الهلال السوداني يقيل مدربه التونسي

06:27 PM July, 01 2017

سودانيز اون لاين
عبد الصمد محمد-السعودية
مكتبتى
رابط مختصر

كما هي العادة والخلى عادته نقصت شهامته..المدرب أول الضحايا. عندنا فقط مطلوب من المدرب صياغة فريق وتحقيق بطولات دولية في نفس السنة

في خطوة مفاجئة أقال نادي الهلال السوداني مدرب الفريق الأول التونسي نبيل كوكي ومواطنه مدرب الحراس وليد بن حسين كما استغنى عن خدمات اللاعب الغاني تيتيه.
وتأتي إقالة المدير الفني التونسي عقب الخسارة التي تلقاها الفريق أمام غريمه التقليدي والتاريخي المريخ 2-1 وذلك ضمن مباريات الجولة الخامسة من مباريات المجموعة الأولى لدوري أبطال إفريقيا.
وتضاءلت آمال الهلال السودانى فى التأهل للدور ربع النهائى بعدما توقف رصيده عند 4 نقاط فى المركز الثالث بجدول ترتيب المجموعة الاولى التى تضم أيضاً ناديى النجم الساحلى التونسى صاحب الصدارة برصيد 9 نقاط
بعد تعادله اليوم مع فيروفياريو الموزمبيقى علماً بأن المريخ السودانى يحتل المركز الثانى برصيد 7 نقاط

وقد تعقدت حسابات البطولة حتى علي المريخ بعد أن ضمن النجم الساحلي التونسي أول تأهله وحده حتى الآن إلى ربع نهائي دوري أبطال افريقيا لكرة القدم
هذا بعد تعادله هذا المساء مع مضيفه فيروفياريو الموزمبيقي 1-1 في الجولة الخامسة قبل الأخيرة من منافسات المجموعة الأولى
وفي حالة فوز الفريق الموزمبيقي على الهلال وخسارة المريخ من النجم الساحلي يصبح الفريقان السودانيان خارج المنافسة.
وفي الجولة الأخيرة الأسبوع المقبل، يلعب النجم مع المريخ، والهلال مع فيروفياريو

Quote: ومواطنه مدرب الحراس وليد بن حسين كما استغنى

هسي مدرب الحراس دا ذنبو شنو ؟؟؟؟ وكل مباراة للهلال مكسيم نجم المباراة !!

دايرين منو شنو يعني ؟؟؟؟

كلو منك يا الغربال ...قطعت عيش الزول .

إمكن حسبوها من ناحية مادية يا الشبلي فبما إنه الهلال طلع من البطولة بصورة رسمية فلا تهمه البطولات المحلية وبالتالي أحسن يوفر مرتبات بالعملة الصعبة ما في طايل منها ألهم إلا إذا كانت هنالك شروط جزائية مرتفعة جدا

Quote: وفي حالة فوز الفريق الموزمبيقي على الهلال وخسارة المريخ من النجم الساحلي يصبح الفريقان السودانيان خارج المنافسة.

المريخ حيخسر من النجم الساحلي ..
والهلال حيترش من فيرو فيارو مخصوص ..
عشان ناس العرضة جنوب يجوا برضو راجعين للمحلي ..
ياخ كورتنا تورم الفشفاش ..
لكن صراحة الهدف الملغي كان له تأثير على مجريات المباراة ..
ليس دفاعا عن الهلال .. لكن الحكم الكاميروني كان مصيبة ..
لكن المريخ كان أفضل ..
والهلال كان لاعبية عبارة عن اشباح ..
فريق سجمان والكاردينال زول مابيفهم بي شلن ..
يفرط في اللاعبين للمريخ .. ونفس اللاعبين البيفرط فيهم ديل يجوا ..
يغلبوا الهلال .. زول ما بيتعظ وسيظل يواصل في مسلسل خيباته ..
وفي ادارته الكسيحة .. وفاطنة شاش البقت تتدخل في شان اللاعبين ..
ده منهتى التخبط والاسفاف يعلم الله .. فاطنة شاش شنو كمان !!..
هي صحافية ما نافعة تجي تنفع في ادارة نادي الهلال .. عشنا وشفنا ..

دي بلد يشهد الله ما عندها سيد ...

ولله دي مشكلة حقيقية يا دكتور
لقد بدأ شعور عام في التبلور، يبتدئ الآن من جمهور الهلال ويتم التعبير عنه بصراحة وبالصوت العالي في منتديات الهلال بأن يفتح الهلال للفريق الموزمبيقي
حتى يطير المريخ فذلك هو الشيء الوحيد الذي يمكن يهدي نفوس الأهلة ونقمتهم على الإدارة واللاعبين
وحتكون بادرة لها ما يعقبها
أعتقد أن الإستغناء عن المدربين والمحترف يدعم هذا الإتجاه
لكن يجب أن لا ينسى الأهلة بأن النجم الساحلي وهو مقبل على ربع النهائي لن يغامر بكبار لاعبيه
وربما هذا ما أدى لتعادله مع الموزمبيقى
وسيلعب المريخ وقلبه على الثأر لمباراة أمدرمان وعينه على التأهل
في النهاية مافي زول بضمن بكرة بحصل شنو
هل بعيد أن ينسحب النجم الساحلي من البطولة لأي سبب ويفوز الهلال على الموزمبيقي
قد يكون الأمر مضحكاً لكنه وارد ولوبنسبة0.000001%

شوف الأزرق هائج مارد فوق الشارع هادر
أرفع راسك فوق يا أزرق إنت الياقوت النادر

هلالابي رغم كل العواصف وكل شي وهكذا حال الكورة غالب ومغلوب ومن هنا كانت المتعة والجمال في اللعبة والإستمتاع بها.

أنا ضد أن يفتح الهلال لفيروفاو عشان يطلع المريخ خارج المنافسة.
المفروض يجتهد الهلال لهزيمة فيروفاو ويصعد فريق سوداني يمثل السودان مع الثمانية الكبار.

الكوكي طول المباريات لاعب خوفا من الخسارة وكانت النتائج تعادلية ، لم يلعب للفوز والدفع بمهاجمين أو أكثر في الملعب.
تيتيه من وقت تسجيله كان معروف أنه ليس تيتيه الخطير الهداف إنما تشابه أسماء وأذكر أنني ذكرت ذلك من قبل حيث أنه قبل تسجيله في الهلال كان قد لعب ١٤ مباراة سجل فيها ٥ أهداف فقط يعني أقل من ٥٠٪.

Quote: فريق سجمان والكاردينال زول مابيفهم بي شلن .. يفرط في اللاعبين للمريخ .. ونفس اللاعبين البيفرط فيهم ديل يجوا ..

الأخ جمال ود القوز,
وأضف إلي ذلك اللاعب السوداني زاتو سجمان يعني تفكيره محدود شديد, هسي لاحظ لعيبة المريخ دائما لمن يلعبوا مع الهلال يلعبوا بطريقة مغايرة تماما, طريقة فيها ندية شديدة وكأنه في الدنيا دي مافي فريق غير الهلال ومع بقية الفرق ما يهمهم النتيجة شديد مثل نتيجتهم مع الهلال, ومن المفروض يلعبوا بي نفس طريقة لعبهم مع الهلال مع كل الفرق. تأكد إذا صعد المريخ ولم يصعد الهلالإحتمال كبير ما يقدر يواصل لأنه هدفهم هو إقصاء الهلال بس والباقي ما مهم.