عمر دفع الله ، هذا الرسم غير مقبول..

07:23 AM August, 23 2017

سودانيز اون لاين
محمد المرتضى حامد-
مكتبتى
رابط مختصر

الأخ عمر طابت أوقاتك بكل خير ..
دون أي تنظير من جانبي عن الفن ورسالة الفن وعلم الجمال والكلام عن الإرتقاء بالذائقة والحس الإنساني ومدارس الإستيطيقيا
وما يردده البعض في مثل هذه الحالات عن ضرورة مراعاة مشاعر فئات كثيرة تطالع المنبر..إلخ
أقول لك أن الكاريكاتور الذي رسمته ورفعه بكري اليوم 23 أغسطس 2017 غير مقبول رسما وتعليقا..
مودتي..

السلام عليكم ألأخ عمر..

أتفهم غضبك وحنقك وسخطك مما أوصلت إليه الإنقاذ وما فعله الإنقاذيون بالسودان وأهله..

لكن أن تسخر قلمك وريشتك وتجد لنفسك العذر في إستعمال نفس الألفاظ البذيئة والقبيحة يسقط
الفاصل بين حديث الترابى المدان جدا وكتابات إسحق فضل الله الموغلة فى الإساءة والنبذ والشتم
و حديث موسى هلال وبين توظيف فن ما وكل الفنون ذات رسالات سامية في ظني البسيط!!

يبقى الكل بمارس في نفس السقوط ونفس الإنحطاط وبين الساسة وأصحاب الرسالات تضيع
حاجات كتيرة..

رسمك مسئ وتعليقك عليه جارج وخارج وصادم!!

الكلمات ليست غريبة وليست جديدة وإنما الجديد هو إستعمالها بهذا الشكل وفي هذا المكان!!!

وبكرى أبوبكر أتفهم أن يعجبك الكاراكتير ويبسطك ويقنعك لكن أن تقوم بفرضه بالطريقة
الغريبة دى ياخ دى حاجة غريبة جدا!!!

وكنت أظن أن المقام لا يحتمل مثل هذه المقالات.

تحياتى..


وسلامى لك العزيز مولانا محمد المرتضى حامد,,,

من وجهة نظري:
الفن عشان يوصل رسالتو بالوجه الاكمل، مامفروض يتقيد بأي سلطه خارجه عنه؛ عادات، تقاليد ، اعراف أو حتي بسلطة السماء ذاتو.
المتلقي هو الذي يحدد مقبولية الفن من عدمها!!!
علي سبيل المثال:
انا شخصيا نظرت للكاركاتير كالآتي :
حسبو بيتكلم بخشمو ساي وفي نفس الوقت القصر قاعد يستخدموا كأرجوز او زيو وزي أي كلب للحراسه..
يعني زول ما صانع قرار ولاحاجه..

تحياتي مولانا
وضيوفه
بعيدا عن هل يجب محاكمة الفن اخلاقيا ولأي مدي
لقيت عمر قديم خلاس . ذكرني نكتة المسجون الجات بت جمب السور
قال ليها وين يا تيتي
قالت ليهو
سجمي !! انت مسجون ليك كم سنة

سطوة الكاركتير المصادم تمكن في صدم المتلقي بسيرة الواقع..والرسمة تعبر عن واقع سمعنا كلنا بالاضان من احد اركان السلطة (وموسي هلال كمنتوج مسلح ركن من اركان السلطة)فخلونا نمارس الانصطدام ونعيش في واقع ازمة وطن. ونسعي للتغيير بكل السبل..اعتقد انه كاركتير مميز ومجرد اثارته للجدل ما بين راضي وغير راضي فهو مكسب كبير كونه يضع الرسمة في موضوع الاهتمام والنقاش وتسير بسيرتها الركبان..!!التحدي الكبير يكمن في مناهضة الواقع الذي انتج هكذا رسمة ورسومات اخري تعبر عن واقع السودان الفضل...عمر دفع الله فنان والفنان لو قعد يغتغت الواقع يفقد قيمته ...وتحياتي االجميع

سلام محمد المرتضى والجميع

كاريكاتير عمر دفع الله لفت النظر إلى عبارة موسى هلال التي تم طمسها في هذا التسجيل:




البذاءة في كلمة موسى هلال امتداد للبذاءة في كلمة البشير التي نشرها عنه الترابي. وقد جاءت الأخبار بأن الطيران السوداني بدأ بقصف مواقع موسى هلال. ما يحدث على الأرض هو انعكاس للفساد الذي يحدث من الحكومة ومن المليشيات التي تستخدمها الحكومة. الكاريكاتير ترجم كل هذا إلى لغة الرسم.

ياسر

الانحطاط انحطاط نظام بحاله ..
مارس شتى أنواع السفالة والاجرام ولغة الشوارع ..
ومافعله عمر دفع الله من رسم مسيء ..
يعتبر نجاح منقطع النظير للنظام ..
لانه استطاع فرض اسلوبه البذيء ونجح في تسويقه ..
بعدبن دي ما اول مرة ولا ظنها حتكون آخر مرة ..

مشكلة عمر دفع الله انه بيسقط شخصيته الانفعالية ..
على رسمه للكاركاتير لذا فهو يعبر عن نفسه وحسب ..
ولا أظنه يعبر عن قطاعات كثيرة وكبيرة ..
تعارض النظام وترفض فرض هكذا أسلوب قبيح ..
ولاتريد ان تستخدم نفس أدوت هذا النظام ..
لانه بديهيا سيسأل أحدنا ما الفرق ! ..
بين احمد وحاج أحمد ..
أظن فقط انها السلطة لا غير ..

نفس اللغه ونفس سقوط الكيزان للاسف ..
احمد وحاج احمد
ااعتقد لاعلاقة لفن الكاركاتير بهذا الرسم واللغة البذيئه
شطط وفجور للحد البعيد...

الكركتير ما ظاهر عندنا
واحد باللاى يتكرم ويشوتو لينا بالواتساب.. الواتساب بتاعي هو نفس الرقم فى البروفايل.

اغفروا لي حزني وخمري وغضبي وكلماتي القاسية, بعضكم سيقول بذيئة, لا بأس .. أروني موقفا أكثر بذاءة مما نحن فيه
مظفر النواب

أروني موقفا أكثر بذاءة مما نحن فيه
ــــــــــــــــــــــــــــــــــــــــــــــ
أن نعدم موقفا نرى فيه أن البذاءة لا تحارب بالبذاءة

وأنا أقول ليه أمورنا جايطة وملخبطة ربنا يصلح الحال أتمنى من الأخ / بكري و صاحب الكاريكاتير سحبه مراعاة لمشاعرنا

أروني موقفا أكثر بذاءة مما نحن فيه
ديل كسروا مقاديف الأدب والفن والمسرح
والجمال والعفاف. ديل دفعوا النساء لبيع
شرفهن لشراء دواء لطفل مريض
______________________

الواقع أسوأ بكثير من هذا يا مولانا ما تخليك
برئ أكتر من اللازم
وما يغرك شجب الكيزان وأشباههم
أشيد بذكاء الفنان عمر فلا خير في فن
لا يصادم أو يصدم
ما مكنه من صدمتهم بس يا حليلك يا مولانا ما
كنت متصورك برئ للدرجة دي.

Quote: وما يغرك شجب الكيزان وأشباههم

يعنى شجبنا للرسم ده صنفنا كيزان او اشاههم !!!
يغنى انا اوافق على رايك اى كان بذى او سوقى او ميتذل
او انا كوز او شبيه للكيزان؟؟

بذاءة الرسم جاءت من بذاءة الكلمات
وفي زاوية مشاترة اتساءل:
هل سيعتذر موسى هلال للمواطن السوداني عن هكذا سقوط
لو جيء به مستشاراً أو نائباً للرئيس (وما ذلك عن اللنغاز ببعيد)
وما بعيد بكرة نلقاه يعرض مع الرئيس ويدير معه شؤون البلاد والعباد
أها .. هسه الأحق بالاعتذار منو !!!!

غايتو السوتو الانقاذ في البلد (أفرش وتخين)

يا عمر
يا أخي كم مرة كلمناك
فن الكراكاتير فن راقي
وما ترسمه ليس كراكتير
وما تقول لي دي رسالة ودا مبدأ والحنك البيش دا
بصراحة كل شخابيطك
عبارة عن سفالة ووقاحة وعدم إحترام لجميع منتسبي هذا المنبر
وقلنا ليك مية مليون مرة لو عامل نفسك معارض لنظام الخرطوم المُعارضة ما كدا
كيف عاوزني أتضامن معاك وأنت سفيه للدرجة دي
عندنا أخوات عضوات في هذا المنبر
وما في داعي توريهن قلة أدبك

على الهامش :
والله ما لي أي علاقة بالحكومة ولا بالنظام وما جاء بأعلاه ليس دفاعاً عن النظام
بس حسرة على ما وصلت إليه حرية التعبير كما تدعون


وقالها صراحة الجنرال مجيدو ( عالم بطااااااالة )

Quote: لتحدي الكبير يكمن في مناهضة الواقع الذي انتج هكذا رسمة ورسومات اخري تعبر عن واقع السودان الفضل... عمر دفع الله فنان والفنان لو قعد يغتغت الواقع يفقد قيمته ...

تقصد يا كريم، أن نحارب هذا الواقع بنفس لغته؟!

الجزء المقتبس من مداخلتك دي يناقض الجزء الأول منها!!
أو هكذا شبه لي

Quote: وما يغرك شجب الكيزان وأشباههم

والله يا عبد الصمد صعبتها علينا شديد يأخ ..
ده إسمو حشف وسوء كيل ..
وكيل بالطرناطة راسو عديل ..
يعني يا نكون معاكم ونوافق على هذا الاسفاف ..
يا نكون كيزان وأشباههم ..
والله انتو يا الشيوعيين وأشباههم صعبين خلاس ..

ــــــــــــــــــــــــــــــــــــــــــــــــــــــــــــــــــــــــــ

الصراحة ما عجبتني منك يا عبد الصمد يأخ ..

"عمر دفع الله" في اعتقادي زول فاقد لموهبة فن الكاركتير وما عنده بيه اي علاقة لا من قريب ولا من بعيد ...
وفوق لي دا فهو انسان كسول جدا وما داير يتعب نفسه ابدا عشان يخرج ليه بفكرة كاركتير جيدة ...
بجي يلصق الموقف زي ما هو (بضبانته) بالاضافة الى البذاءة المتكررة في كاركتيراته (نظام الود شفت) ...
يوم جايب عمر البشير قاعدين يطهروا فيه ويوم جايب بن سودا رافعا اصبعها الاوسط للبشير !!!
غايتو حسب رأيي عمر انسان خيالو تعبان وامكانياته الفنية متواضعة للغاية ...
.
.
.
رسومات الكاركتير في رايي هي مخلص لمقال كامل بأقل عدد من الخطوط والرسومات ...
لكن "عمر دفع الله" و "ود ابو" تلقاهم قاعدين يجتهدوا في شرح رسوماتهم بكلمات وعبارات هي نفسها عبارة عن مقال قائم بذاته ...
.
.
.

Quote: ويوم جايب بن سودا رافعا اصبعها الاوسط للبشير !!!

يعني يا قسم ما عاجبك الأصبع الأوسط المرفوع في الكاركتير ده ..
جاري تستشهد بي اصبع اوسط قديم لي بن سودا ..
يا هن ده قدامك الأصبع الأوسط فما تمش بعيد يا أخوي ..

Quote: ما عاجبك الأصبع الأوسط المرفوع في الكاركتير ده ..

يا جيمي كارتر ...
تعرف انا كتبت كلام كتير بشرح فيه الكاركتير الفوق دا ...
لأن ابو الريش ذكر انه الكاركتير ظاهر معاه زيو وزي الفيديوهات ...
الشرح كان بسبب انه الواحد لو جاء البوست بعد كم شهر أو سنة ما حا يعرف الكاركتير مثار البوست ...
ولكن مسحته عشان المداخلة ما تطول اكتر من اللازم ...
.
.
.
تحياتي لك ...
كما فاتني ان احيي صاحب البوست الاخ محمد المرتضى حامد ...

لقيتك لاحاظ يا جمال لكن
برضو عمر طلع قديم خلاس

Quote: لكن مسحته عشان المداخلة ما تطول اكتر من اللازم ...

مرحبتين قسم ..
كويس انك مسحته يأخ ..

Quote: تقصد يا كريم، أن نحارب هذا الواقع بنفس لغته؟!

هلا
عمر دفع الله عكس واقع كميرور وكفنان ده دوره ودي ماحاجة جابها من السوق...!!
--------------------

مناهضة الواقع يتطلب معرفة الواقع وعكسه بكل الطرق الممكنة ولو الواقع كعب تجيبو كعب

انت خلطت عن حديثي عن عكس الواقع ودي مرحلة
ومناهضة الواقع ودي مرحلة تالية

وشكرا علي مرورك

أستاذ قسم الفضيل
والله كفيت ووفيت
وتحليلك لهذا ( العمر ) وذاك ( الأبو) تحليل منطقي وواقعي
عسى ولعل يصحو ويبطلوا العبث البسوا فيهو دا
نعم هذا منبر عام ،، ولكن هناك فرق وفرق شاسع بين الصراحة والوقاحة
.
تخريمة :
جيمي ود القوز ،،، ود حلتنا ،،، لك تحياتي

الظاهر السودانيين بعد شوية حينزلوا.. كلهم.. سوق الحمير. المستنير شايل الظلامى.
شخصيا ما عندى مانع انو الكاريكاتيريست يقول اى كلام او عبارات.. ولكن ان تعبر هذا شيئ.. وان تعبر عنه بطريقة فنية فهذا شيئ اخر تماما. فن الكريكاتير اساسا عمل تجريدى.. فيه مساحة لعقل القارئ او المشاهد.. لكن اخونا عمر يمسكك من اضانك ويقول ليك دا البشير ودا بيت ودى عربية ودا زول قاعد ياكل.. يعنى لو كتب الكلام ذا كمداخلة كان اريح ليه..
ممكن يكون مقبول لو اعتبرناه عمل زول عادى جاب قلم وبدا
يرسم اشكال فيها شتائم ونبذ للحكومة حسب ما يراه.. ولكن ان يصبغ العمل كعمل فنى فهذه غير مقبولة.. واليوم يوجد بوست اخر عن تدهور الدراما السودانية.. ومثل هذا العمل لو اصر صاحبه انه عمل فنى فسوف يلحق ذلك البوست.. ولو هو معروض على اساس انه رسم زول يشتم ويسيئ للحكومة فممكن ان يكون مقبولا.
تحياتى.

سلام محمد المرتضى والجميع

1-

Quote: كاريكاتير عمر دفع الله لفت النظر إلى عبارة موسى هلال التي تم طمسها في هذا التسجيل:

2-

وكلام الوقح اسحاق فضل الله هنا :

الكاريكاتير يعبر عن الواقع ..

Quote: لقيتك لاحاظ يا جمال لكن برضو عمر طلع قديم خلاس

حفيظ كيفنكـ ..
شينة حركة الاصبع المصرّ عليها عمر دفع الله دي ..
فضلا عن إنها قديمة زي ما قلت ..
عموما بما إنك استهجنت الكاركتير ده ..
يلا سريع أقيف معانا في صف الكيزان وأشباههم ..
لانه تبعا لموقفك ده فأنت كوز بائن الكوزنة أو شبيه كوز مجيّه ..

بالمناسبة أنا شخصيا أبديت إعجابي صراحة ..
وفي غير مرة ببعض اعمال عمر دفع الله ..
وأظن عمر متابع جيد وعارف ..
يبقى ملجة بيع المواقف الحاصلة دي نحن ما داخلنها تب ...
وما بنشتري فيها بي تعريفه ..

آمنا بانه الكيزان أقبح ..
طيب يأخ .. هل هذا عذر مقنع لممارسة القبح والاسفاف ؟! ..
الناس حقو تحترم عقولنا ..
أو حتى فليحسبونا بلا عقل ..
برضو العذر ده ما مبلوع ..

Quote: تخريمة : جيمي ود القوز ،،، ود حلتنا ،،، لك تحياتي

العزيز الغالي ..
سيف الدين محجوب .. ود حلتنا الأصيل ..
لك تحياتي وسلامي يا حبيب ..

يا جماعة عمر دفع الله ما جاب حاجة من عنده
ولا جاب حاجة جديدة...

كان على البشير لبسوه فنيلة ميسى
وكان على حديث الغرباوية قالو الترابي
وكان على كلمة ....... قالها موسي هلال..

عجبتنى رشا عوض كتبت فى حيطتها بوست نهايته
عالم تخاف ما تختشيش

سلام محمد آدم،
الكلبة عمرها ما كانت رمز للحراسة وهي ترمز للداعرة، حتى أن كلمة بيتش الانجليزية تكاد تكون فقدت معناها كأنثى للكل ب لصالح أنثى البشر الداعرة،
أو بلغة موسى هلال وعمر دفع الله ش...

(وما بعيد بكرة نلقاه يعرض مع الرئيس ويدير معه شؤون البلاد والعباد)



وهل غادر موسى من متردم يا أباعاقله؟
عُد إلى تاريخ الحكومة والمعارضة قريبه وبعيده ،
سترى أن موسى لم يستن سنة جديدة..
أليس في منبرنا هذا مثالا وعِبرة؟

(يعنى شجبنا للرسم ده صنفنا كيزان او اشاههم !!!
يغنى انا اوافق على رايك اى كان بذى او سوقى او ميتذل او انا كوز او شبيه للكيزان؟؟)

في زمن اللنغاز إختلطت الأشياء يا سليمان ، خُدع المواطن البسيط بأن أولئك
حراس الدين والفضيلة وعندما انكشف القناع عن تلك الفئة بقي في روع البسطاء حالة
وفهم يحتاج وقتا طويلا للزوال مضمونه أن الفضيلة لاعلاقة لها بالشعارات ، لكن المؤسف حقا أن بعض
الذين صنفوا أنفسهم من أهل الجبهة المناوئة أيضا يتبنون ذات الفهم بأن من يدعو للخلق
القويم هو من أهل خندق الدجاجلة وبالتالي يكون، بلاوعي منهم ، إنطلت عليهم الخديعة..

(البذاءة في كلمة موسى هلال امتداد للبذاءة في كلمة البشير التي نشرها عنه الترابي.
وقد جاءت الأخبار بأن الطيران السوداني بدأ بقصف مواقع موسى هلال. ما يحدث على الأرض
هو انعكاس للفساد الذي يحدث من الحكومة ومن المليشيات التي تستخدمها الحكومة. الكاريكاتير
ترجم كل هذا إلى لغة الرسم.)

أخي العزيز ياسر.. حتى لو افترضنا أن التسجيل الذي أتيت به لم تظهر معه الكلمة المعنية بوضوح ،
وهي ليست كذلك، فما الحكمة المرجوه من الإتيان بها في رسم.. ؟؟
يا ياسر لاأتفق معك أن الرسم استهدف بيان الفساد بين الحكومه والمليشيات أو توضيح ما قاله موسى هلال
فالرسم تمعنته جيدا فقد رسم حسبو بملابس نسائية وإكسسوارات ووضعيه خادشة لوسطى موسى (الإصبع)
وهذه مسائل لم ترد في التسجيل وليست من لوازمه ولاتعكس الحدث لكنها تعكس للرائي مشاعر الرسام
الشخصية تجاه المعنيين وكل ذلك لايقلل من قبح مضمون التسجيل.

عفـــــــــــــــــــــــــــــــــــوا أخى عمر

هـــــــــــــــــــــذا أمر لا يمكن أن يكــــــــــــــــــون مقبولا

لرســـــــــــــــــم فنان وفكــــــــــــــــــــــــــر مناضل ... فضــــــــــــــــــــــلا سحب الصـــــــــورة.

الواقع أسوأ بكثير من هذا يا مولانا ما تخليك
برئ أكتر من اللازم
وما يغرك شجب الكيزان وأشباههم
أشيد بذكاء الفنان عمر فلا خير في فن
لا يصادم أو يصدم
ما مكنه من صدمتهم بس يا حليلك يا مولانا ما
كنت متصورك برئ للدرجة دي.
ـــــــــــــــــــــــــــــــــــــــــــــــــــــــــــــــــــــــــــــــــــ

أنا ياعبد الصمد ماعارف الدرجة حقت مولانا القاصدا إنت...
لكن العارفو إنك في البراءة مقفل المجموع...
عارف ليه؟
لأنك مفتكر (أشباههم ) دي بسّكت ليها زول...

دحين آجنا إنت مودّر؟ وللا نضمك دا كيفنو؟

سلام
عمر دفع الله رسّام، لكن في الكاركتير ضعيف جداً
والكاركتيرست الجيد هو المابيحتاج يكتب كلام
وشرح وتعليق على الكاركتير
عشان بالتأكيد لو الموضوع موضوع كتابة وشرح
المقال بيكون احسن من الكتابة.

بالنسبة للكلمة الجابها وكتبها عمر دفع الله، فكل المشكلة
أن موسى هلال قالها بالدارجي، وعمر دفع الله كتبها بالدارجي.

وتُقرأ (دعارة) أو (عهر) ومشتقاتها.ومولانا مرتضى مُحِق في
اعتراضه (ذوقياً) على الكلمة بصرف النظر
عن قائلها (موسى هلال أو عمر دفع الله)، وهذا باب في اللياقة
والأدب نتفق عليه جميعاً. لذلك نلبس الملابس، ونقضي حاجتنا
وراء بابٍ مغلق.

المعيار هنا يحدده الذوق العام والاتفاق المبرم تواطؤاً بيننا
ولا علاقة للفن ولا لغير الفن به.

أنا شخصياً ضرستني
كتابتها، ولم يضرسني سماعها في التسجيل، وهذا جزء من
عقدنا الجماعي (ليس الاجتماعي) الغير مكتوب
على التعامل مع اللغة بحساسية.
فمؤكد أن حساسية كلمة (عاهر أو عاهرة) أقل بكثير
من نفس الكلمة الدارجية والتي تقول نفس
الكلام ونفس المعنى وهذا باب في اللغة عجيب ومثير
للانتباه والبحث

واقع حكم الكيزان أكثر بذاءة من أي كاريكاتير

من يرفض كاريكاتير عمر يمكنه أن يرسم كاريكاتير أو يكتب مقالة تعبر عن رأيه

لكن لا يطالب بإسكات ريشة عمر..

أعداد واسعة جدا من السودانيين تعجب بكاركاتيرات عمر

الباقر موسى

وعليك السلام يا دكتور ابوبكر.طبعا، لايفتي ومالك بالمدينه. اما، بالنسبة للحراسة أمرها يتوقف علي ال Conditioning و علي ال Relation التعطيه للكلب او للكلبه.

(بالنسبة للكلمة الجابها وكتبها عمر دفع الله، فكل المشكلة أن موسى هلال
قالها بالدارجي، وعمر دفع الله كتبها بالدارجي. وتُقرأ (دعارة) أو (عهر) ومشتقاتها.
ومولانا مرتضى مُحِق في اعتراضه (ذوقياً) على الكلمة بصرف النظر عن قائلها
(موسى هلال أو عمر دفع الله)، وهذا باب في اللياقة والأدب نتفق عليه جميعاً.
لذلك نلبس الملابس، ونقضي حاجتنا وراء بابٍ مغلق. المعيار هنا يحدده الذوق العام
والاتفاق المبرم تواطؤاً بيننا ولا علاقة للفن ولا لغير الفن به. أنا شخصياً ضرستني كتابتها،
ولم يضرسني سماعها في التسجيل، وهذا جزء من عقدنا الجماعي (ليس الاجتماعي)
الغير مكتوب على التعامل مع اللغة بحساسية. فمؤكد أن حساسية كلمة (عاهر أو عاهرة)
أقل بكثير من نفس الكلمة الدارجية والتي تقول نفس الكلام ونفس المعنى وهذا باب في اللغة
عجيب ومثير للانتباه والبحث)

قلت معظم ما عجزت أن أعبر عنه يا الصادق..
ثمة ألفاظ لا أستطيع حتى أن أرددها بيني وبين دعك عن نشرها على الملأ...
ربما أختلف معك انها (ضرستني) حتى في التسجيل كما (ضرسني) أن
يرسم أي رجل سوداني بملابس نسائية وماكياج مهما اختلفت معه سيسايا
بل حتى لو كان قاتلا أدين في محاكمة قانونية .
والتفسير الوحيد للرسم - حتى في حال نقل اللفظ عن آخر - أنها صادف حالة نفسي لذلك
الناقل - وهو عمر ، لم نتوقع أن ينقاد إليه ..
محبتي يا رجل..

ة

(من يرفض كاريكاتير عمر يمكنه أن يرسم
كاريكاتير أو يكتب مقالة تعبر عن رأيه لكن لا يطالب
بإسكات ريشة عمر..
أعداد واسعة جدا من السودانيين تعجب بكاركاتيرات عمر )

1- ليس بالضرورة أن نرسم كاريكاتورا ليتسنى لنا رفض الرسم المعني
وليس المطلوب منا أن نصبح مطربين أو نصمت عن نقد الغناء غير اللائق..
2- كتب الناس مقالات عدة في نقد كثير من المسائل السياسية ومنهم صاحب
البوست لكن هذا لايحول دون أن يعارض فاحش القول والرسم..
3- لم نطالب بإسكات ريشة الأخ عمر ، ولاينبغي لنا ذلك، فإن أحسن الرسم أثنينا
وإن حاد عن معايير رسالة الفن نصحناه وهو حر في أن يقبل أو يرفض رأينا..
4- يهمنا جدا أن يكون لعمر معجبين لكن لا أدري كيف توصلت إلى أن هناك
( أعداد واسعة جدا من السودانيين تعجب) بكاريكاتورات عمر؟ إن نظرة سريعه لآراء المتداخلين
هنا كفيلة بأن توضح رأيها في الرسم ، أما بقية الرسومات فهي ليست محل نقاش
هنا وليس لدي إحصائية ابني عليها رأي السودانيين في رسومات عمر.

(وبكرى أبوبكر أتفهم أن يعجبك الكاراكتير ويبسطك ويقنعك لكن أن تقوم بفرضه بالطريقة الغريبة دى ياخ دى حاجة غريبة جدا!!!)

عارف يا أيمن بكري إلا يكون عايز يوفر مرجعيه ready reference لقراء البوست
لغرض المضاهاة ولولاها لأزال الرسم بذات السرعه
التي أزال بها سابقيه من كاريكاتورات.
شايف أخوك بيصفي النيه قدر شنو؟
بس تاني ما بتتصفى آكتر من كدا..
بتتبخَّر..

(من وجهة نظري: الفن عشان يوصل رسالتو بالوجه الاكمل، مامفروض
يتقيد بأي سلطه خارجه عنه؛ عادات، تقاليد ، اعراف أو حتي بسلطة السماء ذاتو.)

دا كلام ما صحيح يا محمد، قول لبافاروتي يعمل شغلو الأوبرالي بقرية نائية
بالهمالايا أو أقم معرضا لسلفادر دالي في أضان الحمار أومسرحية لصموئيل بيكيت في أي قرية بغواتيمالا ،
لو حضر أيا من اتلك المناسبات شخصان قول أنا غطان، الفن لابد يتصل ويتقيد بمعطيات ما حوله.

(المتلقي هو الذي يحدد مقبولية الفن من عدمها!!!)

شكرا..أتفق معك..

يا جبل ما تهزك ريح

انا وقفت محايد جدا . وجدعت بياضي بس
هل يحاكم الادب اخلاقيا .. ولياتو حتة ؟
لكن عاينت لي الرسمة بشكل انصرافي جدا .. اي والله
الشخصية النمطية للعاهرة التي تجاوزها الواقع !!!

سلامي للجميع

رسم معيب جداً

عمر شكله شغال رزق اليوم باليوم

دون المساس بعمومية مبدأ جواز القراءة بالإضنين حيثما كان كيكي حاضراً
إلا أنني اود ان أشير إلي أن هنالك فرق بين حمولة الكلمة التي قالها موسى هلال و حمولة نفس الكلمة التي وظفها عمر دفع الله في كراكتيره.

Quote: دون المساس بعمومية مبدأ جواز القراءة بالإضنين حيثما كان كيكي

تعرف يا حافظ، بعد قريت مداخلة عبد الكريم دخلت مكتبته هنا،
ثم بعد رده عليّ زهدت في المحاججة، لا أدري لماذا؟؟
المهم زي ما بقول تبارك، نزل لينا الكاركتير في البوست لزوم الارشفة والقاريء المتأخر

واقع حكم الكيزان أكثر بذاءة من أي كاريكاتير

من يرفض كاريكاتير عمر يمكنه أن يرسم كاريكاتير أو يكتب مقالة تعبر عن رأيه

لكن لا يطالب بإسكات ريشة عمر..

أعداد واسعة جدا من السودانيين تعجب بكاركاتيرات عمر

الباقر موسى
ــــــــــــــــــــــــــــــــــــــــــــــــــــــــــ

ياالباقر

كلامك كان بستقيم تماما لوكان عمر دا شيخ طريقة صوفية في زمن الفونج،أما وإنه جعل من نفسه فنانا فليجهز قلاعه لمناجيق النقد...
بالنسبة للمقالة...البوست ومداخلات الضيوف ـــــ عدا مداخلة عبد الصمد العويرة ـــــ بتعتبر مقالات،وللا إنت قاصد مقالة زي حقت د.كمال الجزولي (ضمة كسرة فتحة شدة دائرة تمثل السكون )
أوافقك تماما في رفضك للمطالبين بالإسكات...
بالنسبة للأعداد الواسعة،نحن برضو بنمثل أعداد واسعة من السودانيين،إنت مفتكرنا قايمين (بروس ) وللاشنو؟
أعدادنا دي بتقول :أي كاريكاتير ينقد السلطة الحاكمة نحن تلقائيا معجبين بيهو بغض النظر عن مصدره،بغض النظر عن أي شئ فني أو غير فني،..
لكن في حاجة بسيطة مهمة جدا لينا:ختونا البذاءة والابتذال...
أقوليك حاجة :أعدادنا أكتر من أعدادكم.. أها شنو ليك؟

والله يا مولانا احيانا تقتلنا منازعة الروح لقبول ما ليس مقبولا او رفضه
اللحظة والمزاج حينها تحدد القبول او الرفض وليس المبدأ حيث اصبحت كثير من المبادئ تقبل التجزئة حسب الحاجة

سلام للجميع
هل عدنا لزمن جدلية الفن لايحاكم بالاخلاق




تنهدات: الكلام للعقاد (قالو الحياة قشور قلنا إنا الصميم قالو شقا قلنا نعم اين النعيم
إن الحياة حياة ففارقوا أواقيمو

Quote: دون المساس بعمومية مبدأ جواز القراءة بالإضنين حيثما كان كيكي حاضراً إلا أنني اود ان أشير إلي أن هنالك فرق بين حمولة الكلمة التي قالها موسى هلال و حمولة نفس الكلمة التي وظفها عمر دفع الله في كراكتيره.

هلا يا حافظ وتحياتي..!!
هل بالامكان مزيدا من التوضيح عشان يحلو الحديث والنقاش

مزيد من التوضيح شنو يا كيكي الله يهديك, ما صدّقنا ظهر لينا طرف آكشن في البورد المسيخ اليومين ديل!
لخ طوالّي و حت الأتو دي تسمية كاملة الأركان: قراية اذنين ما دايرالها توضيح

بصراحة يابشرى...أنا اول مرة يقابلني المصطلح دا..
أشرحوهوا لينا...عشان لو قالو لينا نعرف نرد..
شكلو كدا والله أعلم فيهو حاجة مريبييبة..

Quote: لخ طوالّي و حت الأتو دي تسمية كاملة الأركان: قراية اذنين ما دايرالها توضيح

ههههههههه
اللخ يا ود البشري لمن يجي بعد افادة واضحة وما فاضحة بكون لخ بادب
ولكن طالما التبس علي الامر في مداخلة الاخ حافط فقلت اتريث وما الخ استنادا علي مداخلة ما وقعت لي تخيل...!!
وح ادي الاخ المحترم الصالح يوضح ويسهب في مراميه ان اراد

وساعتها ممكن الخو والخ معاهو ابوبكر بتاع الزهدية داك
او اخليهم ياخ وشعاري اضان اضان والمافي شنو هههههههههههههه

عموما حبابك يا عمك واشواقنا

مشتاقين بالأكتر يا كيكي بقينا نشوفك في المواسم بس
مرات الواحد يرجع للأرشيف ايام الاستديوهات التحليلية و الايقاع السريع و الآكشن الما بديك نفس تقوم تصلي ولا تاكل داك هههه أيّام حيّاها الغمام
اسّي الآكشن بقى بالتحانيس هههههه

بتبالغ يا عليش, دا من اقدم مصطلحات البورد قصة القراية بالإذنين دي, وهسّي اتطوّر بقى القراية بآذان الآخرين كمان!
ويستخدم على أكثر من نحو اغلبها نوع من اللخ للموصوف و طريقة قراءته و استيعابه مع المكتوب
احد معانيه هو القراية الإنطباعية و التنميطية, ودي تشتغل بي اتجاهين الأول انك تكون منمّط أو عندك انطباع عن س من الناس لو قال السلام عليكم ساي تقراها على ضوء انطباعك او تنميطك و تصنيفك ليه و في مناضلين الكيبورد ابلغ مثال لتلك القراءة
و الإتجاه التاني انه يكون هناك رأي أو موقف ما من يخالفه أو يوافقه غض النظر عن خلفيته تقوم طوالي تصنفه وتنمطه حسب موقفه من الرأي المعني - اقرب مثال تعليق عبد الصمد وتصنيفه للناس حسب موافقتهم أو رفضهم للكاريكاتير

المهم .. ما يلينا من الموضوع دا انه هناك آكشن في الطريق

Quote: اسّي الآكشن بقى بالتحانيس هههههه

عشان كده شايفك عاوزني انط جوز في حافظ هههههههههههه
انا اساسا لو قررت انط جوز في البوست ده ح انط في ابوبكر القال مشي ارشيفي ده

عموما تحياتي للجميع
وسنتابع

المهم .. ما يلينا من الموضوع دا انه هناك آكشن في الطريق
ــــــــــــــــــــــــــــــــــــــــــــــــــــــــــــــــــــــــــ
ماظنيت والله...معليش البوست دا شكلو انتهى خلاص..
شوفلك واحدا غيرو...

إنت عارف،رغبتك المفرطة في الآكشنات دي،بتخليني أتفهم أبوسن لما يبدأ كل بوست بلازمة :بهدوء هههه

الشكر والتقدير للجميع على مشاركاتهم أيا كانت ، فجُلهم أقالوا عني مشقة الرد والتفصيل والشرح،

سأعود للرد على التعليقات وليسمح لي الأعزاء بالتخطي الإستثنائي للدور لأطمئن الأخ عبدالصمد
الذي أشفق علي من "براءتي" وأود أن أطمئنه ،
معقول ياخ أكون برئ حد أن أثير شفقة خلايق الله !! لا تخف علي من صروف الدنيا ،
أخوك ليس ملاكا ولكني لست شيطانا وخبرت الحياة جيدا وسوداننا هذا تخصصت فيه
و بتفاصيل الجغرافيا والأنثربولوجي بتاعو وعشت فيه بين قبائل وأماكن نسيها حتى
قوقل إيرث ، شرقا وغربا ووسطا وشمالا ومافي شي حارق جوفي إلا أنني لم أعش
في جنوبه الجميل قبل أن يذهب ، كل ذلك مع ميلاد ونشأة في أمدرمان وصعلكه حميده
في قارات الدنيا السبع (طبعا السابعه دي ما أطلانتس لكن خليها مستوره) ، تفريعا على
هذا أرجوك أن تنسى مسألة براءتي التي إن سمحت بها أيامي فلن تجزها مهنتي..
ونوم قفا ..

(اعتقد انه كاركتير مميز ومجرد اثارته للجدل ما بين راضي وغير راضي
فهو مكسب كبير كونه يضع الرسمة في موضوع الاهتمام والنقاش وتسير بسيرتها الركبان.)

كيكي سلامات..
سألت عنك في بوست زها حديد وربنا استجاب وأهو جيت..
ليس بالضروره أن تؤدي الأشياء الصادمة إلى تغيير إيجابي ولو تمعنت الرسم والتعليق لايمكن
أن يكون ناتجه النهائي ، في تقييم المشاهد ، سوى المزيد من الإحباط ، حتى ليظن القارئ والمشاهد
العادي مثلي أن المثقفين السودانيين لم يبق لديهم ما يخسروه..

-
ياهندسه ليه مسحت قباني؟

ود البشرى ما بريح.. ههه

Quote: ياهندسه ليه مسحت قباني؟ ود البشرى ما بريح.. ههه

هلا يا ود المرتضي وحبابكالحمد الله لحقتها قبل ما يلحفها ود البشري وكل اعتذاري والله...انا كنت قبل دخولي بوستك بقرا بوست كاتبو قباني واها مع كورتنا السودانيزية الفكت دي طوالي رشيتك بقباني دي هههههه وعموما شكرا لبوستك الخلانا نكتب شوية شوية بجاي ورغم الاختلاف في وجهات النظر وده دور المنبر الحقيقي (الراي والراي الاخر)ويبقي الود والتقدير

Quote: هلا يا حافظ وتحياتي..!! هل بالامكان مزيدا من التوضيح عشان يحلو الحديث والنقاش

تحياتي يا كيكي
القراءة بالإضنين مصطلح بوردابي يعني القراءة الغير موضوعية للبوست و الإكتفاء بقراءة آراء أسماء معينة و الإصطفاف معهم دون التفكير في منطقية و موضوعية مداخلاتهم.
و قد إختلف فيها فقهاء البورد بين كونها محرمة او مكروهة.
أنا جوزت، إستثناءً، القراءة بالإضنين في البوستات التي تتداخل فيها. بمعنى أنه يجوز الإصطاف إلى جانبك من غير تفكير كتير في أصل موضوع البوست و ذلك لثقتي في آرائك و ثقتي في قراءتك.

يا ود البشرى
أنا عارفك فهمت مداخلتي لكن رايح ليك آكشن بس

المستنير
كيكي دا معلم كبير و شعراً ما عندنا ليهو رقبة

كيكي
النبي فيك رش المستنير و أمرق لود البشرى نفيستو في الآكشن

صاح يا حافظ، دا فعلاً ما عندي ليهو رقبة.
أول مرّة ألقى في سودانيز دي زول خطير جداً!
اللفت انتباهي لمكتبتو غير المداخلة؛ العدد الضخم للمشاركات وفِي نفس الوقت ما بعرفو كويس!!
المهم، الأيام دي مستمتع بمكتبتو العامرة والنصيحة كدا هي أحسن من مكتبة ود البشرى المملة جداً.
انتقيت للآن عدّة بوستات على سبيل المثال بوست "الأمة والليبرالي" وبوست "السراويل والكمنجات"
و بوست السراويل دا لم يكتمل بسبب شغب محمد اي سليمان، لكن فيهو تشفير عالي!!
المهم تاني، كلما أتعمق، أجزم بصحّة حكمك
دا "شعراً ما عندي ليهو رقبة"
"ورحم الله امرئ عرف (غدر) نفسه"
ولو ما جيت هبشتو، تعرفو ان المستنير كبّ الزوغة

يا بكري، يا كيشة،
مشكلة تنزيل الصور لازم تحلها،
حتى الصور الهنا ومستضافة خارج المنبر لازم تلقى ليها حل وتنزلها بالمنبر.
مع الزمن لو فقدت الصور، بوستات كتيرة بتفقد قيمتها.

ما عارف ليش بقولو ليك يا هندسة!!

يا أبو بكر عباس
كيكي وبوستاته (والتشفير) العالي
أيام الحبشي وصاحبك محسن خالد، وكيكي التفكيكي وغيره
ليس فقط (شعراً ما عندك ليه رقبة)، بل أن تعيينك لنفسك
مستنيراً في هذا البورد إنما هو نتيجة حتمية لغياب ناس كيكي.

ففي تلك الأيام وحاتك بوستاتك دي الصفحة العاشرة ما تثبتها هههههههههه

يا خي كنا بنقرأ البوست وانبثاقه، ونفك التشفير دون الاستعانة (بماسنجر).

ثم أتى حين على المنبر فصار إلى ما صار عليه حتى أنه احتاج
لاستنارتك فتأمل هههههههههههههههههه

الحبشي عندي يا صادق، نبي وصاحب رسالة وأنا في حضوره أخاف أن يعفصني ببوته وهو لا يشعر،
منذ أن عرفت كتاباته وضعته مع الثريا وحيدا،
لكن الظاهر هناك من هم أخطر منو.
مستغرب كيف غاب عني متابعة عبد الكريم دا، ولم ألحظ خطورته كل هذه المدة من متابعتي لسودانيز،
وفعلاً الما بعرفك يجهلك
وحقيقي استنارتي تبدو كاللمبة ام خيط قصاد كشافات كريم
"تعيش كتير، تعرف كتير"
وشكرا لصدفة هذا البوست وشهاداتكم الغير مجروحة
متعنا الله بمستنيري سودانيز القدامى وكفانا شر الجدد

الارشيف يا صادق، بتاع سودانيز مبذول والقراية فوقو ممتعة،
صحي كلامك، كان عدد المشاركات ضخم ونوع بوستاتي الحالية كانت بتمشي أبعد من الصفحة العاشرة،
في نفس الوقت الناس المبارين السيرة في البوستات غالبية، ولو قريت البوستات بطريقة تتبع فكرة بمعيار الحبشي بتلقى الزبد أضعاف مضاعفة لزبدة الفكرة،
أها و إتّا بتقرأ بتسقط كل مرّة طيرة وتقفز من مداخلاتها،
البوست الكبير الباكون شايفو كان ضخم بتلقاهو اتعصر في مشاركين بسيطين

مولانا، يا أخي، آسفين عن الخروج عن النص

(بعيدا عن هل يجب محاكمة الفن اخلاقيا ولأي مدي لقيت عمر قديم خلاس .
ذكرني نكتة المسجون الجات بت جمب السور قال ليها وين يا تيتي قالت ليهو سجمي !! انت مسجون ليك كم سنة)

أبوسن سلامات يا عزيز..
ربما طال اغتراب عمر عن البلد ونجد له العذر في طرفة السجين، لكن مازلت أتساءل عن الرساله
التي يحملها الرسم؟ كلنا يدرك ماوصل إليها الخطاب السياسي و/أو ال political discourse هناك فما
الجديد الذي جاء به الرسم ليعالج تلك الحاله؟
وهل رسم حسبو على تلك الشاكلة يليق بالعمل المعارض غض النظر عن موقع حسبو في السلطه؟

يا مولانا مرتضى سامحنا على الانحراف من موضوع البوست
يا المستنير ابكر حيرتنى بكلام انك ما بتعرف كيكى ؟؟؟؟؟؟
واحد من اتنين يا تكون زهمرت و قربت تقابل طابت يا كمان لما اتداوست مع كيكى هنا دة كنت بتكتب بمصاحبة الهينيكين و اخواتها من الماء الثقيل

يا أحمد، دا ياهو زولنا بتاع حياك الغمام؟
فهمت انو دا بقطر

اييييييييي ياخ ياهو بتاع حياك الغمام
زى ما قال ليك ود البشرى ابدوا لينا اللخ طوالى السوق نايم

لو دا زولنا بتاع حياك الغمام، ابدا ما بنشبك معاهو
كل ما امشي النادي السوداني بلاقيهو وبسلم عليهو، لكن أبدا هو لم يتعرف علي
اقوم انشبك معاهو يقوم يركز معاي، وانا قوتي في لساني دا

مرحبا مولانا
قصدت معنا مختلف تماما
ان العاهرة ليست كالماضي
وكذلك الفساد السياسي والخيانة الوطنية
اختلط الامر تماما حتي صعب الفصل بينهما

(مشكلة عمر دفع الله انه بيسقط شخصيته الانفعالية .. على رسمه للكاركاتير لذا فهو يعبر عن نفسه وحسب ..)

ود القوز،

سلام يا بركه..

وأكد ذلك برسمه الأخير والذي ، في ظني ، وبكافة القراءات ، جاء كردة فعل على هذا البوست..

إحترامي لكما..

(أروني موقفا أكثر بذاءة مما نحن فيه

ــــــــــــــــــــــــــــــــــــــــــــــ

أن نعدم موقفا نرى فيه أن البذاءة لا تحارب بالبذاءة)

من أبلغ الردود التي قرأتها في السنوات الأخيرة ،

سلِم الرأي واليراع يا عليش..

(مشكلة تنزيل الصور لازم تحلها، حتى الصور الهنا ومستضافة
خارج المنبر لازم تلقى ليها حل وتنزلها بالمنبر. مع الزمن لو فقدت الصور،
بوستات كتيرة بتفقد قيمتها.)

الله يفتح عليك يا مستنير، مشكلتنا مع بكري معقده و (عميغه) ،
الأمور ماشه في صعوبة بائنة ، زمان كنا بننزل الأغاني والصور ونشيل
الود وندِّي الود ، هسه لازم ننزل تطبيقات أخرى وبعد أيام تلاقي أي شئ إتمسح .
يعني الأعضاء اللي من أمثالنا وماعندهم معرفة بالثقافه والسياسه عضويتهم
تبقى زي عضوية السودان في الأمم المتحده أو الكوميسا..

تتفرج بس.

(احيانا تقتلنا منازعة الروح لقبول ما ليس مقبولا او رفضه اللحظة والمزاج حينها
تحدد القبول او الرفض وليس المبدأ حيث اصبحت كثير من المبادئ تقبل التجزئة حسب الحاجة)

يا حمد أتفهم قولك وما تحس جيدا ، الألم عظيم ووطن بحاله ذهب ثلثه والباقي في الطريق
لكن ذلك لايسوغ الرسم بشكله ذاك وترديد عبارات موسى .
لست طوباويا ولكني أرى أننا نتبع الفنانين فهم يغسلون ما يلوثنا به الساسة وتابعيهم من الإنتهازيين
لذا ما كام لعمر أن يقبل تجزئة المبدأ ، مبدأ أن يبقى فنانا ، فيوظف المبدأ (حسب الحاجة) كما تقول..

.