حكومة الإنقاذ وتدمير مقدرات الشعب السوداني

07:54 PM January, 31 2017

سودانيز اون لاين
Omer Mustafa-USA- Washington State - Retchland
مكتبتى
رابط مختصر

قصة السجين الأمريكي الكان مسجون 27 سنة وفي النهاية طلع براءة فعندما سمع الحكم القضائي براءته صار يبكي بحرقة ، فسألوه لماذا تبكي وأنت بري ؟
فقال: من سيعوضني ال 27 عاماً التي ضاعت من عمري سداً.
وعندما سأله القاضي بماذا تريد تعويضا.
قال : أأمل أن لايحدث ذلك لشخص آخر.
القصة دي بتزكرني قصة الشعب السوداني مع حكومة الانقاذ الحكمتوا 27 ولسع الشعب ما اكتشفت براءته.
طيب نحن الشعب السوداني بعد انقشاع الظلام و رحيل الإنقاذ هل نبكي علي شبابنا وعمرنا الضاع سدا
ولا علي مشاريعنا التم تدميرها
ولا علي التعليم المتدهور وصار سلعة يباع ويشتري
ولا الصحة و الرعاية الصحة
ولا الضباط التم اعدامهم
ولا علي الكوادر المؤهلة التي شردوها واحالوها للصالح العام
ولا علي الطلاب التمت تصفيتهم و إبادتهم
ولا المواطنين العزل التمت تصفيتهم في مجزرة بورتسودان وكجبار و العيلفون.
ولا علي شبابنا المات وراح وقودا للحرب في الجنوب وبيوت الأشباح
ولا مواطنينا السكنوا في معسكرات النازحين
ولا الاكتر من 300 الف شخص التمت إبادتهم بطائرات الانتنوف و مليشا الجنجويد في دارفور وجبال النوبة
ولا علي جنوبنا الانفصل
ولا مواطنينا الخمسة مليون العايشيين متغربيين ومنفيين ولاجئين بره السودان
ولا علي حلايب وشلاتين وأبورماد و الفشقة
ولا ال33 مليون سوداني العايشيين تحت اعتاب الفقر
ولا علي المواطن البقي مزموم ومصدر ازدراء في جميع عواصم العالم.
ولا علي الثروة و السلطة الفي يد أقلية قلية متاجرة بإسم الدين .
ولا نبكي علي الاقتصاد المنهار
ولا علي اموال الشعب الفي ماليزيا ودبي
ولا علي الجنية الصار بدون قيمة
ولا علي الدين الاسلامي البقي تجارة عند الحكام
ولا علي الإرهاب البقينا متهمين بيهو
ولا علي النسيج الاجتماعي
ولا علي تفشي القبلية و العنصرية
ولا نبكي علي الانتهازيين والمغسولة ادمغتهم وبدافعوا عن الانقاذ.
نبكي علي شنو ولا علي شنو ؟؟
والإنقاذ سجنتنا وعزلتنا من العالم والمجتمع الدولي 27 سنة ورجعت البلد للوراء 27 مليون سنة ضوئية فماهو التعويض لنا كشعب صبر علي كل هذا الظلم و الذل و الهوان.
#لابد_من_الديمقراطية_وان_طال_السفر
عمر مصطفي / الولايات المتحدة الأمريكية
ولاية واشنطون

صباح الخيرات اخي الفاضل عمر ..

حكومة الإنقاذ وتدمير مقدرات الشعب السوداني
والشئ المؤسف يا اخي عمر لما يكون التدمير متعمدآ
وبكل القوة المفرطة من دمار !! وصل بيهم الدمار لتغييب
الشباب بالمخدرات او التطرف الاسلامي الشفتو بام عني
في اولاد اختي الكرهوني التعامل معاهم ! لما اسه عندي
صراع نفسي من ما شفت من سلوك متطرف في البيت
وتسلط وتسمم للبيت الكان نموذج للفن والابداع ونشر
الوعي ! يا للاسف ويا للحسرة السكنت جواي . تصدق
عاملين لينا قرابة الخمسة الف مسجد في الحي وقريبة
مننا وبسمع الخطب العدائية المن عام الفيل الغزو بيها
عقول الشباب . عمومآ مصيبتا اعزوا فيها يا كنا جادين
في تغيير هذا الدمار الشامل للوطن وانسانه يا اما غدآ
سوف نبكي علي وطن اسمه السودان وننعي شعبه .

لك التقدير اخي عمر ,,,