Post: #1
Title: ياخ انعل ابو كده ذاتو ... يوجد ما هو اجمل
Author: د.محمد حسن
Date: 03-12-2017, 04:11 PM
03:11 PM March, 12 2017 سودانيز اون لاين
د.محمد حسن-
مكتبتى
رابط مختصر
جيتيني من وين زي دعاش
فتق مسام الشم
وبشر بالخريف
يا بنية من طعم المحنة
وشهقة الزول الوريف
انتبهتك في مسارات السفر
زولا شفيف
وارتضيتك انثى زي طعم اشتياقي
للبلد المستف
بالحنين
واحساس وليف
ايماني بيك
قطعا بزيد
كلما اوغل السفر العنيد
نصلو في جواي وانثال النزيف
قولا من الشعر المموسق بالجوى
وحاسيك زي نغما بدوزن جوة في عصبي
وبلحن للكلام شعرا رهيف
رقراق كما الموية الزلال تدخل عروق
والدم يروق
واتبدل الحال المزاج لي احلى كيف
وريني بس يا احلا زول
القاه في صحوي ومنامي
احلا طيف
وارحل اليك مع بدايات السحر
حين النجوم تحل مع خيط الصباح
وتقولي لي
نتلاقى كيف
نتلاقى ارواح في
مسارات الكواكب والقمر
نلاقى في الحرف البجيك
من شاعر القول الحريف
نتلاقى زي نسمة بتبرد للحشا
والدنيا صيف
يا حاجة بتوز جوة الفؤاد
وقليب صغير مليان عناد
واحساس نضيف
كما النيل والصباح
شلتك سماح
جواي اتكرفت طيبك
والرياح هيابات لواقح
حملا صحيحا ما هو زيف
واتملا بيك
ايمان يقين
باكر بتتبدل مواجع الغربة افرح وانتصار
والقاك في عيون النهار
القا بشع
القاك في فرحة مداخل امدر
تصحح لي التواريخ المجملة
بي الاحاديث الكذوبة
عن كان
وماذا
وكيف صار لي حالنا كيف؟
اهديك نغم
جوات حرف
مليان خريف
وبس
|
Post: #2
Title: Re: ياخ انعل ابو كده ذاتو ... يوجد ما هو اجمل
Author: وضاحة
Date: 03-12-2017, 05:19 PM
Parent: #1
Quote: يا بنية من طعم المحنة
وشهقة الزول الوريف
انتبهتك في مسارات السفر
زولا شفيف وارتضيتك
انثى زي طعم اشتياقي للبلد
المستف بالحنين
واحساس وليف
ايماني بيك قطعا بزيد [/quote
شكراً يا رائع
|
Post: #3
Title: Re: ياخ انعل ابو كده ذاتو ... يوجد ما هو اجمل
Author: د.محمد حسن
Date: 03-13-2017, 12:40 PM
Parent: #2
وضاحة تمرق زي
شعاع النور يفجر ساتر الضلام
بنية من طينة المحنة
ومن تفاصيل حلو الكلام
وبس
|
Post: #4
Title: Re: ياخ انعل ابو كده ذاتو ... يوجد ما هو اجمل
Author: أحمد الشايقي
Date: 03-14-2017, 02:56 PM
Parent: #3
الدكتور الشاعر الملهم
أحمد الشايقي
|
|
|