الخرطوم الان مطر مبالغة ... يارب تقيف .. صور

02:08 AM August, 28 2017

سودانيز اون لاين
احمد محمد بشير-كُل اجزاءهِ لنا وطنٌ إذ نُباهي بهِ و نفتَـتِنُ
مكتبتى
رابط مختصر

امطار غزيرة جدا مستمرة الان كمية كبيرة من المياه غمرت الارض... اذا استمرت هطول المطر بهذه الطريقة ما أظن في بيت يطلع سالم.... يارب تقيف عند هذا الحد.
الساعة الآن 5 وسبعة دقائق فجرا

الكهرباء قاطعة كالعادة ..... والضلام دامس وما قدرنا نمشي صلاة الصبح... اكتب اليكم من الشقيلآب
خلو الواطة تفتح شوية عشان نصور.
يا رب تقيف هذه الامطار

سلام
لا تدعو الله لإيقاف رحمته.. بل ادعوه لإيقاف الوزير والوالى الذين تقاعسوا عن واجبهم فى العمل على تصريف المياه..

اللهم أجعلها أمطار خير وبركة، ونعوذ بك من شرها واصرف مياها الزايدة دون اضرار
وأستر وأحمى أهلنا ومنازلهم بكل العاصمة المثلثة أمدرمان والخرطوم وبحرى وضواحيها

وقفت والحمد لله
اللهم آمين تسلم كتير يا نادر الفضلي
الطين والموية والحالة صعبة
حكومة السجم دي الله لا بارك فيها ولا هاميها اليغورو في ستين نهبو البلد واهو النتائج الشايفنها قدامنا دي.
ياخي الشوارع دي ملك عام لكل السودانيين
حتى المسؤولين يستغلوا هذه الشوارع في مشاويرهم .... لماذا لا يتم اصلاحها؟؟؟
عالم وهم الله لا جاب باقيهم.

السلام عليكم
بعد المطر تتكون البرك وتظهر الامراض
اصحاح البئية من أوجب واجبات الحكومة وهي عاجزة عن الايفاء بمستلزمات الادارة الرشيدة

ان شاء الله امطار خير وبركة
الزرع يرتوي والضرع يمتلئ
تحيتي للجميع

(((يا رب تقيف)))

أسوأ دعاء يمكن أن يتوجه به مخلوق ... لكنه مبرر، فالناس تخاف على حياتها وممتلكاتها.

(يا رب تقيف) ..... المطرة غلطانة في شنو؟
المطرة ده شغلها في الدنيا وخصص لها سبحانه وتعالى ميكائيل ليوزّع الخير على مخلوقاته من بشر وغيرهم.
البني آدم خلقه الله سبحانه وتعالى (ليعمّر الأرض) ... وجزء من هذا العمار هو البنية التحتية من طرق وكهرباء وتصريف مياه ..... فماذا فعل؟

لا تلوموا الأمطار ..... هو فشلنا نحن.

الغريبة في الخرطوم شرق ( الجريف غرب ) خفيفة شديد نقيط بس
لكن الجو عجيب

الأخ/ احمد محمد بشير

لك ولأهل السودان كل تحايا والله يلطف بكم

كما قال Abureesh

Quote: سلام لا تدعو الله لإيقاف رحمته.. بل ادعوه لإيقاف الوزير والوالى الذين تقاعسوا عن واجبهم فى العمل على تصريف المياه..

حسب المأثور نقول (حوالينا لا علينا ) لان الامطار خير وبركه علينا نسال ربنا يسوقها
لبلد اخر ينفع اهلها ويسقى زرعها وضرعها.

بحرى خايه من الامطار...فقط هواء شديد

حتى الان ولا صورة

الاخوة
محمد ابو العزائم
اخلاص
خليل
فتحي عباس
عاصم علي

شاكر لكم مروركم...... وتاني نقول يا رب تقيف
والحمد لله الوقف ... ياخي دي في خلال 45 دقيقة ملت الشوارع
والله لو كانت استمرت البيوت دي كانت بتقع فوق راسنا
ما تتخيلو كمية الموية قدر شنو كانت
ارواح الناس وممتلكاتهم اهم من المطرة دي
امطار خير وبركة دي ممكن تقولها في الاقاليم لكن في الخرطوم دي
لا بجي منها خير ولابركة في الخطرطوم المهملة من اولياء امرها....
وروني خير واحد بس بنتحصل عليهو من المكرة دي!
ياخي والله الله شافنا بس امس....
انتو عشان ما قاعدين هنا ما عندكم علم كافي بالمصائب الكان ممكن تحصل.
الصور في وممكن هسي اصور ليكم لكن والله ما بعرف ارفقها في المنبر كيف.
على جبر والخرطوم شرق وبحري وامدرمان كانت خفيفة الامطار
كانت كتيرة في جنوب الخرطوم
ابتداء من حي يثرب وابوآدم وانت ماشي على الجنوب.
الله ستر بس
ودمتم بخير.

اتصلت بعد كلامك ده قالو جو خرافي
دي براها رحمة هنا الحرارة ما تفدر من غير التكييف دقيقة
ربنا ان شاء الله بخفف عنكم وتتصرف الموية سريع

شوفو ناس اللجان ونقو فيهم ونقو في ناس المحلية ونقو لما بسوفو لكم طريقة
يحفروا خيران واا اي حاجة بعرفوها ناس الهندسة وناس حصاد الامطار
انا محل ساكنه كان مجري سيل مهندسيين السعودية ال نصهم مننا عملوا حاجة كده
تبع تصريف المياة الاول ما ظبطت معاهم قعدوا سنتين يعدلوا ويصلحوا شئ سيخ وشئ
اسمنت الي ان ظبطت

*وسائل اعلام تورد صدور تحذيرات باحنمالات تزايد فيضان النيل خلال هذا الاسبوع خاصه مناطق جنوب الخرطوم
*حسب تقارير الارصاد احتمال هطول امطار خلال 48 ساعه هى 40%.
.
الاخ احمد محمد بشير
انشاءالله الامور احسن عندكم الان
نحنا هنا مافى مطرلكن البرك الراكده وتراكم النفايات لعدم مرور سياراتهم مؤشر لمشاكل تانيه.
.
تحياتى