ترامب قفلتها معانا ياعمك -طارق اللمين

06:09 PM January, 28 2017

سودانيز اون لاين
زهير عثمان حمد-السودان الخرطوم
مكتبتى
رابط مختصر

ترامب
قفلتها معانا ياعمك
طارق اللمين

في الساعات الماضيه قام (عمك) دونالد ترامب بإصدار قرار يقضي بمعاقبة مواطني الدول ذات الحكومات غير الرشيدة (ومنها بلادنا) بعدم الدخول الي الولايات المتحده- القرارعاقب المواطنين وليس المسؤليين والحكام - فأصبح الحال عندنا كمايلي:
تتولد ماتقدر تعيش في البلد لأنك ما من ناس الحكومه
تحاول تهرب (تقد بي ليبيا) تلقي حميدتي بالمرصاد
لاعب سيرباك- تزوغ من الدعم السريع يلم فيك عمك ترامب لاعب قشاش -شفت كيف؟
وتعتبر بلادنا الأكثر توسعا وكده في معاقبة المواطنين الكرام جراء مالم يرتكبوه في حياتهم من جرم. فالحكومه تحرص جزاها الله خيرا علي عدم افلات أي مواطن من العقاب ابدا انشاء الله
تبدأ مرحلة العقوبة للمواطن الكريم منذ بواكير الطفوله والصبا وامعانا في عدم افلات المواطنين الكرام من العقاب في هذه المرحله الهامه من حياتهم حرصت الحكومه علي مرمطتهم بتقليص ميزانيات الصحه والتعليم والتنميه حتي تفوقت علي حكومات العالم في هدا الضرب من القلاصة ثم أردفت الأمر بتعقيد الإجراءات التي يسعي من خلالها المواطنون جبنا لتسهيل حياتهم هربا من مواجهة الشدايد (والعياذ بالله )فلجأت الي سد كل الثغرات التي تمكنهم من ذلك بدءا من تعقيد استخراج شهادة الميلاد والشهادات الجامعيه واهمال المستشفيات والمدارس والتركيز علي عدم مجانية التعليم للأطفال والكبار وعصلجة الإجراءات الحكوميه وفقا للخطه الخمسيه وتعظيم شعيرة الفطور في المكاتب ثم تجلي ذلك في النجاح الباهر الذي حققته الحكومه في عدم توفير فرص العمل للخريجين والطفره الملموسه لها في زيادة اعداد العاطلين عن العمل وتنمية الفساد وحمايته حتي يترعرع في كنف الدوله الراشده ثم مطاردة من يحاول كسب العيش في الطرقات والشوارع بالكشه والجبايات والكثير من شواهد الاعجاز والإنجاز في عهد الانقاذ مرورا بتسليط قوات الدعم السريع للقبض علي كل من تسول له نفسه بالتفكير في الهروب من الوطن الي خارج حدود البلاد
يقول ألمثل (جوه حار- وبره الحمار) وهو مثل يقال علي لسان مزارع مسكين يسكن في غرفة من الجالوص ويربط حماره المزعج خارج الغرفه فيصبح حاله ليلا مع سخونة الطقس في الصيف كحال بلادنا : (جوه حار - وبره الحمار)
لماذا تعاقب الحكومات المواطن وتترك المسؤليين- أليس السبب فيما وصلت إليه بلادنا من أوصاف هو أولئك المسؤلين الذين يستعد رهط منهم من البرلمانيين للسفر الي الولايات المتحده للقاء الكونغرس والتفاكر مع المسؤلين هناك في شنو كده ماعارف - بل هنالك وفد برلماني مستهبل يعد لزياره تفتيش للسفارات في امريكا واوربا واسيا - شوف بالله - ياخي تشاد دي ماتفتشوها معاكم - او اقوليكم - مادام بتحبو التفتيش قدر دا - هلموا لتفتيش عشره مدارس اساس فقط داخل الخرطوم- فتشوها لينا- ذلك ارخص واسرع لمن يريد التفتيش والفلاح وليس السياحه والانشراح ان كنتم تعلمون - اليس الاولي معاقبة هؤلاء المسؤلين ؟؟ يعني هم يسوطوها ويطمبجوها واحنا اللي نستحمي؟ يمنع المواطنون من الدخول الي امريكا بسبب خرمجة الحكام فيعاقب المواطن مرتين- مره بخرمجة الحكام ومره أخري بالقرارات الرئاسيه الامريكيه- بعدين - انت ياترامب - كدي كلام هيلاري وكلينتون داك خليهو - شنو كمان قصة الحيطه العاوز تبنيها لحام مع المكسيك دي- شنو التخلف دا ؟؟ياخ سور برلين زاتو إتلحس!! معقوله ياخي؟؟ فاكيها في روحك قدر دا ؟!؟ ولاعب داغت مع الناس كلها؟! انت الله ماليك ولي شنو؟!
كمان جابت ليها حركات كيزان؟!
والله ياعمك ! عصرت علينا ،،، وقفلتها معانا