Post: #1
Title: ما بين الحج والضحية تكمن القضية
Author: عبدالحفيظ ابوسن
Date: 08-30-2017, 06:21 AM
05:21 AM August, 30 2017 سودانيز اون لاين
عبدالحفيظ ابوسن-no where
مكتبتى
رابط مختصر يحتفظ كل واحدا من جيلنا بذكريات مشبوبة وعطرة عن الضحية والحج
فالحج مناسبة تكاد تكون نادرة في الحي . ويحتفل بها الناس كمناسبة عظيمة
قبل سفر الحجيج تعلم كل الحلة ان فلان حاج . ويتحرك فلان في كل اطراف المدينة مسددا ديونه ومعفيا الناس
عفو الله والرسول
ويولم قبل سفره والمداحين يصدحون بالقصيد .
قالوا الحجيج قطع طالب نور البقع
قلبي زاد وجع
حماني القيد منع
فتري كبار السن تمتلئ لحيتهم بالدمع السخين
الاكل معروف .. فتة بي لحمة ضان ورز
عمر الحجاج زاتو متقارب فندر ان تجد شابا حاجا
كان الحج ركنا له مدلوله الديني العميق في نفوس الحج
فمن حج جر شخيت بين حياته السابقة والجاية
يقول ليك الزول
انا مسكت شباك الرسول بي يدي معقول اكضب
عنده ان الحج يستوجب سلوك ما بعده . فلا يحج إلا وهو يستشعر قيمة الحج وان الحج المبرور يغفر ما بعده
وحتي عودة الحجاج طقسا وكرنفالا عظيما
الجير في الحوائط
ادخلوها بسلام آمنين
حجا مبرورا وسعيا مشكورا
بلون مختلف علي باب المنزل
وعودة الحاج كعودة العريس
|
Post: #2
Title: Re: ما بين الحج والضحية تكمن القضية
Author: عبدالحفيظ ابوسن
Date: 08-30-2017, 06:31 AM
Parent: #1
خروف الضحية ندر ان تجد منزلا ليس به خروف
وبل ندر ان تجد جزارا لافي في الحلة .. كل زول بضبح خروفو براهو
يضبح الاب ويسلخ وقد يساعده واحد من الابناء في الذبح
جيب الكونش
وانفخ الجلد
يحفر ويدفن ما بداخل الكرشة
الملح والليمون في كباية معاهم العتي وينفخ في الفشفاش
تفتيش عود لتكسير اللحمة
قطيع اللحمة . واحد يمسك والتاني يقطع والمناقرات
امسك كويس ما بتعرف تقطع
الام والبنات متقسمين الخدمة
الام مع الكمونية
والبنات واحدة للمرارة
والتانية تولع في الفحم للشية
كل المنزل مشغول مع الخروف
وسعداء
|
Post: #3
Title: Re: ما بين الحج والضحية تكمن القضية
Author: عبدالحفيظ ابوسن
Date: 08-30-2017, 06:45 AM
Parent: #2
لامن تقول حاج فلان في اي مجلس يكون معلوما للناس كلها
رغم وجود فلانات كتار زي اسمو
كان الحج ركنا وشعيرة لها رهبة في نفوس الناس
لم تكن الاستطاعة المادية هي المحك فقط . بل الاستطاعة النفسية والايمانية هي المحك الاساسي
هسة الحجاج ما يدوك الدرب . حج وعمرة
مش حجة واحدة بل حجات كتارات
ومجموعات حج كمجموعات رحلات السفاري
والحج زاتو بقا درجات
الحج الحكومي
الحج الاقتصادي
الحج الفاخر
تحج قدر قروشك
وتلاشت كلمة حاج .. مافي حاج فلان
صار الحج ركنا عاديا
بعرف كم زول بحجو سنويا فجأة تلقاهو مافي يقولو حج
وفجأة تشوفو بعد العيد لافي جا امس المساء
لا اعفو عني ولا ارضو
|
Post: #4
Title: Re: ما بين الحج والضحية تكمن القضية
Author: عبدالحفيظ ابوسن
Date: 08-30-2017, 06:54 AM
Parent: #3
ساءت اوضاع الناس الاقتصادية
وعجزت عن توفير ابسط مقومات الحياة
وقلت خراف المضحيين في العيد
وتعثر الناس في توفير الخروف
والله الضحية ما واجبة علينا لكن نسوي شنو العيال
تحول الواجب الديني لعبء
آي صحي الضحية ما واجبة لا علي الغني ولا الفقير ووووو
لكن بالتواتر صارت واجب علي الناس
واجب العيد
واجب فرحة الاطفال
وتحول العيد لكابوس للآباء
يشيلو الهم
وتحول الخروف للاستحالة
وتكدرت الاسر
في داخل كل واحد منا ان يستعيد ويحافظ علي شهده في طفولته
|
Post: #5
Title: Re: ما بين الحج والضحية تكمن القضية
Author: عبدالحفيظ ابوسن
Date: 08-30-2017, 06:59 AM
Parent: #4
تكلفة الحج
44 مليون لي 200 مليون
تكلفة الضحية
1.5 مليون لي 2.5 مليون
رغم عدد من يحجون مقارنا مع عدد من يعجزون عن الاضحية
مقارنا بتكلفة الحج مع تكلفة الاضحية
تكمن ازمتنا
مبروك عمر البشير رئيس جمهورية السودان لقد حج هذا العام ما معروف الحجة الكم
وصلي الله علي سيدنا محمد وسلم منشئ الحج الذي حج حجة واحدة في حياته
|
Post: #6
Title: Re: ما بين الحج والضحية تكمن القضية
Author: عبدالله عثمان
Date: 08-30-2017, 08:18 AM
Parent: #5
أت آآآآآ ود أب سن عمدة
ما بترضى بي كلمة حاج أو كما قال جدك
===
المشكلة أنو كثير من الحجاج يلقط القروش زي دم الحجامة
والقروش دي ذااااااتها يشيلها بعض سفهاء الحجاز يمشوا بيها الفلبين
فتأمل
|
|