وافد (سوداني) يساعد الشرطة السعودية في القبض على وافد ( أثيوبي) ويحصل على مكأفاة مالية

04:55 PM January, 08 2017

سودانيز اون لاين
Elhadi-
مكتبتى
رابط مختصر

Quote: وجّه أمير منطقة الرياض فيصل بن بندر، مدير شرطة المنطقة بتكريم الوافد .............. -سوداني الجنسية- ومنحه شيكاً بمبلغ عشرة آلاف ريال، وشهادة شكر؛ لقاء مساعدته رجال الأمن في ضبط أحد الجناة، مما أدى لتعرضه لإصابة بليغة جراء ذلك. وكانت إحدى فرق دوريات الأمن بمنطقة الرياض قد اشتبهت في شخص إثيوبي الجنسية يقيم في البلاد بصفة غير نظامية، يسير في حي منفوحة حاملاً بيده لفافة بلاستيك، وحال طلب الفرق منه الوقوف ارتكب الفرار، فتمت متابعته وتصادف ذلك مع تواجد مقيم سوداني الجنسية قام بمساعدة طاقم الدورية في متابعة الجاني، محاولاً الإمساك به، مما أدى لتعرّضه للإصابة؛ جراء اعتداء الجاني عليه بضربه على رأسه بـ"مطرقة حديدية" كانت بحوزته. جرى إسعاف المصاب وتلقى العلاج اللازم، وتم ضبط الجاني، وبتفتيشه عُثر بحوزته على ثلاث قوارير مليئة بالعرق المسكر جرى تحريزها، وإيقافه بمركز الشرطة المختص، وإشعار فرع هيئة التحقيق والادعاء العام بالمنطقة لإكمال اللازم حسب الاختصاص. من جانبه عبّر المكرّم ............... عن بالغ شكره وامتنانه للقيادة على كريم اهتمامها وعنايتها، مؤكداً أن ما قام به يعد واجباً عليه تجاه هذا البلد المعطاء، مثمناً حسن استقبال مدير شرطة الرياض له.

الأثيوبي برضو جاي يأكل عيش زيك

الخبر منشور في صحيفة عكاظ مع صورة الــ " و ا ف د " . السوداني

الله المستعان بس..

سلام الهادي
جنس شلاقة على السوداني دا .. لو كان الإثيوبي إعتدى عليه كان ممكن نلقى ليه عذر في مطاردته ، بس تخيل لو كان المطارد سوداني كان برضو حيساسكو مع الدورية؟ نحن عندنا حقيقة نظرة دونية لأجناس هي في الحقيقة لحم ودم لينا وإحترام زايد لمن في قرارة نفسه لا يرى فينا مساوين لهم

وعليكم السلام الأخ عبد الصمد..

التصرف ده عندو اسم تاني غير الشلاقة يا عبد الصمد.. :)

وأكيد لو كان المطارد سوداني ما كان الأثيوبي سيساهم في القبض عليه بأي حال من الأحوال

التصرف فردي، لكنه قد يعكس صورة سيئة عن " بعض " السودانيين لدى الجالية الأثيوبية وبعض الجاليات الأجنبية

هههههه ..
والله ده دخل الناس في مدرسة حقيقية
شخصيا قدر ما حاولت بيني وبين نفسي اقتنع بي مسألة مساعدة الشرطة ورجال القانون .. الا انو المسألة دي نهائي ما كريمة :)

Quote: شخصيا قدر ما حاولت بيني وبين نفسي اقتنع بي مسألة مساعدة الشرطة ورجال القانون .. الا انو المسألة دي نهائي ما كريمة :)

وحاتك يا دوك حاولت أفكر فيها من الزاوية دي برضو لكن ذي ما حصل معاك ما لفقت معاي. بس نقول الحمدلله الساطور ما جاب أجل قريبنا دا وإلا لكان لا 10 ولا مية ألف ما حتنفعوا

الهادي سلام

دي غير انها (تع رصة) فالتصرف خطر جداً
لمن الشرطة تطارد مجرم التصرف السليم للمدنيين انهم يبعدوا من المكان

عندي سؤال
قدر كيف يفرزوا اثيوبي ولا سوداني من البداية

انت عارف يا أيمن زول قام جاري من دورية الشرطة ده غالباً بكون زول غلبان وفي حالو...

وإلا ما كان ليهرب من دورية الشرطة ليقع في قبضة اللخو السوداني الذي طارد أخاه الأثيوبي عاري اليدين من أجل شنو ما تعرف...

وفي كل الأحوال نقول للأخ السوداني: ياخ انت مالك ومالو ياخ ؟؟

Quote: شخصيا قدر ما حاولت بيني وبين نفسي اقتنع بي مسألة مساعدة الشرطة ورجال القانون ..

ولا أنا يا المشرف :)

وبالذات الشرطة السعودية.. واللي كان عادي ممكن يخلوا الاثيوبي يذهب لحال سبيله ويبقوا للسوداني في رقبتو

الخزي والعار يجللان هامة هذا الوافد السوداني لصنيعه الذي هو في الدرك الأسفل من الخسة والدناءة.
يا اهلنا في أثيوبيا : امسحوها في وشنا.

أحييك اخي الهادي وضيوفك الكرام.

تحياتي الهادي
قرينا أمس في الأخبار تكريم سوداني من توتي في امريكا لدفاعه عن سيدة امريكية ضد معتدي و قيامه بالقبض عليه أو المساعدة في القبض عليه حتى وصلت الشرطة
وفي السودان لو سمعت قولة حرامي و الناس ساكاه تلقائيا ح تسكه معاهم و يمكن تضرب قبل تعرف الحاصل شنو, هل دا نوع من التـــ############ة برضك؟
انظر للنصف الممتلئ من الكوب, مساعدة قوات تطبيق القانون في اي مكان سواء في بلدك او بلد اقامتك ليست عيبا ولا تنتقص من قيمتك كإنسان وهذا الشخص حين ساعد الشرطة لا اظنه انه دار بخلده انه سيحصل على مكافأة وغالبا ما يكون تصرف بعفوية فقط
اتضح أن الأثيوبي شايل عرقي فقط لكن هل كان السوداني يعلم ذلك؟ قد يكون من تطارده الشرطة قاتلا او ارهابيا او مغتصبا أو غيرها من الموبقات, تصرف السوداني سليم وشجاع احييه عليه ولو كنت مكانه ساختار أن اتصرف مثله

Quote: ومنحه شيكاً بمبلغ عشرة آلاف ريال، وشهادة شكر؛ لقاء مساعدته رجال الأمن في ضبط أحد الجناة، مما أدى لتعرضه لإصابة بليغة جراء ذلك.

تصرف أخرق منه وهذا التصرف كان من الممكن ان يكلفه حياته او عاهة مستديمة

فرق كبير جدا بين ان تسعف شخصا او تمد يد المساعدة لانقاذ ارواح من غرق او حرق
ولكن ان تطارد مطلوبين ومجرمين وانت اعزل وفي وجود الشرطة او رجال الامن فهذا تصرف لا يوصف الا بالسذاجة والسبهللية
وهو سلوك اخرق

انا لو في مكان الشرطة كنت حبسته واتهمته بالتدخل في مهام الشرطة بدلا من تكريمه

لان سلوك مثا هذا الشخص غالبا ضرره اكبر من نفعه...وقد يسبب الاذى لنفسه او للاخرين
رجل الشرطة او الامن هو شخص تم تدريبه وتاهيله للتعامل مع هذه الحالات والشغلانه ما حماس وشهامه وعاطفة...دا عمل مهني عندوا قواعده واصوله

Quote: تحياتي الهادي قرينا أمس في الأخبار تكريم سوداني من توتي في امريكا لدفاعه عن سيدة امريكية ضد معتدي و قيامه بالقبض عليه أو المساعدة في القبض عليه حتى وصلت الشرطة وفي السودان لو سمعت قولة حرامي و الناس ساكاه تلقائيا ح تسكه معاهم و يمكن تضرب قبل تعرف الحاصل شنو, هل دا نوع من التـــ############ة برضك؟ انظر للنصف الممتلئ من الكوب, مساعدة قوات تطبيق القانون في اي مكان سواء في بلدك او بلد اقامتك ليست عيبا ولا تنتقص من قيمتك كإنسان وهذا الشخص حين ساعد الشرطة لا اظنه انه دار بخلده انه سيحصل على مكافأة وغالبا ما يكون تصرف بعفوية فقط اتضح أن الأثيوبي شايل عرقي فقط لكن هل كان السوداني يعلم ذلك؟ قد يكون من تطارده الشرطة قاتلا او ارهابيا او مغتصبا أو غيرها من الموبقات, تصرف السوداني سليم وشجاع احييه عليه ولو كنت مكانه ساختار أن اتصرف مثله

سلام يا ود البشرى...

قدر ما فتشت للنصف الممتليء من الكوب في تصرف أخينا السوداني ده لم أجده يا ود البشرى

أنا ما فاهم انت كيف تطارد زول أجنبي ظروفه في الغالب الأعم هي نفس ظروفك وظروف البعض من بني جلدتك لتساهم في تسليمه للشرطة السعودية، مع العلم أنو حتى " بعض " أهل البلد في كثير من الأحيان يحجم عن هذا التصرف.. إما تعففاً من التصرف أو خوف العاقبة لا فرق...

بل وحتى في بعض الحالات القليلة " قلة " من عناصر الأمن حين تكون الظروف مواتية يسمحون للأجانب بالمخارجة من بعض المواقف وحملات التفتيش.. و دي مواقف شفتها ..

ما في مقارنة على الإطلاق يا ود البشرى بين شخص يدافع عن سيدة معتدى عليها في أي زمان ومكان وبين حالة أخونا السوداني ده، ولم تقل الشرطة حتى أن الأثيوبي كان بصدد الاعتداء على أي أحد

الشرطة حاولت استيقافه وربما لم يكن يحمل إقامة أو أوراق ثبوتية.. فأطلق ساقيه للريح... ودي مواقف قاعدة تحصل كتير وفي أي مكان في السعودية يا ود البشرى وممكن أحكي ليك منها ألف لو عاوز... لكن الشاذ والأخرق هو تصرف هذا السوداني..

لك التحية...

تجاوز يا الهادي الجنسيات و الظروف و شوف بشكل مطلق التالي :
( الشرطة تطارد شخص ثم يقوم شخص آخر بإيقافه مساعدة للشرطة. نقطة)
هل هذ السيناريو فيه ما يعيب؟ ودون تفاصيل مثل قد يكون وقد يكون لأنه قد يكون مفتوحة حتى احتمال أن يكون هذا المطارد - بفتح الراء - إرهابي عديل كدا و قد يقوم بقتل آخرين لو افلت
كون الشرطة تمسك شخص هذا لا يعني نهاية الدنيا, إن كان بريئ فلن يمسه سوء وإن كان مدان فدا عز الطلب, الشرطة يحكمها قانون برضه و على اي انسان الانصياع لهذا القانون بما فيه التعاون مع رجال الشرطة و عدم الهروب منهم
كما الحال عندكم في امريكا مثلا

( الشرطة تطارد شخص ثم يقوم شخص آخر بإيقافه مساعدة للشرطة. نقطة)
هل هذ السيناريو فيه ما يعيب؟

لا ما فيهو أي شي معيب .. بل يعتبر عمل بطولي
بس نحن بقينا غريبين جداً

معروف منفوحة اثيوبي جاري شايل عرقي
حي وانت داخل ليهو كاحياء اديس ابابا
الاحباش ما ليهم في الارهاب ولا المخدرات
قبل كدا الكشات الاتعملت في منفوحة للاثيوبيين سوداني باشر للشرطه عن اماكن الاثيوبيين طعنو مات
التصرف اخرق

كتب ود البشرى :

Quote: تحياتي الهادي قرينا أمس في الأخبار تكريم سوداني من توتي في امريكا لدفاعه عن سيدة امريكية ضد معتدي و قيامه بالقبض عليه أو المساعدة في القبض عليه حتى وصلت الشرطة وفي السودان لو سمعت قولة حرامي و الناس ساكاه تلقائيا ح تسكه معاهم و يمكن تضرب قبل تعرف الحاصل شنو, هل دا نوع من التـــ############ة برضك؟ انظر للنصف الممتلئ من الكوب, مساعدة قوات تطبيق القانون في اي مكان سواء في بلدك او بلد اقامتك ليست عيبا ولا تنتقص من قيمتك كإنسان وهذا الشخص حين ساعد الشرطة لا اظنه انه دار بخلده انه سيحصل على مكافأة وغالبا ما يكون تصرف بعفوية فقط اتضح أن الأثيوبي شايل عرقي فقط لكن هل كان السوداني يعلم ذلك؟ قد يكون من تطارده الشرطة قاتلا او ارهابيا او مغتصبا أو غيرها من الموبقات, تصرف السوداني سليم وشجاع احييه عليه ولو كنت مكانه ساختار أن اتصرف مثله

أتفق معك أخي والله دوماً أتلصص لتحليلاتك التي تتمتع بنظرة ثاقبة ووعي .
المساعدة في القبض على المجرمين عمل كريم .
أنت رجل جميل يا ود البشرى

يمكن المكافئة هي االامر المزعج شوية...لان مساعدة الشرطة امر فطري في السودان
كا ن الامير يديه جنسية ويشغله ضابط صف برتبة نقيب ...لانه بلده خربانة ويريحو من هي لله هي لله وناس ود الباوقة لو رفض المكافئة كان سيسوء وضعه اكثر مع الامير
واعلام السعودية الرخيص غطى الحادثة بطريقة سيئة
يسيب ذكر الجنسيات ويقول مواطن سوداني يساعد في القبض على مجرم وبس

شكرا ل(ماندينقو) الشجاع
لقد شرفتنا ورفعت من قدرنا
ان شاء الله المرة الجايةنسمع بيك شهيد

ياود البشرى
بتاع امريكا داك شيء طبيعي لانو وقف مع زول ضعيف اللي هي المرة الحاول اتعرض ليها المعتدي اما
هنا فاسمح لي دي مجرد ت############ة وشغل هناي فكري
هسي كان المشتبه به جقدوا اولا ح يفقد روحه ثانيا ما ح يعتبر عمل بطولي لانه ماشغله ولا املته عليهو ظروف مكانية او زمانية
يعني لو قارنت مع بتاع امريكا ح تلقى انو لومات الزول البدافع عن المرة ع الاقل ح يحترمه لكن دا كان مات ح يقولوا ليك الله يرحمه المرحوم كان شليق خلاص

مع تحياتي

اها احكي ليكم قصة ماندينقو،، وعن ماندينقو بقولكم
زمان، زمن السودان بخير والسينمات شغالة تش
في كسلا كان عندها سينمتين،، السينما الشرقية والسينما الوطنية
الاولي كانت شعبية متخصصة في الافلام الهندية والكراتيه والكابوي
الوطنيه، واظنها كانت حكومية، تخصصت في الافلام الاميركية والانجليزية وبعض الافلام الفرنسية الراقية والمصرية
لاكثر من اسبوع وعبر المناظر، كانت الوطنية تروج لفيلم ماندينقو،، قصة الزنجي المصارع في احدى مزارع البيض في امريكا، ايام العبودية
يوم عرض الفيلم، امتلأت السينما زت حتي تسلق البعض الصالات الجانبية،،، انا والاصدقاء اشترينا زوادة الفيلم،،، تسالي، فول،ساندوتشات طعمية
وانتظرنا عكة الفيلم،،، مع مشاهد الفيلم والتنكيل بالزنوج كانت السينما تسب وتسخط في الخواجات، حتي ظهور ماندينقو بعضلاته المفتوحه
وتحمله للجلد جعل السينما ترقب كل حركاته بإعجاب (كان يقوم بدور ماندينقو، لاعب الكرة الاميركية الشهير ج.ج.سيمبسون، الذي اتهم في
التسعينيات بقتل زوجته وعشيقها،،، براته المحكمة نتيجة للطعن الدفاع في شهادة رجل البوليس الذي اعتقله، نتيجة لعرض الدفاع تسجيلات
عنصرية له)
فجأة... تحول الاعجاب بماندينقو الي كره عام، ومن بطل تحول الي عدو الشعب!!... حاول احد الشبان الهروب من العبودية والمزرعة، منطلقا
بين الغابات،، الي الحرية... انطلق خلفه مجموعة من عمال المزرعة البيض وامامهم كلابهم الشرسة المدربة،،، اخينا ماندينقو، وبعد ان انتصر لسيده
في عدة مصارعات.. انضم لقافلة المطاردة،، وبهمة تعدي حتي كلاب المصارعة،، دق دق دق، قطع كل الادغال، منقضا علي الزنجي الهارب،،،، هنا انتفضت كل
السينما... فكو فكو ده اخوك،، كان الهارب يستجدي let me go brother،، وكان زعيق الجماهير قد وصل الي ماندينقو،، ارخي يديه وافسحهما للهارب..
الا، وفي لحظة كانت الكلاب والصيادين تكبل الهارب،، ومع الضرب، سحبوهو للمزرعة،، كانت نظرات الهارب لماندينقو مزيجا من الاسي والاحتقار،،،
انشالله يرقوك عب كبير يا م############!! كل جماهير السينما سببه،، وتلاشي اي تعاطف معه حتي في لحظات مقتله.. تستاهل يا...........كل عبارات الشتم تم استنفادها
ذلك اليوم

بعضلاته المفتوحه
بعضلاته المفتولة
عفوا لبقية الاخطاء للكابة عبرموبايل

شكرا يا الهادي على المجاملة و الجمال في عيونك انت يا جميل

يا يوسف مشكلتنا مخزنين في ذاكرتنا صورة الشرطة السودانية المتعسفة و المرتشية والتي نردمها بالحجارة في المظاهرات وهي ترد بالبنبان و العصي التي نفضل دائما حل مشاكلنا بعيد عنها أضف كذلك الصورة السيئة لجهاز الأمن التي تجعلنا نتعاطف مع كل معتقل باعتباره بريئ و مظلوم وربما بطل!
ثم لا تنسى فكرة الكفيل و عقد العنصرية و الهاوس نيقر وما إلى ذلك, الفلاتر دي كلها هي المشوهه المنظر ومخلية الناس تشوف صورة سلبية
شيل الفلاتر دي كلّها و اتناول الصورة البسيطة المجردة بدون جنسيات القلتها فوق (شخص يساعد الشرطة في القبض على شخص آخر هارب منها ) و قولي هل لازلت ترى في الأمر تعــــرصة او هناي فكري؟

Quote: شخص يساعد الشرطة في القبض على شخص آخر هارب منها

سلام للكل

يا محمد البشري التحية ليك و لموضوعيتك و نظرتك الإيجابية رغم إختلافي معاك

مساعدة الشرطة عمل جيد و لكنه قد يكون أخرق لو تم بدون طلب من الشرطة و بدون توفر معلومات كافية عن الشخص المُطارد لمن يريد المساعدة

افراد الشرطة مدربون على التصرف الذي يوفر قدر من الحماية لهم و لمن حولهم في مثل هذه المواقف و ليس من الحكمة أبداً الإندفاع لمساعدتهم بدوافع مثل الشهامة

كما أنه ليس من الحكمة أبداً تقديم مساعدة لأي مهني (طبيب، مهندس، محامي، قاضي) أثناء أداءه لعمله دون أن يطلب هو ذلك و دون إلمام كافي بالظرف و نوع و كيفية المساعدة المطلوبة

هذا بغض النظر عن جنسية المهني او جنسية الشخص محل المساعدة او جنسية الشخص الذي يود المساعدة

هنالك فرق بين الشهامة و الشلاقة

بمناسبة الشهامة و نظرتك الإيجابية للواقعة أهديك أبيات صلاح أحمد إبراهيم

الشعب الحر الفعله بسر
آب لحما مر
في الزنقة أم لوم قدام باينين
البسمع فيهم يا أبو مروة
بي فرارة ينط من جوه
يبادر ليك من غير تأخير

أتمنى ان ينتقم الإخوة الأثيوبيين بزر شارب البلحين ولابع المهرين في أزقة غبيرة زرة كلب في طاحونة ويمكنهم الإستعانة ببربار لمعرفة من أين يتمون الحبرتجي

في البداية لمن قريت الخبر وبعد داك قريت التعليقات
اتعاطفت مع السوداني الشهم الذي ساعد الشرطة السعودية
في القبض على اثيوبي مجرم تطارده الشرطة ...والشرطة لا
تطارد في الشوارع سوى المجرمين..وقلت ان السوداني فعلا
يستاهل التكريم والاشادة لهذا العمل البطولي وهو الامر الذي
سيؤدي الى تحسين سمعة السودانيين في دول الخليج...
ولكن...
ولكن بعد ما قريت قصة الفلم الحكاهو سيف الدين فضل الله
عن البطل ماندينقو غيرت رايي ..وقلت في نفسي الشلاقة
شنو في السوداني الغبيان ده ..ويتدخل مع البوليس ويطارد
واحد اثيوبي وبدون ما يعرف مطاردينو لشنو....ومش احتمال
يكون سوداني لان هناك ملامح شبه بين السودانيين والاثيوبيين
وخصوصا من بعيد....واتفقت مع المعلقين الذين انتقدوا تصرفه
والذي كان يبدو في البداية ايجابيا ولكن بعد التمحيص والتفكير
في فلم مامدينقو بدا التصرف سلبيا...
والله يديكم الصحة والعافية

الاخ الهادي سلام عليك وعلي ضيوفك

تصرف ارعن من السوداني وهسع تلقاهو ما طاردو زاتو يكون الاثيوبي المسكين جاء
جاري بالقرب منو والسوداني وضع رجلو شكل شنكل والاثيوبي ضرب الارض وبعد
الشهادة التقديرية دي هسع تلقاهو سارح بالناس

يا ود البشرى هسع لو الاثيوبي دا في ملاوة السوداني دا ليهو لو وقع كسر رقبتو
ومات هل الشرطة السعودية كانت حتكرمو ؟ والله ينكروهو حطب . الشلاقة ماحبابا

سلام اخي الهادي و سلامات لضيوفك الكرام
تعرف عندنا هنا في امريكا لو حاولت تساعد الشرطة و هي تطارد شخص ما،
ممكن جداً تتم محاكمتك بتهمة التدخل في عمل الشرطة و تعريض حياتك للخطر،
كل الشئ الممكن تساعد بيهو الشرطة هو انك تنسحب من منطقة المطاردة لمكان آمن
و تترك قوات الشرطة تشوف شغلها

Quote: عُثر بحوزته على ثلاث قوارير مليئة بالعرق المسكر جرى تحريزها

الأثيوبي المسكين ده احتمال كبير كان ماشي يعمل دليفري لي قعدة كاربة بتاعة سودانيين،
اها زولنا الشليق ده لا رحم لا خلى رحمة الله تنزل

شكرا يا حافظ على الإهداء اللطيف ونردّوا ليك في السمح إنشاء الله :)

تعرف يا ود الباهي أنا سعيد أن النغمة تغيّرت وصارت لوم السوداني على (شلاقته) التي أقرأها شهامته
فا الشلاقة افضل مليون مرة من التـــ############ة و من كونه حقر بالحبشي إرضاء للكفيل السعودي أو السعي للمكافأة المادية
على الأقل الشلاقة ما فيها تجيير لدوافع الرجل و تحفظ له فرضية أنو تصرفو نبيل و ايجابي رغم شتارته