أطرف ما كتب في عيد الحب

12:12 PM February, 16 2017

سودانيز اون لاين
زهير عثمان حمد-السودان الخرطوم
مكتبتى
رابط مختصر

امس العوض ضرب لي قال لي آسكينة انتي ماك عارفة الليلة يوم شنو؟ الليلة عيد الحب آسكينة الليلة الفالانتاين وانا داير الاقيك
قت لو هوي ملاقاة شنو كمان فوق الحلة وامي ذاتا ما بتخليني امرق
قال لي نتلاقى نص النهار الحلة بتكون صانة والناس بكونوا نايمين قولي ماشة لي صاحبتك وتعالي.
قلت ليه خلاس بلاقيك في زقاق ناس السرة بت الحاج بالنهار بكون فاضي قال لي خلاس.
وقللللت كدي قمت استحميت انكرشت بالليفة زييييين وجبت لي كركار اتمسسسسسحت وشقيت شعري وجلطتو بي جاي وبي جاي وشلت من كركاري داك حتة مسحت شلاليفي واتكحلت ولبست توبي الاخدر وسفنجتي الخدرا ومشيت .
الدنيا نووووصت نهار الشمس ان ربطوا فيها العتوت يجري وكشتك كشتك كشتك لاااامن وصلت الزقاق حق ناس السرة واشوف ليك زولي داك وبقيت اتخجل واسوي هيهيهيهي وعاد كركاري داك سايح متل باغة السمن ساعة يختوها في الشمش ومشيت عليه قال لي احي آسكينة وكت شفتك قلبي دا تلب من محله انتي يا بت سميحة كدي مالك؟
انا وحااااات الله الا اعرسك وهو بقول لي في الكلام دا اشوف ليك كلبة ناس السرة جاية من هناك ومن تشوفنا ليك تجي جارية علينا الساااعة القالت ليك هوووووو جدعت نعلاتي في الواطة وشلت توبي في خشمي جيت اجري لقيتا قابضاني من توبي الليلة وووووب علي العواااااض عاينت لقيت ليك العوض مافي واسمع ليك صوتو يكورك سكينة انا هنا آسكينة عاينت لقيتو مشعبط في الحيطة متل الضب والكلبة تكورك انا بركت في الواطة وبقيت ابحت الكلبة ساعت شافت العوض متعنكش في الحيطة فكتني وجرت عليه قولت هووو هو العوض تلبت تلب عند ناس السرة واسمع ليك السرة تكورك حراااااامي.
الليلة آاالعوض يوووووومك اسود واسمع ليك لب لب لب لب لبعك لموا ليك فيه بالعكاكيز وانا ابحت في واطاتي ديك وهو يكورك بقول لهم انا العوض ود مساعد فكوني قالوا ليه العوض؟ البجيبك بالحيطة شنو متلب بالنهار؟ قال ليهم لمت فيني الكلبة فكوني وتاني توبة من زقاق السرة الحلة ذاتا خليتا وجاني مارق بالباب لقاني في واطاتي ديك ابحت قال لي تاني خلقتك ما اشوفا وقولي لي تاني زقاق ناس السرة قلت ليه تاني آلعوض قول لي فالانتاين!!