Post: #1 Title: الهندي عزالدين يكتب أطلقوا سراح (البرتكان) !.. منو القال ليكم إنو لبنان وسوريا أنظف من مصر ؟ Author: زهير عثمان حمد Date: 05-28-2017, 02:04 PM
قبل يومين .. فوجئت وبائع الفاكهة يطلب مني مبلغ (100) جنيه .. (مائة) لا تنقص جنيهاً، ثمناً لدستة برتقال قادم من “جبل مرة” بدارفور !! قلت له: لماذا مائة جنيه وهو مزروع في دارفور وليس في البرازيل ؟! {لا إجابة له .. ولا هو يعرف السبب، ولا يملك غير أن يغمغم بكلام هو نفسه غير مقتنع به من شاكلة: (بياخد تلاتة أو أربعة أيام في الطريق عشان يجي الخرطوم) !! {هل من إجابة على هذا السؤال عند منتجي الخضر والفاكهة وولاة الولايات التي يعبرها (برتكان) مناطق جبل مرة؟! لماذا يصل البرتقال من خارج السودان على متون السفن والطائرات عبر الموانئ والمطارات، فيصل الخرطوم ليباع بالقطاعي بـ(30) جنيهاً للدستة في أسوأ الأحوال، بينما يكون برتقالنا الدارفوري سعره ثلاثة أضعاف المستورد، فيما تتجاوز قيمة برتقال محلي آخر حجمه مثل حجم الليمون قادم من ولايات قريبة مثل نهر النيل (40) جنيهاً للدستة ؟! {ولا شك أن الأسعار سترتفع أكثر خلال هذا الشهر الفضيل، لأسباب غير موضوعية، لا تخرج عن سياق مرض الجشع وداء السعار الذي ينتاب صغار الباعة وكبار التجار في مواسم الأعياد والمناسبات !! {ساعد في أزمة البرتقال، ما يتداوله الناس في وسائل التواصل الاجتماعي منذ أكثر من عام، من كلام ساذج وسخيف حول حقن البرتقال القادم من “مصر” بفيروس الكبد الوبائي، ثم تخرج علينا فتاة مجهولة الهوية في تسجيل صوتي عبر الواتساب لتحدثنا بجهالة تحسد عليها، عن عثورها على دماء بشرية – لاحظ دماء – داخل برتكانة اشترتها من موقف “جاكسون” أو “شروني”، لا أذكر، ولهذا .. وخوفاً على صحة عباد الله المساكين في جمهورية السودان، فإنها تحذرهم من مغبة تناول البرتكان !! {إنها أفكار بايخة وفطيرة، فالمعلوم لدارسي العلوم أن الوسط (الحمضي) داخل البرتقالة لا يسمح بحياة أي فيروس لعدة ثوان، سواء أن تم حشره داخل البرتقالة بحقنة أو عن طريق (فراشة الدرب) على معصم البرتكانة !! {ثم حدثينا يا شاطرة .. ومن يقف ورائك في هذه الحملات، ومن يتداول هذه السخافات عبر الوسائط لزراعة الرعب في قلوب الناس من البرتقال (المستورد)، ليثرى الجشعون من تجار البرتقال المحلي أبو (100) جنيه: متى كانت الدماء رخيصة سواء في مصر أو السودان أو أمريكا، لدرجة حقنها في كل برتكانة، شوفي عايزين كم ألف قزازة دم ملوث عشان نحقنها في كم مليون دستة برتكان ؟! {وبعد روايات فيروس الكبد الوبائي وحقن الدم الملوث، طلع علينا السيد “خضر جبريل” مدير وقاية النباتات بوزارة الزراعة الذي نزل المعاش .. وتقاعد ثم أعيد للخدمة في زمن دكتور “المتعافي”، ثم تقاعد تاني .. ثم أعيد تاني وتالت للخدمة في ذات الموقع على خلفية أزمة فسايل النخيل الإماراتي، طلع علينا السيد.”خضر جبريل” – قدس الله سره – بقرار حظر دخول (300) حاوية برتقال أكملت جميع إجراءاتها القانونية والصحية، بحجة أن هناك آفات طائرة تخرج من تلك الحاويات!! {ما علاقة وقاية النباتات بالبرتكان المستورد ؟!! {اتقِ الله يا مولانا “خضر جبريل” .. وشوف شغلتك في مشروع الجزيرة وامتداد المناقل .. شوف الآفات الحقيقية في القضارف .. والشمالية .. ونهر النيل .. وجنوب النيل الأزرق التي تهدد المحاصيل. {اتركوا هذه المؤامرات الصغيرة .. وأطلقوا سراح حاويات البرتكان .. فالجهة الوحيدة التي تحدد صلاحيات الفواكه المستوردة سواء من “مصر” أو من “لبنان” هي هيئة المواصفات وعبر شهادات المعامل وما كلام سياسي .. (ثم منو القال ليكم إنو لبنان وسوريا أنظف من مصر .. انتو ما سمعتوا بأزمة النفايات الاستمرت شهور طويلة في لبنان .. وما عارفين إنو في سلاح كيماوي وبراميل متفجرة في سوريا ؟!! ) . {ما تنشفوا دم الشعب السوداني أكتر مما هو نشفان .. مئات الآلاف من المواطنين مصابون بفقر الدم بسبب عجزهم عن شراء الفواكه باهظة الأثمان. أطلقوا سراح البرتكان . {رمضان كريم .. و(سبت) أخضر.
Post: #2 Title: Re: الهندي عزالدين يكتب أطلقوا سراح (البرتكا Author: جمال ود القوز Date: 05-28-2017, 02:48 PM Parent: #1
الهندي مصر يأكّل الشعب بتاعنا من برتكان المصريين .. أبو صرف صحي ساب موضوع الصرف الصحي .. ومسك في حكاية الدم المحقون في البرتكان كمخارجة .. يا هندي لو اصلا حارقك برتكان جبل مرة يصل 100 جنية للدستة .. وما قادر تشتريه .. وكمان ما عابز تاكل البرتكان التاني .. ما ضروري تاكل برتكان يأخ .. حتموت لو ما اكلتو مثلا .. ثم برتكان شندي مالو بتعيبو مالك ؟.. والله طاعم وزي السكر .. ويتخلط يعمل عصير فرش كارب .. هسه عليك الله 100 الف دي قروش تجرسك يا هندي .. انا شخصيا والله قاعد ادفع وبالزيادة للمنتج المحلي .. ودون حتى أن اتأفف كمساهمة بسيطة مني في ريادة وسيادة .. منتجنا الوطني المحلي المضمون منتج لا فيهو شق لا فيهو طق .. ولا راوينو بي موية المجاري .. أو بتزرعو وتعبيهو .. أيادي أجنبية لا يهمها صحة الشعب السوداني وسلامة بدنه .. بطل الاستلاب بتاعك ده يا هندي .. تقول لي برضو برتكان مصري عيب عليك .. اشتري حق جبل مرة ده ولو بالزيادة .. دعما لمنتجك المحلي وللمزارع المسكين بني جلدتك ..
ما يكون دافعين ليك ككس ولا عندهم اعلانات كاش .. ( مستوردين البرتكان المصري )... لو ده حاصل كلامنا ده كله أكيد حنبله وحنشرب مويته برتكان .. هههههههههه ..
Post: #3 Title: Re: الهندي عزالدين يكتب أطلقوا سراح (البرتكا Author: جمال ود القوز Date: 05-28-2017, 02:54 PM Parent: #2
بس برضو لازم نلحّقك سوط راينا ده علك ترعوي .. وتشتري برتكان بلدنا .. الـ Organic .. ده
Post: #4 Title: Re: الهندي عزالدين يكتب أطلقوا سراح (البرتكا Author: عادل الباهي عبدالرازق Date: 05-28-2017, 03:02 PM Parent: #3
Post: #5 Title: Re: الهندي عزالدين يكتب أطلقوا سراح (البرتكا Author: Ali Abdalla Date: 05-28-2017, 04:26 PM Parent: #4
مدير المباحث الجنائية ل "التيار" : فحوصات البرتقال المصري أثبتت ريه بمياة الصرف الصحي.
Post: #6 Title: Re: الهندي عزالدين يكتب أطلقوا سراح (البرتكا Author: Nasr Date: 05-28-2017, 05:20 PM Parent: #5
في سؤال: ليه البرتقال البجي من جبل مرة بمية ألف والبجي مستورد أرخص كتير بدلا من إلقاء اللوم علي البائع (ولو تلميحا) ما كان ممكن (وكصحفي) تحاول تعرف السبب
ما تسأل ليه شوال السماد في مصر بستين جنيه وفي السودان بتلتمية وما تساله ليه الضرائب والجبايات الكتيرة ومسيخة البترفع سعر المنتج عشرة أضعاف ما بين مكان إنتاجه وحتي يصل المستهلك النهائي
نقول ليك الكلام الما داير تسمعه حكومة الجبايات والضرائب هي المجرم الأول في السودان والضحايا هم المنتجين والباعة والمستهلكين
فهلا طعنت الفيل لا ظله يا هذا ؟؟؟؟؟
Post: #7 Title: Re: الهندي عزالدين يكتب أطلقوا سراح (البرتكا Author: أبوبكر عباس Date: 05-28-2017, 09:47 PM Parent: #6
يا عادل الباهي، سلام اعتقد إنّو الزول بتاع المعمل دا كاذب المصيبة إنّو دا يكون معمل حكومي
Post: #8 Title: Re: الهندي عزالدين يكتب أطلقوا سراح (البرتكا Author: امجد الجميعابى Date: 05-29-2017, 00:33 AM Parent: #7
Quote: فالمعلوم لدارسي العلوم
و انت علاقتك شنو بالعلوم و دراستها و دارسيها يا هندي التأريخ استاذ شاهد و شكرا
يا هندي كان تكملها وتقول المصري وبس. المثلك ( مستلب مصريا) ومستورد برتقال المجاري، أو مستورد كل منتجات المجاري يلزم محاكمته بتهمة الخيانة العظمي. أصحاب المكوس من ( رجال دولة وحكومات إقليمية ) الذي رفعوا سعر برتقال جبل مرة يلزم محاكمتهم بتهمة الخيانة العظمى.
Post: #10 Title: Re: الهندي عزالدين يكتب أطلقوا سراح (البرتكا Author: MOHAMMED ELSHEIKH Date: 05-29-2017, 01:19 PM Parent: #9
ما هو الفرق بين مكونات مياه الصرف الصحي وبراز المواشي الذي نستعمله في غذاء برتكاننا؟؟؟؟
اتوقع اجابة من زول دارس كيمياء او احياء وبعدين نجيكم
Post: #11 Title: Re: الهندي عزالدين يكتب أطلقوا سراح (البرتكا Author: قسم الفضيل مضوي محمد Date: 05-29-2017, 03:23 PM Parent: #10
يا ود الشيخ انا ما دارس كيمياء ولا أحياء ... لكن النجاوب ليك قبل المتخصصين ما يجوا ... المواشي بتاكل الحشايش وبالتالي حتى مخلفاتها بتلقاها أقل عفونة مقارنة بمخلفات البني آدم البتعبر مخلفاته سامة بسبب تناوله للحوم ... ومن هذا المنطلق بتلقى انه مخلفات المواشي غير نجسة وغير مبطلة للوضوء ... هذا والله أعلم ...