قبطي في شندي يركز للسوط ركزة تمام ويحير الجعليين (صور) **

07:15 PM August, 10 2017

سودانيز اون لاين
عادل ابراهيم احمد-الدوحة -قطر
مكتبتى
رابط مختصر

الشاب فادي جورج .. من شباب شندي الاجتماعيين جدا ..

حفيد العم نبيل فاخوري اول من ادخل الميكرفونات الى شندي ..

وهم من اقباط شندي الذين يمثلون ركنا اصيلا في المكون الاجتماعي لمدينة شندي ..

الذين يشاركون اهل شندي في افراحهم واتراحهم واعيادهم .. من انبل الناس واكثرهم امانة في السوق ..

الشاب فادي جورج شارك صديقه من حي شندي فوق قرب سوق الشجرة مناسبة زواجه قبل ايام ..

لم يكتف بالمجاملة فقط كحال الكثيرين انما "اتمولص" تب وركز ركزة للسوط حيرت الجعليين انفسهم ..

الخبراء في مجال السوط قالوا الشاب دا من وقفتو دي وكربة هدومو زول ركاز تب ..

عوافي عليهو ..

الصور من جرتق اولاد العم حسن ابراهيم حسين .. شندي فوق ..مبارك لهم

اقباط شندي بالذات لهم مكانة خاصة ..

تراهم في الاعياد مع الناس والمناسبات والافراح والاتراح ..

امناء في التجارة .. ورجال في التعامل .. من افضل الناس خلقا ..

لهم التحية

Quote: حزقيال توفيق حزقيال : سر تجار مدينة شندي وصاحب المحطة الشهيرة ونسة عمار هاشمنشر في الصحافة يوم 15 - 04 - 2011 حزقيال توفيق حزقيال واحد من اشهر تجار شندي في مجال تجارة الاقمشة من مواليد مدينة شندي مربع واحد ، أب لأربع بنات وله ستة من أحفاده التقينا به في ونسة من دار جعل استقبلنا بترحابه المعهود ودردشنا معه وحدثنا عن حياته العملية وحب اهل شندي له ، ومحطة حزقيال أصبحت من اهم معالم شندي في شارع السوق الرئيس ،وكانت ونسة تحكي عن روعة حزقيال وطيبته. * مرحب بيك عمنا حزقيال في ونسة؟ أهلاً بي ونسة وبي ناس الصحافة * في البداية حدثنا عن بدأيتك للتجارة * بدأتها يوم 25/5/1969م نحن شغالين بنعمل ونجرد ومارشات نميري شغاله سوق شندي الأمس واليوم؟ * * سوق شندي يختلف إختلافا كبيرا عن الامس ،سوق شندي اليوم لو مشيت السوق مابتعرف زول ،زمان فيها أعلام بارزه إفتقدناها أمثال المرحوم خالد حسن حسين ،عبدالرحيم أبو دقن ،محمد إبراهيم النعيم وعلي كريم الدين وديل كلهم معالم شندي الكبار واسياد البلد وأسياد السوق وهسه ديل اختفوا من السوق. التجارة شطارة ؟ * زمان التجارة صدق وامانه ومعاملة وأحسن مقابله هسه اي زوووول بشتغل تاجر وفي تجار مابعرفوا يتعاملوا مع الناس ولا يعرفوا يودعوا الناس بس إسم تجارة ، والتجارة اصلا تعرف الناس وتقابلهم كويس والتجارة فن وذوق. * سوق شندي إقتصادياً كيف بعد الكبري؟ * شندي تطورت شديد من الفترة السابقة من 2000 حتي الاّن نهضت نهضة كبيرة ،وكمان كبري المك نمرة ح يدفعها خمسين اوستين سنة لي المستقبل ، والحمد لله * هل أضاف الكبري لحزقيال جديدا ؟ * وأجاب باسماً تجارة الأقمشة فيها كساد عام وليس في السودان وحده ولا حتي شندي بل العالم كله. * الملابس الجاهزة اتعبتكم ؟ * الملابس الجاهزه غزت السوق ونحن هسه بنشتهر بالفرده وجلابية الدمور والشال الرجالي والفرده النسائية ،وأما تجارة الأقمشة توقفت خالص ،،واصبحنا نعتمد على الملابس القومية التي تصنع في شندي وهي بقت عنوان لي شندي والذي يأتي الي شندي من كسلا والخرطوم والابيض وبربر ومن نيالا يقولوا ليك عايزين الحاجات القومية بتاعت شندي وناس شندي بودعوا ضيوفهم بالهدايا ، والزول البيجئ شندي لازم يشيل معاهوا هدايا زي الحجاج لما يمشوا مكه ويجيبوا معاهم سبح وطواقي. * تجارة الأقمشة عائدها المادي ضعيف؟ * نعم عائدها غير مجز وضعيف بس قالوا الولف قتال ،لكن مابخليها وفي اصناف شغاله وماإتأثرت زي مشمع الارض الملايات والستائر دي كلها حاجات ماوقفت وشغالين فيها ..وماعندي شغل غير تجارة الأقمشة والحمد لله تجار شندي القدامي الأقباط أين هم الاّن؟ * * في ناس رحلوا وهجروا شندي وخلوا البلد .. زي فادي أديب غير من شغل الاقمشة وعمل ليه صيدلية ، ومدحت من الاقمشة الي التصوير والكاسيت والفيديو،مجال الأقمشه خلي الناس تتجه الي تجارة اخري. كلمنا عن علاقة الأقباط بالمسلمين في شندي؟ * شندي بالذات تختلف عن كل مدن السودان مافي علاقة بس، في محبة وديل اهل في الفرح والكره ، والخير والشر والحالة واحدة وانا ما برضي يقولوا ليا في فرق بينكم الإ بس الفرق في الدين ،وبيناتنا الاحترام. * حزقيال يتمتع بحب ناس شندي حتي اصبح أسمه محطة كبيرة في شندي؟ * علاقتنا الوطيده مع ناس شندي ومحبة الناس لينا هي الخلت حزقيال محطه لايمكن تجاوزها علاقتك بالفن السوداني * * استمع لي الفنان الرائع محمد الأمين ولوعندي عشرين شريط ح تلقي 19 شريط لي ودالامين . * محمد الامين ولا محمد عبد الوهاب أم كلثوم ؟ * ضحك وقال وبرتاح للفن السوداني أكتر من العربي ماذا يعني لك مربع واحد فى شندى ؟ * * مربع واحد الطفولة الشباب الإنتماء والنشأة وهوكل شئ في حياتي كلمه أخيرة؟ * * شكراً علي الونسة الجميله في صحيفة الصحافة وأقول السودان ده في القلب وفي العين وعلى الرأس وأعتز جداً بأنني دفعة أصدقاء كتار جداً أمثال علي قسم السيد وهاشم السيد واعلام بارزة في الوطن أمثال سعادة الفريق الفاتح عبد المطلب والفريق عبدالحميد بروزة ودكتور أحمد لوكا وسعادة السفير عبدالحليم بابو وديل كلهم أخواني وأصحابي وتربطنا بيهم كل المناسبات وده سودانا الكبير.

الإبن الحبيب عادل ابراهيم أحمد ..

شكراً يا إبنى على كلماتكم الصادقة ..

اقباط شندي بالذات لهم مكانة خاصة .. تراهم في الاعياد مع الناس والمناسبات والافراح والاتراح .. امناء في التجارة .. ورجال في التعامل .. من افضل الناس خلقا .. لهم التحية

بالفعل يا عادل .. هؤلاء هم من أصل أهل السودان القديم ..
فهذا الإبن القبطى الحبيب ما هو إلا نتاج السودان القديم ..
سوداننا القديم الذى نشأنا وترعرعنا بين أحضانه ..

صدقنى يا عادل يا إبنى .. أيام ذاك الزمن الجميل
لم نشعر قط بالتفرقة بين المسيحى والمسلم .. وبين
المسلم والمسيحى .. إلا أن الآن وللأسف الشديد ..
قد تغير الحال .. و أصبحت النعرات التعصبية
واضحة وضوح الشمس ..

.. ولكن نصلى الى الله أن تعود تلك الأيام ..
ويعم السلام والوئآم فى القلوب ..

مرة أخرى الشكر لكم يا إبنى عادل ..
ونيابة عن عشيرتى من أقباط السودان ..
أتقدم بوافر الشكر والتقدير لما جئتم به ..
من كلمات جميلة صادقة وعادلة .. يا عادل ..

والرب يبارك فى حياتكم وفى حياة أسرتكم الغالية ..
عمكم العجوز ..
ارنست
+++

سلام يا عادل والجميع

مع أن عادة البطان عادة قبيحة وينبغي أن تزول إلا أنني أود أن أحيي هذا الشاب القبطي الفارس، وقد تلاحظون أن يضع وشما يرمز إلى ما يعرف في التراث المسيحي بالشهيد القديس مارجرجس على ظهره.

Quote: الإبن الحبيب عادل ابراهيم أحمد .. شكراً يا إبنى على كلماتكم الصادقة .. اقباط شندي بالذات لهم مكانة خاصة .. تراهم في الاعياد مع الناس والمناسبات والافراح والاتراح .. امناء في التجارة .. ورجال في التعامل .. من افضل الناس خلقا .. لهم التحية بالفعل يا عادل .. هؤلاء هم من أصل أهل السودان القديم .. فهذا الإبن القبطى الحبيب ما هو إلا نتاج السودان القديم .. سوداننا القديم الذى نشأنا وترعرعنا بين أحضانه .. صدقنى يا عادل يا إبنى .. أيام ذاك الزمن الجميل لم نشعر قط بالتفرقة بين المسيحى والمسلم .. وبين المسلم والمسيحى .. إلا أن الآن وللأسف الشديد .. قد تغير الحال .. و أصبحت النعرات التعصبية واضحة وضوح الشمس .. .. ولكن نصلى الى الله أن تعود تلك الأيام .. ويعم السلام والوئآم فى القلوب .. مرة أخرى الشكر لكم يا إبنى عادل .. ونيابة عن عشيرتى من أقباط السودان .. أتقدم بوافر الشكر والتقدير لما جئتم به .. من كلمات جميلة صادقة وعادلة .. يا عادل .. والرب يبارك فى حياتكم وفى حياة أسرتكم الغالية .. عمكم العجوز .. ارنست +++

تسلم عمنا ارنست

شكرا للمداخلة المانعة الباتعة الجميلة الوريفة ..

حقيقة مجتمع الاقباط في شندي جزء لا يتجزا من النسيج العام لمجتمع شندي ..عاشرناهم وداخلناهم فما وجدنا منهم ولا وجدوا منا الا كل الخير ..

عمنا حزقيال مثلا هو سر تجار شندي ..

و عمنا اديب فاخوري متخصص الساوند سيستم وهو من يرب اجهزة الميكرفونات في المساجدوساحات صلاة العيد ويتابعها اثناء الصلاة ..

وادوارد سمعان كان صاحب اكبر بوتيك في شندي..

سعد ميلاد سلامة كان صاحب سينما شندي..

لطفي هابيل اكبر مكتبة في شندي..

عمنا ادوارد عندو ولدو وبنتو دكتور وصيدلانية الان يساهمو في مجتمع شندي ..

وكثير من تجار الاقمشة وتجارة الفراد والمنسوجات ناس مرسوم وغيرهم ..

شباب الاقباط مشاركون في كل انشطة الشباب واخرها تجهيز الحقيبة الرمضانية للفقراء والمحتاجين ..

يا عمنا ارنست رغم اختلاف المعتقدات ولكن تظل اللحمة الوطنية والاجتماعية تجمعنا دوما ..

والاقباط دوما هم الاقرب للمسلمين ..

لك احترامي وتقديري

Quote: سلام يا عادل والجميع مع أن عادة البطان عادة قبيحة وينبغي أن تزول إلا أنني أود أن أحيي هذا الشاب القبطي الفارس، وقد تلاحظون أن يضع وشما يرمز إلى ما يعرف في التراث المسيحي بالشهيد القديس مارجرجس على ظهره.

والله يا اخي ياسر انا ضد هذه العادة السيئة ايضا ..


ولكن ضكارة ولدنا فادي دا عجبتني بلحيل ..

شكرا لملاحظتك الجميلة حول الشهيد مارجرجس ..

لك تحياتي

من انبل ما قابلت صديقنا ودفعتنا المهندس مجدي عياد الياس
من ابناء شندي ويقال انه امتحن اسلامية واحرز اكثر من ٩٠ في الشهادة.
كنا نقلع منو ريال كجزية. ياترى اين هو الان؟ لان القروب يبحث عنه

ما فهمت المغزى من البوست!

اي بني آدم من اي مكان في العالم ده ممكن يكون بركز للسوط او ما بركز!
الحكاية ما مخصصة لناس مدينة او منطقة محددة!!

الخبرليس ان يعض الكلب رجلا ولكن العكس.
الجلد في الحفلات بعيد جدا عن ثقافة الاقباط

Quote: من انبل ما قابلت صديقنا ودفعتنا المهندس مجدي عياد الياس من ابناء شندي ويقال انه امتحن اسلامية واحرز اكثر من ٩٠ في الشهادة. كنا نقلع منو ريال كجزية. ياترى اين هو الان؟ لان القروب يبحث عنه

جمعك الله بصديقك اخي محمد الشيخ

تحياتي

Quote: ما فهمت المغزى من البوست! اي بني آدم من اي مكان في العالم ده ممكن يكون بركز للسوط او ما بركز! الحكاية ما مخصصة لناس مدينة او منطقة محددة!!

حبابك اخي ايمن

مغزى البوست يكمن في هذا التعايش بين الاقباط والمسلمين في شندي

هذا واحد

اتنين :
الركزة من اخص خصوصيات الموروث الثقافي للمنطقة ..كونو انو الشاب القبطي الهمام يقتحم هذه الخصوصية الثقافية بجسارة لاول مرة في تاريخ المنطقة دا زاتو مدعاة للاندهاش ..

تلاتة :

الركزة زاتا خشم بيوت وما كل زول بقدر عليها .. اتفقنا او اختلفنا حولها .. لكن ركزة الشاب دا عجبتني بلحيل ..

وعموما زي ما قال اخونا ود الشيخ دا في حد زاتو خبر ..

تحياتي واحترامي