دعوة للسودانيين وأسرهم بنيويورك والولايات المجاورة للتظاهر غدا من أجل رفع الحظر عن السودان

09:46 PM July, 10 2017

سودانيز اون لاين
حسن حماد محمد-نيويورك
مكتبتى
رابط مختصر

دعوة لكل سودانى وسودانية واسرهم الكريمة لوقفة والمطالبة برفع الحظر المفروض على وطننا الحبيب السودان

يوم الغد الثلاثاء بتقاطع شارع 47 مع 2nd Avenue

الساعة الثانية ظهرا

مهما كانت نتيجة قرار الادارة الأمريكية فمن واجبنا كسودانيين أن نرفع صوتنا

وأن نوْكد أن المتضرر الأول من الحظر هو المواطن السودانى

رفع الحظر يعنى توفير الدواء للمصابين بالأمراض المزمنة

رفع العقوبات يعني مزيدا من فرص العمل الشريف لخريجي الجامعات

رفع العقوبات يعني مزيدا من الرفاهية لشعبنا ومحاربة الفاقة

"
رفع العقوبات يعني مزيدا من فرص العمل الشريف لخريجي الجامعات"

يا ساتر.. هسى شغالين ياتو نوع من الشغل يا حسن؟

السودان بين حدقات العيوناهلنا الطيبون يستحقون منا الوقوف والمطالبة برفع الحظر عن كاهلهم

الكوز حسن حماد أختشي.

رفع العقوبات لن يستفيد منه المواطن في شئ، بل سيخدم النظام وزمرته فقط.

بعدين منذ متى كان الدواء محظورا يا حسن حماد؟

فشل الحكومة في الحكم وفي توفير المعيشة الكريمة للمواطن بما فيها توفير الدواء، سببه الاساسي هو حكومة الأخوان المسلمين الذي أستولت على الحكم بالقوة.
وهي المسئولة عن حجم الدمار والخراب الهائل الذي لحق بالبلاد.

الحرية للصحفية أمل هباني.

النظام ما متضرر من العقوبات....بل يستخدمها كشماعة فى فشلها ادارة ازمات البلاد . رفع العقوبات يضر بالنظام اكثر من بقائها
اذا ارادت امريكا مساعدة الشعب السودانى للتخلص من النظام لفعلت ....

People talk about smart sanctions and crippling sanctions.
I have never seen smart sanctions, and crippling sanctions cripple everyone, including innocent civilians, and make the government more popular

الدكتور محمد البردعي

يعني يادينق اذا لم يرفع الحظر تستطيع استيراد ادوية امريكية عادي

ات بي صحك اازول

رفع العقوبات يجب أن يكون مطلب أي سوداني حريص على السودان

حسن حماد.

مكتب العقوبات بوازرة الخزانة الأمريكية (المالية) يقوم بأعفاء بعض السلع المصدرة للسودان، من ضمنها بعض الالات الزارعية والأدوية.

وبعدين لي معلوميتك.

تاريخيا السودان لم يكم من ضمن الدول التي تستورد أدوية أمريكية، لقد كان السودان يستورد أدوية من بعض الدول الأوربية.

شكرا لهذا البوست الوطني

الكوز حسن حماد أختشي.

رفع العقوبات لن يستفيد منه المواطن في شئ، بل سيخدم النظام وزمرته فقط.

بعدين منذ متى كان الدواء محظورا يا حسن حماد؟

فشل الحكومة في الحكم وفي توفير المعيشة الكريمة للمواطن بما فيها توفير الدواء، سببه الاساسي هو حكومة الأخوان المسلمين الذي أستولت على الحكم بالقوة.
وهي المسئولة عن حجم الدمار والخراب الهائل الذي لحق بالبلاد.
-------------------------------


انت يا دينق المفروض تستحى
ياراجل اخجل رسمي

الاخ حسن

انت بتنفخ في قربة مقدودة
هؤلاء المعارضين المزعومين ارتهنو لاهواء النفس
وخلطوا في طريق نضالهم (النتن) بين الوطن والوطنية من جانب وبين الانقاذ كسلطة

وايم الله لو سلمت اليهم لسرنا (عرايا) في الشوارع
وقيل (الجواب باين من عنوانه) يستنكرون وقفة لدعم انقاذ كل مواطني الوطن
وياتي كوستاوي هذا بما يوحي انه ناضل لاجل رفع الاغتصاب عن مواطني منطقة معينة ويكيل بمكيالين ويرفض (ضمنيا) ان يناضل لاجل رفع الضيم عن كل الشعب
انه الخلط القبيح
والهوى في النفس الامارة بالمطامع والسوء


فلكم ان تعلموا ايها المتخاذلون ان العقوبات ليس لها دخل بالنظام بل انها لاجل الشعب

وبعدها ان اردتم ان تسقطو النظام فليكن
ولكن ليس عبر استثمار معاناة الشعب في هذه الطموحات الدنيئة

الطيور طارت بأرزاقها وانتو ياداب عايزين تعملو مظاهرات لفرع الحظر !!!؟؟؟
هههههههههههههههه ..

لفرع الحظر : يمكن ان تقرأ لرفع الحظر

(-) المُتضرر الوحيد من الحظر المواطن السوداني وليس الحكومة ولابد من رفعة
(-) الحكومة السودانية غير متضرره بل يذهب قياداتها الي امريكا من اجل العلاج والنزهه ومقابضة البنيات في المترو
(-) رفع الحظر مطلب وطني شعبي لتأمن الشركات العالمية وتفتح تعاملاتها مع السودان ومستفيد المواطن من توفر المواد واللوازم الضرورية
(-) رفع الحظر سيوفر بدروه للمواطن ولو بنسبة بسيطة اهم ضروريات العلاج والحياة والاستثمار ودخول الشركات الاجنبية
(-) معا لرفع الحصار ونؤيد ما تقومون به من اجل رفع الحصار لظهور بارقة امل للمواطن المغلوب على امره
(-) وندعم كل ما هو متاح لرفع المعاناه عن المواطن بغض النظر عن نظرتنا للحكومة

Quote: دعوة لكل سودانى وسودانية واسرهم الكريمة لوقفة والمطالبة برفع الحظر المفروض على وطننا الحبيب السودان يوم الغد الثلاثاء بتقاطع شارع 47 مع 2nd Avenue الساعة الثانية ظهرا

اخي الكريم ابو علي أظنك تعني ميدان ( داغ همرشولد ) الذي اعتاد منسوبي حكومة تسميتها
انه منسوب لأحد المثليين عندما يودون تبخيس مظاهرات المعارضة ....
اها مبروك عليكم ميدان المثليين في البلد الذي دانا عذابها...

دينق قال ليك أختشي
هههه

مرحب بمعارضي الاسافير... صاقعي الكيبورد

العقوبات وبال علي كل سوداني ويجب ان يسعي الجميع لرفعها

للاوطان في دم كل حر يد سبقت ودين مستحق


السودان في حدقات العيون

Quote: رفع العقوبات لن يستفيد منه المواطن في شئ، بل سيخدم النظام وزمرته فقط.

المستفيد الوحيد من الحظر هى الحكومة.
بسبب الحظر اصبح المواطن مشغولاَ بما يحفظ له (حياة)
لذلك أمِنت الحكومة ان تُغتال من قِبل الشعب.
الحكومة وظَّفت الحظر لمصلحتها فبدل ان يكون نقمة عليها اصبح نعمة .

Quote: السودان في حدقات العيون

الأخوان المسلمين أفسدوا وخربوا كل شئ في السودان، ومارسوا أفظع أنواع القتل ضد المواطنين الأبرياء، وأقاموا بيوت للتعذيب وعرفت ببيوت الأشباح.
حدث كل ذلك ولأكثر من 28 عاما ، وبعد كل ذلك يأتي حسن حماد ويكتب لنا "السودان في حدقات العيون" أكيد أنها عيون عمياء.

حسن حماد

أخير لك تختشي.

يادينق هل خرج حب جنوب السودان وحب اهل جنوب السودان من قلبك

نتيجة لما يفعله سلفا ومشار

نحن والانظمة الي زوال ويبقي الوطن

فلتعش انت ياسودان ودمت في حدقات العيون

فلنخرج اليوم من اجل السودان وجميع اهل السودان

Quote: المستفيد الوحيد من الحظر هى الحكومة. بسبب الحظر اصبح المواطن مشغولاَ بما يحفظ له (حياة) لذلك أمِنت الحكومة ان تُغتال من قِبل الشعب. الحكومة وظَّفت الحظر لمصلحتها فبدل ان يكون نقمة عليها اصبح نعمة .

طبعا مولد زي ده مستحيل يفوت الكوز المتخفي عبد العزيز الفاضلابي!
الراجل عامل فيها هو ضد النظام ولكنه مع "الشعب"

قديمة دي يا كوز العب غيرها.

كوز نيويورك حسن حماد.

بالله بطل الاستهبال البتعمل فيهو ده!

طيب أنت وبما أنك بتخرج لمظاهرات رفع العقوبات، طيب شنو المانعك تخرج للمظاهرات التي تندد بجرائم نظام الإنقاذ وأنتهاكه الى حقوق المواطنين السودانين؟
هل خرجت من قبل يا حسن حماد في مظاهرة بنيويورك لأدانة الحكومة أو التنديد بالدكتاتورية الكيزانية وطالت بعودة الحريات والديمقراطيات؟؟

دي مش برضوا مطالب من أجل المواطن السوداني والتراب السوداني؟

كده بالله أشرح للناس كيف يكون السودان في "حدقات" عيونك وأنت لم تدافع على السودان أو على المواطن السوداني الذي يقلع تحت أسواء نظام حكم مر على تاريخه؟؟؟

مالك يا كوز نيويورك، كيف تحكم؟؟

اسمع يا رمة انت نحن ماراجين واحد رمة ويك يورينا مصلحتنا وين
ماتعمل لينا فيها برز الثعلب يوماً نحن سودانيين ادرى بمصلحتنا
نحن ما جهلة عشان تنصب نفسك وصى علينا.
كان عندك باقى نصائح وفرها لوطنك الجديد يا قادوس مقدود.

مهما كانت نتيجة قرار الادارة الامريكية

وقوفك اليوم مناصرة لوطنك فوق كل الاعتبارات الحزبية والجهوية الضيقة

رفع الحظر خير للسودان واهله وكل ابناء الدول الشقيقة والمحاورة الذين اضرتهم الظروف للجوء والعيش في السودان

رفع الحظر يعني تدفق الاموال والاستثمار في السودا
حرية الحركة للمواطن السوداني في كل العالم بسهولة
المزيد من فرص التعليم والعلاج في الولايات المتحدة
المزيد من التبادل التجاري والثقافي بين البلدين
المزيد من ايصال الدعم المطلوب للمناطق المنكوبة بالحروب والنزاعات
االمزيد من الخزيات ورعاية حقوق الانسان

الكوز عبدالعزيز الفاضلابى

أعصابك يا كوز أعصابك!

كوز متخفي زيك مفروض يختشي.

الحظر الخارجي ده هين يا حسن حماد
الحظر الداخلي نعمل فيهو شنو ...
حظر الصف و الجرايد و الكلام ...
المصيبة كبير يا حسن ...
الحظر ده هم و سياستهم السبب فيهو
و رفع الحظر في يد الحكومة الان
فلنوجه لها صوتنا ...
أنا شايف كدة و فتك بي عافية

لماذا لم تتظاهروا رفضا لحظر الشعب السوداني من زيارة أمريكا وهو أمر أثار الرأي العام
والمنظمات الإنسانية والإعلام الأمريكي وجعلهم يتضامنون مع الشعوب المحظورة؟
لماذا لم تتظاهروا تضامنا مع شعبكم ضد قرار ترامب الجائر؟
**
الحكومة السودانية تجاهلت حظر السفر تماما وكأنما الشعب لايعنيها ولكن ركزت علي رفع
العقوبات - ا لمفروضة منذ رئاسة بيل كلنتون لأن رفع الحظر - يعني لتجارها ومتنفيذيها
- إحتكار الإستيرادو والرخص التجارية والحصول علي توكيلات الشركات الأمريكية !
إن كانت المصالح المادية والتجارية هي المحرك الأساسي - للإنقاذ في سعيها لرفع الحظر
وبالتالي لايهمها رفع الحظر عن سفر السودانيين لأمريكا فما عذركم أنتم يامن تصمتون
عن حظر شعبكم من السفر لأمريكا؟
،،،،،،،

مره تانية ابو علي وضيوفو
مصادرنا تقول لم يصدر اَي permit لوقفة احتجاجية كانت ام مناصرة الْيَوْمَ ١١/٦/٢٠١٧
في شارع ٤٧ بين الفيرست والسكند افينيو......
لعنكم متظاهرين من شبابيك السفارة
بالله الميديا يا جارنا العزيز

لا شكر في امر الوطن

ولكن نسأل الله ان يجعل لكل من اقتطع من وقته وحاء لمناصرة وطنه واهله في ميزان حسناته..
المؤمن امره كله خير وايما كانت نتيجة القرار حتما لن تكون نهاية الدنيا

تأجيل القرار لمدة ثلاثة اشهر

هذا ماتوقعه الكثيرون وقصر المدة وعدم صدور قرار بعدم الرفع يصب في خانة حسن الظن ان يكون القرار في مصلحة السودان ان شاء الله
دمت ياسودان في حدقات العيون

يعني يادينق اذا لم يرفع الحظر تستطيع استيراد ادوية امريكية عادي

ات بي صحك اازول



يا حسن رايك شنو الحكومة السودانية حظرت من قبل استيراد ادوية من الدنمارك بحجة انها اساءت للرسول ( ص ) وبهذا القرار الاحمق حرمت مريض السكرى في السودان من اجود أنواع الانسلون في العالم !
يا اخى نحن محظوريين من الداخل بسبب سياسات النظام وتصرفاته وحماقاته وفساده قبل ان يكون الحظر امريكى او بلجيكى!

عليه أطالب بتحوبل مسيرتكم ومظاهرتكم للخرطوم ومطالبة النظام برفع الحظر عن الشعب
مع التحية

Quote: يعني يادينق اذا لم يرفع الحظر تستطيع استيراد ادوية امريكية عادي

خالد حاكم.

الإجابة هي نعم، حيث يمكن للسودان أن يستورد أدوية من الولايات المتحدة، ولكن بعد أن يستخرج تصريحا من مكتب المقاطعة (الاوفاك) التابع لوزارة الخزانة الأمريكية.
قانون العقوبات عندما صدر ، أقر بأن هنالك بعض الاستثنائات من الممكن أن يسمح بها، وكان من ضمنها الأدوية والمعدات الزراعية.

ولكن كما زكرت من قبل. تاريخيا السودان لم يكن يستورد أدوية من الولايات المتحدة، بكل كان معظمها يأتي من أوربا، وبالتحديد من الدول الأسكندانفية.

ولكن أيضا أن موضوع العقوبات هذا ، الحكومة السودانية رمت فيه كل فشلها وأخفاقاتها وحتى جرائمها التي أرتكبتها في السودان وفي حق المواطن السوداني.

رفع العقوبات لم يعود الى المواطن في السودان بأي فائدة هامة في حياته اليومية. قد يستفيد من ذلك بعض الأغنياء ولكن عامة الشعب لن يستفيد.

غايتو يا دينق ماعرفناك محلل اقتصادي ولا قانوني ولا خبير سياسي
ياخي قبيل وقفوا معانا امريكان واقروا بأن سياسة فرض العقوبات لا تضر بالحكومات ولا تساعد في رعاية حقوق الانسان ولا تعيد الديموقراطية وانما ا يتضرر منها الابرياء والبسطاء وضربوا مثال والعراق.. وانت ومن لف لفك عايزين تقنعونا انو الحظر خير للمواطن ووبال علي النظام.. والله جد الاختشوا ماتوا... ارحموا عقول القراء

حسن حماد.

مالك أنت ما مقتنع بأنك أمريكي ولا شنوا؟؟

شنوا وقفوا معانا "أمريكان" دي؟؟

بعدين أنت جاي تقنع نفسك بأن "الامريكان" الوقفو معاكم ديل بيعرفوا الحكومة السودانية أكثر من أمثالي؟؟

حسن حماد أحسن تختشي.

Quote: تأجيل القرار لمدة ثلاثة اشهر هذا ماتوقعه الكثيرون وقصر المدة وعدم صدور قرار بعدم الرفع يصب في خانة حسن الظن ان يكون القرار في مصلحة السودان ان شاء الله

يا حسن حماد حتى ابليس بيحسن الظن في انه ح يدخل الجنة .. المافى شنو ؟؟؟

خذها منى .. في أكتوبر أيضا كذلك ح يتم التأجيل لمدة ثلاثة اشهر أخرى !! والسبب نظامك الفاشل والفاشى ح يرتكب نفس الأخطاء السابقة ..

والسبب نظامك الفاشل والفاشى ح يرتكب نفس الأخطاء السابقة ..

بحسبان انا سودانى وأنت سودانى ممكن النظام يكون نظامنا الاثنين

ولا لو أنت شايف انو أنا معتمد ولا سكرتير فى سفارة ولا موظف محلية دا شئ تانى

ولو مخموم ساى بي شاكلة كلام دينق ياكوز ويا جك دى تبقى مشكلتك

وأكيد لا علم لك بمواقفى تجاه النظام ولا يهمنى علمك كثيرا فأنا لا علم لى عن افكارك أو توجهاتك ضد أو مع النظام ىولا تهمنى كثيرا

هذا البوست غير معنى بذلك .... اذا كنت تود معرفة توجهاتى فيما يخص النظام افتح بوست تانى وممكن نتحاور اذا اصلا البورد دا فيهو ناس عايزة تتحاور

أصلو السودانيين اصبحوا ناس خم ساى .... الواحد يجيك متلب ونفسو مخموم النظام فعلتك وتركتك وهو زاتو ماعارف بقول فى شنو

عالم على قدر من السذاجة والانغلاق لا تعى حتى أين مصلحتها ولا مصلحة أهلها ---- من نوع دينق دا العندوا الاف او ربما ملايين من اهلو الجنوبيين يعيشون فى السودان

وبالضرورة المسغبة التى يعيشها السودان من جراء الحظر سوف تصيبهم .... لكن هو طالما متجدع فى المدن المترفه ماذا يعنيه من معاناة اهله

شايل ليهو اكليشهات وأحكام مسبقة وعامل فيها حكم ومرجعية ومنظراتى من الدرجة الاولى والناس فى السودان وجنوب السودان بتعانى من جراء الحظر وسياسة التجويع والزج بالسودانيين فى حروب

لا نهاية لها ....

اٌقرأ عنوان البوست

رفع الحظر عن السودان وليس عن النظام

اذا النظام حايستفيد من رفغ الحظر فليهنأ بذلك

نحن يهمنا الوطن والمواطن وندرك تماما ضرر الحظر على الوطن والمواطن

على أنا وعليك انت وعلى أهلى وأهلك واسرتى واسرتك

الجعجة بتاعة النظام دى ماعندنا شغلة بيها هنا فى البوست دا

الداير يحظر النظام ولا يقلبوا ولا يلعنو يشوف ليه محل تانى

نحن هنا لا نتحدث باسم النظام ولا ندافع عن النظام

المعارضين الاسفيريين صاقعى الكيبورد كثيرا ما تلتبس عليهم الأمور

ولا يفرقون بين مصلحة الوطن ومصلحة النظام

وشغالين بمبدأ عجبنى للمرقوت