Post: #2
Title: Re: ماهي sudaneseonline
Author: عبدالحفيظ ابوسن
Date: 03-17-2017, 05:44 PM
Parent: #1
هذا بوست انفعال عاطفي
وليد لحظته
امكانية استمراره في يد ذات اللحظة العاطفية التي استمدها منه كمحفز ذاتي
رغما عن نظريتي الخاصة
ان لا تعط وعدا وانت مستثار عاطفيا
ولا تكتب
|
Post: #3
Title: Re: ماهي sudaneseonline
Author: عبدالحفيظ ابوسن
Date: 03-17-2017, 05:54 PM
Parent: #2
كيف لها ان تتجاوز افتراضيتها
ك فلم matrix
ولكن تجاوز حقيقي بذات الطعم وليس الخدعة
نحن من نحولها لواقع
نحن من نخرجها من شاشة اعجوبة القرن لارض الواقع
كيف لنا ان نتحول لأشخاص نمتلئ ضحكا سودانيا غامرا وعامرا
وننعت بعضنا في مودة وحب
دون عقد الترصد
سعدت جدا
بإتصال معاوية الزبير ودوما يسعدني بمهاتفته . بصوته الفخيم المتأني كأنه يقرأ من ورقه . تأتي محادثته مرتبة تتخللها لحظات صمت كأنه يستنشق الذكريات وقودا لمواصلة الحديث
تحدثنا وتونسنا ذكريات واخبارا
واعتذر بضيوف
ولم تمر ساعة
حتي اتصل ناذر
ياااااه
فرحت به ولا ازال احفظ رقمه السوداني
فرحت جدا بإتصاله كون انه يحفظ لي مودة داخله لم تزل
اتونسنا
وانا احدثه شعرت ان سودانيز موقعا يمكن ان يتجاوز نفسه ليتنزل واقعا
كون انه وطنا
|
Post: #4
Title: Re: ماهي sudaneseonline
Author: عبدالحفيظ ابوسن
Date: 03-17-2017, 06:00 PM
Parent: #3
وقبلهم
مجموعة من الاعضاء
إلتقيت ب
ابوروضة
محمد المسلمي
حسن بشير
جيلاني ارتيقا
وسمعت اصوات كثر
كنت حريصا علي التعزية والتهنئة من خلال الاتصال
رغما عن حزن المناسبة إلا انني اشعر ان جدار من الود والمحبة بل قل جسرا يمتد بيننا
تتحول تلك الاسماء الكودية لاناس من لحم و دم
فأحس بالألفة نحوهم
اجدني متسامحا نحو غيرهم وان اغلظوا لي القول
فكل الاعضاء اصدقاءا محتملين
|
Post: #5
Title: Re: ماهي sudaneseonline
Author: باسط المكي
Date: 03-17-2017, 06:08 PM
Parent: #4
ياخ انت جميل بجد
وبوست له ا يقاع ووقع خاص
|
Post: #6
Title: Re: ماهي sudaneseonline
Author: عبدالحفيظ ابوسن
Date: 03-17-2017, 06:16 PM
Parent: #5
تحياتي باسط
كتر خيرك
عجزنا من خلال الكره ان نبني وطنا
يمكننا ان نبنيه بالحب
بل دع الحب
فقط الاحترام
ما نبقا كوحشين يتنازعا قطعة لحم
لابد ان يفوز بها واحدا فقط
كيف لنا ان نجلس كأناس عصرين في مائدة واحدة بحقوق وواجبات واحدة
ان نخرج من ثنائية
الوطنية والتخوين
التدين والالحاد
المركب واحد نحتاج ان نوازن جلوسنا عليه
|
Post: #7
Title: Re: ماهي sudaneseonline
Author: عبدالحفيظ ابوسن
Date: 03-17-2017, 06:28 PM
Parent: #6
حظيت بسماع اصوات كثر
رغم ان صوتا ساهم في تهكيري قبل سنوات .حيث اني اتعامل بمودة
كماهجر في بلد غريب يلاقي احد اهله
يشعر ان خيوطا مشتركة تربطهم . الوطن والذكريات واللغة والهموم
رغم تجربة التهكير بمعاودة الاتصال بس وتحول ذلك للمسنجر . لم افقد الثقة
بعض الحذر فقط الذي اعجز عن الحفاظ عليه
|
Post: #8
Title: Re: ماهي sudaneseonline
Author: بشير حسـن بشـير
Date: 03-17-2017, 09:13 PM
Parent: #7
تحياتي يا زول يا بلد
|
Post: #9
Title: Re: ماهي sudaneseonline
Author: علاء سيداحمد
Date: 03-17-2017, 09:45 PM
Parent: #8
يا اب سن انتا زول ود بلد جد ياخ كتر الف خيرك
كدا الواحد يأمل فى انو البلد المسروقة ممكن تعود لاهلها ..
|
Post: #10
Title: Re: ماهي sudaneseonline
Author: عبدالحفيظ ابوسن
Date: 03-18-2017, 04:53 AM
Parent: #9
تحياتي بشير
علا
كتر خيركم
كلنا بنشبه بعض والله
شوفو ما اتلاقوا الاعضاء وجها لوجه حتي تزول العداوات
ف شنو
الاختلاف في وجهات النظر كويس . لكن نخليها خلافات وجهات نظر بس .. ونناقش فيها بس
|
Post: #11
Title: Re: ماهي sudaneseonline
Author: محمد عبد الله الحسين
Date: 03-18-2017, 07:13 AM
Parent: #10
الأخ عبدالحفيظ
تحية طيبة
كلامك نسمة صيف ..
نتمنى أن تكون الاختلافات كما قلت في نظاق الخلافات في وجهات النظر دون مشاحنات و شتائم
فعلا زي بوستك ده مرة مرة بيخفف الاحتقانات و بيصلح المسار
دمت أخي الكريم
|
Post: #12
Title: Re: ماهي sudaneseonline
Author: معاوية الزبير
Date: 03-18-2017, 08:47 AM
Parent: #11
شوف يا عبد الحفيظ، زي صديقنا عمر الجنيد الذي فجعنا برحيله أمس
علاقتنا الوثيقة التي تعود بداياتها لأيام الصبا في السبعينيات في كوستي
خفتت منذ مغادرتي السودان ولم نعد نلتقي إلا لماما
لكن منذ سماعي بوفاته عصر أمس الجمعة يسيطر عليَّ -بالإضافة للحزن طبعا-
شعور بأن من مات هو في الحقيقة حقبة كاملة من العمر
اللعب مع المجموعة ديك، الحوادث التي شهدناها معا، سذاجة أفكارنا يومئذ الخ
أقول رغم أننا لم نتصادف أبدا في وسيلة تواصل اجتماعي إلا أن إحساسي بالفقد كان عظيما
إذا وجدت في المداخلة -يا صاحب- ما يناسب موضوع البوست.. كان بها
وإلا فقد اتحت لي فرصة للتفريج عن كربٍ
|
Post: #13
Title: Re: ماهي sudaneseonline
Author: عبدالحفيظ ابوسن
Date: 03-18-2017, 09:43 AM
Parent: #12
تشكر محمد عبدالله
وكتر خيرك
سوف نصل
هذه الحياة كل يوم تجعل لقاء البوردب ممكنا
المواساة التي لا تقف
الافراح
كلها بتخلي كل مرة واحد يعيد حساباتو ولو مع شخص واحد
اقول ليك
مرة واحد طلع بوست للهجوم علي ابوروضة .. نزلت شهادتي فيه وآخر نزل شهادته
شهادات من خلال معرفة شخصية
وتغير مسار البوست
كلنا سودانين عندنا روح الالفة والمحنة
|
Post: #15
Title: Re: ماهي sudaneseonline
Author: عبدالحفيظ ابوسن
Date: 03-18-2017, 09:50 AM
Parent: #13
شوف الاقدار يا معاوية
تزاملنا في مدرسة واحدة ثلاثة سنوات ولم نتعارف . رغما عن معارفنا المشتركين
وتعارفنا في سودانيز وبدأنا من الماضي وصولا للآن
اياها سودانيز ما يجمعنا اكثر من ما يفرقنا
يجمعنا تلك الذاكرة العشقية للطفولة وذكريات الصبا وهم وطن الذكريات
هو الوطن شنو يعني
ما ياهو الحنين
الحنين لعوالم موغلة في تلافيف الذاكرة ننظرها كأننا لم نعشها ونحس بطعم تلك الايام حين نجد من شاركنا فيها
وسودانيز وفرت ذلك
الدور علينا ان نخرج من النافذة ليس كخروج كمال الجزولي لكن فلنقل ان الحياة تكمن خلف النافذة
نافذة الواقع الافتراضي
|
Post: #14
Title: Re: ماهي sudaneseonline
Author: ناذر محمد الخليفة
Date: 03-18-2017, 09:49 AM
Parent: #1
سلام يا ارباب
Quote: ولم تمر ساعة
حتي اتصل ناذر
ياااااه
فرحت به ولا ازال احفظ رقمه السوداني
فرحت جدا بإتصاله كون انه يحفظ لي مودة داخله لم تزل
اتونسنا
|
يا اب سن انت راجل ماك ساهل ولا انت الزول التنفات ..
انت محطة لازم ووجب الوقوف عندها مهما كانت الظروف
وانا سعيد بي اهتمامك وبي قلبك الحار تجاه المواطنين والوطن وهمك واهتمامك بي اصحابك وزملائك ..
لولا ان المجال ضيق لوصلتك عندك في كوستي لكن الجايات اكتار من الرايحات ان شاء الله .
وتحياتي للصديق العزيز جدا صلاح عوض الله بطرفك
|
Post: #16
Title: Re: ماهي sudaneseonline
Author: عبدالحفيظ ابوسن
Date: 03-18-2017, 09:58 AM
Parent: #14
شوف يا معاوية
عمر الجنيد
رحمه
في دورنا
عشنا تلك اللحظات الذهبية في ذات الزمن
الدافوري
السينما الدور التاني
المشي والجية من المذاكرة
كتل الحفلات وشد القمصان والبناطلين
المساندة عند لقاء الحبيبات ذلك الحب الملتبس الساذج
عشنا في واقع لم نعرف جماله إلا حين فقدنا
شوف
فجأة تسمع بموته رغم خروجه من ذاكرتك لسنوات
تكاثفت عليك الذكريات
فلا تدر اهو حزنا عليه
ام حزنا علي ذاتك
تلك اللوحة الذهنية غاب عنها مشهدا لم تعرف انه اساسي الا بعد فقده
فوجئت بموته
كان سريعا دون عله
شابا ممتلئ حيوية مات بغته
سودانيز صارت وطنا موازيا
فلا نفسدها
|
Post: #18
Title: Re: ماهي sudaneseonline
Author: درديري كباشي
Date: 03-18-2017, 10:18 AM
Parent: #14
تسلم يا ود ابسن
يكفي أن نقول أنت قاسم مشترك يتفق ويلتف حوله الجميع ..
كما أضيف يوجد قطعة في داخل أي سوداني لا تمس أبدا .
لا أحد يدري كنهها ولا مكانها لكن سرها باتع وتدهش الجميع من حولنا .
مثال قبل بضع سنوات زرت مدينة الدمام في مهمة عمل مع زميل مصري . نزلنا بفندق .. وفي المساء نزلنا نتجول في السوق كسياحة في مدينة جديدة علينا نحن الاثنين ..
كل مرة في الطريق يصادفنا سوداني أو أكثر من واحد يبتسموا لي وابتسم لهم ونتبادل التحية دون أن نتوقف .
الزميل المصري يسألني : تعرفهم؟ .
- أبدا والله ما أعرفهم أول مرة أشوفهم .
ويتكرر المشهد كما يتكرر سؤاله وردي عليه ( تعرفه ؟؟؟ أبدا والله ما أعرفه )
في النهاية يعبر عن دهشته : مش ممكن الكلام دا والله ما أصدق )
و كانوا سودانيين بمختلف سحناتهم وألوانهم كأن هذه الابتسامة التي تعقبها تحية (كارني) أو بطاقة هوية يبرزها كل ما شاهد سوداني أخا له ..
كما أضيف أن الصراعات الجهوية والحروب الأهلية هذه أبدا لم تؤثر على السودانيين في الغربة أو في علاقاتهم مع بعضهم البعض بروابطهم واحتفالاتهم ورحلاتهم .. وممكن يتصادف في رحلة واحدة أخوين لشهيدين ماتا في معركة واحدة ضد بعضهما البعض ... لكن لا يوجد أي انعكاس لهذه المعركة في ديار الغربة ..
ولذلك اؤمن على كلامك رغما عن أنك تتخذ سودانيز نموذجا مصغرا لكن أنا أعتقد الحمد لله أن هذه السمة أوسع ولازالت موجودة ونراهن عليها في بناء مجتمع أقوى ومتماسك أكثر .
|
Post: #17
Title: Re: ماهي sudaneseonline
Author: ناذر محمد الخليفة
Date: 03-18-2017, 10:13 AM
Parent: #1
Quote: سودانيز صارت وطنا موازيا
فلا نفسدها |
|
Post: #19
Title: Re: ماهي sudaneseonline
Author: عبدالله ود البوش
Date: 03-18-2017, 11:22 AM
Parent: #17
طالبك طلاطاشر ضربة ونص
.
.
اتا متين بقيت مثقف كدا وتكتب كلام زي حق المذيعات
اظنك قاعد تتثقف من ورانا بالدس ول بتتعولق لينا نحن بس
اتكلم عديل خلينا نتفاهم معاك زي الناس
خليهو كلام التقت الزهور مع الورد في مغيب الشمس ونعانقت معها
|
Post: #20
Title: Re: ماهي sudaneseonline
Author: عبدالحفيظ ابوسن
Date: 03-18-2017, 01:07 PM
Parent: #19
تسلم يا ناذر والله
تعرف كنت سعيد جد والله بإتصالك .. وانا بتكلم معاك اتذكرت اسماء كتيرة .. معتز تروتسكي وتبلدينا و انور التكينة والمسلمي وحافظ انقابو وايييك من تلك المجموعة التي انفرط عقدها
كثيرة مودة ليك وليهم
|
Post: #21
Title: Re: ماهي sudaneseonline
Author: عبدالحفيظ ابوسن
Date: 03-18-2017, 02:30 PM
Parent: #1
ل
حين
ميسرة
|
Post: #22
Title: Re: ماهي sudaneseonline
Author: Basamat Alsheikh
Date: 03-18-2017, 03:18 PM
Parent: #21
المسنوح ود ابو سن
بوست من بيت الكلاوي...
(وما عارفة بقولو بيت الكلاوي ليه شنو...مع انه الكبده احلى)...
.والبوست يصب في ايجابيات سودانيز اون لاين..
.(السلبيات دي خليها لينا نحن...مع ناس فحيح الافاعي)...
تخيل يا ود ابوسن انو عضو في المنبر بيتكلم مع عمنا مصطفى السيد والد الاميرة اميرة وما شافه قبال كده...
واتعرف بيه في سودانيز ...وبيتونسوا كانهم اصحاب...
ياهي دي سودانيز اون لاين الجانب المشرق الانت بتتكلم عنه...
ناس يبقوا ليك اهل وقرايب...
..بوست من بيت الكبدة...هههههه(وجه ضاحك)..
.ونشوفك بعد شهر...
ودمت بالف خير وصحة وعافية
|
Post: #23
Title: Re: ماهي sudaneseonline
Author: عبدالحفيظ ابوسن
Date: 03-18-2017, 04:32 PM
Parent: #22
يا ود البوش انا كان قمت للثقافة جنب ما بتطاقع
اعمل حسابك
الساعة الاعوج ليك خشمي واقول ليك
حقيقة
اسكت بس
هههه
|
Post: #24
Title: Re: ماهي sudaneseonline
Author: Fatima Alhaj
Date: 03-19-2017, 00:57 AM
Parent: #1
كأن هذه الابتسامة التي تعقبها تحية (كارني) أو بطاقة هوية يبرزها كل ما شاهد سوداني أخا له ..
إنها نحن يا أبوسن وسودانيزاونلاين مجرد وِعاء، كما قال أخي درديري، كأن في دواخلنا بوصلة قوية
ترميك في حضن إلفة غريبة وغير منطقية في بعض الاحيان لذلك يستغربها الكثير من الناس
نعم أخي عبدالحفيظ ستكون بلادنا بخير ما دمنا نحمل هذا الجمال في دواخلنا.
تحياتي
|
Post: #25
Title: Re: ماهي sudaneseonline
Author: عبدالحفيظ ابوسن
Date: 03-19-2017, 07:53 AM
Parent: #24
كتر خيركم والله
بسمات وفاطنة والجميع
وعلي دفع الله
علي دة زول حلو جدا والله وود بلد
ما تشوفو زهجو في المنبر
زول رايق جدا وزول خلا ساي
|
Post: #26
Title: Re: ماهي sudaneseonline
Author: Arif Nashed
Date: 03-19-2017, 08:23 AM
Parent: #25
ود بسن .تحياتي
سودانيز روح بلا جسد ..
|
Post: #27
Title: Re: ماهي sudaneseonline
Author: عبدالحفيظ ابوسن
Date: 03-19-2017, 08:42 AM
Parent: #26
عودا حميدا عارف
وتقبل الله الوالدة وغفر لها
القصد
هل يمكننا خلق جسدا يماثل تلك الروح .. اقصد روح الخوة والضكرنة
|
Post: #28
Title: Re: ماهي sudaneseonline
Author: Arif Nashed
Date: 03-21-2017, 10:30 AM
Parent: #27
Quote: عودا حميدا عارف
وتقبل الله الوالدة وغفر لها
القصد هل يمكننا خلق جسدا يماثل تلك الروح .. اقصد روح الخوة والضكرنة |
جزاك الله كل خير
الله ينور عليك ده الكلام العايز اقوله بان سودانيز الرقمية تحولت لوعاء ممتلئ بالمشاعر والأحاسيس ومجتمع يتواصل اعضائه فيما بينهم بكل أريحية رغم الاختلافات والخلافات التي تزخر بها المجتمعات ..
|
Post: #29
Title: Re: ماهي sudaneseonline
Author: MOHAMMED ELSHEIKH
Date: 03-21-2017, 11:07 AM
Parent: #28
ود ابسن
انا عيني ما بتتملي اكان ما لقيت لي معاك قعدة سمك تحت ضل الشدر الكبار داك على نيل كوستي
|
Post: #30
Title: Re: ماهي sudaneseonline
Author: د.محمد حسن
Date: 03-21-2017, 11:50 AM
Parent: #29
دي طوبتي
|
Post: #31
Title: Re: ماهي sudaneseonline
Author: عبدالحفيظ ابوسن
Date: 03-21-2017, 11:55 AM
Parent: #30
هو انا لاقيك وين يا ود الشيخ
تشرف والله ويزيد شرفنا
|
|