجور فى التخاصم مع ابكر و عدم ملاحقته بهذه الطريقة الصبيانية وكنت اظن انه لدى خاطر عنده الا اننى واهم على ما يبدو , تم قبل مدة ليست بالكثيرة وضع معاوية فى حوار ساخن بواسطة كامل افراد المجموعة و بحضور احد المتضررين من اسلوبه فى اتهام الناس من غير دليل و قد تم بالاجماع ادانة هذا المنحى و نبذ هذا السلوك لمعاوية فى وجهه و بعدها اختفى معاوية اختفاء تام ثم بدا رويدا رويدا الظهور مرة اخرى , لعله يعتمد على ذاكرة السودانيين قصيرة المدى و كذلك على روح التسامح ونسيان ما فات
فاتنى التحية لود البشرى و مباركة العيد له المعذرة يا حبيب و لمثلك تقرع الاجراس ( احتفاءا)
Post: #45 Title: Re: الزول دا معقّد! Author: عمر نملة Date: 09-08-2017, 05:09 PM Parent: #43
سلام احمد ود الجيران ...وانت بخير وسلامي لكل اهلكخ سب البشرى بس عنوان البوست يكفي..فتح اهم بوست بعد بوست جريمة ماليزيا ..وفي النهاية بعد تركيز على الراجل صاحب الفيديو. دون ان يمس موضوع الفيديو ..واذا لم يكفيك العنوان شوف اخر مداخلة لية قبل اتداخل في البوست..اما الباهي شوف اول مداخلة لية قال بيرحل الراجل ..معقول دا منبر نقاش ومناقشة حالة او حالات..قصدت من تداخلي في البوست ان اوضح انو بدل الاسلوب العنتري ممكن تفند كل الاتهامات التي ساقها الراجل..وما عجني البوست ينقفل وهم خسرانين القضية
Post: #46 Title: Re: الزول دا معقّد! Author: أبوبكر عباس Date: 09-08-2017, 05:59 PM Parent: #45
يا عادل، الكتاب الأسود لغة استعارية للقوانين الغربية
Post: #47 Title: Re: الزول دا معقّد! Author: أبوبكر عباس Date: 09-08-2017, 06:01 PM Parent: #46
يا أحمد، قاصد تنزل المداخلة دي هنا؟
Post: #48 Title: Re: الزول دا معقّد! Author: احمد التجانى احمد Date: 09-08-2017, 06:06 PM Parent: #47
يا ابكر ايوة قاصد انزلها هنا و السبب انى لقيتك كاتب اخر مداخلة فى البوست دة قلت اكتب ليك الكلام دة , المعنى انى قاصدك انت و ليس البوست دة تحديدا
Post: #49 Title: Re: الزول دا معقّد! Author: عمر نملة Date: 09-08-2017, 06:36 PM Parent: #43
سلام دا تهديد الباهي غايتو عكلتة مني ساي لو في زول عارف الزول دا موجود في أي دولة أوربية يورينا والله بالفيديو دا لو ما رجعتو السودان أخليهو ماشي ويتلفت
Post: #50 Title: Re: الزول دا معقّد! Author: عمر نملة Date: 09-08-2017, 06:49 PM Parent: #49
و دا سب البشرى لبوست من أوله بل من عنوانه وضّحت رأيي في العاهة دا, يا د. ابوبكر فعلا انا عايز اذكر القانون بالتفصيل وانو عقد الزواج بين اثنين عقد يتساوي فية الاثنين في كافة الحقوق والواجبات..وعايز احكي عن التجارب وحكم السودانيين امثال البشرى الواقفين في المحطة القبل ( هوي)..رجاء يا د. في البوست دا أنسى العلاقات الشخصية وركز في عظم البوست.وما تكون انطباعي وغير محايد
Post: #51 Title: Re: الزول دا معقّد! Author: أبوبكر عباس Date: 09-08-2017, 06:49 PM Parent: #49
دا ما تهديد شوف الوش دا نفس كلام الملك، داير يقول الفيديو دا بدين الزول دا قانونيا
Post: #52 Title: Re: الزول دا معقّد! Author: عمر نملة Date: 09-08-2017, 07:01 PM Parent: #51
بالعكس الملك قال شخصيا وصيت الزول دا يسحب الفيديوهات دي لإنو إذا ترجمت يتخلق ليهو مشكلة كبيرة.. لإنو تراتيبيتها وتعميمها دا ما شغل زول عايز يفرغ زعلو من حدث بيحاول يقول للزول يتخارج من الورطة القانونيه..لكن الباهي مشمر وقال ,( هوي) يا جنا..تقول عرس البلولة قلت ما تهديد عاد استمر معاك كيفن في النقاش يا بشرى لو سمحت ابعد من البوست دا واتعلم استمع لو مرة واحدة..خليك في بوستاتك التانية..واذا عايز خلو رجل قول
Post: #54 Title: Re: الزول دا معقّد! Author: عمر نملة Date: 09-08-2017, 07:04 PM Parent: #52
ما تقول لي كلام البشرى ما سب بتكون ظاهرة
Post: #55 Title: Re: الزول دا معقّد! Author: محمد البشرى الخضر Date: 09-08-2017, 07:07 PM Parent: #52
بالمناسبة يا نملة انت مش فقط ممل بل كمان سمج السماجة الواحدة دي البوست قدامك لو عندك راي - او عندك ثقة في نفسك - اتفضل قوله لكن عايز يفضوا ليك الصيوان و يطلّعوا الناس برة و الرقصة دي للعريس و العروس بس ومش عارف ايه اخشى ما اخشى انو بعد داكله تطلع متفق مع (العاهة) دا في آراؤه المعقدة ح تحرجنا مع صاحبنا غايتو
Post: #53 Title: Re: الزول دا معقّد! Author: عادل الباهي عبدالرازق Date: 09-08-2017, 07:03 PM Parent: #49
Quote: يا عادل، الكتاب الأسود لغة استعارية للقوانين الغربية
يا أبوبكر عباس ما تجيب ليك مراقة للزول دا ، أنا فهمت في البداية نفس كلامك دا ولكن لو استمعت لكلام الزول دا بيخاطب الناس في السودان وخصص كمان ياحاج قاصد ولي امر المراءة فهل الحاج الفي السودان البيسمع كلام الزول دا حيفكر في استعارة ولا توكيد لفظي ؟
Post: #56 Title: Re: الزول دا معقّد! Author: عادل الباهي عبدالرازق Date: 09-08-2017, 07:11 PM Parent: #53
Quote: .لكن الباهي مشمر وقال ,( هوي) يا جنا..تقول عرس البلولة
يا نملة للمرة الاخيرة خليك محترم أنا لمن وزعو الاخلاق كنت نائم فما جاني نصيب من التوزيع ياقسما عظما انت ذات في البوست دا اخليك تمشي وتتلفت لو قمتا علي قلة أدبي فااااشنو أحسن تتأدب بلاش قرف معاك .
* أنا بديت أشك انو صاحب التسجيل دا نملة دا زاتو والله صحي
Post: #58 Title: Re: الزول دا معقّد! Author: عمر نملة Date: 09-08-2017, 07:19 PM Parent: #56
يا د. شفت ناسك والماعون الفاضي..اول كنت قاصد سب وتهديد لصاحب الفيديو..ناس قلبوا علي سب وتهديد..شفت كيف.. يا باهي احمض ما عندك قولوا..ويا بشرى واصل انحدار..تمام دائما دا منطق الشخص المغلوب على امره. سوف استمر في البوست بس خلي عندكم صبر..السب والتهديد ملحوق...ممكن لو تكرمتوا احفظوا سبكم وتهديكم في الكمبيوتر ..
Post: #57 Title: Re: الزول دا معقّد! Author: أبوبكر عباس Date: 09-08-2017, 07:16 PM Parent: #53
ما سباهو يا عمر، دا أقرب للتشخيص حول الفيديو أنا أفتكر الزول دا فعلاً يحتاج مساعدة من هول الصدمة الواقع فيها لم يتصور إنّو الأمور قد تؤول لهذه الدرجة
دي ما مراقة يا عادل، الزول دا مسمي القوانين بالكتاب الأسود الرجل متدين جدا محتاج شويّة استنارة
Post: #60 Title: Re: الزول دا معقّد! Author: عمر نملة Date: 09-08-2017, 07:28 PM Parent: #57
خلاص انا اسف وغلطان.. بس ادوني فرصة اوضح الكتيب الصغير البيوزع لكل وافد جديد سواء كان في هولندا ..بلجيكا...المانيا...وباقي دول الغرب...وتنوير كل شخص سواء كان مذكر او مؤنث
Post: #61 Title: Re: الزول دا معقّد! Author: عمر نملة Date: 09-08-2017, 07:42 PM Parent: #60
يا بسمات والله ما بدافع عن باطل وما واقف في صف الراجل بالعكس كلامه يوجع..بس انا بقول الزول دا حد فهموا وبدل يسبوا ويتهددوا من المفترض يقارعوا الحجة بالحجه..السب والتهديد اسلوب العاجز ودا ما مكانو..وللاسف ناس كتيرة بتشوف زي شوفوا..بس كلامه مش من فراغ اكيد في حادثه على الاقل وما ننكرها..وبالنسبة ليكم ناس امريكا. في واحد بيقول في نفس الكلام دا بس بتمثيل فكاهي يا عليش المتعه لسه قدام بس ما عندي وقت..
Post: #62 Title: Re: الزول دا معقّد! Author: عادل الباهي عبدالرازق Date: 09-08-2017, 07:44 PM Parent: #60
Quote: يا د. شفت ناسك والماعون الفاضي..اول كنت قاصد سب وتهديد لصاحب الفيديو.. ناس قلبوا علي سب وتهديد..شفت كيف.. يا باهي احمض ما عندك قولوا
أنت يا نملة قاعد تفهم بالحتة القاعد تقعد بيها ؟ جيت تطاعن ردينا ليك بضاعتك بقيت تقل في أدبك وحتي لا ينحرف البوست عن مساره كتبت ليك فوق عبارة هسع مافات شيء وكتبت ليك كذا نقطة لو اصلا جاي لنقاش تعال ناقشني فيها لكن ما تتجاوزا وتتجاوز حدود الادب . ماعون شنو يا ابو ماعون أنت وانت لا في راسك ولا في كراسك وزائد عليها بسذاجة ولذاجة ورعونة كمان اتا الله ما ليك ولا شنو عاوز تتناقش حبابك الف عاوز تنقز انقز واردح بعيد مني .
Post: #63 Title: Re: الزول دا معقّد! Author: عمر نملة Date: 09-08-2017, 07:48 PM Parent: #62
شنو يا ود الباهى روّق المنقة ياخى عمر نملة ده قدّم اعتذار عديل كده و قال ادوهو فرصة يعلق على حكاية الكتاب الاسود دى مالك جايى ناطّى جوز فيهو انتا قايلنا غجر خخخخخخ بتاعت طلحة
Post: #64 Title: Re: الزول دا معقّد! Author: جمال ود القوز Date: 09-08-2017, 07:49 PM Parent: #60
انت يا عمر نملة غلطت بانك جيت البوست وطوالي قيّمت آراء الناس بل وسخرت منها بافتراض إنك موجود في أوربا وده خطأ كبير منك وأبدا ما ممكن يكون مبرر مقبول أو كافي لان يكون رأيك والزول ده هو صاح أوهو الحقيقة المطلقة بدليل انه الزول ده مختلفين الناس معاهو في أراءه وبعضهم مقيم في اوربا أو زاروها وعرفوا حياة الناس فيها او في الغرب عموما فالصورة قريبة الشبه وكمان ممكن جدا تلقى كثيرين مقيمين باوربا برضو رأيهم مخالف له ولك فكان الاجدى إنك تقول رأيك وتواصل في البوست عادي والناس المتابعين بيقدروا يقارنوا بين كلامك ووجهة نظرك والآخرين وبيقدروا يستخلصوا الصحيح لكن التعميم المنطلق منه الزول ده أصلا ما محتاج الزول يكون مقيم في أوربا عشان يعرفه إنه رأي حيكون فيه اختلاف والغالب الاعم حيكون رأيه أو رأيك مبني على تجارب فردية وقد لا ترقى لجعلها أساس لتعميم الرأي ده , عموما متابعين رأيك فليتك تسهب في توضح وجهة نظرك دون أن تسخر أو تتناول آراء الآخرين بالانتقاص منها لانك كده بتحجر على وجهة نظرهم دون أن تشعر هسه انا شايف الزول ده عنده كثير من الاسقاطات والتجارب الشخصية البيحاول يعممها على الكل دون أي مبرر منطقي مقبول - واصل ياخ متابعين وجهة نظرك المختلفة ولنا الحكم في النهاية
بتبالغ ياباهي يأخ الزول ده براهو او كما تابعت إنه مقيم في النمسا
Post: #66 Title: Re: الزول دا معقّد! Author: محمد البشرى الخضر Date: 09-08-2017, 08:06 PM Parent: #64
البوستات للنقاش و طرح الآراء المختلفة لا تحتاج للإستئذان لتطرح رؤية مخالفة وانت ما داخل فصل اوعشان تلقي محاضرة عشان تقعّد الطلاب بأدب و يسكتوهم ليك وإلاّ ما حتقول رايك ولا انت داخل تاخد حقنة عشان يفضّوا ليك الأوضة عندك راي و تمتلك الثقة لقوله البوست مفتوح وكل ما تحتاجه باسويرد شغّال و قبل ذلك قدرة على ترتيب الأفكار و طرحها و لغة مقبولة ومفهومة إلى حد ما توصّل بها افكارك و رأيك ما عندك حاجة أو قدرة ياهو بتقعد تلف وتدوّر وزحّوا لي فلان ونادوا لي علاّن و فضّوا لي الساحة وانا ماشي و يا اب شام ورا وقدّام
Post: #67 Title: Re: الزول دا معقّد! Author: عادل الباهي عبدالرازق Date: 09-08-2017, 08:09 PM Parent: #64
Quote: شنو يا ود الباهى روّق المنقة ياخى عمر نملة ده قدّم اعتذار عديل كده و قال ادوهو فرصة يعلق على حكاية الكتاب الاسود دى مالك جايى ناطّى جوز فيهو انتا قايلنا غجر خخخخخخ بتاعت طلحة
يا جلالدونا هسع الجاء ناطي في أخوهو منو ؟ الزول دا جاء ناطي فيني جوز لمن قرب يفقهني وقاعد يتريق . زول الفيديو طلع ستين في المائة من النسوان السودانيات المتواجدات في اوربا وفي بعض الدول اربعين في المائة ببيبيعن اجسادهن للصوماليين والبنغالة وهردبيس كتير لو بيحكي عن قصة واقعية حصلت ليهو ما يعمم التعميم مخل دائما . ويجيك نملة مكفكف القميص وبارز عضلاتو وفاكي الزراير كيف بس نقول ثلث الثلاثة كم ؟ لا زول الفيديو ولا نملة دا حينورني عن قوانين الاسرة وانا عشت نصف عمري ويزيد في اوربا . يقوم يلف
Post: #68 Title: Re: الزول دا معقّد! Author: عمر نملة Date: 09-08-2017, 08:28 PM Parent: #67
خلاص قوز قلت اسف ما كفاية ولا فيها سجن وغرامة يا باهي خلاص متاسف
Post: #69 Title: Re: الزول دا معقّد! Author: عادل الباهي عبدالرازق Date: 09-08-2017, 08:36 PM Parent: #67
Quote: بتبالغ ياباهي يأخ الزول ده براهو او كما تابعت إنه مقيم في النمسا
ممكن يكون عادي ياهو زاتو نملة دا شنو الدرانا مادام جاي منفوخ كدة
Quote: بس ادوني فرصة اوضح الكتيب الصغير البيوزع لكل وافد جديد سواء كان في هولندا ..بلجيكا... المانيا...وباقي دول الغرب...وتنوير كل شخص سواء كان مذكر او مؤنث
نورنا الله ينورك هات ماعندك
Post: #70 Title: Re: الزول دا معقّد! Author: جمال ود القوز Date: 09-08-2017, 08:46 PM Parent: #69
Quote: خلاص قوز قلت اسف ما كفاية ولا فيها سجن وغرامة
كفاية يا عمر نملة ..أكيد كفاية .. أنا اصلا كتبت المداخلة واتاخرت في ارسالها .. فسبقت اعتذارك .. فعذرا يأخ .. والآراء المخالفة لي ولوجهة نظري .. أنا شخصيا بديها اهتمام أكثر ولا تزعجني .. لكن محاولة امتلاك الحقيقة صراحة مزعح .. خصوصا ان امتزج بتسفيه الرأي الآخر .. عموما لا تثريب عليك .. فاعتذرك مقبول .. وشيء تُشكر عليه ..
Post: #71 Title: Re: الزول دا معقّد! Author: يحي قباني Date: 09-09-2017, 02:45 AM Parent: #70
Quote: ...ثانيا عنونت وختمت البوست باستخراج شهادات تعقيد وتخريف وكان الاحر بك ان تناقش او تتدرك الفوله لكيالها... استغربت لمداخلة قباني وهو الاقرب لارض الواقع ويمتلك خبرة طويله بحكم استقراره بالغرب...
شكلي جيت راجع بعد ما الناس قتلت الموضوع بحثاً ..
لكن قلت لازم ارد عليك يا عمر ...
ما فهمت لي استغربته في ردي ؟
انا ردي الواضح الفاضح للزول ده فعلا مبني على خبرتي و قربي لأرض الواقع ...
لي في كندا 23 سنة يا عمر ...
هل يوجد سودانيات مطلقات بعد حضورهم هنا ... نعم يوجد ... و يعدو على أصابع اليد الواحدة ...
هل يوجد من تحرض النساء على أفعال خارجة في المدينة التي بها الاف الأسر السودانية ... نعم ... و لكنها واحدة او اثنين ...
هل توجد مثل هذه الأمثلة في السودان ... نعم بالآلاف ..
هل النسبة تصل الى 40-60 بالمئة في الغرب كما ذكر ذلك المسكين ... لا و الف لا ... النسبة لا تصل الى كسر في المية ...
ذلك الشخص المعتوه رمى الاسر في الغرب بسمعة مشينة يسأل منها ...
تحياتي لك و لكل الاحبة هنا ...
Post: #72 Title: Re: الزول دا معقّد! Author: أبوبكر عباس Date: 09-09-2017, 06:15 AM Parent: #71
داير أقارن بين موقف الملك واللاهي: - الاتنين متفقين إنّو الزول تجاوز القانون وممكن يعرض نفسو للمساءلة - الملك يجنح لمساعدة الرجل بإخفاء الفيديو - الباهي لو صدق في كلامو وحولها لقضية يكون مواطن صالح بالمفهوم الغربي، لكنه لم يصل بعد هذه الدرجة من الصلاح في اثناء تفكيري حول هذه المسألة ملت للملك باعتبار الرجل يحتاج لمساعدة نفسية، لكن وجدت إنّو جهات اكثر مهنية في تحديد المساعدة سوف تتدخل لو عادل نفذ كلامو. كل زول في الغرب عندو دور
Post: #73 Title: Re: الزول دا معقّد! Author: أبوبكر عباس Date: 09-09-2017, 06:17 AM Parent: #72
