اليوم الصباح قمت و راسي ما فيهو حاجة غير اغنية يا الحرموني منك، حسن عطية و حسين عثمان منصور يا زول خلصت ليك الطقوس الصباحية بسراع بسراع و طيران على اليوتيوب افتش يا الحرموني منك و يا الحرموني شوفتك. و انا يا قباني بصراحة بحب اسمع الاغاني القديمة دي من فنانين اليومين ديل لشنو ما عارف، المهم لقيت ليك كمية..العرفتهم غايتو فرفور و نهى عجاج و البقية ما تعرف الشاب امير و صلاح حبة و حسن محجوب و زعيط و معيط و نطاط الحيط. اها يا هندسة بقيت اسمع نص دقيقة هنا و تلاتة ثواني هناك و النتيجة انو جمال فرفور قد يكون الوحيد الممكن تسمعو للنهاية. الغريبة لقيتها بصوت الهادي الجبل و لكنه لم يعجبني على الاطلاق. و في النهاية سمعتها بصوت الكابلي و طبعا ابداع و ايما ابداع و ختمتها بصوت حسن عطية و اذا بالمثل السوداني يتحقق و اذا سمح الغنا في خشم سيدو فعلا و لو كان التسجيل بمثل جودة تسجيلات الاخرين لكان الامر عجبا.
Post: #2 Title: Re: يا قباني...بعيدا عن الاصبع الوسطى. Author: مني عمسيب Date: 05-20-2017, 11:16 PM Parent: #1
مساء الفل يا دوك ..
مشغولة بعمل لي في مهمات هههههههه قلت اعمل استراحة ادخل الحوش افتش حاجة خفيفة كدا استمتع بيها عيني وقعت في طلبك .. الما غالي .
عمومآ لو ما عجبتك استعين بالصديق الاصلي .
Post: #3 Title: Re: يا قباني...بعيدا عن الاصبع الوسطى. Author: Amira Hussien Date: 05-20-2017, 11:26 PM Parent: #2
طبعا ما فى شك انو حسن عطية سيد الاغنية اداء جميل وتطريب عالى الكابلى من مدرسة حسن عطية لذلك أداؤه ممتاز و بصمتو واضحة وصوتو جميل ومخارج الحروف عندو سليمة مية المية
Post: #4 Title: Re: يا قباني...بعيدا عن الاصبع الوسطى. Author: يحي قباني Date: 05-21-2017, 03:43 AM Parent: #3
Quote: ليوم الصباح قمت و راسي ما فيهو حاجة غير اغنية يا الحرموني منك، حسن عطية و حسين عثمان منصور يا زول خلصت ليك الطقوس الصباحية بسراع بسراع و طيران على اليوتيوب افتش يا الحرموني منك و يا الحرموني شوفتك.
سلام دكتورنا يا راقي ...
حرمان او الحرموني منك ... قبال كل شي من كلمات عبد الرحمن الريح و ليست لحسين عثمان منصور
و الله عندي تسجيل جميل لحسن عطية و آخر بديع جدا لكابلي ...
ان شاء الله بجيبهم ليك هنا ...
Post: #5 Title: Re: يا قباني...بعيدا عن الاصبع الوسطى. Author: يحي قباني Date: 05-21-2017, 04:05 AM Parent: #4
دواوين ود الريح لم تحوى معظم اغنياته وقصائده بل شملت مختارات ثم ان لو دالريح ديوان شعر مخطوط كان جاهز للطباعه لكن فقد فى اللحظه الاخيره ويشمل اغنيات ومدائح فى الامام عبد الرحمن " ود الريح انصارى ووالده شارك فى كررى"حرمان بالفعل لودالريح شعرا ولحنا كما تم ذكر ذلك فى اكثر من لقاء اذاعى ثم ان من مقتنياتى الثمينه حوار نادر مع ود الريح على شريط كاسيت قبل وفاته بحوالى اربع اشهر اجراه معه الاستاذ معاويه حسن يس عبر العازف الراحل محمد الضى لاجل تسجيل ماده قفل لكتاب معويه يس الضخم عن الفن والموسيقى السودانيه منذ اقدم العصور والذى ظهر جزئه الاول قبل اكثر من عام فى هذ ا الحوار ذكر و الريح ان حرمان من تاليفه كما جرى التاكيد على ذلك فى سهرتين عن حسن عطيه قبل عامين بقناه النيل الازرق كان ضيوفها الكابلى وميرغنى ابن شقيقه الراحل ب لود الريح بصوت حسن عطيه كذلك أغنيه هى الاغنيه الجميله " لو انت نسيت انا ما نسيت" وهى لودالريح ويؤديها كابلى على مزهره بصوره تكاد تنسينى حسن عطيه!!!
* منقول ... بقلم العزيز احمد الأمين احمد على صفحات مكتبة الأغنية السودانية ...
Post: #6 Title: Re: يا قباني...بعيدا عن الاصبع الوسطى. Author: يحي قباني Date: 05-21-2017, 04:30 AM Parent: #5
Post: #7 Title: Re: يا قباني...بعيدا عن الاصبع الوسطى. Author: Haytham Ghaly Date: 05-21-2017, 04:57 AM Parent: #6
Quote: اليوم الصباح قمت و راسي ما فيهو حاجة غير اغنية يا الحرموني منك، حسن عطية و حسين عثمان منصور
ههههههههههههههههه
حلوة يا دوك
بالله ما اتذكرت معاها خدعوك وبوظو سمعتك .. لكن في الحقيقة هي اصلاً بايظة
برضو في اغنية او منلوج خليجي بقول: كان ودي نلتقي وفي حياتي تشرقي متل نجمة تبرقي
الاغاني مهداة لي ناس عارفين نفسهم
تحياتي يا دوك
Post: #8 Title: Re: يا قباني...بعيدا عن الاصبع الوسطى. Author: سيف النصر محي الدين Date: 05-21-2017, 02:55 PM Parent: #7
شكرا يا منى.. بس ما فهمت الفكرة بتاعت الجدادة و للا الطائر الغريب الفي بداية الفيديو دي ههههه
Post: #9 Title: Re: يا قباني...بعيدا عن الاصبع الوسطى. Author: سيف النصر محي الدين Date: 05-21-2017, 02:59 PM Parent: #8
شكرا أميرة حسين نعم حسن عطية من جيل الكبار الذين لا يعوضون.
Post: #10 Title: Re: يا قباني...بعيدا عن الاصبع الوسطى. Author: سيف النصر محي الدين Date: 05-21-2017, 03:06 PM Parent: #9
قباني يا هندسة مشكور كتير الغريبة انو في معظم الفيديوهات قيل ان الاغنية من كلمات حسين عثمان منصور. يبدو انه خطأ شائع.
Post: #11 Title: Re: يا قباني...بعيدا عن الاصبع الوسطى. Author: عبدالحفيظ ابوسن Date: 05-21-2017, 03:11 PM Parent: #10
انتو البكا الحاصل الايام دي شنو تبكو بس قباني طالبك لي كم سنة