يا خوانا النفس الحار ....في شنو!!

06:46 AM December, 29 2016

سودانيز اون لاين
كمال حسن-Germany
مكتبتى
رابط مختصر

هذا البوست ليس له علاقة بالسياسة
موش لأنه السياسة ما مهمة
ولا إنو البشير و عصابته الفاسدة ما بيحتاجو مننا كل حرف يوجه ليهم
وإنو العمل التثقيفي السياسي لا يقل دورا عن النزول للميدان والمشاركة في العصيان
لكن القضية المهمة
أنا شايف أن البعض يدخل بعض البوستات بحكم مسبق وبخلفية معينة
بعض الناس يكتب بوست - مثلا - في الشأن العام
ويقول كلاما مهما فيه نفع للوطن والمواطن
فيأتي آخر..... يلوي أعناق كل الحقائق التي تعرفها
ويسوق كل المبررات التاريخية والخفية لصاحب البوست .... وبي نفس حار جدا
فلا يستفيد الوطن ... ولا المواطن
فاااشنو
لو اتذكرت إنو في يوم من الأيام المنبر ده حا يتسوّد ..... عشانك
وإسمك حايكون معلق فوق
وناس كتار - حينها - حا يدخلوا بوستاتك وحايقروا مداخلاتك
فإذا إنت داير الناس دي من جوه قلبها تدعوا ليك
وتحس إنها إفتقدتك حقيقة
قبل ما ترد أو تتداخل مع أي من الناس الإنت (مكجنهم) ديل ....
فكّر...
مداخلتك دي هل هي متناسقة مع ما تحملو من مبادئ؟؟
والله ...
(عَينَ السُّخْطِ تُبْدي المَسَاوِيَا)

طبعا أصصصصصلا ما خذلتو توقعاتي
المشاركة بالردود في سودانيز أونلاين يحكمها عاملان
أولا الشللية
ثانيا الضدية (يعني القاعدين يحدروا ليك)


ناس النص الزينا ديل
لا عندهم شلة
وكمان لا بتاعين مشاكل ولاعندهم عداوات

عشان كده ما توقعت مشاركة
وده حا يكون بوست الرجل الواحد
برااااااي
أضقل علي راحتي
وأغالط روحي
واصفق لي لعبتي الحلوه
واضحك لي نكتتي الحا أسمعها لأول مره

يا كمال ياخوي
الهتيفة في المنبر بقوا اكتر من الناس الجاده
معظم البوستات مفترعة من اصل بوست واحد
والمديده حرقتني فتحت بوست جانبي
وهلم جرا
وشايف كمان في ناس واجعهم الحاصل
وناس زهجت وقررت المغادرة
في رايي دا بخدم مصلحة النظام
العاوزة تشغل الناس بي مواضيع انصرافيه وعاوزة المنبر
يكون عبارة عن نبز وشكل وشيل حال
وبجيك اورك الناس المحترمة القاعدة تكتب كويس
وتفيد وتستفيد
في النهاية انت اكيد عندك قناعات
تحياتي

Quote: في رايي دا بخدم مصلحة النظام العاوزة تشغل الناس بي مواضيع انصرافيه وعاوزة المنبر يكون عبارة عن نبز وشكل وشيل حال

حبيبنا صادق ميرغني، تماما ده الحاصل
إذا سلمنا إنو تشتيت الكورة ده قعد تعمل فيهو الحكومة فوق راي
(بالرغم من إني ما بتخيل الحكومة بالذكاء الشديد ده، وما عندها فهم قدر ده)
لكن بعض المحسوبين علي المعارضة هم أشد ضررا على المعارضة نفسها
ومساعدة للنظام من جهادهم الألكتروني زااااتووو
ياخ والله ديل يكرهوك المعارضة زاااااتها
لت .... وعجن ..... وكضب .... وشلليات ..... وشكل ....
إساءات .... وتخوين لي بعض
ليهم حق بعض الناس تزهج وتغادر المنبر

لو ما الناس دي ختت الكورة الواطه
وبنت جسور الثقة في بعضها البعض
واقتنعت إنو بناء الأوطان يتتطلب عمل جماعي للقوى الوطنية كوللللها بمختلف ألوانها
ومختلف مسمياتها
إذا ما عملت كده فليبشر بطول سلامة نظام الإنقاذ
ولتبشر كروشه المنتفخة بمزيد من الإنتفاخ

سلام
وكل عام والجميع

بوست بناقش موضوع مهم

اعتقد ان المسالة لها ارتباط بثقافة الانسان السوداني
نقاشها وتناولها بشكل مكثف سوف يظهرها اكتر ما قد يساعد علي ايجاد حلول لها٠

اتمني انو في البوست تناقش في صورتها العامة الظاهرة هي ظاهرة مجتمعية اكيد ستنعكس في مجالات عديدة و السياسة ليست استثناء ٠
اعتقد انه الوقت المناسب لتناولها ونقاشها٠


ودوورد

Quote: اعتقد ان المسالة لها ارتباط بثقافة الانسان السوداني نقاشها وتناولها بشكل مكثف سوف يظهرها اكتر ما قد يساعد علي ايجاد حلول لها

مرحبابك حبيبنا حامد
إلى حد كبير أتفق معك فيما ذهبت إليه أن المسألة لها ارتباط بثقافة الفرد السوداني
والتعميم طبعا بالتأكيد فيه بهتان لعدد مقدر من السودانيين، إلا أن هناك من الطبايع البشرية للانسان السوداني - كذلك بلا تعميم -
ما يجعله محترما ومقدرا بين كثير من أقرانه من الدول التي من حولنا
من بين تلك الطبايع إحترام الغير و اثارة الآخرين على النفس
هذه الطبائع قد تختفي عند قلة حين تتوفر عوامل محددة منها الإنغلاق وحيدا في غرفة من خلف كيبورد وشاشة كومبيوتر أو (Nickname)، ويعزز هذا العامل
الإحساس بامتلاك المعلومة الكاملة، غير منقوصة، وبالتالي أحقية الحكم على الآخرين ثم التحرر من القيود المجتمعية فيسب البعض الآخرين طالما
أنه لن يقابلهم، أو بإعتقاده أن المسألة كلها تنتهي مباشرة بمجرد (اللوق آوت Log out ) أو إغلاق جهاز الكومبيوتر (أو الموبايل).
إمتلاك المعلومة عبر شبكة الإنترنت، هذا في إعتقادي أكبر مصائب هذا العصر، إن إيمان البعض بقدسية المعلومة المتحصل عليها من شبكة الإنترنت هي
أحد أسباب تصاعد الخلافات و (النفس الحار)، إن الواقع يوميا يفرض على العاقل أهمية التثبت من أي معلومة يتحصل عليها من وسائط التواصل و محركات البحث أو المواقع
الإخبارية المختلفة، وبالتالي معاملة هذه الشبكة الإنترنتية على أنها وسيط ناقل للمعلومة بشقيها الصحيحة والمغلوطة، إن مؤسسات ضخمةعلى مستوى دول عظمى تعمل
على ترويج أخبارا مفبركة تهدف من خلالها إلى السيطرة السياسية أو الإقتصادية أو غيرها,
كانت المعلومة في (العهد الورقي) - إن جاز التعبير - تمر عبر مستويات كثيرة من التدقيق والتثبت(طالما أنها لم تكن خاضعة لمؤسسات ذات مطامع) بل لجهات رأسمالها
المصداقية، لذلك فإنها كانت أقرب للقدسية، ولذلك فإن الجيل الذي ترعرع في كنف ذلك (العهد الورقي) و يعيش الآن (العهد الرقمي)هو أكثر الأجيال تضررا حيال
التعامل مع المعلومة، ولذلك لابد له من إنشاء مؤسسات تدقيق وتثبت ذاتية، قبل إصدار أي من الأحكام النهائية. من أهم هذه المؤسسات الذاتية هي إستقاء المعلومة من مصادر
مختلفة ومتنوعة، مصادر مع، ضد أو محايدة، والتثبت الشخصي في كثير من الأحيان قد يتطلب بذلا ماديا أو أو جهديا، ولكن في سبيل ذلك تهون المشقة، فمثلا إن التاريخ يحكي لنا عن
المحققين في علم الحديث النبوي كان أحدهم يسافر آلاف الكيلومترات ولمدة شهور على ظهر راحلة تحت ظروف وأحوال جوية مختلفة حر وبرد صحراويين وغير ذلك لكي يتحقق
من حديث واحد ليصحح نسبته عن الرسول صلى الله عليه وسلم أو عدمها، الآن الجهد أسهل والبذل المادي أقل في سبيل التحقق والتثبت عن المعلومة .....
ففيم التكاسل وإستقاء المعلومة الجاهزة التي يريدها لنا الآخرون لشيء في نفوسهم؟

فعلاً النفس الحار في شنو وفي داب منو ؟
وِتويرة النفس فوق كم ؟
وليه الشتائم والسباب ؟
غايتو زمااان لمن كنا بنتاوق للمنبر ده
كان الخلاف السياسي على أشدة
لكن كانت الشتيمة (قوم لف )!!!!
الناس دي الحصليها شنو ؟
الله يهدي النفوس يا اخ كمال