Post: #4 Title: Re: بالصور..انبهلت معجون طماطم وكاتشب من كريم� Author: جمال ود القوز Date: 04-08-2017, 06:24 PM Parent: #3
يارب يأخ مصنع كريمة يقدر يغطي السوق المحلي على أسوأ الفروض .. على الاقل ده شغل محلي مضمون مافيهو لغوصه المصاروه .. المشكلة جماعتكم الشفقانين هسه حيردموا المصنع ده ضرائب وجبايات .. لحدي ما يقفل عشان يقدروا يستوردوا من الخارج .. عارف لو الحكومة قدرت وتجرأت وشالت السماسرة الفي السلطة لانصلح الحال .. أي مسؤول عنده ماكلة في مكان ما يمرقوهو بره .. يشوف ماكلته دون اي استغلال لسلطته وصلاحيات قرايبه ومحاسيبه ,, لكن لسان حال الحكومة بيقول العين بصيرة والايد قصيرة .. لانه السماسرة ديل كان الحكومة قلبت عليهم وحاولت تشيلهم وتوقف السبوبة .. حيقلبوا على النظام بي حاله ويلحقوهو امات طه .. انت قايل ساكتين عليهم ليه ؟ .. عشاند يل ناس قادرين وقاهرين .. وعندهم لوبيات ودوائر محاسيب ومضرسين جوه الحكومة .. وعلى أقدام اللوبيات المضرسة دي يقف النظام .. اي لخلخة ليهم بتتلخلخ الشغلة كلها .. غايتو لنا الله .. وتنمنياتنا بانه البلد دي تشم العافية .. وماتبقى شغلة ردود افعال وفورة اندروس ..
Post: #5 Title: Re: بالصور..انبهلت معجون طماطم وكاتشب من كريم� Author: علي عبدالوهاب عثمان Date: 04-09-2017, 08:52 AM Parent: #4
الحبيب ود الباوقة .. ديل أهلنا الشايقية .. ديل نكهتهم أحلى من اي كتشاب على وجه .. بعدين نحن ناس الشمالية بتقينا نستورد البطيخ من شندي .. صدقني في أجازتي قبل كم شهر .. كنت هناك عند أهلنا الطيبين في أعماق دنقلا .. لقيت العربات ( دينات ) من البطيخ وارد شندي في أسواقنا .. الناس منتظرين علي اليمين بطيخ زي العسل .. أحسن من أي نوع الاسواق الخليجية .. أكلنا البطيخ الشارع عديل فوق حجر .. كما النعاج عندنا تنتظر عشان تأكل القشر وتنظف المكان .. سواق الدينا يقولي .. أهلنا الدناقلة فلوسهم كثيره .. بطلنا أسواق الخرطوم ولقينا الحكاية مربحة هنا .. كلها ساعتين من وأقل من شندي إلى دنقلا .. ود الباوقة إستثمر في البطيخ .. مودتي .. المشكلة سوف تكون في تزويد المصنع بالمواد الخام
السوق الخليجى سيصبح المستهلك لمنتجات الأرض البكر يوم شميت لى ريحة ليمون وبكل ثقة ذكرت للمتواجدين هذا ليمون الأرض البكر ولمعرفة الفرق قارنو بين رايحة هذا وذاك
Post: #16 Title: Re: بالصور..انبهلت معجون طماطم وكاتشب من كريم� Author: Hassan Farah Date: 04-10-2017, 10:08 AM Parent: #10
انجازات الانقاذ لا تخطئها الا عين المصدر : http://sudaneseonline.com/board/490/msg/%d8%a8%d8%a7%d9%84%d8%b5%d9%88%d8%b1..%d8%a7%d9%86%d8%a8%d9%87%d9%84%d8%aa-%d9%85%d8%b9%d8%ac%d9%88%...9...-1491670832.html -------------------------------------------- ود الباوقة العين بى حسين قول آمين مصنع كريمة بنوه الروس ايام عبود هو ومصانع اخرى منها مصنع الالبان فى بابنوسة ومطامر الغلال فى القضارف وبورتسودان ومصنع تجفيف البصل فى كسلا ومصنع آخر فى يامبيو جنوب السودان.... المصانع دى كلها كانت شغالة حتى عهد النميرى الى ان قلب النميرى نحو الامريكان فتوقف التعاون الفنى مع الاتحاد السوفيتى وجاءت انقاذ السجم دى لتتم الناقصة وهسع انتوا فرحانين عشان واحد سعودى يجى يشغل ليهو مصنع ملكا للشعب السودانى ويكسب من ورائه وانتم تهللوا وتكبروا يا لخيبتكم
Post: #12 Title: Re: بالصور..انبهلت معجون طماطم وكاتشب من كريم� Author: إسماعيل ببو Date: 04-09-2017, 10:26 PM Parent: #1
سلام ود الباوقة أول الغيث قطرة ومشوار الميل يبدأ بخطوة " نحنا خيرنا من تحت بنبّت ومن فوق بنقّط ... والماعندو خير يجي يلقّط " تحياتي
Post: #13 Title: Re: بالصور..انبهلت معجون طماطم وكاتشب من كريم� Author: خالد حاكم Date: 04-09-2017, 11:28 PM Parent: #12
على الاقل ده شغل محلي مضمون مافيهو لغوصه المصاروه ..
سلامات يا جمال حكاية شغل محلى مضمون ده غير صحيح وخاصة فى عهد ازمة الاخلاق والضمير يا اخى على سبيل المثال الغالبية هنا فى هذا المنبر اجمعت بعدم جودة المياه الصحية فى السودان ( موية القارورات ) عدا انتاج مصانع اسامة داؤود وهذه المياه الملوثة التى تسمى بموية الصحة هى انتاج مصانع نفس الناس الممكن يدمروا اى انتاج محلى بالضرائب والرسوم مثلما ذكرت عشان يستوردوا من الخارج وحتى فى الاستيراد هنالك بضائع كثيرة فاسدة دخلت السودان فى عهد الانقاذ من دول غير مصر بواسطة هؤلاء الفاسدين والناس عارفة الحقائق دى وحكاية اهتمام ناس فرانكلى المفاجئ بالانسان السودانى وصحته وحياته موقف غير مبدئى لانو دخول البضاعة الفاسدة للسودان فى ظل الانقاذ ما بديت مع المنتحات المصرية وهو اهتمام حق اريد به باطل !
Post: #14 Title: Re: بالصور..انبهلت معجون طماطم وكاتشب من كريم� Author: خالد حاكم Date: 04-09-2017, 11:58 PM Parent: #13
ياخى صدق فى ديسيمبر الماضى وانا فى زيارة ابن خالى بعد بابكر شرق الحاج يوسف
حسن حماد سلامات لو ملاحظ انو شهر ديسمير ده من شهور الانتاج القليلة للخضروات وخاصة الطماطم والانتاج بيكون وفير فى الموسم وبائر كمان لعدم وجود اسواق تستوعب هذا الانتاج بسبب غياب دور الدولة المحفز للمزارع والبيخلق اسواق لهذا المنتج .. عشان كده المزارع بيبع انتاجه بالخسارة وخاصة الخضروات لانها منتجات معرضة للتلف وده سبب الرخصة اللاقتك .. وضرر المزارع ده ممكن ما يتوقف انو باع انتاجه بالخسارة .. ممكن يتسجن كمان بسبب شيكات مستحقة له لدى البنوك وده كلام انا عايشته عن قرب واتعاملت معه كمان بحكم وظيفتى فى السودان .. يعنى ما كلام معارضة ولا يحزنون .. يا حسن كده حاول زور السودان شهر مايو مثل ما زرته فى ديسمبر وشوف سعر كيلو الطماطم بكم ؟
Post: #15 Title: Re: بالصور..انبهلت معجون طماطم وكاتشب من كريم� Author: محمد عبد الله الامين Date: 04-10-2017, 09:27 AM Parent: #14
خبر مفرح واتمني كل حديد المصانع يدور الشعب ده يرتاح شوية ...
Post: #17 Title: Re: بالصور..انبهلت معجون طماطم وكاتشب من كريم� Author: ANWAR SAYED IBRAHIM Date: 04-10-2017, 12:21 PM Parent: #15
هل بلغ بنا الاحباط من الواقع هذا الحد فاصبحنا نهلل لاعادة تاهيل مصنع للصلصة والكاتشب هل تعلم ان شركة سيقا للاستثمار مثلا تملك مصانع لانتاج الشعيرية والمكرونة ولسان العصفور بجودة تنافس المستورد - تصنع ماكولاتنا الشعبية ( عصيدة قراصة مدايد عصائر كركدي وتبلدي ) ياخي حتي الدانيت بقي يصنع في السودان كل هذا يتم في صمت ودون ضجة اعلامية
ود الباوقه انشاء الله تتبارك ازيدك من الشعر بيت ناس بندة هايبرماركت قايمين وقاعدين عشان يستوردو من المنتجات دى ديل خمسه مصانع مابتكفيهم
Post: #21 Title: Re: بالصور..انبهلت معجون طماطم وكاتشب من كريم� Author: السنجك عثمان Date: 04-10-2017, 08:16 PM Parent: #19
ود البااوقه بطل الهطرقه والت############ه الزايده دى انا بيتى بابو يفتح فى باب المصنع ده وماعاوز افسر ليك لانى اعرف انك بتعرف الفيهو شنو لكن انت طبالى بس اختشى عليك الله اهل الملك زاتن بقوا يتهربوا
Post: #23 Title: Re: بالصور..انبهلت معجون طماطم وكاتشب من كريم� Author: Mohammed Alhasan Mohammed Date: 04-11-2017, 05:00 AM Parent: #22
📌دبابيس📌 📌 دبوس قحطاني يقال ان احد الشباب كانت عنده عربيه امجاد يلقط منها رزقه ويعمل عليها بالليل والنهار في سبيل أن تغطي احتياجات اهله ويتمنى ان يوفر منها شوية قريشات عشان يعرس منهن .... لما الحكايه صعبت عليهو باع الامجاد بي 40 مليون اشترى فيزا للسعوديه بي 20 مليون وجهز نفسه وخلى الباقي لي ناس البيت لحدي ما يستلم شغله وراتبه في السعوديه.... واتوكل على الله وسافر اشتغل عشرة سنين في السعوديه ثم لملم اطرافه ورجع السودان حول قروشه الحمدلله قدر يشتري أمجاد يقدر يلقط منها رزقو يساعد ناس البيت ويحاول يوفر له قريشات يقدر يعرس منهن .... الشاب دا الى حد ما أفضل من حكومتنا لانه حكومتنا حطمت مصنع كان يعمل بكامل طاقته الانتاجيه وهاهي اليوم وبحضور رئيس الجمهوريه تحتفل بافتتاح نفس المصنع القديم وتتباهى باعادته للانتاج بواسطة رجل اعمال سعودي ..... ياترى محتاجين كم سنه وكم رجل اعمال سعودي حتى يعيدوا الحياة لمصنع البان بابنوسه ومصانع محالج مارنجان والحصاحيصا ومصانع النسيج ومشروع دلتا طوكر ومشروع القطن في الزيداب .... وكم سنه وكم رجل اعمال لاعادة احياء السكه حديد والنقل النهري ومصلحة المرطبات والنقل الميكانيكي والخطوط البحريه وسودانير ... بل كم سنه ومنو ال يقدر يعيد لنا الانسان السوداني الكريم المتسامح مع نفسه ومع غيره من غير قبليه وحروب بين ابناء الدم الواحد .... شكرا لخريجي مدرسة عطبرة الحكوميه الثانويه الذين عملوا على بعثها من تحت الركام وشكرا لأهل عطبره الذين حافظوا عليها من ان تطولها يد البيع الخفي الذي فات الصغار والقدرو وشكرا لرجل الاعمال السعودي القحطاني الذي تكبد مشاق السفر من ارض الحرمين لارض النيلين حتى يطعم أهلها من انتاج بلدهم صلصة وكتشبا خالصا سائغا للآكلين من مصنعهم القديم .... وياريت يكمل جميله ويعمل لنا مصنع هوت دوغ .....
قال الشاعر : كانت ايامنا الخوالي حلوة طاعمة ومستطابا يا زمان رجعنا ليها كان فضل عندك عقابا نحن منها ما ارتوينا مالو قافل بدري بابا ؟