Post: #1
Title: حج هذا العام مبالغة
Author: عبدالحفيظ ابوسن
Date: 07-06-2017, 07:35 PM
Parent: #0
06:35 PM July, 06 2017 سودانيز اون لاين
عبدالحفيظ ابوسن-no where
مكتبتى
رابط مختصر 43 مليون بالطيارة
37 بالبحر
سؤال لي هيئة الحج والعمرة
ادونا تفاصيل المبالغ المهولة دي
وماذا تقدمون للحاج
يعني الحج دة الا نبقا حرامية ز....
|
Post: #2
Title: Re: حج هذا العام مبالغة
Author: sadig mirghani
Date: 07-06-2017, 07:37 PM
Parent: #1
زي النكتة بتاعة الحبوبة
قالت ليهم انا زاتي ماعندي ذنوب قدر دا
|
Post: #3
Title: Re: حج هذا العام مبالغة
Author: عبدالحفيظ ابوسن
Date: 07-06-2017, 08:07 PM
Parent: #2
هههه
اي والله يا صادق
انا داير كشف حساب
43 في شنو
|
Post: #4
Title: Re: حج هذا العام مبالغة
Author: جلالدونا
Date: 07-06-2017, 08:24 PM
Parent: #3
الخدمات .......... 76%
التذكرة ...............20%
التطعيم ............1%
خدمات ولائية’...2.5%
رسوم ادارية ...0.5%
عرفت اللبع وين يا ود اب سن
التطعيم و رسوم الولاية و الرسوم الادارية كان ممكن يكونو بكل بساطة
ضمن رسوم الخدمات لكن نعمل شنو مع قوة العين
|
Post: #5
Title: Re: حج هذا العام مبالغة
Author: عبدالحفيظ ابوسن
Date: 07-06-2017, 10:02 PM
Parent: #4
بكون جلال
اغلي حج واسوأ خدمات
كل سنة فضيحة
سكن بعيد
اكل مافي
مشكلة ترحيل
اسوأ سكن
|
Post: #6
Title: Re: حج هذا العام مبالغة
Author: Haytham Ghaly
Date: 07-06-2017, 11:38 PM
Parent: #5
السؤال يا ود ابسن هو
هل يمكن ان يكون هذا الحج الباهظ التكاليف صحيحاً
من حجاج بلد يعاني معظم اهله الجوع والمرض؟؟؟
سيأتي من يقول انه ركن من اركان الاسلام.. نعم اعلم ذلك
ولكن الا تظنون ان الاله يتفهم هذه الاوضاع؟؟
لو تبرع كل حاج بنصف تكلفة الحج سيكون مجموع الفلوس
اذا اعتبرنا مجموع الحجاج 15 الف مضروب في عشرين الف
يعني 300 مليار بالقديم
هذا المبلغ بامكانه تأمين حوجات الاف الاسر واطعام الاف الجوعى
بالله عليكم اين الاصح والانفع للمسلم وللمجتمع الاسلامي ودايركت الى الاسلام
غايتو راي الدين ماني خابرو
الا المنطق والعقل بقول الاحسن التبرع بنصف التكلفة وعدم الذهاب الى الحج الذي تسبقه دائماً عبارة من استطاع اليه سبيلا
وهل لا يدخل المحتاجون والجوعى من حولنا ضمن شروط هذه الاستطاعة؟؟؟؟
|
Post: #7
Title: Re: حج هذا العام مبالغة
Author: عبدالله عثمان
Date: 07-07-2017, 01:53 AM
Parent: #6
يا ود اب سن ما فيهم زولا يقدر يدق سدرو ويقول زي نا قال العارف بالله
حجوا اليّ فإنني كعبةٌ نصبت وصاحب البيت عندى والحمى حرمى
---
من زماااااان يا ود اب سن من اربعين سنة دالي في اركان الحمهوريين
كان بتكلم عن خلو ممارسات الحج "اليوم" من الروحانيات
كان بقول الحجاج كلامهم كلو عن البرتكان في مكة قدر ده
ويشير لحجم البرتكانة والجدادة قدر ده
ولما الحاج يرجع البجيب ليهو خروف بديهو ساعة سيكو
والبجيب ليهو حلاوة بديهو طاقية
والبجيهو اباطو والنجم بديهو مصحف
--/
من لطايف عبدالله الطيب وهي كثيرة قال لما اخدوهو ليؤسس حامعة
في نيجيريا النيجريين سألوهو حجيت؟ قال ليهم كو!!
نصحوهو يحج حتى يجي نيجيريا لانو الما حاج ما عندو مكانة في المجتمع
ففعل
لما مشى نيجيريا قال لقى اللافتة في مكتبو
الحاجو عبدالله الطيب
--/
بقى زي جدك ود اب سن الحجوجية ضيعت عليهو شياخة العرب
|
Post: #8
Title: Re: حج هذا العام مبالغة
Author: عبدالحفيظ ابوسن
Date: 07-07-2017, 03:34 AM
Parent: #7
مرحب هيثم
فعلا
ودة فيهو قصص تراثية مشهورة كمان .من تبرع بحجه لفقراء معدمين
امشي شوف لستة الحج بتلقا اسماء مكررة كتيرة يقول ليك حجيت عشرين مرة
الرسول صلي الله عليه وسلم حج مرة واحدة
لو كنت رئيسا لمنعت الحج حتي تنصلح احوال الناس
|
Post: #9
Title: Re: حج هذا العام مبالغة
Author: عبدالحفيظ ابوسن
Date: 07-07-2017, 03:35 AM
Parent: #8
فعلا عبدالله
الحج صار مظهرا اجتماعيا
وبشكل مجموعات
الحج وعمرة رمضان
في وطن يعاني المسغبة
|
Post: #10
Title: Re: حج هذا العام مبالغة
Author: Muhib
Date: 07-07-2017, 10:44 AM
Parent: #9
كم دي بالدولار
شكرا
|
Post: #11
Title: Re: حج هذا العام مبالغة
Author: عبدالله عثمان
Date: 07-07-2017, 02:25 PM
Parent: #10
تقريبا ٢٣٠٠ دولار تكلفة الشخص الواحد
لاحظ من الخرطوم لجدة مع طيارات مواعيدها مشكلة
ده غير المصاريف الشخصية ولو جاي من الفاشر مثلا ضيف عليها كم مليون تاني
بعض ال packages من الخليج لجنوب شرق آسيا لزيارة دولتين واقامة في فنادق
فاخرة تتضمن وجبة الأفطار لمدة اسبوعين لشخصين لا تتجاوز هذه ال ٢٣٠٠
حقو فعلا يتم "تدويل الحج" ومداخيلو دي يتم توزيعها على الدول الفقيرة
بدل يتباهى بها السفهاء في عروض السيارات التى يتباهى بها العرب اليومين دي
في صيف لندن (حرب اغاظة بين السعوديين والقطريين في شوارع لندن منو البسوق
عربات أفخر)
|
Post: #12
Title: Re: حج هذا العام مبالغة
Author: Asim Ali
Date: 07-07-2017, 02:49 PM
Parent: #11
عبد الحفيظ وضيوفه -سلامات
الليله فى صلاة الجمعه الامام مؤيد للجماعه ديل ..وجه لوم لى ناس اداره الجح ولا اسمهم شنو..
لكن طبظا بى شنو .... قال ادعو الشباب للذهاب للحج هذا العام.....دا كلام شنو دا ..
الشاب العازب يعرس بيها ويكمل نص دينو ولا يحج ؟؟؟.....الشاب المتزج .العندو دى يصرفها بناء اسرتو وعلى الاطفال ..واحتياجتهم ولا يحج ..
الناس ديل بيخاطبو المجتمع بخطابات متناقضه وغريبه ....
|
Post: #13
Title: Re: حج هذا العام مبالغة
Author: عبدالحفيظ ابوسن
Date: 07-10-2017, 08:26 AM
Parent: #12
كتر خيركم والله جميعا
في الاخبار
البرلمان يستدعي مدير الحج لمراجعة التكلفة
|
Post: #14
Title: Re: حج هذا العام مبالغة
Author: عبد العزيز محمد عمر
Date: 07-10-2017, 09:52 AM
Parent: #13
الحج من استطاع إليه سبيلا يا ود اب سن ......
ما عندك ... ما عليك حج ..
بس الزول يعقد النية ...
|
Post: #15
Title: Re: حج هذا العام مبالغة
Author: البرنس ود عطبرة
Date: 07-10-2017, 10:12 AM
Parent: #1
(-) سلامات المُتداخلين وصاحب البوست من كتب بان يتبرع الحجاج للاسر المُحتاجه ويبطلوا حج نسألوا !!!
(-) هذا المبلغ تدخل اضعافه مباريات كرة القدم لماذا لا تكتب على الفرق التنازل من نصيبها او نصفه للاسر المُحتاجه والحفلات تذاكرها لما لا تكون للاسر المحتاجه
(-) بس لما بقت في الحج بقت للاسر المحتاجه وظهرت الرحمة ؟؟ وبعدين انت فاهم الاستطاعة غلط الاستطاعة للحاج وماعندها دخل بالمحتاج
(-) في النهاية المستطيع دا بدفع زكاة فطر وزكاة في العام يعني صارف على الاسر المُحتاجه ولا مُسقط برضوا الزكاة ؟؟
(-) النيه كالحج اي واحد ينوي ويجعل الامر لله عز وجل سييسر له الامر
|
Post: #16
Title: Re: حج هذا العام مبالغة
Author: عبدالحفيظ ابوسن
Date: 07-10-2017, 10:25 AM
Parent: #15
عاقدين وناوين يا عبدالعزيز يا اخوي
لكن نسوي شنو مع ولاة الامر
الحج دة لو خلو لينا برانا زي اي سفر بنحج . التأشيرة وتسافر بنباصر مصاريفنا
يا قصي بلاشك الحج من العبادات الفردية والتكاليف الفردية . مالو نخلي الحج مرة واحدة فريضة . ونوفر عملات صعبة وبرضو نلزم ناس الكورة يلتزمو بجزء من الارباح حقتهم . ونقلل الصرف الحكومي وبل نلغي الجيوش الجرارة من الدستوريين وهكذا
الحج لمن استطاع اليه سبيلا . وركن
كما اطعام اطفالك واجب عليك ياكلو زي مادايرين لا جناح عليك . لكن من اخلاق الاسلام ان لاتؤذيهم برائحة طعام عاجزين عن تناوله . يا تغرف ليهم ولا تبطلوا وتساعدهم دي روح دين ما نصوص بس
|
Post: #17
Title: Re: حج هذا العام مبالغة
Author: علي محمد الفكي
Date: 07-10-2017, 11:32 AM
Parent: #16
ابو سن
سلام
خلونا نحسب التكلفه الحقيقيه للحج بالارقام باعتبار الحاج ح يقيم 15 يوم
الاعاشة 3x15x15= 675 عدد الوجبات 3 تكلفة الوجبه 15 ريال الاقامة 15 يوم
السكن 500/6x15=1250 ( تكلفة الغرفة 500 ريال وافترضنا العدد للسكن فيها 6 )
التزاكر=1000
الترحيل 5x4x15+200=500 ( باعتبار الحاج بترحل يوميا 5 مرات ذهاب واياب للصلاه تكلفة كل مره 4 ريال بالاضافه لي رحلة مكه المدينه 200)
( مع العلم ان الترحيل داخل مكه مجاني تتكفل به الحكومه السعوديه )
المجموع = 3425 ريال
حسب السعر المعلن من بنك السودان للريال 3425x1784=6110,000
6 مليون و110 الف جنيه سوداني
اضيف ليها رسوم حكوميه وتطعيم والذي منو لو افترضنا 900 الف
تبقى التكلفه 7 مليون
وحتى على سعر السوق الاسود 3425x5=17125,000
اضيف ليها 3 مليون خدمات
التكلفه الحقيقيه لا تتعدى ال 20 مليون
|
Post: #18
Title: Re: حج هذا العام مبالغة
Author: عبدالحفيظ ابوسن
Date: 07-10-2017, 11:40 AM
Parent: #17
تسلم علي
قرض علي السبعة دى ياخ
ممكن اسمح ليك بزيادة تلاتة
شوف الصلاة دي الناس بتخش من الضهر بتمرق العشاء . الحج دة عندنا في السودان عبادة وصلاة
دة حسب كلام الناس البمشو . يقولو بمشو الضهر وبقعدو قبلهم
ولي الليلة نحن مطالبنهم بكشف حساب
دايرين كشف حساب
ترحيل بي كذا
اكل بي كذا
ودايرين تكلفة الامراء كم . وبياخدو نثريات ورواتب
ودايرين تكلفة بعثة الحج
|
Post: #19
Title: Re: حج هذا العام مبالغة
Author: أحمد الشايقي
Date: 07-10-2017, 12:23 PM
Parent: #18
كل سنة أخ عبد الحفيظ يشتكي الحجاج وكلهم من كبار السن والمسنين والمرضى من الإهمال
ورداءة الخدمات في بلاد منحها الله تعالى كل التسهيلات الحديثة
ومع ذلك يبخلون عليهم بالأكل على البوفيهات المفتوحة والبصات المكيفـة
ويتهمهم العديد من الحجاج والكتاب بأنه مجرد (دلع) للمرشدين والامراء وجماعة الفتوى
امتياز حج بالمجان على حساب الاخرين
ولم يتم تحقيق ومحاسبة في أية شكااوى تم رفعها من قبل
وهكذا دواليك
أحمد الشايقي
|
Post: #20
Title: Re: حج هذا العام مبالغة
Author: عبدالحفيظ ابوسن
Date: 07-10-2017, 02:41 PM
🕋 🕋
* خالتو ليلي الدارتحج. *
خالتو ليلى الدار تحج....
تزرع نهار..
تقلى الجرم ..
ماشي وسط الليل تفج..
كايسي الرزق ..
رزق الحلال..
تعب الرجال..
عرق النضال..
في حر شديد
كتاحة يوم
ايام غبار ..
وايام كمان زي التلج..
يااخوانا ماداير تحج...!!!
خالتو ليلى ولا بتقول...
للناس فتر!
خالتو ليلى تصوم ستوت
حتى الخميس ...
في الليل تساهر وتنتظر
فوق البرش
وفي الوقفة تبكي وتتنخج..
تطرى المشوا وقطعوا البحر..
(ياحليلنا نحن متين نحج)
لبيك ليك
ياالله ليك ...
وتااااني تبكي وتتنخج..
وخالتو ليلى تلم جنيه
وتخت جنيه...
دايرالا صبحا ينبلج..
وتلقالا فرصة تروح هناك..
ولمان قروشا خلاص كفت..
يامروي هووووي ..
يامروي جيتك للجواز..
ياولادي داير امشي الحجاز
وفي ايدا شايلي من الحراز..
ياحليلة تتوكا وتقيف ..
(ياربي سهل يالطيف)
وماشي بين الناس تفج..
خالتو ليلى الدار تحج...
ويومين تلاتة وجاها زول
شايل الجواز ...
زغروتة بي صوتا اللي راح
في تعب السنين..
ومرقة الليل والصباح...
دا كلو عشان تحج...
خالتو ليلى في يوما داك..
حست الكون يبتسم..
وبالا يادوووب استراح..
ايام تجهز شان تحج..
وياسلام ..
تمشي المقام .
احرام وزمزم والحمام...
وتطوف كمان ..
وفوق عرفةتنده تبتهل
ياالله شكرك ياالسلام ..
ونامت فرح
خالتو ليلى من العشي...
وحلمت كتير
حلمت كتير..
بالكعبة...
حلمت بالبقيع ...
شبك النبي
الهادي الشفيع..
والسعي والصفا
والخلق...
مرات تهرول ودار تفج..
وطافت كمان ..
ودا طواف وداع...
وحلمت تخمخم في السبح
الطواقي لي
ناس البلد ...
وحاجات كتار
للشفع اللسع (سغار)...
والمساويك الكحل..
الجلاليب العمم..
طرح البنات..
وخالتو ليلى تبكي وتتنخج..
وايام مضت..
قالوا الناس تقدم للسفر.
شالت قروشا العن سعاد
وجاها الخبر...
الحج مدبل مرتين
يعني القروش العن سعاد
لازم يكونن مرتين
وازيد كمان..
لازم تخت قدر القروش
الليها لمت من سنين ..
خالتو ليلى اترايمت...
وسنونا ترجف وتتكرج..
خالتو ليلى اقيفي فوق...
نادت سعاد..
الحقوني انا ياخلوق...
خالتو ليلى استغفرت ..
يسألني الله اشهدت..
وفجأة الطير نزل
غطاها هايج وداك يوج
والحلي والحلال جميع
متلمي تبكي وتتنخج..
ياحليلة حجت في الخيال
والناس دي جات
من كل فج...
خالتو ليلى ماتت وودعت..
ماتت عشان عجزت تحج..
ياحليلة كانت دار تحج..
حقك معلق في الرقاب
حيكومة كان ناس كتر
والله يعيق الدار يضر..
ياحليلة ماتت لا حبوب
تحمد الله ولا بنج...
ويا خالتو ليلى مع السلام
والنيي اقوى من العمل..
ربك كريم
نيتك كفاك
عزك صفاك
كرمك نداك
طهرك بهاك
وياحليلو داك
الخم مالنا
وماشي قادل دار يحج
والنارهناك
محروسة وقادة وتقج..
وحاجة ليلى حجت في الخيال
وماتت غلب
ماتت عشان
عجزت تحج.....
*عبدالقادر محمد عبدالقادر
*مروي...7/7/2017الجمعة
الساعة 9مساء
|
Post: #21
Title: Re: حج هذا العام مبالغة
Author: عبدالحفيظ ابوسن
Date: 07-11-2017, 09:36 PM
Parent: #20
لخرطوم: صديق رمضان
قطع مدير إدارة الحج والعمرة، المطيع محمد أحمد، بتنازلهم عن الإشراف على ملف الحج لوكالات السفر والسياحة في حالة تأكيدها تقديم الحج بتكلفة 42 ألف جنيه للحاج الواحد، غير أنه جزم بعدم قدرتها على فعل ذلك لأن أهدافها ربحية.
وأكد المطيع إن الصورة السالبة المرسومة في ذهن المواطنين عن إدارة الحج والعمرة تعود أسبابها إلى سعي عدد من أصحاب الوكالات إلى إظهار الدولة بمظهر الفشل في إدارة ملف الحج حتى يستأثروا به لتحقيق أرباح، مؤكداً على أن المراجع العام لم يسبق له أن أشار الى وجود مخالفات وتجاوزات في الإدارة بل ملاحظات يدونها حتى في وزارة المالية.
الصيحة
عاد في فشل اكتر من دة . رغم انو دخل فشل الدولة غصب لتوصيل رسالة للجهات الامنية
والرهان علي الوكالات خليهو
ابعدو انتو والوكالات وخلو الناس يحجو بي طريقتهم
وسيادتك من هسة اقول ليك الوكالات ما بتقدر لانو مطلوب منهم دفع رسوم انتو محددينها سلفا
نحن دايرين منك حاجة واحدة ورهان لو كنت راجل دة لا يليق بمؤسسة حكومية
دايرين حاجة واحدة
ادينا تفاصيل ال43 مليون دي
دة المخرج الوحيد لزياداتكم وتبلغ تقريبا 135% من تكلفة العام الماضي
ادينا التفاصيل
|
Post: #22
Title: Re: حج هذا العام مبالغة
Author: عبدالحفيظ ابوسن
Date: 07-12-2017, 03:07 AM
Parent: #21
ادونا عدد الامراء البحجو مجانا وبياخدو مرتب قيل انو ستة الف ريال في الحجة الواحدة
ومخصصاتهم من سكن واكل وشراب وترحيل
وورونا كيفية اختيارهم
علي اي اسس يتم الاختيار
وعدد اعضاء البعثة ومخصصاتهم ومصاريفهم وراتبهم
|
|