فرق بين الخبر و الرأي وبين التحليل و الأمنيات!

07:57 AM July, 13 2017

سودانيز اون لاين
محمد البشرى الخضر-العين-الإمارات
مكتبتى
رابط مختصر

لا أزعم إنتمائي للإعلام بأي شكل احترافي سواء دراسة أو ممارسة أو حتى اهتمام ساكت, اللهم إلّا كمتلقّي
لكن علي بالحلال ازعم وبعين قويّة أن فهمي فيه أنجض من عشارت المتلبطّين و الذين اتاحت لهن فوضى الأسافير و الرخص النسبي في اسعار موبايلات السامسونج الإدعّاء بأنّهم اعلاميين و محلّلين وبتاعين مصادر وجيب من جوّة لا يشق لهم غبار!
يا أخي الإعلامي شعورك شنو بالله و انت تكتشف ان ما كتبته - نقلته - ونشره ما هو إلاّ شتلة محسّنة رعاها و سقاها شفت ما في ابعد اصقاع الدنيا عن الحدث و طعّمها بما تيّسر من صور قديمة قبل الحدث المعني بسنوات و لاعلاقة لها البتّة بالحدث !!
و حدّثني يا ظريف عن منظرك بكون عامل كيف بعد ان أنفقت الزمن وانت تدبّج و تزيّن تحليلا مكرّبا و ملأت زواياه وحواشيه بالمحسّنات البديعة و اللطائف و اللغة الراقية مع ما بها من تعسيم أحيانا ظنّا منك ان هذا التعسيم يضفي قدر كبير من المصداقية و الذكاء إلى تحليلك الفطير
ثم تكتشف أنّك شيّدتك بنيانك على أساس قراءة خاطئة لمعلومات إمّا كاذبة أو في أحسن الأحوال أماني وأحلام صاحبها
هل تحس بالحرج! ح تاكلها في حنانك وتعمل رايح ولاّ تتكرّم على القرّاء بإعتذار ظريف و خفيف وتلعن أم الدجاج لإلكتروني الذي خصّص على ما يبدو قفص كامل لك فقط لمتابعتك و الدس لك وتضليلك وذلك لـ (أهميّتك) !!
أقول ليك حاجة يا قريبك..
قوم لف بلا قرقوش معاك *

____________________________________

* حقوق القرقوش محفوظة لتراجي خخخخخخ

سلامات ود البشرى..

مريت على تغريدة ترامب المزيفة؟
مصدرها صحفي مرموق صاغها بنفس لغة ترامب
ودبلج صورة التغريدة بالفوتوشوب

وجا واحد لافحها وفتح بيها بوست خبري يغالط في الناس
طرامب غرد وطرامب صرح..
غايتو

هي دي براها يا دكتور, ياخي عمّك بتاع الواتساب كان كان عارف السودانيين ح يسيؤوا استغلاله كدا اظن كان صرف النظر عن الفكرة اساسا
ياخي بعض الناس ادمنت فكرة اللفح و التلفيق و يجيبوا ليك الخبر من الشرق و معاه صورة قبل عشرة سنة من الغرب! لا وكمان شنو يغالط و ف النهاية يزعل يا مرق خلى القروب يا حرّش عليك الأدمن هههه
دكتور عبد الله وقع ضحيّة الفبركة و التي ربّما اساسا لغرض المزاح لكن بعد تداولها صارت أكثر من حقيقة, البغيظ ا وسائل التحقّق بسيطة وساهلة بس الناس بترتاح احيانا لمّا تلقى خبر يحقق امنياتها
المصيبة الجد حين يتناول اللفحة صحفي او اعلامي احد مهامه المهنية هي الاستقصاء من الحقيقية قبل نشرها وترويجها, عشان كدا بالذات من ينتمون - أو يدّعون الإنتماء - للمجال الاعلامي لا اعفيهم أبدا من الوقوع في فخ الفبركات خاصة الساذجة التي لا تمر على الانسان العادي

ود البشرى الموضوع ده ما جديد ، العالم كلو شغال شتل والاشاعة والبروباغاندا دي جزو من النشاط السياسي من زمن هتلر ..حتى قبل ثورة الميديا والسايفر كان في صحف التابلويد وما زالت التابلويد تشتل وتطبع وتبيع وامورا ماشة زي العسل رغم انو الناس عارفينها تماما ومدينها اسم خاص ، ده لانو دي طبيعة البشر كده بتحب الاشاعات الخاصة بنجوم السياسة والمجتمع وبتحب تنسج قصص خيالية لتعبر عن بعض هواجسها ومخاوفها و مواقفها تجاه مسألة او قضية ما .. بعد ثورة السايفر ، اصبح بداخل كل جهاز مرتبط بالانترنت صحيفة تابلويد مستقلة يمكن لصاحبها "شتل " وفبركة ما يشاء ، جداَ او هزلا . وبالنسبة لينا نحن في السودان تحديدا ـ اعتقد ان انعدام الشفافية وسيطرة جهاز الامن على بعض الصحف وتسريب اخبار مختلقة لها خلق حالة متأخرة جدا من التيه وعدم اليقين ولها دور كبير جدا في انتشارالاشاعة . اصبحت الصحف "بعضها" ينسج قصص وحكايات من وحي خياله ، مثل الاخبار الخاصة "بنجوم " الحركة الشعبية والحركات المسلحة ، تحولت هذه الصحف الى تابلويد رخيص دون ان تدري .. عرمان عندو كم شركة ، الحلو توفى ، ريبيكا قرنق عملت شنو ، هذا بالاضافة للنقص المريع في الكادر المهني المؤهل ! الخ الخ .. اما سونا و اس ام سي ، فحدث ولا حرج .. حتى البشير ذاتو شغال شتل نضيف لمن بقى خبير بستنة عديل .. فالحكاية "خربانة من كبارا" . لكن لو طبقنا نظرية "سهر الجداد ولا نومو " على الاشاعات دي ممكن نلقى مخارجة لمروجي الاشاعة السياسية بحسبانها تكتيك غرضه الضغط على الحكومة "مثلا" للافراج عن او تصحيح معلومة ما او لزعزعة ثقة الناس ودفعهم لاتخاذ موقف معين الخ الخ .. لكن بالنسبة للاشاعة "الشخصية " فهذه قطعا شيء سيء للغاية .بعد داك نحن كمتلقين للاشاعة والفبركة يفترض انو يكون عندنا نظام فلترة معقد جدا ، لانو الاشاعة ولفبركة بقت بتجينا من كل الجهات زي المطر ، حكومة ، معارضة ، ناشطين الخ الخ .. نعم مرات الناس بتعبر عن امانيها بالاشاعة غايتو مرات الواحد بعزل الاشاعة البتعجبو نسوي شنو سيد الرايحة فتح خشم البقرة شغل فلترك بس " يو كان دو ناثينغ اباوت إت" ..

ود البشرى ازيك
هاك شوف الإعلامي الجد جد
الفيديو ده أنا شفته قبل كم شهر طوالي إتذكرتك وكنت عاوز أفتح بوست أجيبو ليك (باعتبارك خبير)



الفيديو ده فيهو ترجمة عربية للعاوزين
اضغط علامة (الترس) من subtitles إختار عربي

سلام أخ محمد البشري
التحليل السياسي فن وعلم - له مناهجه وأدواته وليس مجرد خبط عشواء وتخريجات أو حتي
تعليق سياسي لايرقي لتوصيف تحليل سياسي !
* فكثيرا من الكتابات والتعليقات يطلق عليها مجازا وتجاوزا ( تحليل سياسي ) !
التحليل السياسي العلمي والموضوعي يجب ألا يخلط مابين رأي المحلل الشخصي ورغباته
ورؤيته وأمانيه ومابين التحليل الموضوعي . - التحليل الموضوعي يضع مساحة بين المحلل - والتحليل حتي لا يختلط الذاتي الموضوعي !
*

المهم في الإعلام هو قدسية الخبر ومصداقيته - وهي قضية لايجب المساس أما الرأي ووجهة
النظر والتحليل وإستنباط خلاصات وإستنتاجات فهذه - لاتخضع لمعيار الكذب والصدق وإنما
تحاكم بمعايير أخري - العلمية والموضوعية مثلا !
يمكن أخطئ في تحليلي ورؤيتي ورأي من دون يطعن هذا في مصداقيتي وأخلاقي بعكس تعمد
إيراد خبر كاذب أو تلفيقه والإصرار علي هذا الخطأ !!
** في المحك العملي يصعب وجود فواصل قاطعة - فكثيرا من الكتاب يمزج في تحليله مابين الرؤية
الخاصة والرأي والرغبوية والأماني ! مهمة القارئ الحصيف وصاحب الرأي الآخر كشف هذا التخليط و وضع الفواصل في مكانها !
*وكما ذكرت في موضع آخر أن وسائل الإعلام في العالم لها مرجعيات وخط سياسي عام
وليست محايدة .بصورة كاملة - نعم أنها تورد الخبر كما هو وتتيح الفرصة للرإي الآخر وتبرز التحليلات
والتعليقات المتباينة ولكنها تركز في التغطئية والمساحة علي يماشي خطها الإعلامي!
......

ود البشرى رسل لي رقمك
اواطسك اول قبل انشر
تمهلوا ياخ
انمهل وما بتندم الا حدث انت حاضرو فيزكالي

مرحبا بالشباب و معذرة على التأخير

اهلا عبدالله إدريس..
تقول أن الأمر اصبح أمر معتاد وحتى قبل انتشار الميديا و الأسافير, اتفق معك إلى حد ما, توجيه الرأي العام أمر متعارف عليه بشكل أو بآخر, الصحف تنشر الأخبار التي تدعم خطّها و تعكسها بطريقة تبرز ما في صالحها و تغفل ما عداه, و زي ما قلت في النهاية للمتلقّي القدرة و الخيار على الفرز
أمّا بالنسبة للشائعات و الأكاذيب الراسها عديل فدا أمر ينافي المهنية و المصداية حتى عند من يوجه الرأي العام, فالحقيقة دائما تبقى مقدّسة.
الأزمة الحقيقية في رأيي في الوسيط الثاني الذي يعيد نشر المعلومة أو الخبر على انّها حقيقة لا تقبل الجدل وو بذلك يخدم بوعي - او بدون - أجندة صاحب الكذبة الذي ألّفها و نشرها لغرض ما قد لا يبدو للناقل من الوهلة الأولى. انتشار النت و الوسائط صنع من كل من حمل هاتفا ذكيا وسيطا اعلاميا ثانيا و احيانا البعض يكمّلها للآخر و يدّعي انه اعلامي و للأسف مع غياب الحس المهني و المنطقي صار كل ما في الأمر اعادة ارسال ونشر ما يردك وبأسرع ما يمكن حتى تنال قصب السبق في القروب أو الصفحة حتى دون ان تكمل قراءته حتى ناهيك عن أن تمحصّه وتعمل عليه فلاتر المنطق و العقل و الاستقصاء.
وتقريبا نفس المنطق يطبق على تحليلات و قراءات ما وراء الأخبار حال كانت اخبار مفبركة وكاذبة فما شيد عليها لا يعدو ان يكون ترهات ايضا!

شكرا يا أيمن على الفيديو الممتع
الشي الطلعت بيه منه على الرغم من الكم الهائل من تدفق للمعلومات و الأخبار و الفيديوهات و الصور الاس تخلّي شفقة عاجل الحق السوق وتتريث قليلا ووسائل التحقق متوفرة ومجانية - دا بالنسبة للزول العادي أمّا الإعلامي المحترف فالمسالة أكبر من تريّث بل هي واجب تفرضه مهنيته
اعادة نشر صورة او فيديو مفبرك يخصم من مهنيتك وسمعة مؤسستك و مصداقيتك ويحدث بها ضرر عظيم, كذا الحال أيضا عند من يحلل و ينظّر بناء على أساس خاطئ
المسالة في النهاية بذل قليل - أو كثير - من الجهد و الأمر يستحق, استسهال نشر أو اعادة نشر معلومة خاطئة أمر ضرره كبير عل المصداقية .

اهلا كمال
فقط اخالفك في جزئية واحدة من حديثك وهي ان التحليل الخاطئ لا يطعن في مصداقيتك, في حال ان التحليل مبني على معلومة كاذبة او مفبركة فستنتج تحليل خاطئ زي ما قلت, المشكلة وين ان هذا التحليل يساهم في تشكيل الرأي العام خاصة عند الإشارة للأساس الكاذب بالتالي كأنّ هذا التحليل اعاد نشر و روّج للمعلومة الكاذبة
يبقى بشكل او بآخر تأثرت مصداقية صاحب التحليل حتى ولو بدون قصد
لذا كل من يتناول الخبر سواء باعادة نشر او تحليل او حتى للاستشهاد لا يعفى من التحقق قدر الإمكان من مصداقية ما يتناوله.

هلا ود أبسن
أظن طوفان الأكاذيب التي مرّت عليك الأيّام الماضية في مواضيع اهتممت بها من انتشار الكوليرا لموضوع اختفاء أديبة لغيرها وضّحت ليك أهمية التيقّن و التفريق بين الخبر و الراي و توزيع الأمنيات

الاخ ود البشرى وضيوفه - سلام عليكم
حتى ناهيك عن أن تمحصّه وتعمل عليه فلاتر المنطق و العقل و الاستقصاء.
فى الحته دى اغلب الناس ماشغاله بيها ...والمثال عندى بسيط قصه طه.
الناس شغاله ماخده مايتردد جد
انا طرحت سؤال فى بوست من البوستات عن طه وطلعت بانطباع انو الناس لم تحب تقنع/تصدق نفسها بحاجه حتى لو ماصاح
تتغابى عن سؤالنفسها سؤال منطقى وواقعى .
(كان سؤالى : طه فريق امن ....ومديرمكتب البشير ...الاقاله من وظيفه مدير مكتب البشير ...طيبفى حاجه عن احالته للمعاش من وظيفته كفريق فى الامن ؟؟؟؟
ولو حصل دا ... الوظائف الحساسه يمنع صاحبها الخروج او العمل خارج البلد على الاقل فتره من الزمن ....قصه كروت ضغط عندو ..زى مابقولو الشباب مامقسمه معاى
وقصه طه لعبه من السودان لحفظ التوازن فى العلاقات...رغم انحيازهم حسب معسكر الولاء الفكرى ..الانقاذيون مع قطر )
اسف اذا طلعت من موضوع البوست لى سياسه لكن ضروره ايراده كمثال ..الايام ستثبت صحه وجهه نظرى باعمال الاسئله المنطقيه قبل التداول والحوار فى الموضوع دا .
شكرا

ود البشري يا حبيبنا تحياتي ولضيوفك الكرام ..


ردآ علي :
هي دي براها يا دكتور, ياخي عمّك بتاع الواتساب كان كان عارف
السودانيين ح يسيؤوا استغلاله كدا اظن كان صرف النظر عن الفكرة اساسا
يا ود البشر بالمناسبة الكلام البتقول فيه دا كأنك ما سوداني وما عارف طباع هذه
الشعوب المتخلفة ! نحن من ضمن الشعوب المتخلفة زينا وزي الشعوب العربية ...
وغيرهم من الشعوب البسيطة وساذجة واكرر متخلفة ! يعني البنعمل فيهو في النت
دا دا الواقع الفي حياتنا العادية وتجمعاتنا اللايف ! لو كانت اشاعات ولا نميمة ولا
سخافات ! دي حياتنا كدا !! يا ود البشري تعاملي مع التواصل الاجتماعي ضعيف
جدآ ولكن لا اخلو من التواجد به . فعشان كدا ما تقنبوا تنقوا وتتعاملوا مع الناس
كانها اول مرة تعرفوهم ! فعلآ عالم النت بسلبياته وايجابياته وفيه الصدق وفيه الكذب
وفي الاشاعات وفيه اي شئ فعشان كدا الاندهاش ما بنفع . الشئ الوحيد المطلوب
منكم وبما انه دي وسيلة رهيبة جدآ للانتشار حاولوا اعملوا توعية للناس تكون بدل
الميديا . ودي فرصتنا الوحيدة الممكن نتعمل من بعضنا البعض اي شئ حتي السلوك
وتهذيب النفوس .. والشئ المستغربة ليهو ما اطلقت عليهم صحفين ولا كتاب عشان
بجيبوا ليك كلمة كلمتين ! ياصديقي البشري اي انسان من حقو اكتب لكن ما من حقنا
تصنيفه ! عشان ما نظلم اصحاب المهنة الحقيقية . ودي الفكرة .

ومشكور ومتأسفة علي النفس الحار . هههههه

سلام أخ محمد البشري
أنا أتحدث عن إمكانية الخطأ في التحليل وإن بني علي معلومات حقيقية !
التحيل قد يبني علي إستنتاج وإستقرأ وفرضيات - ويخطئ !
وقد يبني علي معلومات صحيحة وخبر صحيح - ويخطئ المحلل !
وقد يبني علي معلومة غير دقيقة ويخطي التحليل!
* و وممكن جدا أن يستند المحلل علي خبر ومعطي - متواتر مستهلا تحليله بما لايقطع بصحة
الخبر كأن يقول "بإفتراض صحة الخبر كذا وكذا !
*أما التحليل بناء علي خبر خاطي والتعامل القطعي معه وبتعمد كمعطي مؤكد فهذا يعد
خصم علي المحلل !
* الشاهد في هذا أن خطأ التحليل و المحلل في معظم الأحيان لايطعن في مصداقية المحلل !
.....

وعليكم السلام كمال
قلت لك نعم اتفق مع مجمل كلامك فقط اتحفظ على عدم تأثر مصداقية المحلل عندما يستند على معلومة او خبر خاطئ وخاصة اذا ما تبيّن له هذا الخطا
و خليني اديك مثال حي واديني رايك انت
تذكر موضوع التغريدة المفبركة على الشيخ ابوزيد رحمه الله التي نشرتها حريات؟ عندما تبيّن فبركتها كان التحجج من محرّر حريّات الذي ينتهج نهج نشر الخبر مصحوبا بتعليق أو تحليل له أنه ومع اقتناعهم بفبركة التغريدة لكنها تشابه طريقة تفكير الشيخ!!
هل في رأيك ألا يطعن هذا في مصداقية محرر حريات؟

مرحبا عاصم
موضوع طه معقّد قليلا لأنه اساسا صعوده السريع ووصوله لرتبة الفريق لم يكن طبيعيا ليكون خرجه بالشكل الطبيعي
وإن كان زاوية تناولك للأمر مثيرة و مدهشة حقا!


هلا يا منى ومرحب بيك و بنفسك أيّا كان حار أو بارد
مسالة شعوب متخلفة و ما يجري في الواتساب هو نفسه ما يجري في الواقع فهذا ليس عذرا مقبولا, الدين أمر بالتبيّن و التحقّق ونهى عن الكذب أو نشر الأكاذيب
العرف المجتمعي يحتقر الزول الكذّاب ولا يحعل له قيمة ومن عرف عنه كثرة الكذب أو الخفّة يقال عليه زول ساكت! ولا يؤبه له أو يؤخذ بكلامه
خلّيك من دا, دورنا نحن شنو؟ مش محاولة معالجة الخلل أو التنبيه لمواطنه اينما وجدناها
ايه رايك خلّي زميلنا هنا مسميني الصوارمي في احد قروبات الهلال من كثرة ما بنفي الأكاذيب و الفبركات غير المنطقية
فا معليش لا اتفق معك, هذه ليست حياتي كدا نميمة واشاعات وسخافات لا يا منى ووهذا ليس عذرا للاستسلام, وأنا هنا لا انهش بل أمارس في حقي في النقد ووضع الأصبع على الجرح
إن كنت انت لا تستطيعين او لا ترغبين فا شنو.. خلي البقدر و البحب يتصرّف وساعدينا بالسكات و الموية الباردة :)

Quote: والشئ المستغربة ليهو ما اطلقت عليهم صحفين ولا كتاب عشان بجيبوا ليك كلمة كلمتين ! ياصديقي البشري اي انسان من حقو اكتب لكن ما من حقنا تصنيفه ! عشان ما نظلم اصحاب المهنة الحقيقية . ودي الفكرة .

مافهمت عايزة تقولي شنو بالضبط!

ود البشري مشكور علي الرد وعلي سعة الروح والصدر ..


كدي خليني من الدين دا !
الدين أمر بالتبيّن و التحقّق ونهى عن الكذب أو نشر الأكاذيب
الكضب لا من الليلة لمبارح عشان تجي تدخل لينا الدين !!!

والشئ المستغربة ليهو ما اطلقت عليهم صحفين ولا كتاب عشان
بجيبوا ليك كلمة كلمتين ! ياصديقي البشري اي انسان من حقو اكتب لكن
ما من حقنا تصنيفه ! عشان ما نظلم اصحاب المهنة الحقيقية . ودي الفكرة .
مافهمت عايزة تقولي شنو بالضبط!
لاني شايفاك بتخاطب فيهم كانهم صحفيين محترفين ولا شنو كدا ما عارفة ؟هههههه

كيف اخليك من الدين! أفا يا منى
لا أصلو ما بخلّيك ههههه
عشان متوقع كلامك دا جبت ليك كلام العرف المجتمعي بعد كلام الدين! اها أخلّيك من العرف برضو؟

انا اتكلمت عليهم بوصف اعلاميين و هو اليومين ديل اشمل و فضفاض أكثر من صحفيين, كل من يطرح نفسه منصة اخبار و ترويج ومصادر يدخل في دائرة هذا الوصف
بعدين مسالة تحرّي المصداقية مطلوبة للجميع لكن بدرجة أكبر من هؤلاء الاعلاميين لأن هناك من ينقل عنهم وينسب لهم بل و يحاجج

خلاص انت الغلطان ههههههههههههههه .
انا اتكلمت عليهم بوصف اعلاميين و هو اليومين ديل اشمل
و فضفاض أكثر من صحفيين, كل من يطرح نفسه منصة اخبار
و ترويج ومصادر يدخل في دائرة هذا الوصف

كيف اخليك من الدين! أفا يا منى لا أصلو ما بخلّيك ههههه
ههههههههههههه يا زول ما تخليني لكن انا بعمل الفي البعملو فيهو .

مشكور يا ود البشري الله يكرمك فرقت علي هههههههه .

سليت روحنا ياخ الفرق شنو؟ والبوست ده راى ولا خبر ولا امنية؟

Quote: ود البشري مشكور علي الرد وعلي سعة الروح والصدر

عرفنا ا سعة السدر ,, سعة الروح دى كمان شنى؟

ود البشرى يا رقيق الصوت

كل عام وانت بالف خير

اها انا بتختني مع ياتو؟
:)

Quote: سليت روحنا ياخ الفرق شنو؟ والبوست ده راى ولا خبر ولا امنية؟

البوست من باب الـchمـchـرة و الطعمية وكدا :)

تعال صلّح الكوت بتاعك بهدلت علينا البوست يا مولانا


أوو دكتور محمد حسن
أنت يا عزيزي ما بين الحالم والمنظراتي و تحليلاتك عبارة عن رغبات و اماني
ما عندك مشكلة في المصداقية وإن كانت كتاباتك لا تخلو من لفحة لفحتين احيانا :)