عن عبد الله بن عمر رضي الله عنهما عن النبي صلى الله عليه وسلم قال: (أَلَا كُلُّكُمْ رَاعٍ، وَكُلُّكُمْ مَسؤولٌ عَنْ رَعِيَّتِهِ، فَالْأَمِيرُ الَّذِي عَلَى النَّاسِ رَاعٍ، وَهُوَ مَسْؤولٌ عَنْ رَعِيَّتِهِ، وَالرَّجُلُ رَاعٍ عَلَى أَهْلِ بَيْتِهِ، وَهُوَ مَسْؤولٌ عَنْهُمْ، وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ، وَهِيَ مَسْؤولَةٌ عَنْهُمْ، وَالْعَبْدُ رَاعٍ عَلَى مَالِ سَيِّدِهِ وَهُوَ مَسْؤولٌ عَنْهُ، أَلَا فَكُلُّكُمْ رَاعٍ، وَكُلُّكُمْ مَسْؤولٌ عَنْ رَعِيَّتِهِ)
07-23-2017, 12:38 PM
وضاحة
وضاحة
تاريخ التسجيل: 01-16-2005
مجموع المشاركات: 9116
اكولهم لحم ورموهم عظم يا حيف يا حيف يدفعوا فى الضرائب المساكين طيلة غربتهم ياخى في بلاد الكفار لما تنزل معاش بحترموك وبقدروك وبرجعوا ليك الدفعتوا ما قالوا مسلمين وينوا الاسلام دا !!!!!؟ ود اب سن سافر بلاد الكفار احسن ليك واعمل جنسية وتقاعد هناك هههههههه
07-23-2017, 01:00 PM
Salah Zubeir
Salah Zubeir
تاريخ التسجيل: 08-17-2015
مجموع المشاركات: 5239
غايتو جهاز المغتربين دا الجمعيات الخيرية اخير منو ... جيش جرار من الموظفين شغلتم زي الشحادين المنتشرين في الاستوبات داخل العاصمة ... الجزيه (ضرائب + زكاة + خدمات) البتخدوها من المغتربين منذ العام 1981 الي اليوم قصاد سودانيتنا فقط زي الجزيه البياخدوها من المسيحين قصاد مسيحيتم ... ماهي فايده الدولة الانا بدفع ليها ضرائب طوال اكتر من 35 سنة ... ضرائب لو قارنتها بالضرائب الماخوذه من موظفيها وعامليها داخل الدولة لعرفت مدي الظلم الذي حاق بالمغترب ... منو في الدولة بياخدو منو ضرائب 30 دولار وهي 360 دولار في العام تعادل اكتر من 7.2 مليون لا اظن عمر البشير بيدفع هيك ضرائب. مع ملاحظة المغترب لا يستجدي (تقرأ يستعمل) الماء والكهرباءوالمواصلات ...الخ التي توفرها الدولة لدافع الضرائب. بعدين الزكاة دي عبادة بين المغترب وربه ومعظم المغتربين بيعتبرو الزكاة التي تستجديها الدولة لن تذهب لمستحقيها بعلم اساطين الفساد المنتشرين في كل دواوين الحكومة عشان كدا جل المغتربين بيدفعو زكاتم لمستحقيها بي معرفتم ويجو جهاز المغتربين لدفع الجزيه لأنو الجزيه مربوطه بي تاشيرة الخروج ... ومن جزية الخدمات تم بناء صالة الوصول ومنها تم اطلاق قناة السودان الفضائية وتم كذلك بناء الكثير من مباني السفارات في العديد من بلدان العالم ... ماذا فعلت وتفعل الدولة للمغتربين قصاد المبالغ الطائلة التي جنتها من جزية المغترب ... صفر كبير وقلة أدب وقلة حياء بمثل التصريحات عاليه.لي عودة ...
بصراحة افتقدت بهدوء .. جعل الله المانع خيرا _____ قرينا و سمعنا عن بند العطالة الذى استنه الشريف حسين الهندى و كانت مبادرة لدعم الخريجين العاطلين عن العمل فهى شكل من اشكال الرعاية الاجتماعية و لكنها قامت لمنع الترهل فى الكاجر الوظيفى كان عليه ان يقول بتسهيل اجراءات الاستثمار و الاعفاء الكامل من رسم الضريبة و الزكاة و مساعدتهم فى توزيع انتاجهم .. لكنها عقلية الانقاذ و اهلها .. طالعة نازلة تاكل بس ...
07-23-2017, 01:43 PM
Hatim Alhwary
Hatim Alhwary
تاريخ التسجيل: 01-23-2013
مجموع المشاركات: 2418
ونكران الجميل لن يكون فقط من "جهاز الدولة" ...فدا امر متوقع من دولة تعرف فقط تاخذ ولا تعطي...يعني الدولة قدمت شنو للمواطن بالسودان عشان تقدم حاجة للمواطن المغرب؟
ولكن المرار وقاصمة الظهر سيأتي من أقرب الناس لهم بالسودان ...والسؤال التاريخي منتظرهم عملتو شنو؟ في نكران وغيبوبة متاصلة لذاكرة تعيش رزق اليوم باليوم...
07-23-2017, 02:28 PM
محمد عمر ابراهيم
محمد عمر ابراهيم
تاريخ التسجيل: 05-28-2017
مجموع المشاركات: 78
Quote: الدولة ليست منظمة خيرية لتوظيف العائدين جهاز المغتربين
هههههههههههههه هل الجمعيات الخيرية بتقوم بتوظيف العائدين !!!؟؟؟ اليس من اوجب واجبات الدولة توفير فرص العمل وذلك بإقامة مشاريع التنمية لجميع المواطنين !!!؟؟؟ اى عقلية هذه التي تتكلم ؟؟؟
أمثال هذه العقليات المتخلفة هي السبب المباشر في الفشل الذريع الذى وصل اليه الحال في السودان .
07-23-2017, 07:09 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
وما آفةالأخبار إلاّ رواتها, كاتب مانشيت الصحيفة بدون مزعة من حياء حرّف حديث دكتور كرّار و انتزعه من سياقه و حرّفه هذه فيديو سجّله أحد الحضور أرجو من كل مّمن تم تضليله بمانشيت الصحيفة أن يسمعه بقلب سليم
هذا ما جاءنا في الواتساب ممن حضر الندوة و سمع الكلام بأذنيه
Quote: العزيز أبا المنذر تحياتي لك ولكل الأخوة الأعزاء بالشرقية والمملكة. كانت ندوة الأمس عن جاهزية جهاز السودانيين العاملين بالخارج لاستقبال الأخوة العائدين بعد تصحيح أوضاعهم. وقد شاركت بمداخلات كانت مفيدة للحضور لتوضيح ظروف الجالية السودانية بالمنطقة الشرقية وما يترتب علي الرسوم التي أقرتها المملكة اخيرا"وما يتبع ذلك من هجرة معاكسة للعوائل. والملابسات التي أدت ببعض الاخوة للمخالفه وماهو دور الجاليات في تسهيل إجراءات السفر. حاول الإعلام خلق معركة في غير معترك وذلك ببعض الأسئلة التي من بينها كيف يتم إستيعاب هذا النفر العائد في مواعين الدولة والقطاع العام. وماهي الأسباب التي أدت الي هجرة هؤلاء النفر. كان رد الأمين العام بان الهجرة ليست وقفا علي السودانيين فقط وهنالك الكثير من الدول التي أصبحت مصدرا للأيدي العاملة المدربة مثل الفلبين وأكد أن الدوله وسعت مواعين التعليم العالي الذي يضع الطلاب في ال Right track وليس بالضرورة أن تقوم الدولة بتشغيل كل الخريجين. وكما ذكر الأخ الأمين العام بعد حديثه هذا قال سيغير بعضكم عناوينه التي كتبها للمنشست مرفق اعلاه التسجيل لبعض أجزاء الندوة
07-23-2017, 08:03 PM
عبدالحفيظ ابوسن
عبدالحفيظ ابوسن
تاريخ التسجيل: 06-24-2013
مجموع المشاركات: 22319
عذرا للرد الراتب يا ودالبشرى الكلام عن فهمو للدولة زاتا ما تكية ما جمعية خيرية بعد داك ممكن يقول للخريجين .. للعايدين .. للمواطن الدولة ما جمعية خيرية بل مؤسسة ربحية لازم تربح وفي نفس الوقت بتناقض مخجل بتكون جمعية خيرية وتكية لاخرين . تفصل لهم الوظائف ذات المخصصات العالية .. جيش من الوظائف العليا يكفي آلاف الخريجين الرك علي فهمو من واجب الدولة توفير فرص العمل والتوظيف وبعض دول الكفر التي لاتؤمن بحديث كلكم راعي تدفع راتب للعاطل . لانو من واجبها حفظ انسانيتو
07-23-2017, 08:40 PM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
نفس العقلية الخربة البائسة المستفزة التي تدير الدولة وتتعامل مع ازماتها .. وتفرض مزيد من الازمات والمشكلات بدلا عن حلها .. مفروض يخجل الزول ده من المقارنة مع دولة زي أمريكا .. واظنه ذكر النقطة دي أكثر من مره أثناء حديثه (وليهو عين كمان يقارن).. امريكا الما جمعية خيرية بتدفع للعاطل حتى يتحصل على عمل .. أين دور نظامك المقابل لهذا الأمر حتى تجي وتقارن نفسك مع أمريكا .. وتتخذها كمضرب مثل لآلية سوق العمل وضرورة عدم الارتباط بالمؤهل .. طبعا دولتكم دولة الجبايات والاتاوات ليست جمعية خيرية ولا تكية ... دولتك ياهذا يتم ادارتها بعقلية صاحب الكنتين .. الزي عقليتك دي .. فهي لاتراعي إنسانية المواطن ولا آدميته ولا تتحمل أي عبء عنه .. كما لاتتركه وشأنه بل تثقل كاهله وتنغص عليه .. بمخصصاتكم ورواتبكم وامتيازاتكم المليارية .. سنين جيش عرمرم يعيش سلفكة وأوانطة على قفا المغترب .. الآن هذا رد الجميل لمن حلبتوه سنين طوال .. بافي ليكم صعب تردوا له ولو نذر يسير مما قدمه لكم .. أي توقع خلاف هذا الموقف منكم هو ضرب من الجنون والخطل .. حتظلوا كده في اقطاعيتكم وامتطاءكم لظهور مواطني السودان .. حتى تجيكم داهية تريحنا منكم ومن عقليتكم الاقطاعية الطفيلية البائسة .. لقد سئمنا منكم ومن لعبكم واستهبالكم .. الا تستحون !! .. أخلاقيا مفروض يكون موقفكم مغاير تمام لما تفعلوه الان .. من تنصل عن دور منوط بكم وملزمين بالقيام به.. في استيعاب آلاف العائدين من المهاجر وتوفير فرص العمل لهم .. بعد جف ويبس الضرع الذي ظللتم ترضعوه سنين بلا كلل .. الآن ماذا انتم فاعلون ؟ .. اكيد لن تفعلوا شيئا وستتركوا المغترب العائد وحيدا أمام غول السوق .. الذي صنعتوه بجشعكم ووزعتوه زي المرارة فوق روسيكم .. وسيقاسي ويعاني العائدين من صعوبة الحياة وقساوتها .. وطاحونتها التي لا ترحم وأكيد ستمتليء الاشارات بهم شحادين ومجانين .. وهذا برضو لن يهمكم ولن يحرك فيكم ساكنا .. بلا يخمكم وقرف يقرفكم ..
07-23-2017, 09:23 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
أنا يا ود أب سن بعد سماعي للغنا في خشم سيده لا اكتفائي بقراة المجتزأ من سياقه و المدلّس الذي كتبته الصحيفة وصلني انه يتحدّث عن ان الدولة وفّرت التعليم الجامعي و اشاد بالتعليم الكمّي الذي ينتج خريج حتى لو كان مستوى ما تلقاه من تعليم ضعيف لكنه وضع قدمه على الطريق السليم و اشار لتجربة امريكا التي ممكن يعمل فيها الطبيب نجار او سائق تاكسي و ما فهمته من حديثه ان العمل سوق وعرض وطلب و تنافس الدولة واجبها توفير التعليم وليس الوظيفة قد اختلف معه في جزء من طرحه حول مسؤولية الدولة لكن قطعا لن انساق وراء الطريقة التي عرضت بها الصحيفة الموضوع و بيّنته كأنه يتحدّث بصلف وتعالي و غسل يد الدولة من المسؤولية مثل أحاديث الهوت دوق و القميص و الشحّادين ما حدث من الصحيفة و انتشر في وسائل التواصل عبارة عن توجيه رأي عام واستغلال لعاطفة الناس, أشبه بما جرى في موضوع حريق بوكس و سيارة الأزهري
07-23-2017, 10:09 PM
Salah Zubeir
Salah Zubeir
تاريخ التسجيل: 08-17-2015
مجموع المشاركات: 5239
Quote: سنين جيش عرمرم يعيش سلفكة وأوانطة على قفا المغترب .. الآن هذا رد الجميل لمن حلبتوه سنين طوال .. بافي ليكم صعب تردوا له ولو نذر يسير مما قدمه لكم ..
شكرا" جمال فقد عبرت عني. الامين العام لشؤون المغتربين بالخارج المفروض يتحدث بإسمي كمغترب ويدافع عن حقوقي عند حكومة السودان ويكون عندو القدرة في إقناع الجهات الحكومية المختلفه باهمية المغترب ويوضح لهم ما يقدمه المغترب للبلد دون منه او اذي ومن صميم مسؤلياته مطالبة حكومة السودان وبي الحاح بتوفير الحوافز التي تساوي ما ياخذونه من جزيه (ضرائب + زكاة + خدمات) كل عام وتتزايد الحوافز بعدد السنين التي دفعت فيها الجزيه .. من يعمل في حكومة السودان ينزل معاش ويدفع له لسنين وحتي بعد وفاته ... الدكتور كرار موظف تم تعينه من قبل حكومة السودان وزيو زي ناس الجمارك مربوط بي رقم محدد يجب جبايته كجزيه من المغتربين ودي مهمته الاولي والاخيرة.
07-24-2017, 07:06 AM
عبدالحفيظ ابوسن
عبدالحفيظ ابوسن
تاريخ التسجيل: 06-24-2013
مجموع المشاركات: 22319
وبل يا الشايقي اعطي غير المسلمين .. لقا واحد غير مسلم يشحد وهو كبير في السن وامر ان يعطي من بيت المال .. وقال ما معناه .. اخذنا منه صغيرا ونتركه كبيرا مستنكرا
07-24-2017, 07:49 AM
عبدالحفيظ ابوسن
عبدالحفيظ ابوسن
تاريخ التسجيل: 06-24-2013
مجموع المشاركات: 22319
اتعجب من مسؤول يقول الدولة ليست جمعية خير ويقصد بها مواطني بلده اكان مغتربين ولا مستقرين ولا خريجين الدولة فعلا مفروض تكون جمعية خيرية لاهل البلد . مع التركيز علي سذاجة وسطحية وسوقية التعبير وللاسف هي جمعية خيرية لغير اهلها
07-24-2017, 08:30 AM
أحمد الشايقي
أحمد الشايقي
تاريخ التسجيل: 08-08-2004
مجموع المشاركات: 14611
يا جماعة كدي بعيداً عن العاطفة والكلام الكتير الضد الحكومة دا .. ياخ نحن ما بتاعين شغل .. دي حقيقة .. ما دايرين نشتغل .. أي زول في السودان عندو قدرة يكوّن راسمال ويولدو ويشغلو ويستفيد ويفيد الآخرين قبل كم يوم شاهدت برنامج وثائقي عن الصين والله العملوهو الصينيين قبل الميلاد وبأدوات بسيطة جداً نحن ما نسويهو لامن يرث الله الأرض وما عليها .. المشكلة فينا نحن مش في الحكومات .. ياخ هي الحكومات دي ذاتا بتجي من وين.؟؟ ما هي بتجي مننا نحن .. إياهم أعمامنا وأخوالنا وولاد عمنا يعني هم ما جابوا حاجة من عندهم إنما طبقوا ثقافة شعب ما عندو بصارة لي شئون الحياة دي .. والشعب دا اللي هو نحن ديل ذاتنا البننتقد فيهم ولو قدر لي أي واحد منكم إنو يبقى رئيس أو يتولى أي منصب برضو حيلقي نفسو مواجه بستمية عقبة قدامو .. يا جماعة نحن كدا .. ضد النجاح وضد الابتكار .. وضد العمل وكمان البنجح ما بنخليهو ينجح .. نظل نطاردو بالاتهامات والحقد والنية السيئة ياخ المصريين ديل واطاتهم بالقيراط .. نص فدان تلقاهم زارعين فيهو وساكنين فيهو 13 نفر .. ومربيين الجاموسة والبط والجداد وينتجوا منو أكل عيشهم ويبيعوا الفايض في السوق .. الصينيين والله بنوا مساطب في راس الجبل فوق .. وزرعوها رز وأكلوا مليار وأربعمية نفر ونحن عندنا أطول نهرين في العالم بعد المسيسيبي .. وأكتر ارض مستوية .. سهول على مد البصر ما قادرين ناكل في بطوننا دي دا والله ما عجز حكومة براها .. دا عجزنا نحن في المقام الأول الحكومة ذاتا لو عندنا إرادة بنطوعا لتخدمنا
او كانت جمعية خيرية كان الوزراء والقرون الكبار في الدولة بيشتغلو مجانا" وكان بصرفوا على المواطنين من جيوبم!!
الدولة انك تعلم المواطنين مجانا" وتعالجم مجانا" وتبحث عن رفاهيتهم ولا كتر خيرك ولا كتر خير العينوك لانك ما بتصرف على المواطنين من جيبك بل دي قروشم زاتا وانت تاخد مرتب من قروشم دي عشان توجد حلول العطالة ديل و حلول للمغتربين البدفعوا ليك عشان تاكل !
اما كلامو عن التعليم الكمي كلام خارم بارم! بدل تخرج دكتور يشتغل نجار ولا سواق أفتح معاهد للسواقين والنجارين ولا عشان تعليم المهن الحرفية ما بدر قروش بالدولارات للدولة!
وإذا كانت تدار مسائل التعليم والتوظيف بهذه العقلية العقيمة فمصيبتنا أكبر
07-24-2017, 09:55 AM
احمد الشيخ
احمد الشيخ
تاريخ التسجيل: 12-23-2014
مجموع المشاركات: 784
رده يأتي في اتساق مع مفهوم ونظرة باقي المسؤولين في الدولة للشعب من شحادين لكسلانين لتصريحات زي احنا اكلناكم الهوت دوغ وعلمناكم الموبايلات لتصريحات زي احنا بنصدر الدكاترة والنبق لتصريحات زي الما عاجبو يلحس كوعه والزارعنا غير الله يجي يقلعنا كلها بتشير لنسق موحد عند المسؤولين في نظرتهم لمناصبهم وللحكومة وللشعب وللوطن ومش تصريح شاذ منفرد
07-24-2017, 10:06 AM
عبدالحفيظ ابوسن
عبدالحفيظ ابوسن
تاريخ التسجيل: 06-24-2013
مجموع المشاركات: 22319
احكي ليك دى يا بدر امس واحد معرفة بونس فيني هو مزارع مشي طلع بابور من البنك . قال لي بفتش فيهو . شايف فيهو خرخار زيت قلت امكن مستعمل في تفتيشي وقفن موترين .. واحد داير نفايات وواحد تاني نسيتو والله قلت ليهم انا مستلمو هسة انشبكو فيني قال لي طوالي رجعتو مخزن البنك فيا صحبي الحكومة مفروض تشجع ودة المأخرنا اقرأ الاخبار كم مصنع قفل من الجبايات كم سيد محل تجاري قفل في مصر وكنت حينها اقرأ مجلة صباح الخير و روز اليوسف بداية التمانينات . بقرا عن تجربة مصر ومن خلال تحقيقات وقصص بدو خريج الزراعة ارض في الصحراء و بابور وتقاوي وسكن ويساعدوهو لامن يزرع .ويسوقو ليهو بضاعتو الارض بتبقو ملكو شوف مصر ما يسمي بالشارع الصحراوي بقا اخدر وازدهرت هنا ناس الجبايات يسكو البابور فاضي ف شنو نحن ضحية السلطة ولسنا مساهمين معاها غلطنا في حاجة واحدة صمتنا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة